Mizoram Police te chuan kum 2000 atang khan mihring hmanga sumdawnna (human trafficking) case 24 an ziaklut tawh.
Mizoram Police, CID Crime chhinchhiah danin mihring hmanga sumdawnna (human trafficking) case an ziahluh 24 zingah a tuartu (victim) 38 awmin hemi kaihhnawihah hian 46 chu man an ni tawh a ni.
Zalen zawhna chhangin Police te chuan human trafficking tih hian inhralh mai piah lamah an hnathawh tur bak thawhtir te, tihduhdah leh thil dangte a huam vek niin an sawi a.
A tlangpuiin a tuartu hi hnathawh duh ve si, hrechiang tawk lova kalte an ni tlangpui niin an sawi a.
Human trafficking kaihhnawiha man tam ber chu hnamdang niin Mizo pawh an awm a, a tlangpuiin inthuruala thil ti an ni tih media an hrilh.
Police-te chuan mahni hnathawhna tur hrechiang tawk lova kal ten harsatna an tawk duh nia, sawiin Social Welfare Department leh MHIP te nen tangrualin a tam thei ang ber inhrilhhriatna (awareness) an neih bakah placement agency te pawh kovin an sawipui niin an sawi bawk.
Kumin 2018 hian Case 1 neiin Rohingya raltlan,Myanmar a hralh tur an lo man tawh niin an sawi bawk.
Community Health Action Network (CHAN) thawktute chuan human trafficking tuartute chu a tlangpuiin lehkha zirsang lo an ni tlangpui niin an sawi a.
"Phaia awm chak ve hrim hrim leh nuamsa deuha awm tura inngaiin kal an chak a, mahse an tum ang a lo nih loh avangin harsatna an tawk ta thin a ni," tiin CHAN lama thawktu pakhat chuan media a hrilh a ni.
No comments:
Thanks for your comment.