KA LEI VANTIRHKOH - 7

BUNG-7 NA

By:- Rs Thangluah{Remz}✍🏻

Ka û chuan,"Ka pa i ti lungawi lo nasa khawp mai,"a rawn ti a. Ka ngawi reng a,ka rilruah erawh khang mi 3 mipa in ti ve si. A fair in sual cho ve si,a tawpa hriamhrei thawh leh si ho kha nep ka ti a ka thin an ti rim a phuba lak leh dan ngawt rilruah a awm thung a. Ka nu chuan,"Bawiha,tiang em em chu a thlen kan lo beisei lo a sin,"a rawn ti zawi sap a. Ka nu chu ka en a,keimah vanga rilru tih hriat ngawih ngawihin a hmel chu a ngui lup mai a. Hrehawm chu ka ti ve khawp mai,ka lu lah chu an tuam lûk mai bawk si,"Û,Jo leh Mawia chanchin i hria em?,"tiin ka û chu ka melh a. Ka û chuan,"Imm anni pawh an ṭha e;mahse,hliam an nei ve a,"a lo vat a. 

Damdawiin aṭanga kan chhuah hnu pawn ka pa chuan min be duh miah lova,ka lakah a lungawi lo hle tih ka hrethiam vek a. Mahse,ngaihdam erawh dil ka tum hran lo,ka nu erawh chuan min ngaihsak em em thung a.

Zan 1 chu ka rin loh leh beisei loh deuhin Mercy chu a rawn leng ve hlawl mai. Ka khum bul chair ah chuan a ṭhu vang mai a,ka û nen chuan an ti ti siam siam a,"FIR theh luh in tum lo mi?,"a rawn ti ve hlawl mai a. Ka û chuan,"Aaa ka pa in ngawih a chuh tlat sia,engmah kan sawi zui duh lo a lawm,"tiin a lo chhang a. Mercy chuan,"Tiang khawp hian hliam an tuar a nia,ngawihbo pui chi pawh a ni dawn mawn le?,"a ti leh a. Ka û in a chhan leh hma chuan ka lo chhang vat a,"Eee FIR a ngai hleinem,mipa kan ni a. Phuba chu kan la leh mai dawn lawm,kan tlawm dawn reng reng lo,"ka ti ve hmarh hmarh mai a. Ka û chuan,"Tiang khan sawi ve ziah suh,ka pa hi i ti lungawi lo nasa lutuk a nia,"tiin min lo khap a. Engmah phei chu ka sawi zui duh lem lova.

Kan hliamte pawh tlem tlemin a dam ve ta bawk a,kan tha a za leh tawh khawp mai. Jo chuan,"Tunge kan bitum hmasak ber ang?,"a rawn ti a,Mawia chuan,"Ricky-a ni mai lawm,kha mihring phakar lutuk kha ka hua a nia,"a rawn ti nghal bawrh bawrh a. "Engpawh nise kan hliamte hi dam fel phawt se,phuba chu kan la khawp ang. Kan tlawm dawn lo,mipa kan nih hi,"ka lo ti ve bawk a. Jo chuan,"Ni e damṭha ver vawr phawt i la,phuba chu kan la leh dawn nia,"a rawn ti ve leh bawk a.

Ka pa chuan an room-ah min ko lut a,"Tahkhan ṭhu rawh,"a ti bul hmuk a. Ngawi rengin ka pa hma zawna chair-ah chuan ka ṭhu a,ka pa chuan min melh kur mai a ka khur ru der der mai. Ka pa chuan a âw a han thian leh kharh kharh a,"Miin engtinnge an sawi che i hria em?,"a ti phawt a,"Aih hre lo,"tiin ka lo chhang ve mai a. Ka pa chuan,"Street Fighter an ti che a sin. Ṭhenkhat in kan veng timualpho tu tiin an sawi bawk che a,i nu leh pa te hi kan zak a sin,"a ti ram hmak hmak a. Kei erawh chu ka ngawi kur mai a,ka pa hmel pawh chu ka en ngam tawh lo,"Min en rawh,"a ti vin hlur mai a. Ka phu nasa ngei mai,ka pa chu ngam leh ngam lovin ka melh ṭawk ṭawk a ni ber mai. Ka pa a thinrim tawh hi chuan engmah ka sawi ngam ngai lo,"Thla thar aṭangin i pi te khuaah i awm ang. Hna i thawk a nga,a theih na naah i pi te i pui ang,"a ti leh hmak hmak mai a. Ka pi te khuaa awm chu ka huphurh khawp mai,"Pa,ka pi te khuaah chuan ka awm duh lo a sin. Ka insiam ṭha ang,khawngaih takin ka pi te khuaah chuan min awm tir suh,"ka ti mawlh mawlh mai a. Ka pa chuan,"Ka thu hi hniak suh ang che,"a ti hmuk a,room aṭang chuan a chhuak nghal daih a.

"Nu,ka pi te khuaah chuan ka awm duh lo a nia. Khawngaihin ka pa rilru hi i thlaksak thei lo mi?,"tiin ka nu bulah chuan ka ngen mawlh mawlh mai a. Ka nu chuan,"Bawiha,i pa hian i tana ṭha tur lo chu a ngaihtuah ngai lo. Tiang hian awm lo chuan,i pi te khuaah pawh i awm a ngai lovang,"a ti ve leh bawk si. Huiham...thla thar vel aṭang chuan thingtlang lamah ka awm a ngaih hmel khawp mai. 

Thla tharah thingtlangah ka awm dawn ta sa sa tiin sual lam hlir ka rilruah a lut leh ta. Mawia nen kan in chawina pawh ka la ti hlawhtling lo,zanin chu keimahin ka leng a nga eng pawh thleng dawn se Mercy hi ka bem tawh ngei ngei ang. Ka insiam malh malh a,ka lei thuam famkim ka inbel hnu chuan ka room aṭang chuan ka chhuak ta a. Ka nu chuan,"Bawiha,khawnge i kal dawn a?,"a lo ti vat a,"Ka leng lawk dawn,ka rei lovang,"tih pahin ngawi rengin kawngkapui lam chu ka pan phei a. Ka nu chuan,"I pa committe ban hma in rawn haw ngei ngei ang che aw,"a rawn ti zui lawm lawm a. Ka nu thusawi pawh chu ka bengkhawn lem lo,ka bike ka ti nung a Mercy te In lam pan chuan ka in khal chhuak leh ta puat puat a.

Mercy te In kawtah chuan ka bike chu ka hung rem a. Ngawi rengin an kawngkapui lam chu ka pan a,door bell ka hmet ri nghal tuarh tuarh a. A rawn ri rak a,kawngkhar chu a rawn in hawng a,"E nangmah law? Lo kal rawh lo lut rawh,"tih pahin Mercy a lo nui sâng a. Ngawi rengin In chhung lamah chuan kan in zui lut ta a;mahse,mipa dang ka hmu tlat mai a bialpa a ni ngei ang le? Mahse,haw leh mai chu ka tum bik hauh lo,mipa in ka tum chu ka hlen tur a ni. Mercy chuan,"Lo ṭhu rawh i damṭha tawh mi a?,"a ti nghal siam siam a. "Aw damṭha tawh e,khawnge midang hi? Ka van hmu love,"tih pahin ka hawi kual vel a. Mercy chuan,"Ka pa chu committee naah a kal a,ka nu chu a damṭha lova a mu tawh a,"tiin min chhang vat a. A in lengpa nen min inhmelhriat tir nghal bawk a,kan ti ti ho malh malh a;mahse,a in lengpa chuan min nin hmel ta khawp mai. Mahse,haw mai ka tum bik lo ka awm lui ve tlat a. 

Zan dar 10.30pm velah chuan Mercy pa committee pawh a rawn bang ve ta. Rei lo te a ṭhut khawmuan hnu chuan a mu ve nghal mai a,keini erawh tu mah mah chuan hawn zai reng kan rel thei lo. Mercy pawh a mit meng a dul ruih tawh mai,a mut a chhuak tawh tih a hriat reng mai. Mahse,he mihring pa hi a haw hma chu ka haw awm bik lo e mai a. 

Zan dar 11.00pm a ri ta ka kekawr ipte a ka phone ah pawh a rawn vibrate dawt dawt tawh mai,ka nu a ni tawh ngei ang. A vawi khatnaah chuan ka ngaihsak duh lova,a vawi hnihnaah chuan ka pick ve hram a ka nu a lo ni ngei a;

"Bawiha,lo haw tawh la i pa nen kan lo nghak che aw,"

"Awle,"

"Tunah aw,"

"Awle,"

Ka phone chu ka off a,ka ak leh nghal hmak a. Nula rim laia koh haw nih chu ka duh bik lo,ka nu nen kan inbiak aṭanga 20mins vel hnuah chuan,"Mercy,ka han haw phawt a nge aw. Hei a tlai tawh si a,mut te pawh i duh ve ang,"tih pahin a in lengpa chu ka zu melh zauh a,min en chu min ei loh hmel ngei mai. Mahse,ka ngai pawimawh duh vak lo,"Naktuk thawh hma i ngai ni maw? Khawi kawngka thleng sawn ka rawn thlah ang che,"a ti a,kawngka lam pan chuan kan in zui phei ta a.

Ka pi te khuaa ka awm nan kar 2 chiah hun ka nei ta. Chumi hma chuan Mercy chu ka bem hman ngei ngei tur a ni,a hmasa ber atan a number ka neih a ngai a ni. Ka û phone chu a hriat loh laiin ka check ruk sak a,Mercy number chu ka la chhuak thei ta. Mahse,bul ṭan dan tur ka van thiam lo tak êm! Pawi lo Jo leh Mawia an awm a lawm hehe.

"Bawiha,a number chu ka nei tawh nia aw. Engtinnge ka tih dawn?,"ka ti a. Mawia chuan,"Text la zaninah ka rawn leng dawnhan ti chhin teh,"a rawn ti vat a. Mercy number chu ka hmet chhuak a,ka text ve ta pawp mai le;

"Hi...Mercy zaninag ka rawn leng dawn sin. I phal em?,"

Tiin ka text ve thawr mai a,engtin tak min chhang ang maw?

Rei fêê hnuah chuan chhanna ka dawng ve ta hram a;

"Tunge aw?,"

"Aaaa keihmah Muantea,"

"Eee i number ka lo nei lo a nih hi,lo len te chu phal lutuk e. I duh phawt chuan ka phal reng a lawm."

"Yess ka rawn kal nghal ang aw🙈."

"Imm i thu vek lawm,"

"Nihphawt aw,"

"Awle."

A hnu deuhah min rawn call ta mai,ka chhang rang mai mai a sin.

"Aw Hello,"

"Tu Muantea nge i nih?,"

"Ka dp te kha en ve la,"

"I Dp chu ka en a,i hmel hmuh tur a awm hleinem,"

"Imm kan rawn kal hunah min hre mai ang,kan rawn kal nghal a ni mai."

"Hmm chutiang ringawt ka pawm lo,"

"I nu kha lo mut tir la a dik vek ni mai,"

"Lawkin i áw aṭang hian ka hria che. U Mawitei nau i ni maw?,"

"Chu min hriat reng chu,rawn len chu i phal nge phal lo?,"

"Phal e,"

"Awle nihchuan kan rawn kal ang aw,"

"Awle,"

Phone a hang up nghal daih a,"Lee kan kal thei,"tih pahin ka bike chu ka ti nung nghal a. Mawia leh Jo pawh an phûr khawp mai,"I pi te khuaa i kal hma in khami te pawh kha kan sawp leh a ngai nia,"an lo ti ve bap bap a.

