( Sad Love Story )
By : Hmarramthar Sanate
Columnist, tleirawl.in
Kahung tleirawl ve dek dek a,ka sakhmel leia buoi tawk khawm an um ve nuol,ka pieng khawm insit a umnaw hle bawk. thlangval țhenkhat hai lem chun i pieng vangnei biek tawp siemtun nang hi chu asiemsuol che nienga ti,ițha khuomkhêl biek em dam anmi ti hlak.
Ka hming chu Mampui ani a Pui ti'n anmi ko hlak. Kahung nunghak ve țan tah a thlangval ami kher tu khawm an um nuol,sienkhawm lekha inchuk kala ni lei in tukhawm ka uksak ngai nawh.Amiruok chu an mitmei ka veng lei in tuelkhawm țawngbau țha'n ka biek hlak. Kanun annem a kazai a dam bawk tlangval hai in anmi nel tawl em em a,ka hmel alo țha ve bawk leh anmi zat nasa em lei in,kan chukna tieng ka bahla pha rawp hlak.
Ni le thla ahung inherliem pei a keikhawm chu chuonga ngaizawng uksak naw tawp chu a thei biek ta nawh.Ka lungril a buoi ta khawpel a,kei hi mi hausa nau mal neisun kani a,ka nu le pa haiin anmi duot hle a,kum 16 kani ta a chu naupang tesi angel in ka nu hai bula chu kala khawsa hlaka,anni khawma naupangte biek takin anmila biek hlak. Chuonga hun ahung liem pei chun ka hringnuna hin khuonu malsawmna dawng dingin kahma bula chun ami tung ngha ta ruon ela,sienkhawm ka ditthlang na alani a iengam ka thlang ding ti ruok chu kala chieng biek nawh.
Tlangval ruol hai chun kan chukna tieng anmi sukbuoi takzet a, sienkhawm thaw dan ding rak um chuonglo abuoithlak thei khawpel,lekha ka thiem bek bek naw a a hmingin 2nd div adam ka passed ve țawk țawk hlak,ka nu le pa haiin anmi hal nasa thei khawpel a,anmi hmangai lei ani ti chu ka hrietchieng hle.Hun aliem peia pawl 12 kazawm ding kum chun ka suongril a hmangaina thienghlim taka ka vawng zing hlak chu ahung ințhanglien ve pei a,a ruoka pai sawng zing dan a um biek ta hlawl nawh,kan Junior hai pakhat hi dit ruok deu kanei a,iengtiklai khawm kalungril ngaituona sukbuoi tu khawm ahung nipha ta hiel a,kei hlak chu nuhmei kani si ka hmangaina biethu zuk inhlan tawp ding hlak chun amawi chie sinawh,lungawp inkai in ka um hlaka,nuhmei dangin an biek met le kalo theida hman pei bawk,ka umdan hi ka hrietthiem biek ta nawh,ka hmangai em lei nidingin ka ringa,ama hlak chun ami uksak naw si chu baka kan Junior hai ania college țin hun a bak inhmu nading hun a umnaw a,kan țin char chun U Jeje hmu dingin inhmaw deu in ahma kalo inchu hlak.Chuonga hringnun ka hmang mek lai chun kalungrila thil pakhat ahungin lang tlat a,keikhawm min anmi dit a anmi hmangai ve thoa ka ngaisak ngainaw a,tuta kalungril put ang hin ami dit tu hai kha anlo umve ngei ding ana ti'n.
Amiruokchu ei ditlo zawng hai deu in anmi dit chu zuk dit tawp chu thil harsa ve deu ani bur.Keia hmangaina hi U Jeje ngei hin chang thei sienla chu kaduthusam ani a,U Jeje lungril kahne theina ding chun țhang nasa deu a kalak angai a,ka thil tum laia pakhat ani ve bawk.Kan chukna chu inthlada el lo in kabei fan2 a,U Jeje lehin kan class an angnaw lei in,tuta țum final ahin ka pass vei chun a kum nawk chu ka pa hai in vai rama inchukzawm dingin anmi tir ngeingei ding ti ka hriet lei in fail ngei ngei katum ta lem a,asan chu U Jeje kahmu thei tanaw ding lei ani baka,kan class ahung in ang ta chun chance țha nawkzuol kanei thei a,ama hi ieng ang mi am ani? ti khawm kala hriet naw a,khawlaia um hlak am ani ti khawm kalahriet nawh.Kati ang ngei in kahung failed tah a,ka pa han anmi hal ding ti chu nakawr neinaw lang khawm hrieng katih,sienkhawm U Jeje lei lieu lieu in ka pa hai mi hal ding khawm pawi kati naw a,Hmatieng beiseina nei pum in ka pa hai mihal ding chu ka hmasawn lem tum a nih.Ka pan ka result ahang hriet meu chun ami hal nasa khawpel,mitthli thla pum tak meu in ani ami hal,kapa chu lekha thiemlo ani a,a taimakna lei le a tumruna lei a tuta mi hausa ngirhmun a ngir hi ani lem a,an ret thiemin atik khawm asie hle bawk.Amiruok chu mi pasi tawpkhawk hai chunga ruok chu a hmangaina hi mi po po hmu dingin asuklang nawksi hlak.Kum ahung thar a College chu kan hang kai țan nawk ta ngei a,ka beisei ang takin U Jeje le chun kan hung innel pei a,a chanchin dam kan dawn ta pei a,ama hi mi pasi nau ani a anu le chau a um an nih.Thlangram a inthawk a apa'n a boral san lei a hung inpem an nih.
