SAWMTEA - KA LAWM EM E

Kumin chu a video thar kan hmu deuh mawlh mawlh  mai a, Mizo Zaithiamte hetianga mar pat a tan an la hi a thain an chhuanawm takzet.  Tun tumah pawh hian Sawmtea Chhangte Music video thar 'Ka lawm em e’ tih chu kan hmu leh dawn ta. He Music Video hi November 16, hian MDM Library ah dahin Zonet ah ngaihthlak theihin a awm dawn.

He hla hi ‘Ka lawm em e’ tih a ni a, Lalnunzira phuah niin hla hot leh lampui nuam tak mai a ni a, naupang leh tleirawl hian an duh zualina rinawm a, a hla hrim hrim hi Christmas leh Concert ni khua a hlim leh nuam taka sakpui chi  a ni.

He hla hi Foster ah record niin Video mawitaka siamtu hi Chiangtea videography a ni a, he video tihmuhnawm zual tur hian a karah lam mawi tak tak zeh tel a ni bawk a, mit leh beng a tlai hle dawn a ni.

Sawmtea Chhangte hi a hming pum chu C Vanlalmalsawma a ni a. Kum 2016 atanga kumin 2018 thlenga Mizoram pum huapa Award sem apiangin ‘a serh zinga mei ang’ an sawi ang maiin a dawng pawlah a tang zel a, a zawt zatin Zoram Pum huap Award ala dawng zel a ni. A Award dawn zinga thenkhat han tarlang ila;

1. Lelte Award 2016 - Best Male Artist ( Gospel )

2. Vulmawi Award 2016 - Best Male Artist ( Gospel)

3. Lelte Award 2017 - Best Male Artist ( Gospel)

4. Thazual Award 2017 - Best Male Artist (Gospel)

5. Lelte Award  2018 - Best Male Artist ( Gospel )

6. Best Artist 2006 ( Mizo) - Varsity week, Mizoram University

7 . Best Artist 2007 (Mizo) - Varsity Week , Mizoram University

8. Best Artist 2007 ( English )- Varsity week, Mizoram University

9. Best Performer (2007 ) - Varsity Week , Mizoram University. By Socio and Cultural Dept.

Sawmtea chuan heng chawimawina a dawnah hian lawmthu a sawi a, a theih tawka Pathian a chawimawi vena-ah a lamah Pathian a tang niin  a sawi a, Pathian vang chauha hetiang dinhmun thleng thei a nih thu a sawi bawk.

Sawmtea hi  Mizoram pum huapa Music Award semtur pathum - Vulmawi Award, Moonlight Award leh Thazual Award ah te hian zai tura sawm a ni vek a, theih tawpin a inbuatsaih mek a ni.

NAFTA TRADE DEAL AI AWH TRUMP HLAWH TLING A INTI HLE

2.10.2018: Esther R Fanai

Trump a Trade war neuh neuh ah US, Mexico leh Canada te 3 in kum 20 zet chhung Trade deal an lo neih tawh chu an ti nung mai duh lo , Justin Trudeau an Trade Tarrif a ti sang lutuk ah a puh. UN General Assembly pawh khan an in ngur deuh mahse , Nafta, thlak tu United States-Mexico-Canada Agreement (USMCA) a koh chuan America ram mipui tan hna tam tak a siam dawn niin a chhal.. Ram 3 te trade hian $1.2trn a huam dawn , 1994 a din Nafta ah khan dik tawk lo a awm niin a chhal , "America First" policy vang hian China, Mexico leh Canada lakah Trade War a hmang.

Canadian Prime Minister Justin Trudeau pawh in Canada tan an hlawk phah turah a ngai, China in US biak an duh mahse Trump chuan US in Trade War chung changah China a la hrem hrih niin a sawi

Ralthuam leh Tunlai Khawvel 

*****ERF*************

IRAN ZU CHHE IN VANG IN MI 45 IN THIH PHAH

2.10.2018: Esther R Fanai

Islamic Republic of Iran hi khawvel a ram khirh ber pawl an ni, zu ang chi hrim hrim hi khap bur a ni  , mahse bootleg alcohol  hi an uar hle , Health ministry spokesman Iraj Harirchi tar lan dan in zu chhe in vang in mi 45 an thi , 16, chu an mit a del phah, kar 3 chhung in 460 te damdawi inah dah an ni , Article 265 of Iran's Islamic penal code  chuan mi tu pawh in zu a in chuan vawi 85 hlap tur a ni , keini ramah chuan free sale 🥃

Ralthuam leh Tunlai Khawvel 

*****ERF*************

NORTH KOREA IN US A RING TAWK LO EM NI LE ?!

30.9.2018: Esther R Fanai

North Korea's Foreign Ministry chuan US an rin tawk ngam lohna an sawi chhuak tlat mai, Trump Kim Summit vawi 2 na hi beisei leh dan chuan October ah a nih hmel. South Korea President Moon Jae In a hma lakna zarah , US North boruak chhia pawh a zia awm chho tan viau.  October thla tan tir hian US Secretary of State Mike Pompeo chu Pyoyang ah a zin leh ang . 

Tun tum UN Gen Assembly ah khan Russia leh China palai ten ,US chu North Korea an hrekna ti nep tur in Trump administration an ngen . Mahse Trump , Mike Pompeo leh John Bolton te chuan North Korea hian an tum tak complete denuclearization an tih hlawh tlin hma chuan North hi hrek zel an la tum .

Sept thla lai hawl a Kim Moon ten an vawi 2 nan a summit an neih khan , North chuan an nuclear test site pui ber pawh khar an hreh loh thu an sawi lang kha a ni si a , mahse hei , the head of North Korea's Foreign Ministry, Ri Yong-ho, - Korean peninsula denuclearization tur in hma kan la mek tih in hre teuh ang mahse in rin tawnna awm lova in nawr hi chuan hma lak a har ( US in North Korea sanctions ah hrek reng chung siin , denuclearization tur in an nawr , Trump a president term tawp lam 2021 ah hi chuan denuclearization tur in an beisei a ni ) . In rin tawnna a awm chauh in hna chu a thawh theih a ni .