Mercy leh a nu chu sitting room-ah an lo ṭhu a,a nu chuan no lo zet hian min rawn melh nghal khui khui a,"Nangni 3 bawk maw? Kan veng sualhuai ho,"a lo ti nghal bawrh bawrh a. Mercy chuan,"Nu,i mak thei e mai tikhan lo ti nghal bawrh bawrh ṭhin lo la,"tiin a nu chu khap daih a tum ve ngial a. Mahse,awmzia a awm lo,"Khatin min rawn khap ve khang lang lo mai teh,hetiang mi in lêng atan ka duh hleinem,"a ti leh buan buan mai a. Ka thin in a tuar ta lo,"Awle ka pi,kan haw ang. Tun bak hi chi in In chhung hi kan rawn rap leh tawh lo ang,"ka ti ve hmarh hmarh mai a. Kan ṭhian ho chuan ngawi rengin kan in zui chhuak leh hna hna a.

"Khang lang a,a fanu kan rím duh mah chuan lawm viau tur zawk a sin a nih. An kawmthlang kawngpuiah khan va tlan vak vak ang u,"tiin ka kual pup a,Mercy te kawmthlang kawngpuiah chuan chak mangkhengin kan tlan puat puat mai a. Kan bike lah bengchheng chi hlir a ni bawk sia,min ning ve viau ang. Kan ṭhian ho hian Royal Enfield vek kan khalh a,Mercy nu chuan bengchheng min ti ve viau ang. 

Ka pa chu sitting room-ah kut hnung suihin a lo vei kual thauh thauh mai a. Ka haw min hmuh chuan a ding chat mai a,"I nu hi i hmu em? A ngaihtuah lutuk che a sin,vawi tam a rawn call che a i chhang thei bawk si lo. Engtinnge maw ka tih dawn che le?,"a lo ti nghal bawrh bawrh a. Ka nu chuan min rawn en a,a mit chu a sen râm mai a,"Bawiha,tinge mangang deuh hian min siam leh ṭhin a?,"a rawn ti zawi sap a. Ka ngawi reng a,ka pa chuan,"Lo hnai teh,"tih pahin min hui a,ngawi rengin ka pa awmna lamah chuan ka kal hnai a. Ka pa chuan a hnar a lên vut vut a,"Imm zu rim chu i nam love;mahse,meizial rim i nam. I nu kha ngaihdam dil rawh,"a ti hul hak a. Ngawi rengin ka nu bulah chuan ka ṭhu a,"Nu,ka tihpalh lutuk aw. Khawngaihin min ngaidam hram thei a ngem?,"tiin ka nu kutah chuan ka vuan a. Ka nu chuan min kuah a,"Bawiha,ngaihdam min dil a ngai hleinem. Mahse,tiang chen chen hi leng bo tawh suh aw. I nu hian ka ngaihtuahin ka ngai thei lutuk che a sin,"a ti mawlh mawlh a. Thlamuang taka ka nu âwma ka bei tawh hi chuan engmah dang ka ngâi ngai lo.

KA LEI VANTIRHKOH - 6

BUNG-6 NA

By:- Rs Thangluah{Remz}✍🏻

Zan dar 9.30pm velah pawh Mercy nu chu a la mu lo. Choka lamah a ri rek rek reng mai a,zan 1 na rei tak len chu a tihchi vakin ka hre lova,"Kan haw tawh mai dawn em ni? Hei a tlai tawh sia,"tih pahin ka ding nghal uaih a. Mercy chuan,"A la hma lawm thingpui te pawh kan lum leh ang chu,"tih pahin a lo nui sâng a. Mahse,choka lama thawm ri chuan haw turin min duh tawh kan hrethiam ve vek si. Jo chuan,"Nia kan haw phawt a nge,zan dangah kan rawn leng leh zawk dawn a nia aw,"a lo ti ve bawk a. Mawia lah hi nghal ve hrim hrim chi a ni bawk si,"I nu sound track hman chuan Go home Go home a tiin ka hria,"a ti kher pek a. Mercy lah chu a lo nui var var a,"I van sual tak,anih in tih tlat chuan le,"tiin kawngka bul thleng chuan min thlah phei a.

Haw kawngah chuan kan nui nasa khawp mai,"A nu sound track hman mawlh kha,"tih pahin Jo chu a nui hak hak a. Mawia chuan,"Zan 1 kan leng leh ang,Jo hi zawhna a la zawt ve lo,"a lo ti vat a. Jo chuan,"Nhaa ka leng duh tawh teuh lo mai a,a nu kha ka hlau deuh reuh e a,"a lo ti vat a,kan nui nasa khawp mai. Ni e Mercy nu kha chu keipawn ka hlau ve tho,a duh loh zawngin kan awm a nga min zilh hrep ang tih ka hlau a ni.

"Nizan chu nuam em?,"tih pahin ka û chuan min rawn nuih var var a. Ka khi suk a,"Imm nuam a ni mai,"ka lo ti mai a,ka û chuan,"In leng dawn tih ka hre si lova,engmah pawh ka hrilh hman lo che nihkha,"a ti leh a. "Engnge min hrilh hman loh chu?,"ka lo ti vat a. Ka û chuan,"Aww Mercy nu mizia maw le,inlêng a neih vawikhatna a nihkha,"a la ti zui,hairee. Awih loh hmel takin,"Maw? Mercy khan a hma in inleng a nei ngai lo maw? Van mak em em,"ka lo ti hâ mai a. Ka û chuan,"Aw nei ngai love a nu kha a strick over a. Nangni pawh kha ka naute in nih vang mai maiin a hnar ngamlo che u nihkha,"a ti leh a. "Nih bialpa a nei em?,"ka ti leh hram a. Ka û chu a nui kur kur a,"I star a ni tiraw? Bialpa deuh reuh chu a neiin ka hria;mahse,ka hrechiang fak bik lova,"a ti leh ta. Heiham beisei a van bo tak ém! Ka û chuan,"Mam,Mercy te chu an sâng lutuk beisei duh suh. Ṭhian angin en rawh,"a ti tlat mai,a va hahthlak tak êm! "A hrim hrimin hmeichhia pawh i ngaihsak ngai loh kha,tinge Mercy kher?,"ka û chuan a ti leh a. Ka û chu ka en a,"Û,Mercy chu ka tan a ṭha lo mi?,"ka ti tawl mai a. Ka û chuan,"Ngaihtuah lo la ni mai,"a ti deuh hmuk bawk si,a awmzia ka van hre lo tak êm! "Û,tinge?,"ka ti leh a. Ka û chuan,"Ngaihtuah lo la ṭha vek ni mai,insuk tur i nei em? Ka insu dawn nia,i neih chuan rawn dah mai rawh aw,"tih pahin Bathroom lamah min luh san daih a. 

Ka mut pah chuan thil tam tak ka ngaihtuah leh nasa khawp mai. Hman zana ka mumang te kha ka ngaihtuah let leh a,mak ka ti telh telh mai. Kha ka mumang kha a tak ang chiah a ni;mahse,ka mumang a ni bawk si. Ka nu leh pa fa diktak hi ni lo ta i la,tu fa nge ka nih ang le? Huiham ngaihtuahna a kal thui telh telh a,mut a chhuak lo telh telh a thlanfîm lah chu chalah a rawn bawl ṭuam ṭuam mai bawk si. Zing lam dar 1.00am velah chuan ka tho hlawl mai a,ka room thlang lam veranda-ah chuan ka chhuak a. Thlifîm rawn thaw heuh heuh chuan min chhêm a,tlemin ka zia deuhin ka hria. 

Ka hnung aṭang chuan hmeichhe 1 hian ,"Lalrammuan,"tiin fiah kekkawk hian min rawn ko a,ka hawi let rang kher mai. Mahse,chu nu chu ka hre ngai miah lo,ka vawikhat hmuhna a ni,"Aaah keimah mi min koh?,"ka ti hâ mai a. Chu nu chuan nui sâng chungin,"Aw nangmah ka ko che,"a lo ti vat a,ni lo he nu hi ka vawikhat hmuhna a ni leh lo. Ka mumanga hmeichhia ngei kha a ni,engtinnge ka hming a hriat le?,"Engtinnge ka hming i hriat a?,"ka ti nghal tawl mai a. Chu nu chuan,"Chu chu a pawimawh ber hleinem,lo kal la thil ei ang ka lo treat ang che,"tih pahin College canteen lamah chuan min kal phei pui hlawk hlawk a. Kei pawh chuan ngawi rengin a kalna lamah chuan ka zui ve mai a.

"I chhungte an dam maw?,"tiin nui sâng chungin min bia a. Ka chhungte chanchin leh zel chu min zawh ka beisei lo a sin maw le,"Aaa aw an damṭha e,"tiin ka chhang mai a. Min en vang vang a,"A ṭhat nasat chu remchang hmasa berah ka la rawn leng ang,"a la ti zui. Mak tih hmel tak a ka en ho chu min nuih tet tet a,"Engnge mak min va tih hmel ve?,"a lo ti vat a,"Engmah ni love,"ka lo ti vat a,ka thil ei lai chu ka chhunzawm leh malh malh a.

"Û,kan college ah hmelhriat i nei mial em?,"tiin ka û chu ka zawt tawp mai a. Ka û chuan,"In miss 1 chu hriat ka nei. Tinge?,"a lo ti vat a. "Aih student ah hriat i nei em?,"ka ti leh a. Ka û chuan,"Aww i ṭhiante 2 hi ni mai lawm,"a lo ti leh vat a,"Hmeichhiaah hriat i nei em?,"ka ti leh a. Ka û chuan mak a ti ta deuh aniang,"Tinge tunlai hi tiang lam hi min zawh leh thut thut ṭhin le?,"a ti ve a. ,"Aaa engmah ni lo e,Mawia te Inah note copy turin ka kal dawn nia aw ka rei lovang,"tih leh chhuah ka rual a. 

Mawia te Inah chuan a bialnu hman zana kan rim kha a lo awm ve kuk mai,min lo nuih var var a. Kei lah pek chuan,"Engnge i tih a?,"ka lo ti leh hê háw mai a. Mawia bialnu chuan nui sun sun chungin,"Chaw ka ei a,"a lo ti vat a,Mawia pawh chu room aṭangin a rawn chhuak ve bawk a,"E i rawn thleng tawh law? Min lo nghak lawk aw,"tih pahin bathroom ah min luh san leh rih a. 

Sunday zing a ni a,ka chhungte chuan inkhawm turin min tir leh laih laih hlawm a. Mahse,ka peih leh tawh lo,"In ka lo nghak mai ang,"ka ti leh ta ngawt a. Ka pa chuan,"Duh aiin Kohhran i bêl lo tlat,a ṭha dawn lo,"a rawn ti bul hmuk a. Tianga ka pa a ṭawng hmuk hmuk tawh hi chuan a lungawi lo hle tih a chiang reng mai,ka hnial ngam teuh lo,"Awle nih ka insiam a nge,"tih pahin room lamah chuan ka lut nghal a.

Ka room aṭanga ka chhuak chu sitting room-ah chuan Mercy a lo awm reng a,"E i inkhawm ce dawn mi?,"tih pahin a lo nui sun sun a. Ka lâi leh ringawt tawh,engmah sawi lovin room-ah chuan ka lut leh daih a,"Mawla,tinge tiang hian i awm leh ṭhin a? Va chhuak la,ṭha deuhin va be rawh,"tiin keimah leh keimah chu ka inbe mawlh mawlh a. Tháwk ka han lak leh te te hnu chuan ka room aṭang chuan ka chhuak leh a;mahse,Mercy kha a lo awm tawh miah lo,"Pa,an kal tawh mi?,"ka ti ringawt a. Ka pa chuan,"Aw an kal ta nihkha keini pawh kan kal tawh dawn a sin. Min rawn zui ve nghal mai rawh aw,"tih pahin ka nu nen chuan an chhuak nghal a. Hla Bu kengin ka nu te chu ka zui ve nghal a.