A chanchin kahang hriet chun ka hmangaina chu a zuol sawt a,sienkhawm ruol ang chau in ami en si kalungril hi hre sienla chu mipawm ve el dingin kahang ring a,a chang chun ami hmangai ve ang deu in ka hriet hlak,asan chu kan classmate hai pasal le dam kanin biek a annaw le kaninthlawn lai dam amilo hmu phat le a zinga amin dawn zie kher hlaka, asan um ngei ding chun ka ring,chulei in amitmei ka veng hlaka ahma bula lem chu pasal khawm ka biek ngainaw a umdan țha amin chuktir anga kangai a,athil mihril hai chu thilțha ningei dingin ka ring hmak,kata dinga țha naw ami hril ngainaw bawk amiruok chu a buoina tak chu,ienglei a ami care ve tho si a hmangaina Biethu hi amin hlan elnaw am ana? ti hi anih.Kahlimna le ka lawmna,khawvel scenery sukmawizuol tu U Jeje ka hmangai zie che hi i hriet ve tho in karing tah,sienkhawm imi uksak ve sinaw,Phulo lungdi katawng am ani ding maw? Hrietthiem zai rel el tala U Je
Nitin a sakhmel kahmu ringawt khawm kalo hlimpui ve em em a,nikhat chu college a U Je ngaizawng inei ta'm? ti'n kandawn a U Jeje chu an nui ringawt a,naupang ila nikha ngaizawng tieng pang chu la hril naw rawh ami ti a,kei chu ka nu le pa haiin anmi duot baka nau mal neisun kani lei in,kan sêk khawpel a naupangte ang elin anmi sawisak hlak reng anih.Ka suongril a Hmangaina thienghlim tak le duot taka ka vawngțhat zing chu ka taksa ințhang ruolin ahungin țhang lien ve pei a,Hmangaitu chu a mamaw vieu ta ni'n ka hriet,sienkhawm hmangaitu tawng ding ahmuzo ve sie nawh,U Jeje bawk kamel nawk zau hlak,ata ding chun kaluongliem ta takzet a nih,kata ding chun Khawvel parmawina tinreng khawma an tluknaw a,sienkhawm ata ding ruok chun mawina reng kanei ve sie nawh,ka hmangai em lei in kabei asuk dawng hlak a nih.Zankhat chu suongtuona rama ka chenga,ka khuolzin na In maksan a,U Jeje hai runlum bela sieng kanlawi phat chu,ata dinga Chunu ringum tak ni tum ngei kata,ama ka hmangai ang bawkin Anu/Kanu khawm hmangai ve bawk kata,anrûn sukmawitu ningei dingin dawn kahang suksei vel a,tu hrietlo in invêt angelin kalo innui nawk hawk hlak.
Zing inhma deu in katho a, Chawlni ani bawk leh inkhawm dingin ka thuomhnaw țha le mawi tak tak hai chu ka nawtnam tawl a,Inkhawm ding chun kafe ta a,karing phak derlo in tu ani ti kahrriet ngailo nughak tleirawlte hmelțha var el pakhat le hin U Jeje chu anhungin tlawna,hril kahei ngei ie,kalunglai ruok chu darthlalang kawi her in asun angel hin ana ngawi ngawi nghala,kamitthlie khawm a hnai nghal....U Jeje chu mi bengvar tak le a hun taka țawng nuom chi hi ani a,amilo biek vat vat a,ka uksak rak ta naw kanhai deu mup in ka hriet. Inkhawm kanhang țin a,U Jeje chun kahmel a hlim nawh ti a hriet ningei a tih,an ina leng ding chun ami fiel khiet a,U Jeje le hin kanin pawlna a sawt ta viu a chu,an in a leng dingin vawikhat khawm amila fiel ngai nawh,ken kahung leng ding aw kati chang khawma ami phal ngai naw kha na,chuonga ami fiel nazar a chun phuorlo zet in kazui ve ta a,Lampui a chun U Jeje le a hungpuinu chu an titi mawl mawl a tleirawl tenu chun,U Je kangai thei tawp che ni ahung ti a,U Je hlak chun keikhawm kangai thei taluo che nawm ti'n alahang dawn kir nawk nghal,kava na ngawi ngawi de aw,arukin kamitthlie ahung far kak a,mihmu pal anti kanlau bawk si zuk hruok katum laitak chun U Jeje chun amihung hmu pal hlau a,....Pui iem a ta imit chu asen nasa baka? a hung ti a, kei chun ana a ni e ti'n kadawn vat a.
