ZU ZUAR FANU

CHAPTER--1

Ziaktu: R'z Thangluah

Columnist, www.tleirawl.in

Pathianni tlai lamah chuan tlangval zu in tur chu veng mawng lamah chuan an inzui thla leh dul dul hlawm a. An zinga hmel fel ber leh hmel zahawm ber chuan,"Keichu vawiin bak chu ka in tawh dawnlo ania aw. Nizanah ka pa in min man chhuak a,tih chi loh tak tak a ni,"a lo ti bai bai a. A ṭhianpa pakhat chuan nui huah huah chungin,"Nhaa a ho e mai,kan ruih pawn buaina kan siam ve chuang hleinem,"a lo ti vat a. Midang ho pawh chuan,"Nia kan ruihin kan hnawksak lo e mai a,"an lo ti ve tliar tliar hlawm a.

Msi pawh hostel aṭangin a rawn chhuak tawh bawk a. In lamah a theih ang angin a nu chu a pui ve ṭhin a;mahse,a hostel awm hlana anu thil tih ṭhin chuan a rilru a ti khawp mai. Anu chuan a ṭhiannu zu zuar ve tho hnung zuiin zu a lo zuar ve ṭhin a lo ni a. Msi'n a nu thil tih a hriat tirh chuan a ṭap hial a ni,"Nu,tinge tiang thil hi i tih a? Ṭha deuhin lehkha ka zir a nga,hna ṭha tak ka hmuh hunah ka chawm dawn che lawm,"tiin a nu bulah chuan a sawi a. Pi Ruati chuan a fanu mittui tla chu hruk sak mawlh mawlh pahin,"Bawihte,min ngaidam rawh aw. I nu hian i tan ka theih tawp ka chhuah ve a sin. Bawihte,nang hi ka neihchhun i ni tih hre reng chungin he thil hi ka ti a ni,"tiin a fanu chu a kuah a. Msi chuan a nu thusawi chu a hrethiamlo hle mai a,"Nu,i thil tih hi bansan la kan 2 in thil dang tih tur zawng zawk ang. Ka lehkha zir lai pawh ka chawl mai ang,"a ti leh a. Pi Ruati chuan,"Nilove Bawihte,lehkha i zir zel loh chuan min enkawl thei dawnlo a sin. Chubakah,nakinah pasal chhia ṭha te i la nei duh a nga. Chutih hunah chuan i fa te tan nu zahawm tak i nih ve a ngai a lawm,"tiin a fanu chu a hnem malh malh a. Msi chuan,"Mahse,nu i thil tih hi chu a dik ka tilo a ni,"a ti leh a. Pi Ruati chuan,"Nia Bawihte,i sawi dik a lawm. Mahse,....,"a sawi zawh hma in tlangval zu in tur ho chu an rawn thleng ṭak ṭak a.

Pi Ruati chuan a lo chiau au nghal vat vat a,"A rem lai laiah khan lo ṭhu mai ru aw,"tih pahin a fanu chu room lama lut turin a mit mei zui nghal a. Msi pawh chuan a nu mit mei chu hrethiam takin, room lamah chuan a lut nghal a.

Pi Ruati chuan,"Vawiin chu in inkhawm hlawm lo a ni maw?,"tiin a fiam zui nghal bawrh bawrh a. Pakhat chuan nui huah huah chungin,"Nia helamah pawt tu a na ve em a ni,"a lo ti nghal bawrh bawrh a. Pi Ruati chuan hmel thar a hmu tlat mai,chu mi thar chu tu dang nilovin an veng kohhran upa fapa mal neihchhun a ni tlat mai,"Bawiha,nang chu i rawn lan ve teh tlat a. Nidangah i rawn lang ngai silova,"mak ti tak chuan a lo ti hâ mai a. Sangtea chuan,"Nia nidangah chuan thlanmualah kan in mai ṭhin a,"a lo ti mai a. Pi Ruati chuan mak a ti tel telh mai,"Kan kohhran rawngbawltu te pawh hian an fa te pawn lam lan dan chu an hre lo chiang khawp mai,"ti rilru neuh neuh chungin,a mah dawrtu te tlangval la naupang tak tak te zu in tur chu a thlit sak mawlh mawlh a.

