NURSE, BEISEI AIA HLAWH TLEM

Ziaktu: Lalramdinsanga

The Zozam Times, August 27, 2018


Hlawhpun beiseia sorkar nawra nuar an awm thin a, thlabi hlawh tlem te pek ni chunga mipui tana hnathawk thin nurse te erawh tun thlengin an la nuar lo. Rim taka mipui tana nikhata dar 16 dawn hnathawk thin nurse te hian an thawh phutawk hlawh an lak ve theih nan ngaihven leh ngaihsak an phu hle. 

 Mizoram chhunga private hospital-a staff nurse te hi mipui rin phak bak aiin an hlawh a tlem a, missionary rilru pu chunga mipuite tana pen chhuak thin an nih avangin lungawilo nih an duh lo a, nitin khawsak harsa viau mahse an ngawi a, an tuar tlawk tlawk thin. Trained nurses' association of India (TNAI) Mizoram state branch hruaitute chuan private hospital-a staff nurse te hlawh chu a bei tham thu leh an thawh hah ngaihtuahin an hlawh tlem hle niin an sawi.

 TNAI Mizoram state branch hruaitute hnen atanga thudawn danin Aizawl leh Lunglei-ah Private hospital 14 a awm a, chung hospital-ah chuan staff nurse 444 an thawk mek a. Heng staff nurse te hlawh bul tanna hi a in ang lo fur a ni. Supreme court leh Government of India in nurse te hlawh chu thlakhatah Rs 20,000 aia tlem lo pek tur a ni a tih lai hian hospital tam zawkin Rs 7000-9000 vela bul an tan tir laiin, Greenwood hospital chuan Rs 10,500 in bul an tan tir a, court thuthlukna zawm an awm lo.

 Thiam bik thil nei, mi nazawng thawh theih loh thawktu damlo te mamawh Nurse te hlawh hi a bei tham em avangin TNAI general headquaters chu supreme court-ah a zualko thu an sawi a. Kum engemaw zat court-a an buaipui hnuah court chuan nurse te chuan Rs 20000 aia tlem lo an hlawh tur a ni tiin thuthlukna a siam ta a ni an ti.

 TNAI Mizoram state branch hruaitute chuan supreme court in thuthlukna a siam hnuah sokar laipui pawhin state tinah court thuthlukna angin nurse te chu hlawh pek tur a nih thu hi thuchhuah a lo nei tawh thin niin an sawi a, Mizoram sorkar pawh hriattir an ni tawh chungin, state sorkar hian private hospital neitute chu court thuthlukna anga an nurse te hlawh pe turin a la hriattir ve lo thung niin an sawi.

 Damlo te mamawh nurse hahzia leh an thawh hlawh bei tham zia hria hian state sorkar thenkhat chuan an huam chhunga private hospital te chu an nurse chhawrte Rs 20000 aia tlem lo hlawh pe turin thupek khauh tak a chhuah niin TNAI hruaitu zinga pakhat chuan a sawi a. "Delhi sorkar chuan nurse te thlakhat hlawh atana Rs 20000 pe tling lo te hospital regitration chu cancel sakah a vau hial a, Mizoram sorkar pawh hian hetiang ang hian ti ve thei se kan duh hle," a ti.

(Website a fakna awm hi lo click ve ta che!!)

 Nurse hna hi hna zahawm tak a ni a, hna khirh tak mai, mi nazawngin an thiam loh, damlo tawh phawtin an mamawh vek ni si, thih leh dam hril thei a ni a. TNAI hruaitute chuan nurse te thlabi hlawh tlem lutuk chu private hospital neituten ennawn sak thei se an dhuh thu sawiin, state sorkar lam atang pawhhin nawrna na tak a awm a hun tawh hle nia an hriat thu an sawi a. Private hospital-a thawk nurse 400 aia tam te hian sorkar chet hun an nghah thu sawiin, mipuite harsatna ching fel tu tur a ngawih reng chuan an duh nawr nan na zawka an la chet chhuah ve a tul dawn nia an hriat thu an sawi.

 Private hospital-ah hian nurse te duty hun hi shift 2 a then leh shift 3 a then an awm niin TNAI hruaitute chuan an sawi a, hospital 14 zinga a tam zawk hi chuan shift 2 in an then tlangpui thu an sawi a. Shift 2 a thenna hospital-ah chuan chhun lama nurse duty ten dar 8 vel an duty niin an sawi a, zan lamah darkar 16 dawn te an duty thung an ti. 

 TNAI Mizoram state branch hruaitute chuan hospital-a nurse te duty hun hi shift 3 a then nise an duh thu sawiin, shift 3 a thenna hospital-a thawk nurse te chu an hahdam bik hle niin an sawi a. Shict 2 a then hospital-a thawk nurse te chu an hah hle nia an sawi rualin an taksa pawhin a tuar thin hle niin an sawi.

 Chhungkua pawh buaipui hman lo leh mahni pawi pang pawh khawi hman lo khawpin mipui tan tia damdawiina tap chawt nurse te hian an dinhmun ngaihsaka ngaihventu hi an mamawh em em a. TNAI hruaitute chuan Mizo nula leh tlangval nurse zir chhuak an tam chho zel chung hian an thlakhat hlawh a tlem avangin ram dangah hnathawh tur an zawng zel ang tih a hlauh thu a sawi rualin chu chuan nurse indaihlohna nasa taka a thlen anga tun aia harsatna kan tawh belh a hlauh thu a sawi bawk.

( Ziaktu phalnaa chhuah chhawn a ni e.)