1km lai kan lawn ta kei pheikhawk sang kabun bawk hla deu lawn chu antak ve khawpel ka ke a kham ta bawk,lamkawi kan thlunga U Jeje hai in kanlo phak ta niding,kei hlak chu kahma tieng kala pan pei U Jeje chun Pui ti'n amihung ko a,kathil ngaituona anril em lei in kalo ngaisak nawh,U Je chun ka ban a amihung man chawt a,amin nuisan char char a,kahlimnaw ti ahriet lei mani ding kakut a chun ami chel sawnga,kahlim pha sawt,lamkawi kanhang luot pei a,lampui sîra In țawp tak le țhalo zet a chun,ami luotpui ta thut el,U Jeje hai in alo ni zing an nawm,hienglawm lawm hi chu kalo ringphak ngai der nawh,Pitar pakhat hi alo uma, bawia ruol ihung nei ani maw? ti'n....kei hlak chun Pi a ruolnu kani kalo ti vat a, U Jeje chun Nu zanting suong ding bufai valan chaw vat kati aw? ati a,kavan zak lawm lawm de aw,,,A nu ni ti reng kalo hriet sie nawh, Pi ti'n kahang ko nawk a,Nu ti a zuk ko chu kanhawk vei leh.Kamawl reng reng ka nu le chau kan um a ti zinga.Ka hamhei vawng a ni e....U Jeje chun bufai inchawk ding chun amiko a,nachu tleirawlte nu le an pahnin kanfe tir ta lem a,chu chu chance țha a la in...Nu tum ani nuhmeite nu kha? ti'n kazuk indawn hmasa taka....ka tarpinu ding chun a pate nau ani kha thlangrama inthawk in ahung inzin vat ani kha ti'n ami dawn a...kava zuk lawm lawm2 lungril napum a um zing kha,kahlim taluo hi khek raka zuk inchawm kanuom hiel ani.hehe.
Sawt raklo hnunga chun,U Jeje hai unau (cousin) khawm anhung tlung ta a,zanting bu zuk suongpek khawm chu kanuom khawpel ana chu kanzak lei in inlawi lem ding chun kalungril kan saikar a,Nu hming bula chun Nu zan khawm alo inthim vang anta ie,ka suong hai bula kahung ding thu ka hril sie nawh milo ngaituo taluo pal anti,inlawi phawt kati aw kahang ti a,Nu hming chun ani ngei chu tie nuhmei ini si a i suong hai lo beidawng pal anti hung leng zie raw aw bawi ti'n țawngbau țha tak chun aminthlaa,U Jeje chun an sekawtrawl chen amihungin thla a,U Je sawlai lamkawi lai chen saw mivan thla tala kati a,ami sel chuong nawh kati ang ngei chun amihungin thla a,lampui chen ahunga akir tawm chun U Jeje thil pakhat hril ding che kanei ani kati a,U Je chun iem anta le mizuk hril tala? ati a,kan suomzo bik ngang ta nawh (ka hmangaizie hun kha chen kalo ip ta kha phawrsuok vawng katum ta a) U Je ngainaw tieng mingai peknaw hram la zuk hril dan ding rak khawm ka hrietchuong nawh,Ka hmangai che kati tawp tah a kan zak em lei in nawdang tieng ka ngha a,U Jeje chun mak ti hmel deu in ami en vung vung a kanzak khawpel....U Je zakmaw khawm imi ti vieu el thei,amiruok chu nuhmei kani lei in ka hmangai na che hi hrilo ding che in tunam ami khap thei an um chuonga?
Pawl sawmpahni ka failed nasan khawm nang ilei lieu lieu a nih,U Je pawl sawmpahni kha pass lang chu maw isakhmel hi hmu tanawng kata,i zuon ngai a hun hmang ding nek chun nang kahmu theina ding che ani phawt chun kapa hai mihal ding khawm ka thlang lem a nih.U Je lunginsiettakin i dawnlungruok chu mi hril ve rawh,iengpo khawm ka chunga iti chu sel chuong nawng kati,imi pawm nuomnaw khawma,mi'n anlo hril hlak damlai lusun anga in ngai kata nel,U Je rapthlak khawm imilo ti el thei ana chu iring ang chu kalo nikher naw el thei,ka hmangai na che hi imi hnawl ding am imi pawm pek ding lunginsiet takin țawngbau khat bekin mizuk dawn tala?...
Jeremy:
Pui ka hmangai che an nawm ana chu ei innei thei chuong naw ding ti ka hriet lei in,i hringnun a kahungin rawl nuomnaw lem a nih,Pui ka hmangai che nawm sienkhawm in insuong ngirhmun le kan insuong chu hnui le van ang ana,i suong hai lungdumtu ka tlingzo naw ding ti ka hrietchieng lei in,nang le karhla a um hi kalo thlang lem hlak a chu baka imi hmangai ve khawm kalo ring ngai nawh a,ruolțha anga imi en khawm kha kalo hlimpui ve em em an nawm Pui....tuta inthawk chu Tawi ti'n ko tang kati che Kahnuoi malsawmna chu nang ngei hi ini,sienkhawm kan insuong harsat zie ihmu ta a imi pawm thei tak tak ding maw?
Kei chun assshhh.....khang kha hril angai nawh U Je hmangainan pasie le hausa a tlierhran nawh.