Chawhma bak chu ka inkhawm peih meuh lo a ni,chawhnu lam chu kan ṭhian hovin leng turin kan in sawm khawm leh a. Jo chuan,"Vawiin chu Hlimen Park ah kal i la,a la hma tho a,"a rawn ti a. Mawia pawh chuan,"Nia keipawh nikum a ka kal bak kha ka la kal leh miah lova,ka kal leh châk teh mai nia,"a lo ti ve bawk a. Ka ṭhiante chu kei pawn ka hnial lem lova,ka pa bulah ka dil a ka pa chuan rem a ti vak lo khawp mai. Mahse,a phallo ṭung lem lova,pawisa erawh ka nu bula dil turin min ti a. Ka nu chuan ₹500 chiah min la pe zui,ka wallet-ah chuan 100 note 1 leh 50 note 2 chu ka la ak ve ran mai a. Ka nu in 500 min pek nen chuan ka ak ve thlap a,ka lawm ve khawp mai. Kan ṭhian ho chuan Hlimen lam pan chuan kan in khalh chhuak leh ta ziai ziai mai a.

Luh man erawh chu Mawia'n a tum thung a,midang kal pawh an tam khawp mai. Ka hawi kual a,hmun tin maiah chuan mihring hlir mai an niin ka hria. Jo chuan,"He lam aṭang hian kal i la,kan round dawn nia,"tih pahin kawng hnuai lam kawngpuiah chuan a chhukthla nghal nul nul a. Mawia nen chuan kan zui ve nghal a,"Tinge innu i hruai ve lohva?,"tiin Mawia chu ka zawt a. Mawia chuan,"Nhaaa kannu ka hruai ten ka lerh thei dawn lo a sin,"a ti heu mai,kan 2 chuan kan nui hawk hawk a. Thui pawh kan kal hma in kan hnung lam aṭang chuan,"Lalrammuan,"ti hian min rawn ko lawl mai,ka hawi let rang kher mai. Khanu bawk kha a ni,engtinnge ka kalna apiangah a rawn kal zel theih le?,"Nangnu hi min zui ru mi a?,"ka lo ti vat a. Ani lah chu a lo nui var var a,"Zui ru maithei che a ni,"a la ti zui. Mawia lah chuan,"Khal reuh hle mai a,"a lo ti sur sur a,hepa lerh zia hi chu a,"Min rawn zui ru tawh lo mai rawh,"ka lo ti hmuk a. Chu nu lah chu a nui suk a,"Ka zui ru lo che,ka kalna turah i lo awm zawk a nihkha,"tih pahin min rawn su lui kher a,kan hmaah chuan confi takin a kal phei nghal vuk vuk a. Mawia lah chuan,"E khai,a khal nalh hle mai a. Tunge a? A number i nei em?,"a rawn ti leh nghal chung chung a,ka van ning tak,"Lerh viau ṭhin suh,pakhatah lungawi rawh ka hriat ngai pawh a ni lo,"ka lo ti deuh hmuk a. Mawia chuan ka mood a fuh vak lo tih a hrethiam a ni ngei ang,engmah a sawi chhunzawm ta bik lova.

Tlai dar 4.00pm velah chuan kan in zui haw leh ta a,Hlimen khawchhung leh park in kar kan tlan lai chuan Bike 3 hian min lo um phak a,"Zawng ho,lo ding nghal rawh u. Fuck...Fuck...,"tih pah in horn an rawn pe tuarh tuarh mai a. Keini pawh chu kan ding ve mai a,Jo chuan,"Tu te nge in nih a? Ṭawngkam in va duhtui lo ve a,"tih pahin a bike chu a hung rem a,a chhuk nghal a. Keini pawh kan bike kan ti thi a,kan chhuk ve nghal a. Min lo ûm tu te chuan an helmet chu an phelh a,tu te nge an nih kan hre thei ta. Hman zana kan sawp hrep te kha an ni,"In in la pa viau a ni lawm ni? Mipa leh mipa chu han in nuai leh tak tak i la,"tiin an zinga palian ber chuan min rawn melh khur mai a;mahse,ka hlau bik eih lo,"In ngam ngam kan ngam,"ka lo ti ve hmiah a. Chupa chuan,"A ṭha lawm khawi hmunah nge ni ang?,"a ti leh lawi a. Jo chuan,"A hma khan in duhna hmunah kan ti tawh a,tunah chuan kan duhna hmunah kan ti ve tawh ang,"a lo ti hmak mai a. Chupa chuan,"A ṭha lawm a fair ngatin aw ni ang,zanin dar 10.00pm ah aw. A hmun tur chu zanin dar 8.00pm hma in Ricky-a bulah in lo sawi dawn nia,"a ti a,a helmet chu a khum a a bike chu a pan ding nghal a. Ngawi rengin kan thlir liam a,"Khawi hmunah nge ni ang?,"Mawia chu a phur leh hmel tawh khawp mai. Jo chuan,"Ka patea te farm hlui ah khan kan ti mai dawn mi? Ricky chuan chu lai hmun chu a hre tho a,a hmun a fianriala a ṭha viau ang,"a lo ti a. "Ni e a pawi miah lo ang,engpawh nise haw phawt teh ang u ka ril a ṭam tawh lutuk,"ka lo ti a.   Kan 3 chuan kan in zui haw leh ta hlawm a.

"Pa,zanin chu Mawia te Inah ka riak dawn nia aw,"tiin ka dil ringawt a. Ka pa chuan rem a tih loh hmel khawp mai,"Kan Inah riahna tur nei lo pawh i ni lova,Mawiate Inah chuan engnge riah a ṭulna?,"a ti khauh mai. Chhan dan tur ka van hre lo tak,"Eng lo nia,note copy ka duh bawk sia. Copy tur a tam bawk sia,zan reiah chuan ka rawn haw peih dawn si lova,"tiin chhuanlam ka siam ta ringawt a,ka pa chuan a awih a ngem aw. A ngawi vang vang a,"Chungte chu chawhnu inkhawm lova leng kual vel lo khan tih tur che lawm. Zan chhuah hi i zawngchhang dawn tlat,a buaithlak zanin bak chu i chhuah ka rem ti tawh lovang,"a ti leh hmak hmak mai a. "Awle Pa,zanin bak chu ka chhuak tawh lovang,"ka ti ve ngei a;mahse,ka thusawi ang chuan ka awm leh dawn lo tih erawh ka hrechiang viau lawi si.

Inkhawm kal reh hnu chuan Mawia te In lam pan chuan ka inkhalh chhuak leh ta. Mawiate Inah chuan Jo pawh a lo awm tawh a,ani pawh a chhungte bulah note copy tur anga in sawiin a rawn chhuak ve thei hram a nih hmel. Mawia chuan,"A la hma tho a,dar 9.30pm velah kan kal dawn nia aw,"a lo tih a. Jo chuan,"Nia pawi hleinem. Mahse,ka za zek zek tawh mai keichu,"a lo ti ve bawk a. Kan ṭhian ho hi chuan kan nghal hma ve hrim hrim a,insual te hi kan inpeih at reng mai ti ila ka sawi sual lovang. Kan ṭhian zinga tu emaw ber an lo khawih chuan phuba kan la leh ngei ngei ṭhin. Ṭhian chhan pe na mi ṭhah kan ni bawk a,in chhan thei tak kan ni.

Dar 9.30pm velah chuan Mawia room thlang lam aṭang chuan kan chhuak ru ta a. Thawm dim thei ang berin kan bike chu, switch on lohvin an In piah lang thei lo thleng chuan kan nawr phei a;a hahthlak duh ngei mai. Jo chuan,"Zanin chu hman zan aia na khan kan khawih dawn nia aw,min la cho e mai kan la khawih na tawk lo a nih hi,"a ti a,a bike chu a tinung nghal dut dut. "Chu aichuan zanina min rawn telpui tu tur Ricky hi ka mi rin loh zawng tak a nia. Kan fimkhur thiam hle a ngai dawn nia aw,"ka lo ti thung a. Mawia chuan,"Ni e Ricky chu a phakar tih chu ka hria;mahse,a dawihzep thung a lawm. Kan duh loh anga a chet vaih chuan keichu ka dim dawn miah lo nia aw,"a lo ti ve bawk a. Kan bike chu kan ti nung a,Jo-a patea te farm hlui lam pan chuan kan inkhal chhuak leh ta a.

Ka lu chu a ri chawrh a,ka lu a rawn hai nghal muai muai a. Ka thil hmuh chu a phê ruai tawh mai a,tluk erawh ka tum lo bur. Ka lu chu ka han khawih a,thisen vek in a lo bual a a lum puat puat tawh mai. Pen hnih ka pen leh a,ka ṭhingṭhi hnawk a,"I chak tawk a nihkha,"tih pahin ka bekah hian min rawn pet ri chawrh mai chu,engmah ka hre zui tawh lo. Mahse,ka lu ah khan min vua tih erawh ka hria.

Ka harh leh chuan damdawiin khumah ka lo mu reng tawh a. Ka nu chuan hlauhthawn hmel deuhin min lo en a,"Bawiha,i ṭha em? I ṭha tiraw?,"a lo ti nghal mawlh mawlh a. Ka nu bulah chuan ka pa leh ka û te pawh an lo awm ve bawk a,an vai mai chuan an hlauthawng takzet tih ka hrethiam nghal a. Ka pa erawh chuan engmah a sawi lem lova,a lungawi lo viau tih erawh ka hre thei. Ka û chuan,"Mam,i ṭha tiraw?,"a rawn ti a,ka lu ka bu nghut a. Ka pa chuan,"Nakinah ka rawn lut leh ang,"tih pahin a chhuak daih a.

KA LEI VANTIRHKOH - 5

BUNG-5 NA

By:- Rs Thangluah{Remz}✍🏻

"I ṭha em? Bawiha,i ṭha em?,"ka nu âw niin ka hria. "Ka duh lo a ni thei lo,"tiin ka âu chiam chiam mai a. Ka nu chuan,"Bawiha,engnge awmzia? Harh teh,"a ṭap niin ka hria,chiang vak lovin ka harh a. Ka bulah chuan ka nu leh ka pa,ka û te chu mangang tih hriat tak hian an lo ṭhu ṭhap hlawm a. Ka mit chu ka nuai a,"Khawnge khanu kha?,"ka ti tuarh mai a. Ka pa chuan,"Bawiha,tumaw i sawi chu?,"a rawn ti dam thluam mai a,"Khanu kha maw le,dawheh deuh kha dawt min hrilh a lawm,"ka ti vin hlur mai a. Ka nu chuan ka kutah min rawn vuan a,"Bawiha,chutiang tumah an awm lo. I hah lutuk a tin nihkha,"min lo ti a. Kei lah chu ka hawi ka hawi mai si,ka pa chuan,"Bawiha,engkim a ṭha vek a nia aw. I mumang lamah eng emaw i hmu a ni ngei ang,"a lo ti leh a. Ka pa chu ka en a,"Pa,i fapa diktak ka ni em?,"ka ti hlawl mai a. Ka pa chuan mak tih hmel takin min en a,"Aww ni e ka fapa neih chhun i ni a lawm. Tinge tiang te chu min zawh a?,"tiin ka darah chuan a rawn vuan a. Thil thleng kha ka mumang vek maw lo ni a;mahse,a tak ang chiah a ni si. Ka nu leh ka pa chu ka bulah an ṭhu a,min kuah hle hle mai a. Ka û chuan,"I mumangah engnge i hmuh a? Nizan i meng tlang chiang bawk sia,vawiin lamah thlan laihnaah i kal leh bawk si i chau a nihkha. Hahdam i mamawh a nihkha Mam,"a rawn ti ve bawk a. 

