WORLD CUP THLIRLAWKNA GROUP 'C'

- Hmaa Hauzel
Columnist, www.tleirawl.in

Group C-ah hian team ţha ber pawla ngaih France chuan Australia, Denmark leh Peru te an awm tlanpui a. Kum 1998 World Cup champion France hi awlsam takin second round luh theih a rinawm a. Australia, Denmark leh Peru te zingah hian tuin nge France hnung zui thei ang tih chu thil hriat chakawm tak a ni a. Heng team thumte hi an inhnehtawk hlawm hle a rinawm. 101 Great Goals predicts chu tiang hian Group C a mite an inhnehkual a ring; France 3-0 Australia, Peru 1-1 Denmark, France 4-1 Peru, Denmark 1-1 Australia, Denmark 1-3 France, Australia 1-1 Peru.

Group C hian danglam bik tak a nei a, France tih loh team thumte hi playoff hmang veka tling a, World Cup khel phakte an ni a. Playoff winer group a tih theih hial awm e!

*France*
France hi khawvela player nei ţha ber pawl an ni hial ang. Position tinah an ţha rual em em a, Pogba, Griezmann, Mbappe te bakah Kante te an neih miau vangin Russia World Cup-ah hian an champion em lo a nih pawhin an thleng sang pawl tak an nih erawh a rinawm thung.

Player nei ţha tak an nih laiin France hian rin loh taka chetsual khut erawh an ching ve viau thung lawi a. 2016 khan an tualzawlah ngei Euro-ah champion theihna hun ţha tak an neih laiin Portugal hneh zolovin an tlawm a. 2002 leh 2010-ahte Group stage paltlang zo lovin an tla ri ngawt a. 2014 World Cup-ah erawh quarter final an thleng leh thung a, champion team Germany hneh lovin semi final an lut zo lo thung.

France manager Deschamps chuan Real Madrid striker Karim Benzema a ko duh lo chhunzawm zel a. Benzema bakah hian player ţha taka ngaih Arsenal striker Alexandre Lacazette leh Manchester United forward Anthony Martial te pawhin hmun an chang phak lo bawk a. Hliam vangin Dimitri Payet pawh a inlan dawn lo bawk a. Arsenal defender ţha tak Laurent Koscielny pawhin hmun a chang phak lo leh zel bawk a. France tana hmun chang phak lote en hian France hi team ţha tak an ni tih hai rual a ni lo.

France tan hian Kylian Mbappe (PSG), Antoine Griezmann (Atletico Madrid) leh Paul Pogba (Man United) te chu an player pawimawh zual tura ngaih a ni a. An forward Mbappe hi Russia World Cup-a player naupang ber dawttu a ni nghe nghe a. Anni bakah hian player hrawl tak tak an la kawl khawm ruih bawk a. Position tinah an ţha ber ber an kawl khawm a tih theih awm e!

*Australia*
A vawinga nana World Cup khel tur Australia hi direct in tling zo lo mahse playoff-ah Hondurus chu Mile Jedinak hattrick siam hmanga  3 - 1 a hnehin World khel turin an inhlangkai. World Cup khel tur zawnnaah Everton player hlui Tim Cahill a thawhhlawk leh pek hle a, Cahill hian goal 11 ngawt a thun a, Russia World cup-ah pawh an senior player Cahill hi an inngahna pawimawh tak a ni leh ngei ang.

Socceroos hian kum 2014 World Cup-ah khan point khatmah an hlawhchhuak zo lova,Holland, Chile leh Spain te lakah tlawm vekin an mualpho chiang viau a. Russia world cup-ah hian insiamţhat ngei an tum dawn a ni. Australia tan hian Mile Jedinak (Aston Villa), Tim Cahill (unattached) leh Aaron Mooy (Huddersfield) te chu an player pawimawh an ni ang.

*Peru*
Peru hi football thiam ramte awmkhawmna CONMOBOl aţang tling an nih vangin ngaihthah ngawt theih an ni lova. Argentina leh Chile te chunga an awm reng laiin inkhel hnuhnung berah Argentina leh Colombia ten an lehpel a, Paolo Guerrero goal hmanga Colombia an inhnehtawkpui hlauh vangin playoff khel turin an tling a, Chile an hmakhalh ve thung. CONMEBOL aţangin direct in tling zo bik lo mahse playoff ah New Zealand hnehin Russia zin turin ticket an book fel.

Paolo Guerrero (Flamengo), Andre Carrillo (Watford) leh Jefferson Farfan (Lokomotiv Moscow) te hi Peru ingahna player turte an ni ang.

*Denmark*
Kum 1992-a European champion team Denmark hian a vawinga nan World Cup an khel dawn a. Tottenham midfielder Christian Eriksen chu Russia a an zin theihna tura player pawimawh fal a ni a. Eriksen hian qualifying match-ah khelh 10 aţangin goal 8 ngawt a thun.

Team ţan hlawh thei tak Denmark hi World Cup-ah an thleng sang hleithei lova, quarter final an la thleng ngai lo. Kum 2010 World Cup-ah khan Cameroon hneh bawk mahse group stage paltlang zo lovin an tla thung. Russia World Cup-ah hian Christian Eriksen (Tottenham) leh Kasper Schmeichel (Leicester City) te chu an star player an ni ang.