Kata ding chun ka suong hai le ei kar a țam nasa takin thla sienla khawm nang kata ini a ibul a ka um phawt chun kalung awi em em a tih ti'n ka dawna,ami kuo vawng vawng a vawikhat ami fawp ngawi a fe taraw taw i suong han lohal pal anti che ti'n thlum ngawi in amin thla ta a,kansîr tieng kazuk en le a sangnu te chun amilo enruk niding ahung innui hawk hawk a kavan zak lawm lawm de e....hlim deu in kan intieng kanlawi tah a,pheikhawk sang ka bun a kanfe tienga ka ke puor met sa ani bawk,in kazuk tlung chu ka ke an thîp sep sup a,ka ke puor vel buoipui hman ding kani nawh,hlimna thlarau ka changa invet ang el in ka khuma lukham innem tak chu kuo pumin kan let kan let a,U Je nu chu kamitthla a a cham zinga a thumhnaw hak chun kalungril asuk na khawpel a,țawp tak le an ek țet țut nalai tak chu kamitthla a acham zing,kalunginsiet khawpel kei in hak senglo kanei lai aman hak ding dukdak khawm neizo lo, khawm chu kahma tienga kanu indiktak lani mek ding alani nawk nghal,kalunginsiet taluo a nitina ka pa han kamcherek man dinga tangka anmi pek hai chu kasiekhawl pei a U Je nu ka nu thuomhnaw thar man dingin kasiețha țan tah a.U Jeje hai ina lengkar chu ka nghakhla ta khawpel.
Nu hming thuomhnaw man ding khawm ka siekhawl țeu tah.Kati ang ngeiin Nu hming thuomhnaw ding khawm kanchawk tah a,ka pa bula țha deu in ka hril a,U Je hai ina fe ding chun ka suok tah a,zanting dar 4 vel anri tah,hlim le phuor deu in kahang luot a,Nuhming chu inriktakin alo damnaw a,kahmel ahang hmu chun ahlim taluo a,bawinu i hung ani maw? kabul hnai a hin lahung ta ami ti a kava pan hnai a,ka baksam a tuoi pum chun bawinu,kadam sawt tanaw ding ana i U Jeremy le innei ding hin ka ditsak cheu a iengtinam i ngai a? nang hi chu ifel em a ka mo ni dingin kanhnar ngawi ngawi che ani ami ti a,kei chun dawn dan ding rak ka hriet nawh,U Jeje chu kahang en hmasa phawt a,kahmel hmungamlo ni awm takin an chawr tukver a chun a dâksuok dei a,Nu hming hmel ka hang en chun kalunginsiet khawpel,ni e nu Pathienin rem hung ruot pei ata U Jeremy le hin mila tuorem nawniem ti'n kadawn ringawt a,eh nu i thuomhnaw ding khawm kahung chawipek che annawm ti malamin kaphawr suok nghala,Nu hming chun alawm taluo a,hlimna le lawmna mittui chun abuok a mittui inlengkar pum in bawi ka pienga inthawka ka beisei phak ngailo izar a malsawmna ka dawng hi kalawm taluo ti'n ami dawn a.Sana dar kahang en chu dar 5 lai alo inri nawk der el tah a,inlawi alo hun nawk der tah.
U Je hai ina zuk rieka anu zuk enkawlpek chu kanuom khawpel,sienkhawm kathu a umthei kala nisie nawh,Nu alo inhnu nawk ta khawpel a kanlawina ding ahla ve tham angreng si a,inlawisan nawk el kati cheu aw lo dam vawng vawng rawh ti'n kan thla tah a,Nu hming chun Mama vanthla tala ati a U Je le chun kanpahnin kan suok tah a,an ina inthawk a hla riei kan phak hnung chun hmun ruok pakhat a uma chutaka chun amilan țhung pui a,ami kuo vawng vawng a,ami kei kuon a duottak chun ami fawp vawng vawng a,U Je ka hmangai che kahang ti a,U Je khawm chun Tawi kei khawma ka hmangai che annawm ti'n ami dawn a,U lunginsiet takin mițhe lul naw rawh aw iengpo khawm ka chunga tlung sienla? Pui ka hmangai takzet che nih thina chau naw chun mi țhe lul naw raw seh.ti'n ami dawn hmuk a...hmangai tak hai in duot taka anmihang kuo vawng vawng chu a thlamuong thlak in lung amuong khawpel.In ngai hle inlang khawm in ngai mana inchelsawng thei kanla nisie nawh,U Je Nunu ngaituo lo um taluo tang ati,in mangțha phawt tang eiti aw ti'n ingai hle pum le phallo tak pum chun kanin mangțha ta a,in ka tlung a ka nu le ka pa chun Tawinu khawlam ife le ihung țin intak lawm lawm de? anmilo ti a kei chun pa kan college a ka ruol hai ina kava leng annawm ti'n ka dawn a,ka nu chun bu kanlo faksan el che ani hung fa nghal raw i phieng țam tang ati ami ti a,kafak nghala
Ka pa chun Tawinu ihung nughak ve țan ding anta a,chulei in nughak laia khawlai leng leng hi a țhanaw a,athei chun inah intawm char char hlak ding ami ti a,lungsen țawngbau lem chun anmi hal nawh,kan hnu ve bawk a nih,bu kafak khawp a milim kaziek a,ka imu asuok ta em lei in ka sawl bawk le kazal hadam tah a,hun aliem pei a thlakhat vang ani tah,U Jeje hlak college hung kai ngai talo,ienglei tak am ani ding kabei chu a sukdawng anih,kei hlak kapa hai in ka suok ding anmi phal tabawk sie nawh ava buoithlak ngei el de eh.Chuonga U Je hmel reng reng hmu ding um talo chu,kalungsen ta khawpel a ka ngai ta bawk a sakhmel hlak hmu ding um talo,a zuon ngai in kahun le ni ka