Msi erawh room chhungah rilru na takin a awm a,a pa hian kum 1 liam ta khan a boral san a. A nu hian a hmeithai pui ta kha a ni a;a nu hian chhungte mumal a nei loh vangin han belh tur em em pawh a nei hran lem lo. A pa unau te lah chuan a pa boral aṭanga thla 1 pawh a liam hma in ro ah an buai nghal ringawt bawk a. Tichuan,a pa hming ngei ngei a in awm sa pawh chu a pa farnu duham zet chuan a fapa hmingin a dah ta daih a. An nufa chuan veng mawng lamah Assam type in chhe te luahin an khawsa ve ta a ni.A nu erawh chuan engmah a sawilo,ngawi rengin a pasal chhungten an tih dan chu a tuar tawp mai a ni. Msi erawh a lungawi theih ngang loh avangin a nî pawh a chhuahchhal ve nghe nghe a nihkha. Mahse,a nu chuan,"Khatin mahni nî te an ti ngailo. I pa farnu anih hi,"tiin a zilh nghe nghe a nihkha.

Msi chuan thil tam tak a ngaihtuah let a,a nu thil tih pawh hi a dem ta bik lo a ni. A chhan chu,a pa damlai kha chuan khawsak harsa takin an awm ngailo. A pa kha sumdawng mi a ni a,a ro zawng zawng chu a nupui leh a fanu tan a dah vek a ni."Ṭawng thu chhe lovah zan khat mit chhin ka lo tawk a nihpawh in,in nufa in tu nunna tur hi chu ka hnutchhiah tawh che u a ni,"a ti ṭhin. Mahse,a pa a boral tak hnu khan Msi hian a nu hi mi duhâm a nih loh zia leh a pa farnu te zawk hi mi duhâm leh koham tak an nihzia a hre bawk a ni. A nî te khan,a pa in ro a hnutchhiah zawng zawngte hi chhuhsak vek lo ta se,tun dinhmunah hian an ding bik hauhlo ang le. Mahse,an chan tura khuanu ruat a ni miau si.

Msi chu room aṭang chuan a rawn chhuak a,"Nu,apa thlanah ka kal dawn nia aw,"tih leh chhuah a rual a. Pi Ruati chuan a um zui nghal vat a,"Bawihte,rei suh aw tun ang hunah chuan thlanmualah zu rui an tam ṭhin a nia. Fimkhur ang che aw,"tiin a chah zui lawm lawm a. Msi chua,"Awle ka lo haw har lovang,"tiin a kal liam nghal a.

Sangtea chuan,"Nu Ruat,kha kha i fanu mi a?,"a lo ti vat a. Pi Ruati chuan,"Aw ni e tinge a?,"a lo ti vat a. Sangtea chuan,"Ka hmu ngailo em a,khawnge a awm ṭhin a? I bulah a awm ngailo a mi?,"a ti leh a. Pi Ruati chuan nui chungin,"Awm ngai e,tun kum kum tir aṭang khan hostelah ka dah a. Mahse,nimin aṭang khan a lo chhuak a,day in a kal tawh dawn a,"a lo ti ve nghal vat a. Sangtea chuan,"Class engzatnge a nih a?Khawi school ah nge a kal a?,"a ti leh a. Pi Ruati chuan,"Class-Xii a zir ve mek a, St.Joseph ah a kal a,"a lo ti leh a.

An ṭhianpa 1 rui tawh deuh chuan,"Nangni 2 chu in ti ti a ril hle mai,"tih pah chuan a lo nui vur vur a. Pi Ruati chuan nui sâng chungin,"A la in tam vak lo anih hi,"a lo ti mai a. A sana a bih zauh a,"Bawihtei chu a lo va haw har ang reng ve maw le,ka ngaihtuah ma nge aw,"tiin a phi sek mai a. Sangtea chuan zu chu in ve mah se,rui khawpin a la in lova. Pi Ruati mangang hmel a hmuh chuan,"Thlanah chuan ka zu kal ve mai dawn mi?,"a lo ti ve phawng mai a. Pi Ruati pawh chuan,"Nia,pawi chuang hleinem ka ngaihtuah e mai,"a lo ti ve vat bawk a. Sangtea pawh chu thlanmual lama kal tur chuan a liam ve nghal a.