Hetia a sawi chhan hi , 38North leh US intelligence hrang hrang ten North che tla hi an en thla reng , International news ah thu tha chuah a tlem hle. , North hian US hma a thing thit ai chuan , US chet dan thlir zel chung in an goal chu tih hlawh tlin an tum chauh a ni 

Ralthuam leh Tunlai Khawvel

*****ERF*************

(Website a Fakna awm i lo click zauh khan website man tal a lo tum ve mai thei a sin.)

IRAN IN USS INDO LAWNG AN LO CHO RENG EM NI ??

30.9.2018: Esther R Fanai

TEHRAN, Iran — Iran’s state TV  chuan Revolutionary Guard’s navy leh the USS Theodore Roosevelt te an in nang ching lai , tunkar khan a pe chhuak . He thil hi March 21 ,  the strategic Strait of Hormuz , the Persian Gulf, a thleng a ni . Mahse documentary ang chauh in an chuah niin an in chhal , boruak awm zia ah UN General Assembly ah khan US President Donald Trump an  Iran a sawt nasa hle , Iranian President Hassan Rhouni an US chu middle east , khawi hmunah pawh indopui an duh loh thu a sawi , mahse US Iran Tension tih san belh tawh lo tur in a ngen . .

Chutih lai in Israel PM Netanyahu an Iran nuclear facilities , Tehran a mi a kawk leh va va , Hezbollah ho missile dah that na nen . Iran zawng nek chep in an awm teh meuh mai ,  tun a , Revolutionary Guard’s navy leh the USS Theodore Roosevelt te an in nang ching lai hi eng vang a rawn phawrh chhuak hnu hnawh le nge an nih le ! Ele , Trump administration in Tehran hi sanctions in hrek mahse ,an oil hralh chuah chu ZERO pawh in a ti buai pha lo tih an tar lanna a ni 

#Donald J. Trump

✔@realDonaldTrump

Iranian Harassment of U.S. Warships:

2015: 22
2016: 36
2017: 14
2018: 0

Source: @USNavy

1:59 AM - Jul 9, 2018


#Iranian harassment of US ships in the Gulf was a regular occurrence, but according to the US Navy, the practice declined sharply after the election of US President Donald Trump in 2016 and had totally stopped by 2018 .


*****ERF*************

(Website a Fakna awm i lo click zauh khan website man tal a lo tum ve mai thei a sin.)

MI 832 THI TA

30.9.2018: Esther R Fanai

Indoneisia PALU Island a lirnging leh Tsunami nghawng a hriat choh tan mek a ni , hriat theih chinah mi 832 an thi , hliam chu sawi loh , Hotel leh in chim hian mi eng zat nge a delh , an thi nge an dam tih sawi theih a har hle . Lawng te chu in bulah a in rue ruau mai a ni, picture then khat en hre awm tak tak a awm, ka rawn dah vek duh lo , Indoneisia mipui te tan i tawngtai pui ang u 

Ralthuam leh Tunlai Khawvel


*****ERF*************

(Website a Fakna awm i lo click zauh khan website man tal a lo tum ve mai thei a sin.)

SERICULTURE MINISTER-IN N.VANLAIPHAI AH WORKSHOP ON MUGA HMANPUI

N Vanlaiphai | September 26, 2018: Vawin hian Sericulture Department buatsaihin N.Vanlaiphai ah Pangang khawi lama tui mite tan ‘Workshop on MUGA’ (Under IMSDP) neih ani a, Pi Vanlalawmpuii Chawngthu, Minister of State, Sericulture etc. chuan khuallian niin a hmanpui.

Minister chuan, hmun hrang hrangah Pangang khawi lama tui mite leh kut hnathawktu hlawhtlin tum tak tak hmuh tur an awm thin chu lawmawm a tih thu a sawi a. Kan kutchhuak ngei Silk atanga siam silhfen kan nei ta te hi kuthnathawktute thawhrim rah liau liau ani, a ti. Sawrkarin kut hnathawktute hmakhua a ngai em em a, bul an tanna tur tanpuina sum leh hamthatna dang tam tak a pe thin a, heng kan thil dawn te hi dik takin hmang ila, taima taka leh rinawm taka kan hna theuh kan thawh chuan hlawhtlinna kan hmu zel dawn a ni. A diltu chhuaktu nih lama tan la lova, a thawk chhuaktu, a thawh chhuak thei leh thiam nih lama kan inel chhoh deuh deuh a tul hle a ni, a ti bawk.

He Workshop hi Pu C. Rozawna, Joint Director, Sericulture Department in a kaihruai a, Pu Lalnunzawma, Farm Manager KVK in thusawina hun hmangin, Pu V. Zothansanga, DSO Serchhip in lawmthu sawina hun a nei a, Pangang khawi lama tui mite an kal tha hle ani.
- dipr

SECTOR OFFICERS TRAINING NEI

Serchhip | September 26, 2018: Vawiin hian Serchhip DC Conference Hall ah kan hma lawka Mizoram Legislative Assembly General Election lo awm tura atana inbuatsaihna kal zelah Sectors Officers te tana training buatsaih a ni.

He training ah hian District  chhung  khaw hrang hrang a Vote thlakna  hmun tur (Polling Sation)  hmunhma te, route map an buatsaih te, voter te tan a panna  remchang  anih leh nihloh te, harsatna   thleng/awm  palh thei lakah a him leh him loh te bakah khaw thenkhat inkalpawhna kawng (approach road)  dinhmun  te sawiho  niin Sector Officer te hian an huam chhung  theuh a  “Vulnerability  Mapping” an tih zawh tak te thlir hova; sawiho  ngai te  sawiho  a enfiah  nawn a ni .

