PAWNGSUAL RAWN KA NI

(true story)

6th Nov, 2015

Vanduaina ka tawh lai hian Class  XII zirlai ka ni a, hemi ni tlai hian kan school bang chu kan thiante nen kan haw hova,  Chanmari 'W' kawipui ah chuan kan in bye bye hlawm a, kan in kawng hi a fal deuh a, mahni a haw thin ka ni a, mahse ka nitin kawng a nih avangin ka hlau lemlo. Chutia mahni a ka kal lai chuan ka hmaah hian taxi pakhat hi a rawn ding a, mi pahnih mask vuah hi an lo chhuak a, pakhat zawk chu Sa tha lam deuh, sang vaklo, Tshirt eng(yellow) ha a ni tih ka la hria, an zung dawn emaw ka tia, han kal hel mai ka tum chu min manbet ta thut a, taxi ah chuan min nam lut nghal a, taxi hnung lam seat ah chuan ka hmai an nawr si a, ka hmui leh mit an tuam a, ka kut a hnung lamah min phuar bawk a, mi pahnih te chuan chak takin ka ke lam leh ka lu lanah chuan min manbet tlat a, taxi driver chu tlan turin an hrilh a.

 Au thei ka ni bawk si lova, ka theihtawp in ka tal a, pakhat chuan chemte in ka nghawng ah a rin a, "i tal leh chuan i pumah ka vit ang", a ti a, ka hlau em em a, ka rilru in ka tawngtai nasa mai a.

 Khawilam nge kan pan tih ka hrelo, ka hmai chu motor seat ah an nem beh tlat avangin ka thaw a chham tep hial a, thui tak kan tlan hnu chuan taxi chu a ding a, ramhnuai ah kawng thlang lam ah min hnuk thla a, tlan chhuah ka tum a, pakhat chuan ka biangah na takin min beng a, ka beng(ear) hi a kiu vawng vawng a ni. Ka tal leh deuh chu pakhat in ka dul a min hnek leh chawrh a, chuta tang chuan engmah ka hre tawh lo. Engtin nge min khawih reng ka hrelo.

An hmel ka hmuh theihloh avang leh engmah hrelo a ka awm avangin ka nunna min zuah mai mai niin ka hria. Thimhlim ah chuan kawngsir ah min hnutchhiah a, (chulai hmun chu Falkawn lam road a ni awm e) kawng a kalten min lo chhar a, ka chhungte min zawnchhuah sak a, damdawiin min panpui nghal a, ka serh chu nasa takin a hliam a, thi a chhuak nasa bawk a, ka pum min hnekna chu a na em em bawk a ni.

Ka chau em em a, Police Station ah FIR kan thehlut nghal bawk a, amaherawhchu kha misual pathum te kha an hmel ka hre lova, taxi number ka hre bawk si lova, mi pathum an ni tih bak anmahni zawnchhuah nan sawitheih ka neih loh em avangin vawiin ni thleng hian hriatchhuah an la ni lo a ni.

He thil thleng avang hian hun rei tak chhung chu Gynea doctor in min enkawl a, tun thleng hian harsatna ka neih phah a ni.
Ka chung a thil thleng avang hian ka nun a buai vek a, ka rilru ah zirlai a lang tawhlo, ka hlau a, ka dawi em em a, mipa hrim hrim kha ka hlau a, mahni pawhin ka tla hrang ngam ta lo. Kum khat tal tawp kha chu min nghawng  na em em a ni, Cl-XII ka fail phah a, ka zir zawm ta lo.

Kha mite pathum khan ka chung a an thiltih in ka nun a nghawng nasat zia hi hria sela an nunrawng em avangin engahmah an ngailo maithei, mahse fanu/farnu te an nei ve ngei awm si a, an chungah thleng ve ta sela, an rilru chu a na ve ngei ang le.

Keipawh ka pa te leh ka unaupa te hi an rilru a na asin, anmahni kha hria sela chu an ngawi mai mai bik hauh lovang.
Anmahni kha hriatchhuah ka chak a, ka la ngaidam lova, ka ngaidam ngai hek lovang. Ka tawngtai naah pawh hriatchhuah an nih theih nan ka la chham tel reng a ni a. An phutawk hremna hmu sela ka duh a, amaherawhchu hriat chhuah dan kawng a bo em avangin tih theih kan nei lo a ni. Mahse engkim hretu Pathian hian anmahni kha a hrechiang khawp mai, ka aiawh hian phuba min laksak hi ka ring tlat a ni.

Kum hnih leh a chanve a liam tawh a, ka tan chuan nimin ang mai kha a la ni, ka damchhungin kha thil rapthlak tak kha ka theihnghilh thei tawh lovang.

(p.s; khami te 3 zing ami khan he thu hi in lo chhiar ve hlauh maithei, keichuan zawnchhuah ngaihna reng che u ka hre lo, mahse nangmahni hretu che u chu a awm a ni, A kutah ka hlan tawh che u a ni. In damchhung hian vawi khat tal inchhir a pawi tihna nei ve turin ka duh che u a ni. Tu chungah mah ti leh tawhlo bawk ang che u)

(Hmingthup)

[ WhatsApp kawtthler aṭangin kan chhar a, kan han dah ngawt mai a ni e. A ziaktu credit kan pe thei lo hi pawi kan ti. admin@tleirawl.in ah min han hrilh thei ula kan va han lawm dawn tak em! Tin, website dangah dah a nih tawh chuan source kan tarlan theihnan min han hrilh bawk dawn nia. Mi pawi kan lo sawi a nih chuan remove kan inhuam reng e. ]