VANLALNUNZIRI: MZU B.Sc(Nursing) Topper 2018

Mizoram University, Aizawl chuan August 24, 2018 khan Bachelor of  Science (Nursing) result a tichhuak a. Vanlalnunziri , MCoN zirlai naupang chuan mark 2800 ah 2157 hmuin B.Sc(Nursing topper a ni.

A hun chep tak karah inkawmna hun min siamsak a kan lawm khawp mai,...

Hming: Vanlalnunziri

Koh dan: Mazirtei

Pian ni: 16 May 1994

Pianna: Champhai

Nu Hming: Z.D. Lalfamkimi

Pa Hming: Biakchungnunga

Khua: Aizawl

Unau engzat nge in nih? Engzah na nge?

Pathum. A naupang ber.

Pawl 10 leh 12 zirna:

Class 10 chu St. Paul's Higher Secondary School.

Class 12 chu Synod Higher Secondary School.

B.Sc(N) zirna college:

Mizoram College of Nursing (MCON) , Falkawn, Mizoram.

Thil dang zir i nei em?

Class 12 ka pass in B.Sc(N) hi ka zir a.Kan course hi professional course a nih avangin thil dang han zir kawp hi a rem chiah lo a.

MZU Topper i ni tih i hriat khan engtin nge i awm?

Result a chhuak dawn hnai tih kha kan hre mai lova. Result chhuah tlai ah khan ka phone ka lo khawih loh avangin ka lo hre lawk lova. Ka thianten min rawn bia a min lawmpui turin, chutah chuan ka hre ve chauh a, mak ka tiin ka hlim khawp mai. Pathiani hnenah lawmthu ka sawi nghal vat a. Ka phi ruai a ni ber mai.

Topper nih kha i inring reng em? Nih tumin i zir reng em?

Topper nih tum ngei chuan ka zir ve a. Amaherawhchu ka beisei ngam chiah lova. Ka theih tawp chu ka chhuah ve.

(Website a fakna awmte hi lo click ve ta che!)

I lehkha zir dan tlangpui?

Nursing ah chuan hun awl hi a awm lo em em a. Zingkar atanga duty leh class kal char char kan nih avangin zan lam hi lehkha zir hun kan neih chu ani ber a. Zan ka men rei theih avangin zan lamah ka zir tlangpui thin. Kan subject hi ka tui hrim hrim avangin hun awl remchang apiangah ka chhiar thin bawk a. Thiante nena kan sawi ho leh zir ho te hian min pui hle bawk.

I nunah, mi dangin entawn se i duh a awm em? A awm chuan?

Ka thil tihna reng reng ah hian ka theih tawk a tha ber ka chhuah thin a. A bak chu Pathian kutah ka dah thin.

Zirna atan hian i chhungte'n an tuipui che em?

An theih tawk chuan min tuipui ve khawp mai. Ka exam lai te hian bang lovin min tawngtaipui thin a. A bik takin ka nu hian kan exam chhung darkar hian in lamah fianrial tawngtaina a lo nei thin a. Ka tan chuan a hlu em em a ni.

Zirtirtute atangin thlawpna hmu thain i inhria em?

Kawng engkim ah min pui nasa em em a. Kan zirlai hi practical ngai a nih avangin duty naah te min guide tha a. Zirtirtute mai bakah kan warden te thlengin min thlawp tha khawp mai.

Hlawhtling tura pawimawh ber ni a i hriat?

Kan tuina thil kan zir emaw kan tih hi a pawimawh ber in ka hria.Chumi bakah chuan taimakna neih hi a pawimawh em em bawk.

In College Facility hi tha tawkin i hria em?

Kan College hi Mizoram in ama puala B.Sc (Nursing) zirna a neih awmchhun a ni a. Hei ai a tih changtlung leh zual a pawimawh ka ti. Faculty, Staff leh seat te tih pun belh ni thei se. Tin, M.Sc (N) zirna te hi hawn belh ni thei se chu a khawp mai. Hemi mai bakah hian internet access na hi tha se, BSNL hian Falkawn hi a lut lova, tun hnai a MIMER hawn a nih khan MIMER ah BSNL a lut tih thu te kan lo hria a, MCON pawh hi theihnghilh loh ni se ka ti bawk.

Khawtlang leh Kohhran ah i inhmang em?

Nursing ka zir hma chuan ka phak tawk chuan ka inhmang ve a. Hostel a awm char char kan nih avangin in hman chu a har khawp mai. Amaherawhchu kan college a Evangelical Nurses Fellowship (ENF) ah Financial Secretary leh Vice Chairman nihna te ka lo chelh ve tawh a. MCON Choir member niin theih tawk chuan ka inhmang ve.

Thalaipuite tana thu chah?

Thalaite hian kan thil tihna ah taimakna leh thawhrimna tak tak kan neih hi a pawimawh ka ti. Thawh hreh nei lo se,  chutih rualin hma thlir fel tak nei a lehkha zir leh hnathawh a pawimawh ka ti bawk. Kan hriselna ngai pawimawh ila, ruihhlo, zu leh drugs lamah insum a pawimawh hle bawk. Tunlai in naupang te te damdawiin a zu leh drugs avanga awm an tam em em a, a pawi ka ti hle.Ruihhlo hian mihring pangngai tur mi anglo ah min siam thin a. Chung laka kan fihlim erawh chuan zirna pawh tha takin kan ti thei anga, dunhmun sang takah min vawrh dawn ani. A tawp ber ah chuan engkim Pathian rimchhana kan tih a pawimawh.

 I hlawhtlinna ah hian sawi duh te i nei em?

A hmasa ber ah Pathian vang liau liau ani tih ka hria ka, ka lawm hle a ni. Ka chhungte, kan Principal, zirtirtu, warden te leh staff zawng zawng te an inpekna a thuk hle a ka lawm em em bawk. Kan Kohhrante pawhin min lo tawngtai sak thin tih ka hria a ka lawm hle bawk ani. Ka sawi hmaih hauh loh tur chu ka thiante, ka batchmate te pawh ka lawmpui em em a an hlawhtlinna ah, ka lehkha zirna ah min fuih in min support tha em em bawk a. An mi fuihna leh thahnem min ngaih pui na vang a ni pakhat ka ti lo thei lo.

www.tleirawl.in  i hmuh dan?

A tha ka ti hle. Thalaite tan thu bengvar thlak tak tak hriat zung zung na a nih mai bakah mi hlawhtlinna atanga chona neih na tha tak a ni bawk.