THIMIN VAR MAWIZIE A SUKLANG

- John L Pulamte

Sûm dumin malsawmna ruotui tamtak a paia, sûm vâr ruok chun ruotui mal khat khawm a pai ve nawh. Sûm chu a pik po leh ruotui a pai râwna, nisa lum taluo ding laka khawm mi vêngin deihlim inhawi tak a mi siempêk hlak a nih. 

Chuong ang bawk chun mihriem hringnun khawm hi beidawngna sûmpui pik takin a mi bâwm nasa po leh mihriem ta dinga a mangkaina/mhatna tamtak a lo um hlak a nih. Tuorselna, hrietthiemna, sûngtieng mit varna le thil mha tamtak tiem sênglo a mi pêk hlak.

Ei tuornaa inthawkin tuorselna le hrietthiem theina ei hung nei phaa. Ei natnaa inthawkin damna hlutzie ei hung hriet suok phaa; ni danga pângngai taka ei ngaihai khawm kha Pathien kuoma lawmthu hrilna ding vawngin a hung inchang ta hlak a nih. Chu chu a nih sûngril mit varna ei ti chuh. Mihaiin ienga an ngailohai dâm kha eini ta ding chun lawmna ding ruok a hung ni tah a. Iengkim el hi ei hmu thar sur vawng el a nih.

Vân thla le arasihai khawm khi thim a sa po leh an mawina a sukzuol hlak. Christmas le kumthar lawm nikhuoa Biekin cheimawinaa ei hmang arasi lim de zawk zawka ei sithai po po khawm hi zân thim hnuoia naw chu an mawina an insuo thei nawh. 

Chuong ang bawk chun mihriem hringnun khawm hi harsatna sûmpui pik tak kâra naw chu Pathien hmêl hi an lang mawi zo ngai naw a nih. 

Vadungtui khawm hi ruo a hung sûra sie deu but buta a kuong liem vâng vânga a luong ta chun a hnâr tienga inthawkin nga le thilhring tamtak fâk ding a hung fen sa hlak a nih. Tui dâwn thei hiel khawpa a vâr chun nga le thilhring hmu ding an um ngai meu nawh. A tui an hnawkin a bal po leh fâk ding a lo kawl râwn ting el hlak. 

Chuong ang deu chu a nih mihriem hringnun khawm. Harsatna vadungtui inhnawk le bal takin a tlâkbuok tahai chu mihai ta dingin fâk  an tlinga. Annia inthawkin fâk le dâwn ding a pût suok hlak. Pathien ropui nâwk zuolna ding chauvin ei hril ta mei mei nâwk inla, uongthu inchang bawk naw sien. Kei ngei khawm hi harsatna(accident) namênlo ka tuoka inthawk khan testimony le sermon mihai ta dinga fâk ding keia inthawkin a hung pût suok ta meu el a nih vawisûnni chenin. Hieng ang thil ka tuok hma khan chu Pathien thu iengkhawm hril ding keia hin a pût suok ve ngai nawh; Isu a thia a tho nâwk tah ti thu chauh naw chuh.

Mihai phîngmâm ei va hrietthiempui theina ding chun eini ngei khawm fâk ding nei loa bu nghei rinumzie hrie thei dingin ei tuor hmasa zet a ngai a nih. Lusûn rinumzie chu a tuor tahaiin an hrieta, chuleiin lusûn hnêmtu ding chun a tuor tahai bawk hi fâk an tling hlak.

Var mawizie hrietu chu zân thim hi a nia, midang harsatnahai va hrethiempuitu chu a lo tuor tahai bawk hi an ni châwk hlak. 

Chuleichun harsatnahai hi iengkim ei hrietthiem theina ding le ei hmu fie thiem theina dinga mit varna mi petu dinga Pathien mi ruotpêk ngei an lo nih tia lâwm taka pawm theituhai chu mi vângnei tak an nih.
Lalpa’n a thu mal mi sawmpêk raw seh.