hmang țan tah a bu khawm ka fak pei mang ta nawh,zankhat chu kalung asen ta khawpel a vawikhat bek chu amihung hmu ve khawm a awm tat vei le hung hlak hung bawklo kei hlak chu kapa hai in tuol suoklo dinga anmi tina chu kasel ngam bik sie nawh,lungsen deu pum chun kazal tah a,in invat thei talo,sana kazuk bie chu dar 2 alo pel rak tah a,alo inhnu ta bawk le kamit kansiem dier dier a,ka in ang anta ti vel chun ka ke chu kut deitak ni awm takin amihung man a,iengam anta ding ti'n kapuonsil ka hawk a kahang en chu,Nu hming hmel ang put pitar pakhat chun akut deitak in ka ke alo chel ran a,amin nuisan bawk,kați taluo kakhek raka karawl hlak suok dawk zo lo,Pitar hlak chun kakhum mawnga inthawkin kalu tieng amihung pan hnai peia,kei hlak chu ka kut hai khawm kasuk chang thei sie naw mang ang deu in ka uma,bawk insik in amit cheng kur chun amihung en kur a
Kați ta hle chu nienga tih,kazun ka che a ka khek țhawt a,kakhek suok thei hrama,kanu le pa chun inrang takin ka room ah anhung thlânluot nghala thil umzie anmin dawna,keichun Nu hming hmel ang put kher kher a kahmu kha mak kati em lei in,Pitar kahmu thu le ka changtheinaw thu karawl asuok zonaw thu ka pa bula kahang hril mawl mawl a,Ka pan Pipin a hip che ani chu i thisen a chau nienga tih,tulai i umdan hi mak kalo ti hlak reng anih,zinga Doctor eipan ding ani ti'n amidawn a,keikhawm chu kați em lei in ka pahai bul tieng chun kavan sawn ve dei a.Zingkar inhma deu in ka tho a,kavan zun a sana dar kazuk en le dar 3:45am anri a,alan hma em el ti'n kazal nawk a,ka nu'n amihung keitho chun dar 10 alo inri vang tah. Phak tawk takin katho a kahmai hai kaphi fai a kaha khawm kanawt ta naw,mithi dar ahungin ri kang kang a,kalungrila iengdang khawm ring dang kanei ta nawh ka mang ngei kha ataka hung tlung tah ningei dingin ka ring hmak a,kați thar khawpel. kan tukver hi lampui ep a um ani lei in kava dak a,lampui kahang bie vel a,hla taka inthawkin nupui pathum vel chu puondum bi in anhung kahmu a,tuola ka suok a kan sekawtrawl bul ah chun kalo nghak a,kabul zawn anhung tlung chun kalo in dawn a,anni chun kawn venga Khûpa kha athi ani awm e ti'n anmi dawn a.kadam hûiii.
Kan ngaituo neu neua Pu Khûpa chu a tar ta ema Pathienin a hringna alak pek nitang ati kati zo char le inruol in mithi dar bawk ahung inri nawk kang kang a,kanphu zawk a tuta țuma mi chu Nu hming ningei dingin ka ring hmak tah,ți deu dur pum chun kansiem vat vata,U Je hai in tieng chu kapan nghala,inka tlung chun Nu hming chu alo zal a,U Jeje hlak lo um bawklo kamang kha kazuk ngaituo kir le kapang anza bawk si,kan ngaituo veng venga kir lem tawp chu ka thlang tah a,kazuk nghakir le inruol chun U Jeremy'n ka hnungtîng amihung bo thut a,kava zuk inching nasa lawm lawm de eh.Nu hming khawm a zalna khuma inthawkin anperthla naw chau anih.Nuhming ți taluo inching hmel chun ami suknui a,ama khawm ahungin nui sawi a,chu tak chu ka manga amilo innuisan dan le khan an ang char,kannui lai chu katawp hmak a,kan ngaibel lei ningati ti'n Nu hming chu kahang biek ta mawl mawla,U Je khawm chu choka ah tlaisuong dingin a um bawk,U Je bul tieng chu kava pan hnaia thlai hai khawm ken kava suong pek vawnga hme ding maihna U Jen alo zena,kathiem ang ang chun ka suong pek a,kanlawi san nawk tah a,ka nu hai chun bawi vawisun chu mithi pahni lai einei a ei suongin eife ding ani insiem vat vat la ami ti a.
Nu Pu Khûm le tuom anni? ti'n kan dawn a,Ka nu chun Pi Dar le a ti a,amak ngei el an nupa'n aruola anzuk thi kawp tawp el chu,ka mang țha naw kha hithil thlung ding lei hi nitang ati kati neu neua,mak kati chu Nu hming hmel anga kahmu tak kha a nih.Kanfe ta ngei a,an vûiliem chen kan țhanga,kanin lawi tieng lampui a nupui hai titi na a chun Pu Khûma hai nupa damlai chanchin an hril a,Pi Dar chu natna nei zinga um ana mihriem ngaia chu thi hmasa dinga kalo ngai a ata,pakhatnu chun ni e maw....An Monu'n a sawp ema an chawl hadam vat hi ațha lem ani e,Bu nghei chang an ho bawk an Monu'n Ran chawm taka a chawm el anna,an naupa hlak chu thaibawi an nau neisun alani nawk nghal,a nuhmei in țiet ati ta chun thilsuol thaw angelin anthlep dut a anti neu neua. Anti indik reng kalo lunginsiet ve hlak reng a nih Pu Khûma chu pa zaidam tak el ana,an monu'n an chunga athil thaw hai lei in baukhat khawm in adawnkir ngainaw a,Pi Dari ruok chun em em che a,i pasal anu le pa chu inu le pa anni a an thu hril ngaive met hlak tala ati hlak,ahung damnaw hnung chun anta dingin lung-in a intang dei hai sienla inhawi tilem an tih.