Serchhip District chhunga  Assembly Constituency pathum a  duty tur Sector Officer - 13 ruat an ni a. Vawiina training ah hian  Pu R Vanrengpuia,SDO (Sadar)  leh Master Trainer  ni bawk chuan   Model Code of Conduct(MCC)  hnuaia  dan leh thupek  a siam hrang hrangte hrilhfiahna  neiin ,Sector Officer te  mawhphurha(duty)  leh an  chanvo te hrilhriat thar lehna   a nei a ni.

 - dipr

CHIEF MINISTER IN AGEY LIRTHEI 30 A VAILIAM

Chief Minister Pu Lal Thanhawla chuan vawiin khan Mizoram State Rural Livelihoods Mission (MSRLM) hnuaia scheme pakhat Aajeevika Grameen Express Yojana (AGEY) hmalakna in Tlangnuam BDO Pisa, New Secretariat Complex-ah Self Help Group thawk tha thlanchhuahte hman tur motor 30 a vailiam. He programme-ah hian Deputy Speaker Pu R. Lalrinawma, MIFCO Chairman Pu PC Zoram Sangliana, ZIDCO Chairman Pu Lalrobiaka, Tuirial Bialtu MLA Pu Hmingdailova Khiangte leh AMC Councillor Pi M. Zohmingthangi te an tel a ni.

Chief Minister chuan Mizorama Self Help Group te chu khawtlang leh chhungkaw tan an tangkaiin, a bik takin hmeichhiate tan an intundinna kawng tha tak a nih thu a sawi a. An thawh that avanga vawiina Self Help Group 30 ten lirthei an dawng chu a lawmpui thu sawiin Chief Minister chuan SHG-te chu mimal leh khawtlang tan mai bakah ram leh hnam tana thawktu anni tih hre reng chungin an thiol dawn pawh tangkai taka hmang chhunzawm turin a chah a. Chutiang chiah chuan sawrkara thawktute pawh rinawm taka an hna puitlin zel tura chahin, Sawrkar hnathawkte an thawh that thin thu leh, RD Department chuan tun kum hnih chhunga National Level Award engemawzah an dawng chu lawmawm a tih thu a sawi bawk.

Kuthnathawktute, mi harsa leh chhumchhiate chawikan chu ram hmasawnna atana a pawimawh thu Chief Minister chuan sawiin, chumi tihlawhtling tura NLUP kaltlanga sawrkarin hma alaknate a sawi a. NLUP chu a dawngtute zinga hmang thalo tlem te tih loh ah chuan a hlawhtlin viau thu leh, state dangte tan pawh entawntlak a nih thu sawiin, NLUP hlawhtlinna thual tura policy thar duan NEDP pawhin hlawhtlinna hmu chho zelin, India hmarchhak state dang Chief Secretary-te pawh NEC in zirchiang tura a hrilh hial thu a sawi.

Vawiin AGRY motor 30 vailiam puala inkhawm buaitsaih hi Pu Lalhmingthanga, Commissioner & Secretary, Rural Development Department chuan a kaihruai a. Motor vailiam tak te hi RD block 7 - Siaha, Zawlnuam, West Phaileng, Ngopa, Thingdawl, East Lungdar leh Sangau atanga Self Help Group thawk tha thlan chhuah 30 te hnenah pek a ni. Rural Development Block pakhat tan motor 4 (pali) zel ruahman a ni a, West Phaileng, Zawlnuam Block te hi Aspirational District huamchhunga awm an nih avangin Motor 5 (Panga) ve ve ruahman sak an ni. 

AGEY hian a thil tum chu (i) Deendayal Antyodaya Yojana - National Rural Livelihood Mission (DAY-NRLM) hnuaia awm thingtlang khua, inkalpawh harsatna a cheng SHG’s member ten an chhawr tangkai tur leh sum lakluh hmanrua tur, vantlang in tangkai taka veivahna lirthei an neih theihna tur pek/ruahman leh; (ii) DAY-NRLM hmang tangkai a, thingtlang a cheng ten an khaw mil tur, vantlang in an enkawl tur, mipui veivahna tiawlsam tur (Bazar, zirna in, damdawiin etc. kal na atan a tangkai) leh an khaw chhehvel ei leh bar hmasawnna thlen thei tu tur lirthei (rural transport service) ruahman sak te a ni.

AGEY programme hnuaiah hian DAY-NRLM scheme atanga Village Organisation (VO -  Khaw khat SHG member atanga thlanchhuah hruaitu intelkhawmte) te hnena sum pek Community Investment Fund (CIF) chu AGEY programme tih hlawhtlin nan, VO in SHG hnenah Motor lei nan pung awm lovin Loan Rs. 6.5 lakhs a puk tir ang. (Hei hi AGEY CIF tih a ni). Rs. 6.5 lakhs aia to Motor lei nan sum mamawh belh a awm a nih chuan Bank loan puk leh theih a ni a. Motor hi three Wheeler, four Wheeler (goods 85 passenger vehicle) an khaw mamawh mil tur ang thlan theih a ni. Loan hi thla 72 chhunga rulh ngei tur a ni. Loan puk dawn ah Business plan (6 years) felfai tak SHG ten an siam ang a, Block Mission Management Unit in a enpui ang. 

AGEY motor hi 2017-18 khan RD Block pathum - Tipa, Serchhip leh Bilkhawthlirah motor 18 pek chhuah a lo ni tawh a ni.