Msi chu a pa thlanah chuan ngawi rengin a lo ṭhu a. A piah ah chuan mipa 2 hi an awm bawk a,Sangtea chuan a chhak kawngpui aṭang chuan Msi chu a zu hmu nghal vat a. Mahse,a piah lawka mipa 2 awm chu a la hmu lo a ni,zawi muangin stepah chuan a chhuk thla a. Msi awmna lam a va en leh chuan mipa 2 te leh Msi chu an lo in chai nasa mai a. Sangtea chu rang lutukin Msi te awmna lamah chuan a tlan phei nghal a,"Zawng ho,a ni kha thlah nghal rawh u,"a ti nghal tuarh tuarh a. Chu veleh chumi te 2 pawh chuan an thil tih lai chu an tawp nghal a,"Hmela,tunge i nih a? Kan buainaah hian rawn inrawlh hlek suh aw,"tiin Msi kuah bet tu chuan Sangtea chu a rawn melh khui khui a. Sangtea chuan chupa chu chiang kel kawl a en pahin,"A bialpa ka nih hi,i thlah loh chuan min hmachhawn a ngai ang,"a ti ve khur khur mai a. Msi lah chu hlauh vangin a khur hlawk hlawk a ni ber mai. A kawr lah chu a thler deuh phung tawh mai bawk si,a ṭap deuh pur a a khat tawkin tal chhuah tum in a rawn tal leh phut ṭhin a. Mahse,aman tu pa chu a chak êm vangin a tal chhuak theilo a ni. Sangtea chuan,"Hmela,i thlah dawn nge dawn lo,"tih pahin a rawn din hnaih leh sauh a. Chupa pawh chu a tawlh hnuk deuh hrut a,a ṭhianpa lah chu tlanchhiat in ring ranin a awm bawk si. Sangtea chuan a hmaa ring leh fiahin,"I thlah dawn nge dawn lo,"a rawn ti leh a. Msi man tu pa chu a tawlh hnuk leh hrut a,a ṭhianpa erawh bak lengin a tlanchhe daih thung a. Sangtea chuan a chet thut chuan Msi tan pawh a hlauhawm thei tih a hre reng mai si,chuvang chuan fimkhur tak chungin a ṭan hmun chu a rem fel sawk sawk a. Chutah Msi man tu pa chuan,"Awle ka ṭhianpa in min tlanchhiat san mah se,keichu ka tlanchhe ve ngailo. Hey..hmeli midang i pun vaih chuan i chaklo ang aw. Hmela,a fair in kan ti ang aw,chuan a chak zawk zawk in he nu hi kan chang ang,"a ti bul bul mai a. Msi pawh chu a bula thlan lung ngheng chuan khur hlawk hlawkin a ṭhu ngawi kar mai a. Sangtea te 2 pawh chu an in khawih nghal chu a ni ber mai. Sangte'n vawi 2 vel a hnek hnu chuan chupa chu che tur a awm tawh lo,"Hmela,i hmel hi ka hmu leh anihchuan hei aia na hian ka khawih tawh ang che. Chuan,a ni saw lo tibuai tawhlo bawk ang che aw,"a ti nghal khur khur a. Chupa pawh chu thei leh thei lovin a thova,pei chawn chawn chungin a tlanchhe nghal nal nal a.

"An khawih na hman che em? Lo thleng hma deuh ila chuan,an kut hmawr pawn an khawih lo ang che maw le,"tih pahin Msi darah chuan a va vuan a. Msi chuan,"Ka ṭha lawm,ka lawm lutuk aw,"a lo ti nghal vat a. A mit meng aṭang chuan hlauhna chuan a la kiansan lo tih a hriat theih mai a. Sangtea chuan a jacket chu phelh pahin,"Haw ila,i nu in a ngaihtuah lutuk che ania. Tun ang hunah chuan mahnia thlanmuala kal chu a tih chi vak tawhlo ang aw,"tiin a jacket chu Msi chu a hak tir nghal mawlh mawlh a. Tichuan,thlanmual aṭang chuan an in chhawm chho ta a.