Hun aliem pei a U Jeremy le kanin ngaizawng chu ka nu le pa han anhung hriet tah a,a tîr chun anmi hal nasa thei khawpel,amiruok chu țawngbau khat khawmin kadawn kir ngainaw a,ka pa han anmi hal na chu kanza in thawlo dinga anmi ti hai khawm kathawlui ngai naw bawk.Nitin elin ka chausi deu deua,Ka nu chun ka pa bula i naunu i enkawl dan hi andiknaw anih,a taksan a tuor tanaw ni saw,ei nau neisun ani a,a hmangai tak chu daikil kara mi khawm nisienla iem a pawi le? dik taka chu Jeremy saw kei chu makpa dingin kansit bek bek le,Lekha a thiem bawk baka khawthlang sawr țangkai pawl ani ve a,Puo tieng țhatna chau i en chun i thawsuol lem naw ding maw? ti'n Ka nu chun ka pa an dawn a,ka room a inthawk chun kalo ngaithla kar a ka har huoi...
Kapa:
Innei lo ding tina ni chuonglo a aw,anla naupang ema chu baka,anu le pa meu in an hrietpui a anzil naw chun zalentaluong anta hmanglo lo hi chawk suok pal anti,khawthlang mitmei khawm veng angai ve hlak annawm.
Kanu:
Nilem chu ani tho lai zingin,naupangsi anni ta naw a,ithu hril hai zawmlo anei ngai chuong naw kha ti,chulei in nang A pa ini a țha deu in ama bula hang hril lem la ațhanaw ding maw?
Kapa:
Vako tala thil umzie chu hriltlang nawmei niem,nang anu inia a chintêt an thawk i enkawl na hnuoia seilien ana nangin iti dan dan anel annawm.
Ka nu chun amihung ko tuma kei chun ka pa le anin biekna ka hriet lei in,hlim si in kala nuor pek vel a,kanu chun ți naw rawh i pa bula thil umzie kahril vawng ta kha i pa'n thil hrilnuom che anei a ni,ami tia kan common room ah, ka pa bula chun kava fe tah a,ka pa chun thu țha deu in amin fuoi a
Kapa:
Ei ring hma in ngaizawng khawm ilo nei der el ta a,ilan sêk lawm lawm vei le ngaizawng nei ngam ding che khawma kalo la ring naw che a,a țha e mi tu khawm Pathienin Nuhmei Pasal innei dinga ami siem vawng eini a chulai zinga chun,hringnun hmang dan hi fiemkhur a țul takzet a,vawikhat changsuol ta chun Rangkachak Arâwn (Peacock) ang el hi ei nih.Rangkachak Arâwn khawm mitin inmawi anti hle a chu a meihmul mawitaka ahang khai kang sukpar hin a mawng a hliem zing anih.Chulei in fiemkhur thluka țha a um nawh a,ei taksa hi thienghlim takin ei vawng ațul takzet ani Pathien in eini si a.
Kapa:
Jeremy hi i hmagai tak tak maw?
Kei:
Aw ka hmangai tak tak ani pa.
Kapa:
Anle aman a hmangai ve tak tak che am?
Kei:
Aw ama khawma ami hmangai tak tak.
Kapa:
Um a țha e kum tawp inin exam na resul hung suok phawt sienla inin hmangai tak tak ani si chun intuorem vat inla țhang ati,A nu khawm a chau tasi a,an nufa chau a um an ni bawk,țhangpuitu an mamaw ta a chulei in Pathienin rem hung ruot ata innei inta,inchuk zawmzing bawk inta sum chu keini i pa hai kanla dam suong chu lungmuong takin um zing hlak rawh.Kan bula um zing theila chu kan nuom pa tak ani a,nang chau nau kannei che a,sienkhawm nikhat chu pasal ila nei tho tho ding ana,kanta ding chun mikhuol ang chau ini a chulei in naki huna kan hmuphak naw na rama dam pasal imi neisan chun inu le hin kan ngai taluo ding che ana Jeremy le sawn intuorem inla ama khawm khawvel dana chu Pa bo ani tah a,chulei in ka naupasal dinga Pathien i ruot khawm alo ni el rawi maw.Zinga valeng la bu fa dingin va ko la ţhang ati ie, ti'n ami dawn a.Kava hlim ruk ngei el de aw,khawvel mi tamtak hai chu andit khawm thlang theilo in an suong hai dit thlangna lei le rosum lei damin an nau hai anin nei lui tir hlaka,kei ruok chu ka hmangai tak an nau nûn a dit tak chu asuol tam a țha tam lawm taka mipawm pek thei tu Pa kanei hi ahlu in ava ropui ngei el de aw khawvel a Pa fel tak kalo nei hi ahlu in a ropui takzet anih.Pa ka nu le hin ka hmangai takzet cheu a nih.Innui var var pum chun ka room tieng ka thlânluot a,ka khum chunga kai in ka lukham innêm tak chu ka kuo a.