MCON 31st GRADUATION AND LAMPLIGHTING CEREMONY

 

Aizawl | September 25, 2018: Mizoram College of Nursing chuan 31st Lamp Lighting and Graduation Ceremony chu ni 25.9.2018-ah Multipurpose Hall, Mizoram College of Nursing-ah an hmang a. Prof. K.R.S. Sambasiva Rao, Vice Chancellor, Mizoram University chu Chief Guest niin Nursing chu hna zahawm niin hriselna lama thawktute zingah mi pawimawh tak an ni a ti. Indian ram bakah foreign-ah pawh Nurse te tan hna tau a tet a, zirlaite chuan an training laiin an zirlai bakah online course chi hrang hrang leh ramdang tawngte hna tha zawk an neih theih nan zir turin a fuih bawk. Mizoram University chuan Mizoram chhungah M.Sc.(Nursing) leh P.hd. zirna a rang thei ang bera tan a nih theih nan Nursing College awmsa te chu a theih ang angin a tawiawm ang tih a tiam bawk.

 

   
MCON Principal Pi Lalchhanhimin MCON chanchin report a pe a, Mizoram University Exam a result tha  tak an neih dan – top 10-ah mi 9 langin 1st leh 2nd position an hauh bawk a ni. Mizoram Students Nurses Association ten kumtina intihsiakna hrang hrangah Champion nilai mek an nih thu a sawi bawk. Tin, ramin hma a sawn ve zel a, Nursing education pawhin sawrkar leh hotute ngaihpawimawh a hlawh chho ve zel a, mipui hriat pawh kan hlawh chho mek bawk a, chu chuan hmasawnna hmuh theih a thlen mek zel avangin an lawmthu a tarlang a, chutih lai erawh chuan hmasawnna tur tamtak hmabak post siam belh chungchang te, Quarter, Bus an mamawh thute a sawiin, chutih rualin heng an mamawh te pawh hi bawhzui mek a ni a, hotute zarah an hlawhtlin thuai an beisei a tar lang.

 

Miss Lalfamkimi, Principal College of Nursing, RIPANS-in first year zirturte Lamp Lighting leh thutiam a sawi tir a, an bati chhit leh thutiam pawkmawhna a sawi bawk. MCON hian students ti tha bikte hnenah Award chi hrang hrang a sem chhuak bawk a ni.

MAMIT-AH CHILDREN SCIENCE CONGRESS BUATSAIH A NI.

Mamit | September 25, 2018: Vawiin khan I&PR Conference Hall, Mamit-ah Rashtriya Madhyamik Shiksha Abhiyan (RMSA), Mamit District bultumin Mamit District chhunga Middle School leh High School naupangte tan District Level Children Science Congress neih a ni a. Pi R. Lalnunthari, District Programme Coordinator, RMSA, District Education Officer, Mamit District ni bawk chuan khuallian niin he hun hi a hawng.

Khuallian chuan zirlai kalkhawmte fuihna thu sawiin  eng hna pawh thawk dawn ila, hlawhtling tur chuan taihmak a ngai a. Kan thiamna leh finna kan tah hriam a, a vantlang chunglam ni tura nasa taka kan beih a ngai a ni a ti. Tuna kan thu hriatte hi nakin lawka History a nih dawn avangin zirlaite chu an zirlai mai piahlamah lehkhabu tha leh chanchinbute chhiar tam turin a fuih a. Zirlai hlawhtling tak, khua leh tui tha nih tum tur leh zirtirtute pawh naupangte'n hriatna zau zawk an neih theih nana intuaihriam reng turin a chah bawk.

Children Science Congress thupui hi "Science, Technology & Innovation for a Clean, Green and Healthy Nation" tih niin Category pahnih, Junior leh Senior-ah then a ni a. Junior Category-ah hian lawmman 1-na Presbyterian English Medium School, Mamit-in dawngin lawmman 2-na hi Govt. Middle School I in an dawng a. Lawmman 3-na hi Govt. Middle School II in  dawngin Senior Category-ah lawmman 1-na hi Presbyterian English Medium School-in an dawng a, 2-na hi Govt. Mamit High School-in dawngin lawmman 3-na hi New Diamond School te'n an dawng a ni. Lawmman 1-na hian Rs 5000/-, 2-na in Rs 4000/- leh 3-na hian Rs 3000/- a kengtel a. School tel zawng zawngte'n Consolation Prize Rs 2000/- theuh an dawng bawk.

Children Science Congress hi Pi L.S. Lalthanpuii, Co-ordinator, RMSA-in kaihruaiin Mamit District chhunga School 10 an tel a ni.

MIZORAM YOUTH BASKETBALL TEAM FEHCHHUAK

Aizawl | September 24, 2018: Mizoram Basketball Association chuan vawiin September 24, khan  35th Youth National Basketball Championship, Udaipur Rajasthan a tel turin Mizoram Youth Basketball Team te a tir chhuak a, a thla liam.

Team member te hi Lalruatkima, H Lalrinawma, VL Ramengkima, Lalramngheta, C Lalzarzova, Lalmuanzuala, Lalrinhlua, Ramdinfela, C Vanlalhriatpui,  K Lalthianghlima, Nicholas Lalmuanpui leh Lalhnehpuia te an ni a. Coach H Lalhruaitluanga, Asst.Coach C Lalrohlua leh Manager Eddie Lalfakzuala ten an kaihruai ang.

35th Youth National Basketball Championship hi September 30 atanga October ni 7 , 2018 chhung hian  Atal Bihari Multi Purpose Hall, Sports Complex, M L Sukhadia University   Udaipur, Rajasthan ah neih tur a ni a. India ram chhung state hrang hrang atangin thalai tam tak an fuankhawm dawn a ni.

DSW&R OFFICE LEH EX-SERVICEMEN-TEN CHAMPHAIAH FAINA PUALIN HUN HMANG

Champhai | September 24, 2018: Vawiin khan Champhai District Sanik Welfare & Resettlement Office leh Ex -Servicemen-te tangkawp Swachhata hi Sewa hmalakna kal zelah tukin khan Champhai Vengthlang Bazar huamchhung tifaia hnatlang an nei a, chawhnu lamah Zirlaite tan lemziak hmanga intihsiakna an huaihawt bawk.