"I nu leh pa fa diktak i ni hleinem,"chu thu ngawt chuan ka rilru a luah a. Ka mumang chu tumah ka hrilh duh lem lova,ka û te chuan chaw ei an siam malh malh a,"Mam,a ei theih aw hei i chawhmeh duh zawng kan siam a nia. Ei ṭeuh ang che aw,"tiin ka û chuan min rawn ko a. Ngawi rengin chaw ei tur chuan ka phei a,chaw chu ka kil ve nghal a. Ka pa chuan,"Zanin pawh mu hahdam la a ṭha ang,i chau lutuk a nihkha,"a rawn ti leh a. Mahse,ka ṭhiante nen khawhar Ina kal turin kan lo in tiam tawh si,"Pa,ka ṭha lawm min ngaihtuah suh. Mipa ka nih hi,"ka lo ti ve mai a. Ka nu chuan,"A ti leh ta,i pa hi i chhun lutuk mai. Eng emaw hlekah in mipa nihna hi in chhuang lutuk mai,naktuk zan lamah i kal dawn nia. Zanin chu i û te ho in an lo kep mai dawn che lawm,"a lo ti vat a. Ka û pawh chuan,"Ni e Mam,zanin chu rawn kal rih lo mai rawh. I ṭhiante pawh kan bulah kan hruai mai ang,"a lo ti ve bawk a. Chutia an tih takah chuan khawhar Ina kal pawh chu ka tum lui ta bik lova;mahse,ka mumang bawk kha ka rilruah a lo lang leh ṭhin.

Ka room-ah chuan zai ngaithlak pahin ka online mai mai a. Number hriat ngai loh aṭangin Voice call ka dawng hlawl mai,ka chhang dawn nge dawn lo aww tia ka in ngaihtuah chhungin a lo in ring tawp hman daih a. A hnu rei vak lovah chumi number aṭang bawk chuan message ka dawng leh nghal a;

"Awwi tihpalh lutuk aw,ka lo hmetsual palh a,"

"Aw a pawi lo e,"

Min chhang tawh lo,a Dp ka nghal a. Mahse,a Dp ah chuan uite a hmang daih a,ka message pawh chu min chhang zui tawh bik lem lo. Group velah ka lang zuai zuai a,ka out a mut pahin ML ka khel mai mai a.

"Kan inchawi kha aw,"Mawia tak hi chu aw,thil hi a van hre rei thei tak. ,"Aww zanin te chu khawhar In lamah kan kal ang chu,"ka lo ti ve mai a. Jo chuan,"Khawhar In kal chhungte chu a rei lo e mai a,"a lo ti ve bawk a. Mawia chuan,"A hrim hrimin hman zan te khan engmah i sawi lo mi a?,"a rawn ti leh a,"Aww khatiangah te chuan sawi chi pawh nih loh kha,chubakah a nu saw dead hmel tawp,"ka lo ti vat a. Jo chuan,"Ho lutuk zaninah kan leng ang,"a lo ti nghal vat a. Mawia chuan,"Ni e kan leng ang,a nu chu engtiang pawn dead raw sek sek ho lutuk,"a lo ti sam et mai bawk si.

Zanah chuan ka in siam malh malh a,"I nu leh pa te fa diktak i ni lo,"tih bawk chu ka bengah a rawn ri nawn leh a. Mahse,ka ngaihtuah duh lo lui a,ka insiam malh malh a. Ka û chuan room pawn aṭangin min rawn ko a,"Mam,i hman tawh dawn em? Ka nghak che nia aw,"a rawn ti lâng lâng a,"Aw ka rawn kal ni mai,"tih pahin ka phone ka ak a,ka chhuak nghal a. Ka û nen chuan khawhar In lama kal chuan tur chuan kan chhuak ta a. Ka û(Mawitei) nen hian kan innêl bik e,kan upa ber nen pawh kan innêl tho a. Mahse,ani nen a kan innêl ang em em hi chuan kan upa ber(U Rintei)nen chuan kan innêl em em lo. Ani hi chuan bialpa a neih pawn min hrilh vek ṭhin,ka ṭhian te ho pawh hian an nêl hlawm khawp mai. Kan upa ber hi chu mi ṭawng tlem tak a nih vang te pawh a ni mah na,ka ṭhiante hi chuan an nêl lem lo.

Ka ṭhiante chuan kawnah chuan min lo nghak reng tawh a. Ka û nen kan kal dun min hmuh chuan tlemin an tîm deuh a,Mercy chungchang pawh an sawi zui lem lo. Ka û chuan,"In duh chuan lo zu kal u la,Mercy sawm lawk a ngai a. Ka va sawm kawi lawk a nge,"a ti a. Mawia chuan,"A la hma lawm,tah hian kan lo nghak ang che u,"a lo ti vat a. Ka û chuan,"Nihchuan ka va sawm vat vat a nge aw,"tiin Mercy te In awmna lam kawng pengah chuan a kal nghal a. 

Mawia chu a rawn chek tlak tlak a,"I û chu aw,a rawn kal ve kher a,"a ti nang nang a. Jo lah chuan,"A ṭha daih zawk a lawm,a rawn kal loh chuan Mercy sáwmtu tur an awm dawn lo a sin,"a lo ti ve thung a. Kei lah chu ka ding ngawi kur thung a. Rei vak loh kawnah kan ṭhut hnu chuan ka û leh Mercy pawh chu an lo thleng ve ta,"Kan kal nghal nghal dawn mi? A tlai tawh ang reng sia,"ka û chuan a rawn ti nghal a. Kei lah chuan ngawi rengin Mercy bawk chu ka lo thlir leh dauh dauh tawh a. Mawia chuan,"Heyy in control ve deuh teh,"tih sup pahin,min rawn nghawk zauh a. Ngawi rengin khawhar In lama kal tur chuan kan in zui thla hlawm ta a. 

Khawhar Inah chuan mi an lo ṭhahnem tawh khawp mai. Ṭhutna âwlah chuan kan ṭhu lut ve nghal a,ka bulah Mercy chu a ṭhu ve vang mai. Ka zai ring leh ngam tlat tawh lo,a va hahthlak tak ka âwmdan te chu ka khawr ṭut mai hian ka hria a. Ka ṭâng ṭung bawk si,a van hahthlak tak e aw. Mahse,a perfume rim mawlh mai hi,a hmel nen a inhmeh em em mai bawk si a van rimtui chungchuang tak êm! A khât tawkin a phone chu a hmet leh nuap nuap zel a,bialpa a neih ka ring nghet nghal bur mai nia.

"Zanin chu kan rawn leng kawi dawn nia,i phal em?,"Mawia chuan Mercy chu a rawn zawt a. Mercy chuan nui var var chungin,"Phal loh tur thu a awm hleinem,in peih phawt te chuan rawn leng rawh u,"a lo ti vat a. Ka û chuan,"An ni ṭhian ho hian nula rim tur pawh an hre lo a nih hi,keimah min rim ning tawh a niang,"a lo ti fiamthu ve hlut bawk a. Jo chuan,"Ni e ṭhianpa te farnu rim reng chu nuam lo e lawm,"tih pahin a lo nui ve hak hak a. Ka û chuan,"A nihchuan ka kalsan phawt ang che u aw,hlim deuhin in inkawm dawn nia. Mercy,muttui phawt aw,"tiin min pen san ta a. Mercy chuan,"Awle nan pawh muttui le,"a ti a,an In lam pan chuan kan in zui ta hlawm a.

Jo chuan,"I chhungte an muhil vek tawh a ngem?,"a ti kher a. Mercy chuan,"Aih mu lo ang anu leh apa an la meng ang,min lo nghak ṭhin a,"a lo ti vat a. Mawia chuan,"An fel hle mai a,"a lo ti sup a,Mercy chuan nui chungin,"Chutia mawn le?,"a lo ti ve mai a.

Mercy te In chu kan thleng phei ta,anu kha a lo la mut loh chuan zawhna engzat tak min zawt leh ang maw? Kei chauh lo pawh ka ṭhiante 2 pawh hi a zawt ve ngei dawn si a,a van huphurh awm tak êm! Mercy chuan kawngkhar chu a hawng a,kan zui lut ve ta ṭhem ṭhem mai. Ka rin ang ngei ngei in Mercy nu leh pa te chu sitting room-ah chuan an lo ṭhu dun leh khar mai. Mercy chuan,"E Nu,in lo la mu lo a ni maw? Zanin chu ka ṭhiante an rawn leng dawn a,"a ti nghal siam siam a. Mercy Nu chuan kan ṭhian ho chu min en uluk leh khawp mai,"Imm lo ṭhu rawh u,"a ti bul hmuk mai,phûr na zawng zawng a bo vek mai. Jo leh Mawia pawh an ṭhu ngawi kur mai a,"Ka han inthlak lawk nge aw,ka rei lo ang ka rawn chhukthla leh nghal ang,"tih pahin Mercy chu In chung lamah a chho nghal a.

Mercy nu chuan a âw a thian kharh kharh mai le,zawhna min zawt leh dawn a ni ngei ang,"Kan vengah in awm vek em ni?,"tiin bul a rawn ṭan nghal a. Jo chuan,"Aw awm vek e,"a lo ti nghal vat a,ka ṭhiante 2 hi ka ven viau loh chuan kan chhe chhia ang tih ka hlau khawp mai. Mercy pa erawh chu a ṭhu ngawi ngul mai a,an nêlawm loh nupa ve ngawt mai. Mercy nu bawk chuan,"Kawrdum ha kha hman zanah i rawn kal tawh a,i nu leh pa te pawh ka hre tawh a. Mahse,i bula mi 2 te kha chu ka van hmu ngai lo ve aw. An inkhawm vak ngai lo a niang maw?,"a ti leh a. Mawia chuan,"Nia inkhawm hi chu kan taima vak lova,"a lo ti ve vat a. Mercy nu chuan,"A nihchu maw le,tunge i nu leh pa te ni reng reng a?,"a ti leh a. Mawia chuan,"Aaa ka nu leh pa te hi chu thingtlang khuaah an awm daih a,keimah hi ka pi te bulah lehkha zirin ka rawn awm a. Ka pi chu Pi Khumi a nia,"tiin a chhang a,rin aiin a chhang ṭha phian mai hehe. Mercy nu chuan,"Pi Khumi chu sawlai a Puan dawr nei kha a ni em aw?,"a ti leh a,Mawia chuan,"Aw ni e ka nu nu a nia,"a ti leh a. Mercy nu chuan,"Anihchuan i nu chu Hmangaihsangi a ni em?,"a ti leh a. Mawia chuan,"Aw ni e,"a lo ti leh vat a,Mercy pawh a rawn chhuk thla ve thei hram e. 

Mercy a rawn chhuk thlak takah chuan, Mercy nu pawh chuan Mawia chu engmah a zawh chhunzawm tawh lem lova. Mercy pa chuan,"Keini chu kan lo va mu tawh mai dawn em ni? Ka kawngte hi a na riau mai ka ti,"tih pahin a tho ṭuih ṭuih a. Mercy nu chuan,"I duh leh lo va mu rih la,ka Anṭam tlak tur kha naktuk zingah chuan ka tlak hman lo palh ang,ka va tlak lawk a nge,"tih pahin choka lamah chuan a phei nghal a. Mawia chuan,"Ham strick hle mai,"a rawn ti zawi sup a,Jo lah chu a rawn nui huk a. Mercy chuan,"Ti ti bawrh bawrh ru aw,in ṭawng duh lo lutuk a nuam lo nia,"tih pah chuan a rawn nui sâng a. Jo chuan,"Ee ti daih i la khawi College ah nge i kal a?,"a rawn ti a. Mercy chuan,"PUC ah ka kal a,khawiahnge in kal ve zawk a?,"a lo ti ve vat a. Jo chuan,"HBC ah nia,"a lo ti leh vat a. Choka lam aṭang chuan Mercy nu chuan,"Mamte,i inleng te khan thingpui an in duh lawmni? Han lum sak ta che,"a rawn ti lâng lâng a. Mercy chuan,"Tikhan lo ṭhu ru aw,thingpui chu ka va lum lawk ang,"tih pahin Choka lamah chuan a phei nghal a.