Zingkhuo var ding ngawt chu ka nghakhla tah.Zingkhuo ahung var a ka pa hai mi ti ang ngei in U Jeje chu kava ko tah a,U Je hlak chu anzak tlat a ava buoithlak ngei de e,a tawpa chu kanfe tah a,bu fak khawmna kan nei a ka pa chun U Jeremy atiti pui a,nun țha taka um ding le thil ramtin an titi hnung chun amin lawisan nawk tah a,kum tawp result ahung suok meu chun hlimna ding bawk,Pa hai thu awi hi chu alo țha in a tawpa hlimnan an chang nawk hlak,U Jeje le chun 1st div veve in kan passed a,kapa chun ami lawm taluo a amitthlie khawm athla hiel anih.Aizawl a ka nupui hai in anmi ko a ka passed lawm dingin,kafe ngei ngei ahung ngai tah a,karhni sung chau U Jeje kazuk fehmang san ding chu ka phuor bek naw khawpel.Ka pa hai chun bawi nang i khat chau in fela nel tuta țum chu i nu le hin in lo nghak kan ti ami ti a,keikhawm chu a sawt chuong raknaw ding tho ti'n a pawi nawh kati ve ela,kafe hma chun U Jeje bula kava fe phawt a,kanzin ding thu kava hril a,ama khawm chun thluong deu a fe dingin amilo ti a,ami ngai ding thu khawm chu a hrilsa bawk. Hmangai tak chun ami fawp a kafe san tah a......
JEREMY
Ka tarpu pa ding chun ami ko a,kava lenga kum nawk a Vai rama inchuk zawm ding thu vel chu ami hril pui a,thil ramtin kan hril zo hnung chun,ka nu khat chau a um ani lei in,inlawi katum tah a,kanlawi tawm chun bufai bag khat alien chi hai ang hi anmin put hawn tir a,in thlahrung chu a um nuom khawpel angai hran naw e kahang ti khawma ka tarpu pa ding chun ami en inrum el bawk si,a ruk tak chun kalawm khawpel keini ka nu le chau a um kanni lei in,kanuom ang khawma kan hlaw hman naw a,tulai tak lem chu kan chawl lai tak ani bawk le kan hlaw hlaka,amiruok chu inhlaw na ding a vang khawpel a,chulai zinga bufai bag khat lai anmihang input hawn tir el chu lawm a um khawpel,kalungril a thil hungin lang hmasa tak chu hlaw kanei huna thil dang iemani bekin lathung ve ngei katih ti hi anih.Lawm tak chun kakir tah a,ka hlawthling khawpel,in ka tlunga ka nu chun mak alo ti khawpel a, Mama iem anta le ihung put hi? amilo ti a kei chun Puii pa han anmi pek ani e ti'n ka dawn a,ka nu chun Pathien bula lawmthu hril in țawngțaina anei a.Kar hni hnunga Puii khuolzin chu ahungkir alo hun nawk der el tah.Biekfung pakhat Nokia (BW) kanei ve a.
Zan a chun dar 8:30pm vel in ka Biekfung chu ahung inri kang kanga,Puii ngei chu ni'n a zienga ahung ding thu phur deu in amihung hril lawm lawma lampui a nikhat ahung cham ding thu khawm ami hril bawk,ami ngai thu le a mi hmunuom ta thu khawm a hril bawk.Keikhawm in ka ngai thu le abo a hun kalo hmang hai po khawm kha kan pam zie dam,a hmel in hlimna amin hmutir thu vel ka hril a,abo a hun hmang chu antak kalo tive khawpel pasal e tilo chun bak nei kur ang hin kan ngai tlat chu tie....kanin biek zo a dam le zingnawk milo tuok rawh aw ti'n kanin mangțha tah a....Zingkhuo ahung var a,Puii pa hai ina chun kalo va lenga,apa chun iva ngai hmel ta de zinga a hung tlung ta ding ani kha ti'n amilo fiem a,keikhawm chun innui pumin aningei maw,in tirhmang sawt taluo deu ani kahang ti ve bawk a,ka tarpu hai chu anfel in nel an uma inpawlpui khawm an hawi hle a ruol inpawl takin amin pawlpui hlak a nih.Hun anher hrat khawpel zan alo inthim nawk der tah,Puii hlak biek thei ni talo network an neinaw lei in a Biekfung hmang thei ani pek nawh ninga tih,Zingkhuo ahung var a,zanting dar 5:30pm vel a hung tlung ding an nih a,amila hung phone naw zing, dar6 vel chun amihung phone a.