He hunah hian Major Rebecca Chhakchhuak, DSW&RO Champhai chuan mihring nunah faina chu ngaihpawimawh ber te zing a mi tur, hriselna atana pawimawh tak anih thu sawiin, hrisel tur chuan kan fai a ngai a ni, a ti a. Sawrkar hmalakna kal zel Swachhata hi Sewa chu Ex-Servicemen-te chuan an thlawp tlat a, fai inzirtirna leh tihfai hnathawh chu vawiin atan chauh niloin  nitina faina hi kan thupui a ni reng dawn a ni tiin Bazar hmun tifaia hnatlan fai duh zia chu lantirna leh a hmahruai anih thu a sawi bawk.

 

He hunah hian Sainik Office Staff leh Ex-Servicemen-te mai bakah Bazar Office Staff te, VC, Section YMA leh Welfare Committee te an tel a, faina lam hawi inzirtirna thuziakte kengin an tar bawk a ni.

Vawiin chawhnu dar 1 khan Champhai Zotlang PES-ah Zirlaite tan Swachhata Hi Seva tih thupui hmangin lemziak intihsiakna buatsaiha ni a. He hunah hian Maj. Rebecca Chhakchhuak chuan faina pawimawhna leh tulnate tarlangin Zirlai naupangte chu faina kawnga rawngbawlna chu chhunzawm zel turin a chah a. Lemziak hmanga intihsiaknaah hian Zirlai naupang Pawl 1 atanga pawl 10 atangin  mi 444 vel an tel thei a, lawmman semna  neih chhunzawm  niin  Zirlai naupangte'n an hlut hle.

FARMERS TRAINING

Thingdawl | September 22, 2018: Vawiin September 22, 2018 khan COE Hoticulture Thingdawl Training Hall ah  Institute of Horticulture Technology, Noida atang a rawn kal te chuan Healthy Nursery Production for open protected cultivation of special Vegetable Crop in Mizoram tih thupui hmangin farmer te tan training an rawn pe.

 

He hunah hian Bilkhawthlir, Kolasib, Thingdawl, Bualpui, kawnpui atang te in farmers te kal khawmin mi 76 an tling a, Thingdawl Farmers Society atangin mi 30 an kal thei bawk a ni.

SAIKHAWTHLIR-AH RMSA SECONDARY SCHOOL BUILDING THAR PU LALRINMAWIA RALTE IN HAWNG

Aizawl | September 21, 2018: Nimin khan Pu Lalrinmawia Ralte, Bialtu MLA,  Political Adviser to CM chuan Saikhawthlir Secondary School cheng nuai 86 senga sak chu a hawng.

Hawnna inkhawm School tual zawla neihah hian Pu Lalrinmawia chuan Saikhawthlir khua chu tun hmain Hachhek biala rinluh an ni lova, kum 2008 atanga Hachhek bial chhunga an awm atangin zirna lamah nasa taka tihhmasawn an ni a ti. RMSA leh SSA hnuaiah bial chhung khaw hrang hrangah School building thar tam tak sak a ni a. India ram leh Mizoram Sawrkar chuan zirna a ngaihpawimawh avangin zirna kawnga hma kan sawn zel nan nasa takin hma a la zel dawn a ni a ti bawk.

 

Zirlai naupangte chu lehkhabu chhiar tam tura fuihin kan hriat tam chuan zawhna a lo awm hunah kan hria a ni tih kan hriat loh pawh kan hrechhuak leh thin a ni a ti. Zirlai naupangte chu ngaihtuahna dik, rilru dik kan put a pawimawh a. St Pauls High School-a Class X Exam turte pawhin text book a mi tho kha an chhinchhiah ve a ni tih inhriat a tul a, thingtlang leh hmun hla zawka awm kan nih avangin zirlaibu hran kan zir biklo a ni tiin, a pawimawh ber chu tumruhna leh tih takzetna a ni a ti. Saikhawthlir khua leh a chhehvel khuate chu tangkai taka hmanga, school chawimawitu nih tum turin a chah a ni.

Bialtu MLA hian Hachhek Constituency huam chhunga khawtin te'n an mamawh em em Oxygen khawl pek vek tum a nih thu a sawi a, hei hi damlo thawhah thut, damdawi in pan hma-a harsatna nei tan a tangkai dawn thu a sawi bawk.

Pi Lalnunthari, DEO , Mamit pawhin thusawiin Mizoram Sawrkar, Bialtu MLA leh Department-te thawhhona avanga Saikhawthlir khuain Zirna in tha tak an nei chu lawmawm a tih thu a sawi a, Saikhawthlir khua leh a chhehvel khua te'n tangkai taka an hman a duhsak thu a sawi. DEO hian Mamit District chu ziak leh chhiar thiamlo mi 8000 lai mai kan la awm chu chhan hrang hrang awmah, hnam chi hrang hrang cheng kan nih a vang a ni thei a, kan chhehvela mite ziak leh chhiar thiam tura puihna kawngah theihtawp chhuah turin kalkhawmte a sawm a, kan hmaa census kan hmachhawn tur atan result tha tak kan neih a beisei thu a sawi a ni.  

Saikhawthlir RMSA High School hi 386 sq.m a ni a, Building hi Mizo pa chhiara chhawng hnih niin, Computer Room, Laboratory Room, Art & Craft Room te nen a vaiin Room 8 a awm a ni, Ruahtui khawlna tur Sintex Litres 4000 dah a ni bawk. Tunah hian Headmaster hovin thawktu pali(4) awm mekin zirlai naupang 30 te chuan zirna an bei mek a ni.

Building thar hawnna inkhawm School tualzawla neih hi Pu HT Lalthlengliana, VCP chuan a kaihruai a, khawtlang aiawh leh Organising Committee aiawhte atangin thusawi ngaihthlak a ni bawk.