Mawia chuan nui tut tut chungin,"Haireee,zanin bak chu kan leng tawh lo ang,"a rawn ti hlawl mai a. Jo chuan,"Zawhna a nghah khawp mai,"a rawn ti ve sup bawk a,kan 3 chuan kan kur kur a. Mercy chuan thingpui no 4 rawn chawi phei pahin,"Engnge in lo nuih kur kur bik a? Ka hre ve duh a nia,"a rawn ti nghal vat a. Jo chuan,"A ho lutuk hmeichhe hriat ve chi a ni lova,"tih pahin thingpui chu a lem ri khulh a. Mercy chuan,"Hmmp in van sual tak,"tih pah chuan a ner nung nung a. Mawia chuan,"In In chu a zau nuam hle mai,huau a ni ringawt a lawm,"tih pahin a nui suk a. Mercy chuan,"Chutia mawn le,in rawn leng ve duh a in fel khawp mai,"a lo ti ve bawk a. Jo chuan,"Eekhai keini ṭhian ho teh lul inleng ah min pawm duh hi kan lawm zawk a sin. Ani phei hi chu a lawm lehzual ngawt ang,"tih pahin ka darah chuan min rawn kuah a,"Nia ka lawm khawp mai,"tih pahin ka lo nui ve suk a.

KA LEI VANTIRHKOH - 4

BUNG-4NA

By:- Rs Thangluah{Remz}✍🏻






Zing lam dar 2.00am vel aṭang chuan mut chhuakin min rawn zêm ṭan a,Mercy pawh a chau ve deuh ni ngei tur a ni a zai ring peih vak tawh lo. Ka ṭhiante 2 lah chu ka hmu tawh miah lo leh nghal a,anni hian ngawi rengin min lo hawsan daih mawn le? Mercy chuan,"Va intiharh lawk i la,ka mut a chhuak dawn tlat,"a rawn tih takah chuan pawnah kan in zui chhuak ta a. Jo leh Mawia pawh pawnah chuan an lo awm ve reng a,"Message kha i hmu lo mi a?,"Jo chuan min lo nuih var var a,"Aih ka phone ka khawih miah lova?,"ka lo ti vat a. Mawia chuan,"Khi laiah khian zial han zu lawk i la,"tih pahin an chho nghal daih a. Mercy chuan min rawn melh a,"Han chho ve i la,in tih harh pah a ni mai lawm,"a lo ti a,"Nia pawi hleinem,chho i la,"ka lo ti ve vat a,ka ṭhiante 2 awmna lam pan chuan kan in zui chho ve ta a.

Pawnah chuan rei pawh kan awm lo,kan lut leh nghal a. Mercy erawh ruang awmna lamah a ṭhu phei leh thung a. Kan ṭhian ho erawh chu a hmaa kan ṭhutna ngaiah kan ṭhu phei leh a,kan chau tlang tawh a ni a nge kan zai pawh a dul raih tawh hlawm a. 

Zing khua a lo var ta,mitthi chhungte chuan mitthi chu kuang chhunga an dah hmain thla an lak pui sap sap hlawm a. Y.M.A ho chuan kuang an rawn zawn lut a,mitthi chhungte chu lungchhe takin an ṭap hawm hawm hlawm mai a. Hmuh leh ngaihthlak a van hrehawm tak êm! Mercy pawh a bang bik lo,Zualtei ruang chu a kuah a a ṭap hawm hawm mai a. Zing lam dar 5.30am velah chuan Zualtei ruang chu kuang chhungah chuan an dah lut ta a. Keini ṭhian ho pawh chu haw turin kan in buatsaih ve ta;mahse,ka û kha ka van theihnghilh teuh tak. Ka û bulah chuan ka va kal a,"Û,kan haw dawn a sin lo haw ve nghal la,"ka va ti a. Ka û chuan a mittui hruk chat chat pahin,"Aw lawk aw Mercy hi a la hman lo deuh a,"a lo ti a. Rei lo te kan nghah hnu chuan Mercy pawh chu mit sen râm chungin a rawn kal phei a,"Awii U Mawite,chaw ei turin min ti tlat a haw bik lo la,"a rawn ti a. Ka û chuan,"Aaa inbual te ka duh a sin,"a lo ti a,Zualtei nu chu a rawn thleng phei nghal bawk a,"Mawite,chaw ei ru aw saw chaw an chhum hnem lutuk a nia. Bawiha,nangni pawh ei ve nghal rawh u khawnge i ṭhiante 2 kha?,"a rawn tu nghal siam siam a. Kei chuan,"Aaa keini chu kan ei lo mai ang,ka û te hian ei rawh se keini chu a ngai lo nia,"tiin ka thiam ang tawk chuan ka lo hnial ve a. Zualtei nu chuan nui sâng chungin,"Chuti tur em ni? In lo inthlahrung a nge?,"a ti leh a,"Aaa inthlahrung hran lo e,zan lamah kan rawn lang leh zawk dawn nia. Kan haw phawt a nge,a nih chaw eitui u aw,"tiin ka nui ve suk a. Zualtei nu chuan,"Aww anih i tih tlat chuan nangni pawh chaw eitui u le,in fel lutuk a nia aw,"tiin kawngka bul thleng chu min thlah phei a.

Zan 1 leh tlaivar pawh a van chauh theih ngai ve le. Ka pa chuan,"Bawiha,thlan laihnaah i kal ve dawn em?,"a rawn ti a. Chaw ei mawlh mawlh pah chuan,"Ka hre lo le,"tiin ka lo chhang mai a. Ka pa chuan,"Chaw eikhamah khan insiam la,thlanmual lamah kal ang che aw. Keini pawh i nu nen mitthi In lamah kan kal a nge,"a la ti zui,ka pa thu ka hnial ngam si lo. Saturday a ni bawk si,nilenga mut ka chak a sin maw le. Ka nu chuan,"Nizan an tlaivar ve bawk sia,a chau lutuk a nge,"a lo ti hlauh mai;mahse,ka pa chuan,"Eee zan 1 tlai var te lek lek tlangval hrisel pangngai tan engmah a ni hleinem. Zan dangah pawh rei tak tak a meng ziah ṭhin tho a lawm,chaw eikhamah insiam la i kal dawn nia,"a la ti ṭalh a nia. Ka nu chuan engmah a sawi zui tawh lem lo,ka û pawh in tifai turin a rawn haw ve bawk a. Kei pawh chaw eikham chuan thlan lai turin ka in siam a,Jo leh Mawia chu ka sawm buai duh lo mai an peih tawh dawn chuang lova. Chuvang chuan keimahin thlanmual lam chu ka pan hnak hnak a.

Thlan laihnaah chuan mi kan ṭhahnem  khawp mai. Thingpui lum ringawt pawh kha 20 vel an niin ka hria,Zualtei thi chu tupawn kan ui vek mai niin ka hria. Thlan ko tlangah chuan ka ding ve ran mai a,1 a rawn chhuah veleh chuan,"Khawi ka lo lut ve tawh a nge,"tiin bawngtuthlawh chu ka lo lak sak vat a,ka zuang lut ve nghal thurh mai a. Ka lu chu na ngat ngat viau mah se,thlan khur aṭang chuan chhuah mai ka tum bik lo. Thlan tla hnup a ka laih hnu chuan,"Khawi ka rawn lut ve tawh a nge,i chau lutuk a nge. Nizan lamah i tlaivar bawk sia,rawn chhuak tawh la,"tiin min rawn âu hlawm a,"Aaa ka chau hleinem,"tiin ka in la tlawmngai lui a. Mahse,ka tlin ngang bik lo a ni e 20mins hnu velah chuan ka chhuak ve ta nge nge a. Kan Y.M.A hruaitu te chuan,"Eee i ti ṭha khawp mai,i fel lutuk a nia,"tiin min fak liam liam hlawm a.

Thlan lai tura kal chu
40 vel kan ni a,kan lai zo rang khawp mai. Thlan kan laih zawh meuh chuan ni pawh a lo tlang sang ta khawp mai,nula ho chuan thingpui an rawn sem sap sap hlawm bawk a. Thlan laihnaah hian ka vawikhat kalna a nia,ka rin aiin a nuam zek mai kal ziahna tlak a niin ka hria. 

Thlan lung 1 ngheng chuan ka ṭhu ngawi reng a,ka chau ve ngang a ni ang ka lo chhing sek hman a,"Heyy..ṭhianpa,..,"ka darah chuan min rawn sawi det det a,ka harh thut a ka hmaah chuan hmeichhe 1 hi a lo awm reng a,ka hmu thut chu ka phu nasa ngei mai. Ani lah chu a lo nui vur vur a,"Hei thingpui aw,"tih pahin ka ṭhutna bulah chuan a rawn ṭhu ve nghal a,"Thlan laihnaah i vawikhat kalna a ni maw?,"tih pahin min rawn nuih sun sun a,"Aww ni e,engtinnge i hriat a?,"ka lo ti vat a. A nui har har a,"Thlan laihnaah hian thingpui lum turin ka kal ziah ṭhin a,i hmel hi ka vawikhat hmuhna a ni miau a,"tih pah chuan a phone chu a hmet nuap nuap a. Nuih suk pahin Y.M.A thingpui no chu ka dawm a,"I van fel ve a,"ka ti a,thingpui chu ka lem ri nghal khawlh a. 

Kan chhak aṭang chuan,"An vui zo tawh a,ruang zawn turin In lamah a ṭhen kal i la,"an rawn ti lauh lauh a. Ka bula hmeichhia chuan,"Nang chu i hah e mai,kal ve lo mai rawh aw,"tih pahin min rawn nuih seih a,a duhawm reuh ngei mai. Mahse,Mercy aichuan a ṭha chuang lo,"Nia pawi chuang hleinem;mahse,khi lamah khian han chho ve i la he lai chu ni a sa e mai,"tih pahin ka ding nghal a. Ani pawh chu a rawn ding ve nghal a,"Khawi no kha ka lo keng ang,i hah hmel sia i khawngaihthlak reuh e,"tih pahin ka no ken lai chu min rawn lak sak a,daihlim lam pan chuan kan in zui chho hnak hnak a.


Chawhnu lam dar 1.30pm velah chuan ruang pawh chuan thlanmual a rawn thleng ve ta. Thlanmual lama rawn zui tu pawh an tam khawp mai,a nu ber kha ka khawngaih a fanu neihchhun a ni ve sia a van tuar na dawn tak êm! A ṭap hawm hawm reng mai a ni,thlanmualah chuan Mercy pa chuan vuina hun a hmang a Bible chang a chhiar zawg chuan,a ṭawngṭai zawh hnu chuan mitthi chhungte chuan Zualtei chu kumkhua atan an thlah a ngai ta. Rei tawk fang Zualtei nu chu thlan kotlangah chuan a ṭap a,a  pasal chuan a kuah a,"Tunah chuan natna awm tawhlohna hmunah hlim takin a awm tawh a lawm. In ti pachang hram hram la,kan haw a hun tawh a nia,"tiin a nupui chu a hnem malh malh mai a,chutia an in thlem hnu chuan an haw ve thei ta. Mitthi chhungte an kal liam hnu chuan Zualtei ruang engmah hre tawh lo chu an vur ta.

Tlai dar 3.00pm velah In ka thleng a,ka chau khawp mai. Ka nu chu amah chauhin a lo awm a,ka pa leh ka û erawh chu mitthi In lamah an la awm a. Ka nu chuan,"Bawiha,in bual fai la i mu vang vang dawn nia aw i chau dawn e mai,i ril a ṭam em?,"a lo ti nghal mawlh mawlh a. Ka nu hi chuan min duat ve ngawt mai,"Aih ṭam love ka inbual a nge,chaw ei dawnah min lo kaitho mai dawn nia aw,"tih pahin ka room lamah ka lut nghal a,ka inbual nghal sawk sawk a ka inbual zawh chuan ka mu nghal a,ka chau bawk a ka muhil hma khawp mai.