U Je In in bula hmun ruok lai khan kalo um ani hung rawh ami hung ti a,kei chun eh a hma a kanin hmu na bawk a khan amilo nghak ani chu tie ti'n phuor tak chun kan siem sawk sawka kafe nghal tah a,chulai hmun chu kan in a inthawkin 15mintues vela hla dâwr anih.Kafe lai chun zanting thimbut ani lei in thiefim a hrang hieu hieua,kan umna tak hi khawpuo deu thaw ani ta lei in,in inkhât phar a um neng nung kanni a,kan in tak lem chu ava fal bik.Lampui a kalawn lai chun ka nakawr bula mîn dittawk a anmihung muot ang deu in ka hriet a,kana khawm a sêt map a,ngai țha raklo chun kafe pei a,iengkhawm nisienla hmangai tak hai hmu dinga fe kani lei in phuorna ruk rieu kanei.Sawt raklo kalawn hnung chun ka tlung ta ngei a,anthim ta lei in ka hmufie ta rak nawh,Tawi.....Tawi................Tawi......... Tukhawmin anmi dawn nawH.Pui.......Pui.............Puiii........... anmila dawn chuong nawh.E ami fiem nienga ti khawlam ani alo ibie nienga ti ti'n kahang pan hnai pei a,zan anthim ta bawk le thla avar hmiei hmiei tah,alo ngir ta ngei a,adum suot in anthuom amani ding zan ani talei a dum zur a kahmu lem am ani ding,kava pan hnai pei a,Tawi ti'n kahang ko a,ami dawn naw reng reng....beidawng hmel deu chun anthim na tieng apan pei a,Pui ienglei a imi dawnnaw am ana? ka chunga lungawi nawna inei maw?
Vawikhat char chu hung nghakir tala?.... kava them tum le nuomnaw ang deu in ami maksan pei bawk si ka chunga lungawi nawna anei nienga tih ti'n abula chun ka ngir a,adei bawk thlie a hrang hieu hieu bawk ami râp deu tah,Puii ini am? kati nawka khawm chun ami dawn chuong nawh.Kabei a dawng ve deu tah a thlie hrang le a boruok in ami râp ta laia ala hung țap nawk nghal,țhangțham in amihung se a kazuk ben a kazuk nghakir le alo bo chei a,kați ve deu dur tah,Puii khawlam i um le? ka hang ti a kahnung tieng alo ngir zur a Puii ngei ani ti chu kazuk hriet thei tah,Puii midawn tala kati a,ama hlak chun țap pumin anhnik fat fat a,aboruok le thliehrang le chu anmil naw khawpel adei bawk,Chulai tak chun Puii nu'n amihung phone a kazuk pick-up tum le,ka phone a khatin ahung thi tup a,kala switch-on țha tete a,kazuk on char chun amihung call nawk nghala ka pick-up a, Ahung țap ta char char el,Nu iem anta le? Bawi ati a a țap char char a ami dawn hleithei nawh,kangai ațha tanaw khawpel,Nu iem anta le?...Bawi imaw Puii hai kukha anhung na motor an accident a,ahung ti nawk a,adang hrilzawm theilo....Nu chu iem a chang le kati nawk a,a țap char char a,Athi ti charin amihung dawn a a pone a si hmaka.
Kan phu zawk a,ka ți ta lawm lawm de e,ka bula Puii a ngir zing bawk a hung țap inring ta deu deu thlaphang tak el chun a țap ta hlawp hlawp ela,Mani ngaizawng hai e tilo chun,ka thlânsie hlawl tah a,Hla deu ka thlân hnung chun,lampui a kalan ngaituo thar a,Ka hmangai tak ana ienglei inam ie ka zamsan ding? a theinaw Puii ka hmangai che ani ti'n huisen tak chun ka kir nawk a Puii umna tieng bawk chu kapan hnai nawk tah a,Puii khawm chu alo la um ngei a,Puii ka hmangai che an nawm mi ngaidam hram rawh aw,hilai hmun ngei a hin biethu det taka tiem dunin thina chau naw chun mițhe lul lo dingin ei intiem a,nang chun hi khawvel hi imilo maksan tahnung khawma biethu ei tiemna hai kha ahmun le ngai pawimaw in imila hung pan a,sienkhawm nang le kumtluonga lengdun arem ta sie nawh,Puii ka hmangaizie che hi,kahung puong nawn nawk,hi khawvel ka damsuong hin ka hmangai na che bo naw ni a chuoi ngai bawk naw nih,amin anlo hril hlak Pielral ram a ngei chun milo nghak zing la ka hringna kan thla hun a,ka hnuoi taksa piellei hnuoia anin zal pha ka tharau in hung zawng kati che a hlim takin eila lengdun ding ani aw, A tawpna dingin Tawi ..... ihmel vawikhat char min hmu tir rawh ti'n ka ngen a Damte a hung nghakir in a sakhmel chu innui hieu pumin,amit a inthawk chun lunghlu anga thle sieu sieu tui thienghlim vur anga var a luong ngieingiei a,lawm hmel tak in annui hieu a,Sûm angin thlie'n a muot ral ta vawnga......Keikhawm hi khawvela ka hmangai tak ka chân chu kalungril ana in,biethu kanin tiem na ngeia chun kan țhunga a sakhmel hmu ding reng um ta sie lo,van boruok inthieng tak chu kahang thlîr vela,arasi var mawi tak le Sawrthlapui hai chu kata dingin anin thim mup a,lungaina le khawsawt sukzuol tu anlo inchang tah.Hi khawvel ka dam sung Puii i sakhmel ka hmu ta awm sie naw a,i rauthla bekin mihung hnem hlak raw aw dam takin mangțha le Hmangai Puii.
A TAWP TAH.
Hmarramthar Sanate is a writer, use to write in Hmar Language.
He is a Columnist of tleirawl.in
No comments:
Thanks for your comment.