- DIPR

HEALTH MINISTER IN WORLD ALZHEIMER’S DAY HMANPUI

Aizawl |September 21, 2018: Vawiin khan Health Minister Pu Lal Thanzara chuan Millenium Centre kawtah World Alzheimer’s Day 2018 a hmanpui a. Hemi ni pual hian Alzheimer’s and Related Disorders Society of India (ARDSI) Mizoram Chapter buatsaihin Chanmari kawn atanga Millenium Centre kawt thleng Memory Walk neih a ni.

Khuallian Pu Lal Thanzara chuan thu sawiin Alzheimer natna ngaih pawimawh nachang hretu an awm chu lawmawm a tih thu a sawi a. Thangthar zawkten ‘tar a’ tih ringawt an nih lohzia min zirtir thar leh thin hi thil hlu tak a ni, a ti a. Programme buatsaih chhan ber ten an hlawkpui lehzual a beisei thu a sawi a. Tunkum thupui ‘Remember me’ tih a nih angin naupang leh thalai zawk ten Alzheimer natna in a tihbuai tar zawkte duat takin kan enkawl a, kan hriat reng a tul a ni, a ti a. Anni kan enkawl dan hian kan hnam ropui leh ropui loh a hril dawn a ni, a ti. Alzheimer natna vei enkawltuten nasa takin hma an la a, an theih ang angin beidawnna leh harsatna karah an infuih tawn thin chu lawmawm a tih thu a tarlang a. Kalkhawmte hnenah chuan Alzheimer veite tana malsawmna ni turin a chah bawk a ni.

ARDSI Mizoram Chapter President Pu Vanneihtluanga chuan kalkhawmte lawmna thu a sawi a. ARDSI Mizoram Chapter EC Pi Malsawmthangi hovin pledge sawina neih a ni a. ARDSI Mizoram Chapter Jt. Secy Pi Lalremruati Zote in lawmthu sawina in hun a khar a. Memory Walk-a titha zualte tan lawmman sem a ni a. He ni pual vek hian chawhma dar 11 atang khan Chanmari YMA Hall-ah Alzheimer leh a kaihhnawih dang chungchangah seminar leh inhrilhhriatna hun neih a ni a. NHM Mission Director Dr. Lalrozama, IAS chu Khuallian a ni. ARDSI Mizoram Chapter buatsaih niin National Mental Health Programme bultum a ni a. ARDSI Mizoram Chapter hi September Ni 21, 2015 khan din a ni.  

CHAMPHAI ZOTEAH SWACHHATA HI SEVA 2018 PUALA HUN HMAN A NI

Champhai | September 21, 2018: Tukin khan PHE Department hnuaia Swachh Bharat Mission (Gramin) kaltlanga faina kawnga thingtlang khuaa hmalakna pakhat ‘Swachhata Hi Seva, Faina hi Rawngbawlna a ni’ tih programme pualin Champhai Zote Community Hall-ah hun hman a ni a. He hun hi Dr. Naveen Aggarwal, District Bawrhsap chuan khuallian niin a hmanpui a. Kumin Swachhata Hi Seva puala thupui thlan chu ‘Sanitation is Everyone’s Business, Faina hi Mitin mawhphurhna a ni’ tih a ni.

Khuallian chuan faina kawngah Mizote chu hnam entawntlak an nih thu sawiin, mahni In leh a vel mai bakah vantlang hmunhmate neitu thintlung pu chunga tihfai ani thin chu entawntlak a tiin chhuanawm a tih thu a sawi a. Faina kawnga thahnemngaihna Mizote zinga a hmuh chu tunhma  atanga inzirtirna tha neih vang leh inthlahchhawn zel a ni, a ti a. Swachhata Hi Seva puala kalkhawm Zirlaite chu thiam thil zir kawngah tan la tur leh nakin zela zirlai pui thei tur Sap tawng thiam tum tlat turin a fuih a. Zirtirtute tan pawha Sap tawng zir thar leh anih theihna turin hetiang lama hnu hma nei pawlte nena tangkawpa trainingte pawh neih theih nise a duhawm dawn thu a sawi bawk a. Mitinte chu faina nunpuia zirtirtu ni theuh thei tura thawk turin a sawm nghal bawk a ni.

Pu H.B Chakma, SE, PHED Champhai WATSAN Circle chuan fai chu Pathian an teuhna ber a nih thu leh hriselna atana pawimawh ber anih avangin fai nunpui a tul thu a sawi a. Swachhata Hi Seva programme hman chhungin a zau thei ang bera fai zirtirna neih tuma hmalak anih thu a sawi bawk.

Er.J.Kapkima, Member Secretary, SBM (G) Champhai District pawhin thu sawiin Champhai District chu kum 2016 December-a ODF ni tawh anih avangin District fai anih hriaa chhawm nung zel tum a tul thu a sawi a.  Central sawrkarin faina kawnga hmasawnna a ngaipawimawh a, hma la zel turin State-te a nawr reng a sum leh pai pawha a tanpui reng thu a sawi a. Swachh Bharat Mission tum ber chu faina tluantling neih a ni a, chumi tur chuan mimal, chhungkua leh khawtlang tan rual angai a ni, a ti a. Fai hi hriselna ni a, Mi hrisel chu a hausa a ni, a ti bawk.

He hun hi T.Laikunga, VCP Zote chuan a kaihruai a. Er.J.Kapkima, Executive Engineer, PHED & Member Secretary, SBM (G), Champhai District chuan Swachhata Hi Seva programme sawizauna leh hemi hmanga programme neih dan turte a sawifiah a. Pu Lalchhandama Renthlei, Headmaster, TN Memorial High School, Zote-in Zote khuaa faina lama zirtirna programme buatsaih a ni chu lawmawm a tih thu leh a hlawhtlin ngei theihnan khawtlang mipuite penchhuak turin a sawm a. Khuallianin School hrang hrang, VC leh NGO-te hnenah Dustbin leh Water Filter a sem a. Pi Julie C. Mawii, District Coordinator, SBM (G) Champhai District-in lawmthu sawina neiin hun a khar a. Programme neih zawh hnu hian thuang li a inthenin khawlaia bawlhhlawh awmte chhar faia hnatlang neih chhunzawm nghal a ni.