"Maw? Kei hi ka nu leh pa fa diktak ka ni lo maw? Chu chu engtinnge i sawi theih a?,"ka ti mawlh mawlh mai a. Ka bula hmeichhia chuan,"I awih loh chuan i nu leh pa saw zawt la ti nia,"tiin ngeiawm zet hian a nui a. Ka thu hriat chuan min ṭhawng khawp mai,"Tunge i nih reng reng a? Hetiang thusawi tur hian tunge i nih a?,"ka ti vin hrawk a. Chu nu lah chu ngeiawm zet hian nui har har mai a,"I nu leh pa te hian fapa an nei thei lova,chuvang chuan fa atan an la che a lawm,"tiin a nui zui leh har har a. Ka van haw tak,hnek chawrh mai chu ka duh a;mahse,hmeichhia kut han thlak êm chu ka hreh ve deuh bawk si,"Nangmah ngeiin ka nu leh pa bulah chuan i sawi ang,i ngam em? I ngam loh chuan dawt i sawi tihna a ni mai,"ka ti ve sak sak mai a. Chu nu lah chu a zam duh miah lo nia,"Tehreng mai i nu leh pa mak ti hmel vel tur ka hmu châk tawh,"tih pahin a hma aia uarin a nui awr awr a. Ka thin in a tuar ta lo,"Hmeli,tunah rawn kal rawh,ka nu leh pa bulah chuan sawi la. Lo kal rawh,nang aiin ka nu leh pa te hi ka ring zawk,"tih pahin,ka kai a ka kalpui hlawk hlawk mai a.

Ka bike chu ka ti nung a,"Rawn chuang rawh,ka nu leh pa te fa diktak ka nih leh nih loh chu kan hre khawp ang,"tiin ka tlanpui fua fua mai a. A duh aiin ka tlan chak deuh a ni ngei ang,"Bawihte,tlan muang deuh teh ka hlau a nia,"tiin ka kawngah chuan min rawn kuah a,"Hmeli,min rawn kuah hlek suh aw,min rawn kuah chuan a hma aia chakin ka tlan ang,"tih pahin a hma aia chak chuan ka phit vak mai chu(h),a hma aia nghetin min rawn kuah a,"Khawngaihin tlan muang deuh teh,"a rawn ti leh a,kei lah chu bengngawng ang maiin ka awm a. Ka speed chu ka thlah dul phah chuang lo,ani pawh chuan min kuah nghet khawp mai,"Suala,misualpa,"tih pahin ka nakah chuan min sik nawk nawk mai a,nâ ti viau mah i la ka hre lo der char char a.

Kan In kan thlen chuan zan dar 11.30pm a lo ri der tawh a,ka bike chahbi chu ka phawi a,"Chhuk rawh le,"tih pahin ka helmet chu ka hlip nghal bawk a,ani pawh chu thuawih takin a chhuk ve mai bawk a. A banah chuan ka kai sawk a,"Thudik chu kan hria ang aw,"tih pahin kan In chhungah chuan ka kai lut hlawk hlawk mai a. Ka nu leh ka pa chu sitting roomah chuan an lo ṭhu dun a,ka pa chuan,"Tunge a?,"a rawn ti nghal vat a,tun ang zan rei tawh a hmeichhia ka hruai haw chu mak ti takin min en hâ mai a. Ka nu chuan,"Bawiha,engnge thil awmzia?,"a rawn ti ve nghal vat bawk a. Ka thaw halh a,"He hmeichhia hian in fa dik tak ka ni lo tiin min hrilh a,"ka ti ta a. Ka pa chu a rawn meng kawk mai a,"Eng a ni? Tunge a nih reng reng a? Nang hi kan fapa chu i ni a lawm,"tih pahin min rawn pan hnai a. Ka hmeichhe hruai luh erawh chuan ka pa chu ngeiawm zetin a lo nuih a,"Dawt sawi kher a ngai mi? Ani hi i fapa a nih loh thu kha sawi mai la,"a la rawn ti ham ham zui a. Ka nu chu a ṭhutna aṭangin a rawn tho a,ka hmeichhe hruai hmaiah chuan a rawn beng sawk mai a,"I va han zaktheilo ve a,kan fapa hi kan fapa diktak a nih hi. I zaktheilo hle mai,"a rawn ti ve sak sak mai a,chu nu lah chu a zam duh reng reng si lo,"Fapa in awh êm avangin fahrah chawmna In aṭangin in la a nihkha,zep vak kher a ngai a mi?,"a la ti ham ham zui a. Ka pa chuan chu nu chu chiang kel kawl hian a melh a,"He In chhung aṭang hian chhuak nghal rawh. Police ka koh hma in,"a rawn ti ve leh a,chu nu lah chuan zam hauh lo in ka pa chu a melh a,"A ṭha lawm police chu ko ta che. Tichuan,keiin i fapa nen in DNA ka lo test ve thung ang. Tichuan,thudik chu a lang mai dawn a lawm,"a ti a,ngeiawm zet in a nui zui awr awr a. Ka pa chuan,"A nihchuan khawngaihin min chhuahsan thei tawh a ngem?,"a rawn ti chuai raih a,ka pa hmel chu a hlim lo takzet a ni. Kei hi an fapa diktak chu ka ni lo tihna em ni le? Ka nu chu ka en a,a biangah mittui a lo luang ngiai ngiai a,"Bawiha,miin i bulah eng thu pawh sawi se kan fapa i ni tih hre reng ang che,"tiin min rawn hnaih a. Kei chu ka lo tawlh hnung hret thung a,"Ni lo,kei hi in fapa dik tak chu ka ni lo. Kei hi fahrah In aṭanga in lak chu ka ni tiraw? Thudik ka hre duh,"ka ti vin tuarh tuarh mai a. Ka pa chuan,"Bawiha,kan fapa i ni a lawm,kan fapa diktak i ni a lawm,"tiin ka kut chu rawn vawn a tum a.,"Ni lo,kei hi fahrah ka nih hi,thih ka duh,"tiin kan In aṭang chuan pan lam tur pawh hre lovin ka tlan chhuak ta chiam mai a. Ka nu leh ka pa chuan min rawn umzui ngei mai;mahse,ding turin chakna ka nei lo. Tlan tur erawh chuan chakna ka nei a ni,ka hma zawnah chuan ka tlan pur pur mai a khawi lam nge ka pan tih pawh ka hre lo.

Kei hi fahrah maw ka nih? Tu te nge ka nu leh pa te chu? Min hring sauh sauh a tinge fahrah Inah min hnutchhiah leh si? Ka thinlungah chuan zawhna tam tak a rawn lut nghal zut zut a,thui fê ka tlan hnu chuan Mercy nen kan in hmu hlawl mai a.

KA LEI VANTIRHKOH - 3

BUNG-3 NA

By:- Rs Thangluah{Remz}✍🏻

Mawia leh Jo chu an phur tawh khawp mai,kei erawh ka phur ve tehchiam lo. Jo chuan,"Zanin chu aww tlanchhiat awih loh,"tih pahin Kzp a rawn chhawng va mai a,"Eee mipa ka ni a lawm,ka tlanchhe dawn lo reng reng. Min lo duh lo a nihpawn ngai kan awh a ni leh mai a,"ka lo ti ve ngei a. Mahse,ka rilru tak chuan ka huphurh khawp mai,"Nia mipa chu a tlanchhe ngai lo,"Mawia chuan a rawn ti ve bawk a. 

Ka ṭhiante 2 chuan last period an la neih vangin ka haw san ta a. Ka û nem chuan damlo kan turin damdawiin lam kan pa phei ta a,damdawiinah chuan mi an lo tam khawp mai. Ka rin loh leh beisei loh deuhin khanu kha ka hmu ve hlawl mai,ka û chuan chu nu chu a va be vat a,"Engnge chanchin?,"tiin a zawt nghal a. Chu nu chuan,"Aaa engmah a la ang thei lo,tunah chuan oxygen an pe a mek a,"a lo ti a,kei lah chuan eng dang mah ngaihtuah lovin ka lo thlir leh dauh dauh pek a. Ka û chuan min rawn nghawk sawk pahin,"A nih chu a va zia lo ṭhin ve aw,tunah chuan luh an phal rih awm si lova,"a ti zui mawlh mawlh a. Lalhmelṭhai chuan nui sâng chungin,"Phal e lo kal u la,"a lo ti vat a,"Aa keichu ka rawn kal ve lo mai ang,tah hian ka lo awm a nge,"tih pahin ka bula ṭhutna âwlah chuan ka ṭhu a. Ka û chuan,"Nih min lo nghak char char rawh aw,ka rei lo ang,"tih pahin Lalhmelṭhai chu a zui phei nghal a.

Tlai lam dar 3.30pm velah chuan kan damlo kan te cabin lam chu an ri huk mai a,a ṭhen an ṭap a. Doctor leh nurse ho chu an rawn tlan nghal ṭuk ṭuk bawk a,ka û te pawh chu an rawn in zui phei ve leh bawk a,"Ngatinge a?,"ka lo ti vat a. Ka û chuan,"A thawk a buai deuh a,"tiin min chhang a. Lalhmelṭhai chu a in hnit faih faih a,ka û chuan a kuah a,"Ṭap bawrh bawrh rawh,in sûm miah suh,"a ti zui mawlh mawlh bawk a. Rei lo te hnuah chuan Zualtei thih thu chu kan hre ta,damdawiin chhung chu ṭap thawmin a khat a ni ber mai. Nurse ho pawh chu an ṭap ve hial mai,ka û chuan,"Mam,ka pa te kha zu be nghal rawh. In lam kha lo in sing sa turin hrilh la aw,"tiin min hrilh nghal a. Pawn lamah ka chhuak a,ka pa te chu ka be nghal vat bawk a.

Ka û pawh chu a in sûm reng thei tawh bik lo. Zualtei nen khan an inkawm ve nasa êm bawk a tin ni,Lalhmelṭhai nen chuan an in kuah a an ṭap hawm hawm mai a. Hnem dan tur ka van thiam lo tak êm,hmeichhe ṭap hrim hrim hi ka hnem thiam lo a ni tawp mai. Ka û te ṭhutna bulah chuan ngawi rengin ka va ṭhu ve ta ringawt a.

Jo chuan min rawn call a;

"Aww Bawiha,"

"Zanin chu mitthi Inah kal ve i la,"

"Nia mahse,Mawia nen kan in chawi kha,"

"Mawla,tun angah khatiang tihna boruak pawh a nih loh hi. In siam la kawnah kan lo nghak ang che,"

"Awle nih ka lo kal ang,"

"Awle."

Mitthi Ina kal tum chuan ka insiam ve mawlh mawlh a. Ka pa chuan,"Bawiha,zanin i tleivar ve dawn em ni?,"a rawn ti a,"Aww ka zu tleivar ve a nge,"ka lo ti vat a. Ka nu chuan,"A ṭha lawm kal ve rawh se;mahse,midang tan hnawksakin awm lo la. Pawnah ṭhu mai mai lovin In chhungah awm tam ang che,"tiin min lo hrilh nghal mawlh mawlh bawk a. Ka pa chuan,"Ni e i nu thusawi hi vawng reng ang che,i haw dawnah i û kha rawn ngaihven deuh la aw,"tiin min chah leh a,"Awle nih ka kal aw,"ka ti a,ka chhuak nghal a.

Mawia chuan,"Zualtei chu ka ui ngawt mai,kan veng nula fel kan chân chu a ni mai sia,"a rawn ti ve hlawl mai a. Jo pawh chuan,"Ni e Zualtei te ang nula fel hi chu an vâng tawh viau ang. Kan duh duh a kan fiam ngam a ni ve bawk nen,ka ui ve khawp mai,"a lo ti ve bawk a. Ni e,Zualtei hi chu a uiawm ve khawp mai,kohhran leh khawtlang ah a theih tawpin a in hmang ve ṭhin a. Mi nunnêm leh in ngaitlawm em em mai a ni ṭhin a,kan veng tan chuan chân na nasa tak a niin ka hria.