Pi Ruati chu an in chhung dungah chuan a lo tei kual sek tawh mai a. A fanu chu call turin a fanu chuan phone a keng silo,Sangtea lahin a lo keng ve bawk silo. Sangtea ṭhiante lah chu nidang aiin an rui emaw tih mai turin tumah biak tlak an awm silo a mangang chuan a rilru in a ṭawngṭai mawlh mawlh a,"Aw Lalpa,khawngaihin ka fanu kha min ven him sak hram ang che aw. Ka neih chhun a ni si a,".

Tlai lam dar 5.30pm velah chuan Msi leh Sangtea pawh chu an rawn thleng ve ta a. Pi Ruati'n a fanu hmel pawr phung a hmuh chuan a ngaih a ṭhalo nghal a,"Sangte,eng thil nge thleng a? Bawihte,i ṭha em?,"tih pahin a fanu chu a lo kuah nghal chung chung a. Sangtea chuan,"Nu Ruat,thil pawi engmah a thleng hmanlo e. Mahse,a kawr hi a thler a,"a lo ti zawi sup a. Pi Ruati chuan,"Tun chinah chuan nangmahin thlanmualah i kal ka rem ti tawhlo ang,"a ti nghal hmak a. Msi erawh chuan engmah sawi lovin a nu chu a kuah a,a mittui erawh a dang zo leh chuang lo. Pi Ruati chuan,"Sangte,ka lawm lutuk aw. I lo awm hlauh a,a tihzia khawp mai,"tiin Sangtea chu lawmthu a hrilh leh nghal mawlh mawlh bawk a.

Zan riah ei kham dawnah chuan Sangtea chu in thlahrung takin an kawngkhar chu a rawn hawng a. A chhungte ho chuan zanriah an lo kil ṭhap mai a,engmah sawi lovin room lama luh tlang mai chu a tum a. Mahse, a pa chuan áw ka vin ṭheh ṭhawhin,"ZOTHANSANG,khawiahnge i len kual a? Ka bulah hian rawn kal teh,"tih pahin a ding nghal uaih a. Sangtea chu a ding chawt a,a pa awmna lam pawh chu a pan chuang lova. A pa bawk chuan,"ZOTHANSANG,ka sawi chu i hrelo a mi?,"a rawn ti vin leh ṭhak mai a. Sangtea chuan zawi muangin a pa awmna lam chu a pan phei a,a chhungte dang ho chu an lo ngawi ṭhuap hlawm a. Pu Thanga chuan,"Zu i rawn in leh tawh a ni maw? Zah pawh i zaklo a mi a? I nu leh i farnu te hi en teh,nangmah vangin an rilru a na a sin. In ti fai la,chaw rawn ei nghal ang che. Naktuk aṭangin i nu bulah dawrah kal ve tawh ang,class kal pawh hi i tan chuan sualna mai mai a nih hi,"a ti nghal buan buan mai a. Sangtea chuan,"Class ka kal i phallo anihchuan,nitin ka zu rui min hmu ang,"tih sup pahin a room lam chu a pan ding nghal nul nul a. Pu Thanga chuan,"Ehehe min chhang let ngam ka ti,fapa lak tlak loh tak ka nei che hi ka zak khawp mai,"a ti zui nghal lang lang a.

Sangtea chuan a room kawngkhar chu a kalh nghal a. A computer chu a on a,a hla ngainat em em Bon Jovi hla 'Its My Life'tih chu a play leh chhuai chhuai mai a. Ni e,a mizia leh a nungchang a tui zawng leh a nuam tih zawng,a thil duh zawngte ngaihtuah chuan kohhran upa fapa ni awm pawh a nilo. Mahse,a ni miau si a an unauah chuan amah chiah mipa a ni a. U hmeichhia 2 a nei a,an ni 2 lah chu kohhranah an in hmang em em mai bawk si. Fapa neihchhun ni mah se,family black sheep a ni tlat si.