Swachhata Hi Seva (Sanitation is Service) tih hi Mizo tawng chuan ‘Faina hi Rawngbawlna a ni’ tih a ni a. Forthnight Programme niin kumin September Ni 15 khan Prime Minister-in New Delhi-ah a lo hawng tawh a, Programme hian October Ni 2 thleng a awh dawn a. Kum tina hman thin niin, Mizoramah pawh khawpui leh thingtlang khaw hrang hrangah hman mek a ni a.  Kumin hian a bik takin Sanitation Volunteer-ten midang 100 vel tal kaihruaia mipui/vantlang nena tangkawpa faina kawnga an penchhuah theihna tura hmalakna ‘Swachhagrahiyo Se Swachhagrahi; Ek Se Anek Diwas’ tih programme chu September Ni 25, 2018 hian hman tum a ni a. He hunah hian faina lam hawia hmalakna a zau thei ang bera kalpui tum niin, Zirtirtu, ASHA, ANM, Health Worker, Anganwadi Community Worker-te nena tangkawpin hun hman tum a ni a. Naupangte kawngzawh neihpuia ek In thianghlim neih leh hman tulzia puanchhuah tir tum a ni a. Thingtlang kilkhawr ber thlenga faina pawimawhzia inzirtira nunpui zel tura hrilhfiahna neihte a huam dawn bawk a ni.

- DIPR

MZP INTER-HSS BASKETBALL TOURNAMENT 2018 TAN TA

Aizawl | September 20, 2018: Mizo Zirlai Pawl Inter-Higher Secondary School Basketball Tournament 2018 chu vawiin September ni 20, Ningani khan Hawla Indoor Stadium, Republic Veng, AIzawl-ah  hawnna hun hman a ni a.

Mizoram Youth Commission Chairman Joseph Lalhimpuia’n khuallian niin hun a hmanpui a.

Mizo Zirlai Pawl Inter-Higher Secondary School Basketball Tournament 2018 Organising Committee chairman Lalruatfela’n kairhuaiin, Secretary Jacob Lalmuanpuia report a pe a.

He tournament ah hian School 23 te’n intihsiakna an hmachhawn dawn a, September ni 28, Zirtawpni ah Final khel tura ruahman a ni.

Thusawitu,Khuallian chuan ‘CM Phoenix Project’ kalpui an tum thu a sawi a, hemi atan hian Rs 20,00,000 dah niin, Mizo thalai zinga Competitive Exam hmachhawn tum, mi tumruh leh lehkhathiam thlang chhuakin, chung te chu New Delhi- ah exam inbuatsaih  turin MYC chuan a chawm dawn a ni tiin, Mizo thalaite Civil Service-a an luh ngei theih nan a hmalakna thar tur anih thu a sawi a ni. MYC Young Achievers’ Award siam ani a, thalai kum 40 hnuailam chawimawi tlak Dictrict 8 atangin DC kaihhruaina in zawn a ni a. Chungte chu State Level Committee chuan lo thlifimin, kawng hrang hrang a thlalai hlawhtling chawimawi tlak Mi 8 (pariat) thlanchhuah an ni a, he chawimawina hi ni 21.9.2018 (Zirtawpni) tlai hian PUC Auditorium-ah hlanna hun hman a ni dawn a ni a ti. 

Pu Mahima chuan ‘Competitive World’ ah kan awm a, mi taima leh tumruhte hi mi hlawhtling an ni tawh a, ruihtheihthil a fihlim lo tan chuan hlawhtlinna a awm tawhloh thu MYC Chairman chuan zirlai naupang kalkhawmte a a hrilh a. MZP in hetiang a zirlai naupangte taksa hrisel an neih theih nana hma a la hi lawmawm a tih thu a sawi bawk. 

Member Organising Committee R Lalkhawngaiha’n infiam mite intiamkamna a neihtir a. Inelna tan nghal a ni.

---

A hnuai video hi lo ensak ve ta che

T.ROMANA COLLEGE-AH CAMPUS AWARENESS ON EVM & VVPAT NEI

Aizawl | September 19, 2018: Vawiin khan DC Aizawl buatsaihin T.Romana College zirlaite hnenah EVM leh VVPAT hmandan inhrilh hriatna neih a ni. He hunah hian zirlai vote nei thar tam tak leh vote la thlak lo te’n vote thlak chinna hun hman a ni.

EVM leh VVPAT hmandan inhrilh hriatna hi College hrang hrangah nei mek niin, Govt.J. Thankima College, RIPANS, Women’s Polytechnic, Hindi Training College, Govt. Hrangbana College, Govt. Zirtiri Residential Science College-ah te neih tawh a ni a, Govt. Johnson College, Law College, Pachhunga University College, Mizoram University-ah te he campus awareness programme hi neih tura ruahmanna siam a ni.

- DIPR

Mamit DC Office tualah DC lim hal; amah awm lo mah se staff-te pisa kai tur an dang

Aizawl, September 18, 2018

Mamit Bawrhsap Bhupesh Chaudhury chhuak tura nawrna kal zelah Aizawl lamah kalin amah awm lo mah se vawiin khan Mamita All NGO leh All Political Party huaihawtin DC Office bulah DC Office staff-te pisa kai tur chu an dan an ni tho va. He hunah hian Sub-Headquarters YMA President K.Elly Rosanga chuan DC lim a hal bawk.