Zualtei te Inah chuan mi kan tam khawp mai,keini pawh ṭhutna awl remchangah chuan kan ṭhu lut ve nghal a. Duh aiin kan kal hma hret a ni;mahse,a pawi lo a nuam daih zawk. Nu leh pa ho tam tak an la awm nuk bawk a,ruang awmna lamah chuan ka û pawh ka va hmu ve vang mai. Ka tleitir hmelṭhai pawh a lo awm ve bawk a;mahse,a khât tawkin a ṭap reng mai. Mawia chuan min rawn kheuh zauh pahin,"Hawi hu hu lo khan zai ve rawh,"a rawn ti zauh a,ka lo nui suk ringawt a.

Zan dar 10.00pm vel aṭang chuan tleivar tur ho ṭhalai chu an rawn lut ṭak ṭak hlawm a. Keini ṭhian ho erawh dar 8.00pm vel aṭangin kan lo zai tawh a,kan mark erawh a ṭha phian in ka ring a ni. 

Zan dar 11.30pm velah chuan ka û chuan min rawn kheuh zauh a,"Mam,bike i rawn keng em?,"a rawn ti sar sar a,"Aw keng e tinge? I haw duh tawh mi?,"ka lo ti vat a. Ka û chuan,"Aih duh hran love,ka tir lawk duh che a min rawn zui chhuak lawk mai teh,"a ti a,a kal nghal daih a. Kei pawh chuan ka û chu ka zui ve nghal a,pawnah chuan Lalhmelṭhai nen chuan an lo ding ran tawh mai a,"Aw engnge ni a?,"ka ti nghal ngawt a. Ka û chuan,"A inbual lawk duh a,an Inah han kal pui lawk ta che aw,"a lo ti a,Aw Lalpa le(h) ka lawm rual rualin ka va zâm si êm,"Awle kal i la,"ka lo ti ve nghal vat a. Ka û chuan,"In lo chhukthla rual leh mai dawn nia aw,"tiin min chah zui a,"Awle,"tiin ka lo chhang vat a.

"U Mawitei nau maw i nih a? Tunah khan ka hre ve chiah,mak e,"a rawn ti nghal mawlh mawlh a. Kei chuan nui chungin,"Aw ni e in ang lo min ti a ni maw?,"ka lo ti ve nghal vat a. Lalhmelṭhai chuan,"Aaaih ni lo e,chutiang lam pawh a ni chuang lo. Ka hmu ngai lo che êm a,"a ti bah deuh niai a,"Nia Inah ka awm tam vak lova,"ka lo ti mai a.,"Eeee i hming min hrilh la,keichu Mercy ka nia,"a rawn ti a. Ka van hlim tak êm! Ka zawh ngai miah lovin a hming min hrilh a,"Aaa keichu..,"ka sawi zo hman lo,kan hma a motor tlan chu a ding thut a ka in rin hman hma hauhin a break chu ka hmet thut mai. Mercy pawh a in ring hman lo a ni ngei ang,"Awwiii engnge ni ta?,"tih pahin a hnute chuan ka hnung a rawn do lah mai a"Ka hre bik lo,i ṭha em? Ka tihpalh aw,"ka ti nghal mawlh mawlh mai a. Mercy chuan,"Aaa aw ka ṭha e,"a lo ti vat a,"Engnge ni a? Ka pu,"tiin ka hmaa putar chu ka zawt a. Chu pa chuan,"Sawlai kawiah chuan bike leh taxi an in tai deuh a,"a lo ti mai a. Rei vak loh kan din vang vang hnu chuan kan kal tlang ve thei ta hram a.

Mercy te In chu kan thleng ta,ka hming pawh chu min zawt chhunzawm lem hlei lova. Ka tan han sawi ṭhat leh kha a nuam tawh bawk si lova,ka ngawi reng ringawt a. Ka bike chu ka ti thi a,Mercy pawh chu ka bike aṭang chuan a chhuk thla nghal nalh a,"Lo lut ve la,pawna awm reng chu nuam awm lo e,"a ti a,a nui sen sen a a van hmelṭha thei tak e aww. Ka bike chahbi chu ka phawi a,"Nia pawi hleinem,"ka ti a,kan in zui lut nghal a.

Sitting room-ah chuan Mercy nu leh pa chu an lo ṭhu a. Mercy pa chuan,"Ee Mamte,i lo va haw hma ve tinge a?,"a lo ti nghal vat a. Mercy chuan,"A lum lutuk a inbual harh ka duh a,hei U Mawitei nau hian min rawn hruai a kan chhuk thla leh ang,"a ti nghal vat a. Mercy pa chuan min rawn melh a,"Ee i va fel ve a,lo ṭhu rawh,"tiin ṭhutna te min kawhhmuh nghal a. Mercy chuan,"Ka han inbual lawk nge aw ka rei lovang,"tih pahin In chung lamah chuan min chhoh san nghal daih a. Mercy nu chuan,"Pu Dailova fapa i ni ang maw?,"a rawn ti a,"Aw ni e,"ka lo ti ve vat a. Mercy nu chuan,"A nihchu i pa te an damṭha maw?,"a ti leh a,"Aw damṭha e,"tiin ka lo chhang leh mai a. Mercy nu chuan min en uluk khawp mai,ka ke ler aṭanga ka chhip thlengin min chhinchhiah tum ni âwm takin min en ngun a,ka zam lek lek mai. Mercy pa erawh chuan ngawi rengin TV a en thung a.

"Lehkha te i la zir em?,"Mercy nu chuan a rawn ti leh a,"Aw zir e,"tiin ka lo chhang leh mai a;,"Engnge i zir thlen tawh a?,"a la ti leh zel nia,huiham zawhna a van ngah tak ém! ,"B.A 1st Sem,"ka ti leh a,"A nih chu eng subject nge i lak a?,"a la ti leh zel nia,"Arts ka la a,"huiham,Mercy em em pawh hi a van inbual rei tak ém! Mercy nu chuan a duhtawk tawh dawn emaw ka tia,a la duhtawk lo,"I inkhawm ngai vak lo a ni maw? Biak Inah i hmel hmuh tur a vâng e mai,"tih pahin a nui suk a,"Nia khawm ngai vak lo,"ka lo ti leh mai a. Sana ka bih chhen tawh mai,Mercy pa chuan,"Mamtei pawh chu a va rei ṭhin ve aw,"a rawn ti ve ta,ka van lawm tak ém. Mahse,Mercy nu bawk chuan,"Aww nula a ni ve tawh a lawm. Nula chu an inbual chhung a rei ṭhin a lawm,hei a la hma e mai,"a lo ti la ti zui,ka van ngei tak êm! Mercy nu chu ni lo se,ka chhuah san daih tawh ang maw le.

Rei tawwwk ka nghah hnuah Mercy pawh a rawn chhuk thla ve ta. Aw Lalpa,a van hmelṭha chiang kuang tak êm! A rawn nui var var a,"Min lo nghak rei tawh em?,"a rawn ti nghal vat a,"Rei lo e,"ka lo ti ringawt a. Mercy nu chuan,"Thingpui in phawt u la,"a la rawn ti,hei ham,"Aaa keichu ka in châk lo a nia,"ka lo ti vat a. Mercy pawh chuan,"Nia Nu,kan kal mai ang min lo nghak duh lo mai ru aw,"a lo ti ve bawk a,ka van lawm tehkher ve le. Mercy nu bawk chuan,"Awle nih kawngka kan lo kal mai ang aw,"a rawn ti a,"Aw lo kalh mai ru,bell ka rawn hmet mai ang,"a ti a,kan in zui chhuak leh ta. Pawn ka thleng chu ka thaw huai mai,"I ning deuh tawh ni maw?,"tih pahin a nui sen sen a,"Aih ning lo e,"ka lo ti ringawt a. Ka bike chu ka ti nung nghal a,Mercy pawh chuan engmah a sawi chhunzawm tawh chuang lo. Ngawi rengin mitthi In lam pan chuan kan in phur thla leh lawp lawp mai a.

"Ruang bulah mi i ṭhut leh dawn?,"ka ti a,ka bike chu ka hung rem nghal a. Mercy chuan,"Aa ka hre lo le,i bula ṭhut i phal chuan i bulah ka rawn ṭhu ve mai ang,"a lo ti a,a nui sâng a. Ka rin loh leh beisei loh deuha min chhan vang chuan sawi mai tur pawh ka hre lova,"I bula ṭhut chu i phal lo mi?,"a rawn ti leh a,"Aaa aw phal e phal e,"ka lo ti nghal mawlh mawlh a,"Nihchuan lut i la,"a ti a,kan in zui lut nghal a. Ṭhutna âwl ah chuan kan ṭhu dun ve ta ran mai;mahse,ka zai ring ngam ta lo. Ani erawh chu tui takin a zai a,kut a beng bawk a kei erawh ka khawr ṭut mai. Ka zahzel chuan ka phone chu ka phawr a,whatsapp chat ka check nghal a Jo leh Mawia message a lo awm reng tawh a.

Jo message;

"Eisss in va thang rei ta ve a,kidnap i tum mi?🤭,"

Mawia message;

"Yooo...in rei tawh khawp mai aw,i hruai kual vak a mi a?😆,"

Ka chhiar lai mek chuan Mawia message chu a rawn lut leh nghal a,"A bulah te i ṭhu ngam tawh a ni maw? Hma i sâwn lutuk e,fighting💪🏻,"

Hepa tak hi chu aww,naktukah min chhaih leh ngei dawn a nih hi. Tu mah mah chu ka reply lova,ka out leh nghal a zawi te te in ka zai ve sep sep a.

KA LEI VANTIRHKOH - 2

BUNG-2 NA

By:- Rs Thangluah{Remz}✍🏻

(R'z Thangluah tho kha ka ni a nia,min lo hai su aw hehe. Ka hming ka thlak ringawt a nih hi aw.)

Thla 1 vel zet zawt rui lo hai lova ka awm chu ka chhungte pawh an lawm khawp mai. Mahse,ka rilruah ruih châkna chu a rawn lian leh ṭan ta. Zan chhuah ka chîng ṭan leh tawh a;mahse,ka chhungte chuan min la khap hran lo. A chhanchu ka mark a ṭha tawh tlat a ni,kei lah chuan chu chu remchangah la in sual kawng zawh nan bawk ka hmang leh ta si.

"Bawiha,i star deuh khan bialpa a neiin ka hria,"Jo chuan a rawn ti a. Ka awih chiah loh vang chuan ka nui suk ringawt a,"I awih lo mi? Niminah pawh an in phur ka hmu,"a ti leh a."Aww awih vak lo e,"ka lo ti mai a. Mawia chuan,"I awih loh chuan kan va leng chhin dawn mi?,"a lo ti ve bawk a. Jo chuan,"Nhaaa chi loh lutuk a,an ni ang Ina leng phak kan nih loh hi thil dang sawi ang u,"a rawn ti daih thung a. Kei pawh chuan engmah ka sawi chhunzawm duh lem lova,Mawia erawh chuan,"Aww engnge pawi? Engnge hek? Engnge har? Hmeichhia chu rim thiang vek a lawm an nih,"a la ti leh hram a. Jo chuan,"Rim te chu thiang e;mahse,phû loh pui rim chu a tih chi vak loh ang. Chu aichuan a free a zu min pe tu tur ka hria a nia,"a rawn ti nghal mawlh mawlh a. Mawia chu a phur leh ta khawp mai,"Yess khawiah? A chhelo em?,"a ti nghal zawt zawt a,kei lah chuan,"Jo hian hmeichhe hmelṭha hmelhriat a nei ngai lo,"tih pahin ka lo nui hak hak a. Jo chuan,"Kal i la in hre mai dawn lawm,min rawn zui rawh u,"tih pahin a bike chu a ti nung a,Mawia chu ka phur a kan zui ve nghal a.