Pu Thanga chuan,"Kan fapa awmdan hi chuan min ti luhai tak zet a ni. A ṭhian kawm duh zawng te ho lah hi rui chi hlir an ni mai bawk si,engtia han tih chi nge maw ni dawn le?,"a ti vawng vawng mai a. Pi Zuali pawh chuan,"Ni e a buaithlak khawp mai. Pawi ber mai chu bike i leisak kher hi a ni,bike hi neilo se chuan tiang em em hi a nih ka ring bik lo,"a lo ti ve thung a. Pu Thanga chuan,"Ni e,a ni viau tho mai. Engpawh nise,a la kal thui vaklo niin ka hria a. A kal thui tak tak hma hian kan sim tir a ngai a ni,"a ti ve leh a. Pi Zuali chuan,"Ni e a dik a lawm,mu tawh teh ang. Hei zan pawh a rei tawh hi,"tiin mutna chu a siam fel a,an mu ve ta a.

Msi chuan,"Nu,vawiin tlaia rawn kal kha i rawn tirh a mi a?,"tiin a nu chu a zawt tawp mai a. Pi Ruati pawh chuan,"Aw ni e tinge a?,"a lo ti vat a. Msi chuan,"Aa eng nilove ka zawt mai mai che a. Mahse,khapa kha kan kohhran Upa Pu Thanga fapa niin ka hria,"a ti leh a. Pi Ruati chuan,"Ni e vawiin kha a zu in ka vawi 1 hmuhna a nia,mak ka ti teh a sin aw,"a lo ti ve vat a. Msi pawh chuan,"Nia mak khawp mai. Mahse,a ṭhian dangte ang em em chuan a rui lo a nihkha. Zu in dan a thiam anihkha,"a lo ti leh a. Pi Ruati chuan,"Nia,Mahse,i thil hmuh leh hriat te hi midang bula sawi kher tur tihna a nilo ania aw. Mihring hi famkim kan awmlo tih hi hre reng la,keini nufa ngei pawh hi heti mai hi kan ni a. Chuvang chuan,midang chhiatna lai hi in hmuh sak lovin,an ṭhatna lai hmuh sak tum hram hram zawk tur ania aw,"tiin a fanu chu a zilh leh mawlh mawlh a. Msi chuan,"Awle Nu,ka hria lawm i fanu ka nih hi. I thu chu ka zawm zel ṭhin a lawm,"tih pahin a nu chu a kuah zui vawng vawng a.

Msi nu chu zu zuar ni mah se,mi ṭhat lohna aiin mi ṭhatna hmuh tum hram hram mi a ni. Khawvelah hian chhungkhat laina ti a koh tur nei lovin a lo piang chhuak a. Amah hringtu nu chuan duh lovin fahrah chawmna inah a hnutchhiah kha a ni a,tichuan hun a lo kal a kum a lo vei a. Fahrah chawmna inah chuan seilian in a lo puitlin thlengin chu hmunah chuan a awm ta a,kum 25 anihin a thawhna fahrah chawmna in rawn tlawh ziah ṭhin tu tlangval fel tak nen chuan an inneih ve ta a. Tichuan,an inneih aṭanga kum 1 hnuah fanu duhawm tak neiin a hmingah VANLALMALSAWMI tiin an sa ta a. Fahrah a nih avang chuan,a pasal chhungte chuan eng emaw chang hi chuan an hmusit thei hle ṭhin. Mahse,chung zawng zawng chu a tawrh turah ngaiin ngawi rengin a pasal hnenah pawh vui lovin a tuar tawp mai ṭhin a ni. A thil tum ber chu a fanu tan nu ṭha tak nih a,a pasal tan nupui ṭha tak nih leh a pasal chhungte tan mo ṭha tak nih chu a ni. Mahse,a pasal chhungte tan erawh mo ṭha tak a ni thei ta lova,a pasal tan erawh nupui ṭha tak a ni a. A fanu tan pawh nu ṭha tak a ni chho zel a;mahse,tun dinhmunah erawh chuan a fanu tan nu ṭha tak nih a tumna ah zu a zuar ta si. Engtintak nun hmang chho zel tak ang maw?? A pasal chhungte lah chuan an neih zawng zawng an laksak vek pawh duhtawk lovin,hmelhriat loh ang maiin an en ta bawk si. An nufa tan chuan belh tur an awm lo tak zet a ni.