Inrinnia an meeting-a an lo rel tawh angin nimin thlenga Mamit DC hi sorkarin a la sawn chhuah loh avangin vawiina a pisa kai tur hi Mamita All NGO leh All Political Party hian dan turin ruahmanna an siam a. Vawiin chawhma khan Mamit DC Office tualah Mamit mipui thahnem tak an pungkhawm a; DC hi nimin tlai lama Aizawla a chhoh avangin amah awm lo mah se DC Office staff-te chu an dang tho va, pisa an kai lo.

He hunah hian K.Elly Rosanga, President, Sub-Hqrs Mamit chuan thu sawiin, Mamit mipuite tanrualna chu lawmawm a tih thu leh nakin zelah pawh inlungrualna vawng nung zel turin a ngen a. “Bhupesh Chaudhury hian tunah hlauhna vangin Mamit chhuahsan mah se official-in Mamit DC a la ni reng a, Mamit DC ni tura a lo let leh hi kan remti tawh lo va, a lo let leh a nih chuan a chungah engpawh thleng se Mamit mipuiin mawh kan phur lo vang,” a ti.

Sub-Hqrs. YMA, Mamit President chuan, Mizo zawng zawngte an tangrualin nizanah pawh Aizawla lam pana DC kal hi dan tumin mipuiin an pungkhawm tih sawiin Mizoram chhuahsan tura a duh thu an aupui tih sawi a. Bhupesh Chaudhary, IAS chu rang taka sawn chhuak turin Mizoram sorkar a ngen bawk.

Vawiina Mamita pungkhawmte hian resolution siamin Bhupesh Chaudhary chu Mamita let tawh tur a ni lo an ti a. Mizoram a chhuahsan tur leh a Transfer Order chu rang taka sorkarin tifel tura nawrna te an resolution-ah hian a tel.

Mamita tlawmngai pawl hrang hrangte leh political party-ten Mizoram chhuahsan tura an duh, Mamit DC hian nimin tlai khan Aizawl a pan nia hriat a nih avang hian lo dan tumin nizan khan Aizawl khawpuiah Central YMA huaihawtin pun khawm a ni a; mahse, Mamit DC hi Aizawl a thlen hmain Lungverha 5th IR Batallion Headquarters-ah luhpui a ni a, boruak duhawm lo thleng zui a awm lo.

Inrinnia Mamita All NGO, All Political Party leh Village Council chu DC Bhupesh Chaudhary chungchanga Sub-Hqrs. YMA Committee Room-a thukhawm chuan nimin thlenga sawn chhuah a nih loh chuan a tuk, vawiin atanga DC Office kai tur dan an tum tih an puang a. Hemi hnua thuchhuah an siamah Mamit DC sawn chhuak tura September 5-a kawngzawh an neih hnu leh September 10 hmaa sorkar chu sawn chhuak tura an phut chunga tun thlenga sawn chhuah a la ni lo chu an hriat thiam loh thu sawiin sawn chhuah a nih theih nan na zawka hmalak nise, buaina leh harsatna a thlen hmaa an duh tihlawhtling turin sorkar an phut tih an tarlang.

Hemi chungchangah hian nimin zing khan Siamliana Hall, Charkawnah Sub Hqrs YMA kaihhuaiin joint meeting an nei leh a, vawiina DC Office kal tur dan tumin ruahmana siamin duty tur pawh an inruahman vek a. Hetihlai hian Mamit DC hian Sec 144 CrPC hmangin office kai tur dan leh road block siam te, mi 5 aia tam awm khawm leh kawngzawh khapna thupek chu nimin khan a chhuah a, nimina joint meeting neih zawhah he khapa order copy hi hal a ni nghe nghe.

Hetihlai hian nimin tlai khan Mamit DC hian Aizawl a pan nia hriat a ni a, a nupui chenna quarter, New Secretariat Complex, Aizawl bulah a lut dawn nia hriat a nih avangin Central YMA chuan Aizawl khawpui Branch hrang hrangah nizan khan hriattirna chhuahin lo dan tumin chân a ni a. Secretatiat luhna Main Gate bakah Dinthara finkhawm leiah chân a ni a. Chief Secretary quarters-a luhpui tumna a awm nia hriat a nih bawk avangin Tennis Court bulah chân a ni bawk.

Boruak tha lo thleng thei venthawnna avangin Mamit DC Bhupesh Chaudhary hi Aizawl khawpui luhpui lovin Lungverha 5th IR Bn. hmunpuiah luhpui a ni ta zawk a. Hetiang a nih avang hian pungkhawmte pawh an tin darh zui a, an haw darh hma hian Mamit DC duh lohna lantirin rang taka Mizoram chhuahsan tura an phut thu an au rualpui a, “Mizote hmusittu a nih vangin Mizoramah a awm kan rem ti lo va, a haw lo a nih chuan a awmna chin kan chhui zel dawn a ni,” tiin YMA hruaitute chuan an sawi bawk.

He huna thu sawitu, Central YMA President Vanlalruata chuan Mamit DC-in anmahni duh ngeia Mizoram chhuahsantu Bru/Tuikuk-ten vote an thlak theih nana Mizoram pawna refugee camp thlenga a umzui chu tha an tih loh thu leh tlawmngai pawl hruaitute zah lo taka a tawng khum thin leh YMA leh hruaitute police mantir tuma theihtawpa tan a late chu hriatthiam harsa an tih thu a sawi a. “Mamit atanga Aizawl pana a lo haw mek lai, kawnglaka a awm lai pawha NGO hruaitute man an nih theih dan tur a la buaipui zui cheu mai chuan Mizo a hmuhsitzia a tichiang a. Kan hnam min hmusittu a nih vang hian kan ramah hna a thawh kan rem ti bik lo va, a rang lama Mizoram chhuahsan nghal turin kan duh a ni,” a ti.

- LUNGLEN.COM