Mizoram Environmental Photographer of the Year 2017 LAWMMAN HLAN NIA KA LUNG RILA THU AWM LEH THUSAWI

"Kei ngei pawh hian he lawmman hi dawn ka chak ber zinga mi a ni."

- By KC Ruata

Siamtu Pathianin a thilsiam mawi takte pho chhuak turin êng awmze nei hmang Photography min pe a. Chu mi hnathawhpuitute chu Photographer-te hi an ni. A bikin Environmental Photographer-te hluzia chu sawiin a siak lo, Vantirhkoh tenau an ni ber mai.

Mizo Chanchina thil pakhat- hriatreng hlawh tawh tur vawiin(23.7.2018) a Mizoram Environmental Photographer of the Year 2017 lawmman hlan hun a lo thlen hian nun hlui ram ka han dawn kir a, hun hi rei lote emaw tih chhung hian a va lo kal chak em! Thil hi a lo danglam chak hle mai. Lung a leng a ni.

Kum 2010 hma lama hetiang lam kan tui vanglai leh atchilh vung hlurh laite khan tumah kawm tur leh ram han vahpui tur pawh ka nei ngai meuh lo va. Kha tih hun lai atang tawha mi hriat hlawh Malsawma leh Dina te pawh khan hetiang lam hi an buaipui hman lo. Mahni seh seh mual hranah kan tul tlang vek a ni. Hratlak leh kuthlei, vanneih leh tawn fuh vanga Zoram pum huapa Environmental Photography lama lawmman lungthu kim ka lo dawn ve phah hial ni.

Ni, kan tlang ram mawi leh hmun hring nuam tak maite hi a mawina leh hlutna mi thinlunga tuh chung zelin, khawvel hmuh ah i pho chhuak zel ang u. Hei aia ram nuam hi a awm bik chuang lo a nia.

Lei lungkham pel a, tukloh ram dai, ram ngawpui hnuai ah, rimawi fawn vel ngaithla a, khuarel (nature) nen in-ngheng renga hringnun chheu nawmzia tem pha khawpa lo tal ve thin ka ni a. Khua chuanin tlang kan han lawn a, boruak a va thiang tui em, van ram rim a nam chek mai ka ti, par mawi tin bawm ram chu!

Dam chhung khawsak lungkham buaina karah hian ram dai chhawl thing hnuaiah riah buk kan sual laite kha, Hringnun Chawlh Buk a va tling em! din thar leh fo ka duh a ni. A hlutna leh a par mawina kan tem tawh zet si a.

Vawiin hun lawmawm tak ah hian he chawimawina hi ropui ka ti a, lawmman dawng tura thlan chhuah Top-10 atanga Top-3 te, tute pawh hian an phu vel vek a, an zahawm ka ti. He nihna ropui tak hlawh chhuaktu pawh hi thinlung takin ka lawmpui a. A kutchhuak, a nun leh thil tih atanga hlawhchhuak a ni si a. Ka ngai hluin kei ngei pawh hian he lawmman hi dawn ka chak ber zinga mi a ni tih hi ka sawi duh a ni. KA LAWM E.


23 July 2018