Zan dar 11.30pm velah kan In chu ka thleng a,pawn aṭang chuan ka en a ka pa te room chu a lo la êng a;min lo la nghak a ni tih ka hre thei nghal mai a. Ka iptea Silver Pearls chu ka ei nghal mawlh mawlh a,chhuan lam tur ngaihtuah zui mawlh mawlh chungin thawm dim thei ang berin kan kawngkhar chu ka hawng ta a. Mahse,sitting room-ah chuan ka nu leh ka pa chu an lo ṭhu ran tawh mai a. Ka pa chuan min lo melh rum khawp mai,ka nu erawh a mit a sen râm mai a. Ka ngawi reng a,kawngkhar bulah chuan ka ding zum zut ringawt a. Ka pa chu muang changin a rawn ding a,"Rawn phei teh le,"a ti zawi sup a,ka van huphurh tak ém! Zawi muangin ka pa chu ka pan phei a,ani lah chuan a hnar a lên vut vut mai bawk si. Ka mitah tak min en a,"Zan rei tak tak thleng leng tawh suh ang che. I nu hi en teh,nangmah vanga a rilru hah zia te hi hre ve ta che. Zan dangah chuan  ti nawn tawh suh ang che,va mu rawh,"a ti hmarh hmarh mai a. Ka kâ ka âng ngam tawh lo hrim hrim,ngawi rengin thinphu dep dep chungin ka room lam chu ka pan phei nghal a.

Rilru mitthlaah khanu bawk kha a rawn lang leh ta. Ngatinge maw ka vei tak em em mai le aw,ka van hrethiam lo tak ém! Hmeichhia vanga buai hi ka duh lo a sin maw le;mahse,tunah erawh hmeichhe pakhat vangin ka mut mu pawh ka tuah thei lo chu a ni ta si. Hmangaihna khurah ka tla lut ve ta zawk em ni le? 

(Khawngaihin website a fakna awm hi lo click ve ta che.)

"Eksek,zanin chu rawn leng ve tawh la,"ka kutah chuan a vuan a. Ka lo nui ringawt a,"Mawwwh,rawn leng ve tawh la. Khapa kha a rawn leng reng a,ka ning teh mai nia aw,"tih pahin a ner nûng nûng a,a van duhawm ṭhin tak êm!"I pa in min melh rum lutuk palh ang,"ka lo ti vat a,"Hmm a fanu naupang ber ka ni a,ka hlimna anihchuan engtinmah min ti lo ang,"a lo ti vat a,ka darah chuan a lu chu a rawn nghat a,"Ka hmangaih che,tuman min ṭhen hrang thei lo ang,"a ti sep sep a. A van duhawm tak êm!,"Keipawn ka hmangaih che lawm,"tih pahin a chalah chuan ka fawh sak zauh a,ka kuah nghal vawng vawng a. A pangti lum vung vung chu ka hre thei a,"Ka hmangaih che,"ka ti zawi sap a,a khabe ah ka dawm a a hmui sen tai tekah chuan fawh tumin ka kun hnaia,"Heyyy harh teh,class ṭan a hun ṭep nia,"tu emaw chuan min rawn sawi nawk nawk a,"A va mak tak,min lo tibuai suh,"ka lo ti ve ngawt a. Min lo ko tu lah chuan min dim lo khawp mai,"Mawla,harh rawh a tlai tawh,"tih pahin min rawn sawi nawk nawk a,ka meng chu ka ṭhianpa Jo a lo ni reng a,"Heyy engnge ni vak vak a? Ka kiss teuh teuh nen,"tih pahin ka blanket chuan ka in khuh leh rih a. Jo chuan,"Vawiinah test tur kan neih kha,tho vat mai teh,"tih pahin ka blanket sin lai chu a rawn pawt hlim nghal a,"Tu maw i kiss teuh deuh chu?,"tih pahin a la nui hak hak zui a.,"Lulian,ka mumang i ti khawlo zo vek. Ka van ui tak a hmuiah ka fawp dawn chiah a sin le,"ka ti leh nang nang a. Jo lah chu a lo nui nasa mai,"I va hahthlak tak e aww,tho vat mai teh. 1st kan nei a nia,"a ti leh a,"Zaninah i mumang buai ve vek rawh se,nhaaaa ka van ui tak,"tih pah chuan ka in dawm kun tlawk tlawk mai a. Jo chuan,"I va ho e aw mumang mai mai a nihkha,in ti fai la in siam rawh. Sitting room ah ka lo va nghak ang che,"tih pahin min chhuah san nghal a. Aw Lalpa,ka van ui tak êm! Ka fawp hman ṭep a sin maw le,Hmela vang vek ka ui lutuk.

Kan test tur chu ka thiam lo mai ni lo in,kan test dawn tih pawh ka hre lo a ni. Ziah tur ka hre lo chiang khawp mai,ka pen hmawr chu ka seh ka seh ringawt mai a. A tawpah Jo chuan,"Heyy rawn copy rawh,tlaw lutuk mai,"tih pahin min rawn kheuh zauh a. Jo paper a mi chu ka copy nghal zar zar a,a dik leh dik loh pawh ka hre lo ka copy ve tawp mai a ni. 

Mawia chuan,"Zanin chu lenna tur ṭha deuh ka hria nia aw,"a rawn ti ham ham a. Jo chuan,"Hre mawng leh awm e mai a,"a lo ti vat a,kan nui dar dar a. Mawia chuan,"Mawng tawh lo e nizanah Whatsappah kan inbia a,a chhelo rups hei en mah u la,"tih pahin a phone a hmeichhe 1 thlalak chu min en tir nghal a,"Bawiha,tunlaiah chuan camera te a ṭha tawh a. Hmeichhe ho phei chu a takah aiin thlalakah an hmelṭha zawk zel a nia,"ka lo ti vat a. Mawia chuan min melh rum mai mai a sin,"Ve a che aw,a chhelo ka tih chuan a chhelo a ni mai. Zaninah kan kal a nga i hre mai ang,"a ti vei pang pang a,kei lah chu ka nuih hak hak thung a,"Nihchuan in chawi i la,"ka ti vel a. Mawia chu a lo phur khawp mai,"I ngam ngam ka ngam,"a la ti zui. Jo chuan,"In van ho mai mai tak e aw,khawi vengah nge an awm hrim hrim a?,"a rawn ti a. Mawia chuan,"Venghluiah an unauin In an luah a,"a lo ti vat a,Jo chuan,"Nia a mawng tawh lo a nih chu,kan leng dawn nia,"a lo ti ve vat a. Kei lah pek chuan,"Nizan aṭangin in inhre chauh a,zaninah i rim nghal dawn maw? I che rang mah mah lo maw Bawiha?,"ka lo ti ve leh thung a. Mawia chuan,"Hmanhmawh a ngai a lawm,a nih loh chuan dear ex khan min rawn beisei reng a ka nêm leh ang tih ka hlau a lawm,"a lo ti nghal vat a. Jo chuan,"I ex kha chu sawi tawh lo teh,"a lo ti hmuk a.

Zan riah chaw ei kham chuan hreh tak chungin ka pa chu len ka dil leh ta,"Pa,zaninah len i phal em?,"tiin inthlahrung tak chuan ka dil a. Ka pa chuan ngawi rengin min en vang vang a,"Khawiah?,"a ti bul hmuk a,"Venghluiah a nia,"ka lo ti vat a. Ka pa chuan,"Dar 10.00pm hmain rawn haw ang che,zu rim rawn nam haw lo bawk la,"a ti leh a. ,"Awle pa ka hria e,dar 10.00pm hma in ka rawn haw leh ang. Nih ka kal aw,ka ṭhianten min nghak tawh sia,"ka ti a,ka bike chahbi leh helmet chu ka la a ka chhuak nghal a.

"A lo hmelchhiat viau chuan engnge i chawi ang le?,"tiin Mawia chu ka nuih vur vur a. Mawia chuan,"Ve che aww,i ngam ngam ka ngam ka tih kha,"tih pah chuan a nui hak hak a. Kei chuan,"Awle a lo hmelchhiat viau chuan zaninah haw pahin i ex te gate i zun khum ang aw,"ka ti a,ka nui ṭiah ṭiah mai a. Mawia chuan,"Aww tehreng e le,a lo hmelṭha viau dawn sia. Nang chuan i star deuh kha i bem ang,"a ti ta mai,"Kan kohhran upa fanu kha maw?,"ka lo ti hâ mai a. Mawia chuan,"Aww ni e i ngam em? A nih loh chuan naktuk ah kan miss scooty number plate ah 'KA STAR CHE' tih i bel ang a,i hming i ziak lang bawk ang,"a ti ta mai. ,"Nhaaaa i phakar e nang chu gate zunkhum ringawt a nia,a har lo e,"ka ti nang nang a. Jo chuan,"Buai suh Muankerangi ten an gate bulah CCTV camera an vuah vek,"a lo tih takah chuan ka thaw huai mai,"Awle nihchuan i online chass chu a lo hmelṭha viau anihchuan,kan kohhran upa fanu chu ka bem ang,"ka ti ve ta ṭhuai mai a.

---

---

Mawia bialnu te In chu kan thleng ta,awithaww ka rin aiin a lo hmelṭha daih mai a. Mawia chuan whatsappah min lo text nghal,"Naktuk zanah i hun aw😆😝,"a rawn ti heu mai. Chhan pawh ka chhang lo,tui lo zetin a bialnu te ṭhutthleng seiah chuan ka ṭhu ve ran mai a. Jo lah chuan whatsapp ah,"Naktuk zan chu aw🤣,"a rawn ti ve leh bawk a,ka van ngei dun tak e aww.

Dar 9.30pm velah chuan kan haw ve thei ta hram a. Mawia chuan nuam a ti hle mai,"Kan inchawi kha aw,naktuk zan chu i bem ngam ang maw?,"a ti ham ham reng mai a. Jo lah chuan,"Ni e i bem ngei ngei a ngai nia aw,mipa in ka ti ang a tih chu a ti tur a ni,"a lo ti ve bawk a. Tih ngaihna ka van hre lo tak êm aw,"A hming pawh ka la hre lo a nia,"ka ti leh ringawt ṭhin a. Mawia chuan,"Keiman ka hria lawm lungngai suh,"a lo ti leh vat a,Jo pawh chuan,"Kei pawn ka hria i hre duh em?,"a lo ti ve ham ham bawk a. Ni e khanu kha kan veng chhung mi mah ni se,ka hre ngai tlat lo a ni. A chhan chu,hmeichhe ngaihsak lo mi tak ka ni ka tih tawh kha. Kan vengah hian hmeichhe hriat ka ngah vak lo khawp mai,ka cousin te bak hi chu ka hre vak hlawm lo. Mawia chuan,"Naktuk zan chu rui lo hai lovin kan leng ang,"a la ti zui,"Harhfim in ka leng ngam teuh lo mai a,"ka lo ti vat a. Jo chuan,"Mipa i ni lo mi? Mipa chuan hmeichhia a bem dawnin harhfim in a bem ngam tur a ni. Zanin pawh tumah kan ruih loh hi,naktuk zan pawh tumah kan rui lo ang,"a lo ti leh hmak hmak mai a. Ni e Jo hian a sawi dik a ni,ka ṭhiante 2 hian zu chu duh ve viau ṭhin mah se,rui chungin hmeichhia an be ngai bik lo. Mahse,naktuk zan chu thih hrehin ka hreh a ni.

"Mam,vawiin class i bang hma ngem?,"tiin ka û chuan min rawn zawt a,"Imm vawiin chu last ka nei lova,ka rawn bang hma ang. Tinge?,"ka lo ti vat a. Ka û chuan,"I lo ban hma dawn chuan Zualtei damlo han kan ve zawk i la ka ti deuh a,"a lo ti leh a,"Nia pawi chuang hleinem,kan kal phawt nge aw,"tih pahin helmet leh bike chahbi ka la a,ka chhuak nghal a.

Bung 1-na