Tuna Mizoram dinhmun hi : Thalaiten Mizoram Politics virvel kan ngaihtuah loh lutuk vang ni maw? Mizoramah hian mipui mimir hian Kristian-na aiin Politics-a kan \an lam kan thlang zawk a ang ta hle mai. Vai ram a BDO pakhat awp khawm tham lek mipuite hi kan inthlau tial tial a. Zawlnei Amosa rawngbawl lai hun chhung 760-750 B.C.E. bawr vel kha rilruah a lang nawn fo thin. Sawipuitu leh hmelhriat tha nei ve lo, mi rethei leh mi hnuaihnung, kawng hrang hrang a mi hausate’n a ti ve thei lote an rah beh hun laia Zawlnei Amosa mirethei leh mi chanhaite aiawha a rawn din lai hun kha, tuna kan Zoram dinhmun nen hian a in an viau a rinawm. Mahse, Zoram mipuite hi chuan, kan ram hruaituteah hian Amosa ang kha, kan la hmu lo ni ber in alang!
Thalaiten ngaihtuah chian angai : Mizo mipui mimir din hmun a hniam em em laiin, Thalaite kan harh chhuak thei mawlh si lo! Mizo Thalai tam zawk hi hawi zau vak lem lo, Mizoram Future ngaihtuah reng reng lo, sawipuitu leh hmelhriat \ha nei ve lote tan chuan khawi hmunah pawh hian beiseina hlawhtling neih ve theih zel hi a harsat tawh zia chhutna chang hre map lo a tam zawk kan la ni si. Mizoram pumpuiah hian tun dinhmunah lehkhathiam sawrkar a hna hmu lo, 50,000 chuang Mizoramah an awm mek tawh nia ngaih a ni. Heng zingah hian doctor (MBBS) te, engineer te, M.Sc leh MA etc, rual te an kat nuk ngei ngeiin a rinawm bawk. “Mizo thalai tamtak, lehkhathiam ni a ngaihten kut hnathawh hi zahthlakah an ngai”, tih a ni leh zel bawk nen. Kan hmabak hi a eng lem lo khawp mai.
Mizo thangtharten tawrhchhel zirin, mal tlat a tul pawh a mal tlat ngam, eng hna pawh thawk ila, ka hnathawh hi Pathian rawngbawlna a ni ti theitu ni a, Kan finna, kan thiamna, kan ngaihtuahna leh kan rem hriatna zawng zawng thawh khawmin, Zoram tan, kan ‘future a bright’ zawk nan thangtharten ngaihtuahna kan sen a hun tawh hle mai.
Hmasawnna dik a ni em?: Kan ram leh hnam in, siamthat a mamawh em em laiin, thalai rual tam zawkten kawng dik lo zawhin a phawvuak ah Social Networking Site hrang hrang kaltlangin ram kan vei a. Awmze nei lovin, kan mutthluk san mek niin alang. Reality show lamin min delhbet a. Football a kan hmasawnna hmangin Thalai tam ber-te ngaihtuahna hruai kawiin a awm mek niin a lang. Buaipui tur dik ber State hmasawnna tur lam ngaihtuah chu kan hlat hle a nih hi!! Reality Show ropui tak tak buatsaih theiin Football-ah Europe a Club tha ber ber a lut thei pawh nei nual mahila, Kutdawh State, Chawmhlawm State, Thalai Lehkhathiam hna hmu lo, mi beidawng, Depression hial nei kan pung zel a nih si chuan chuan he hnam hi a ding chhuak ngai lovang.
Thalaiten Politics kan ngaihtuah chian a hun : Kum 2018 ah khel lovin Mizoram chuan Inthlanpui a hmachhawn leh dawn a. Tun atangin political party te pawh in \an an khawhleh nasa \an tawh a Policy an in duan that siak mek leh tan ta. Chutihrualin Mizoram a Political Party hruaitute duh khawp lo, mi hmingtha ni a ngaihten pawl an indin siak mek bawk. “Politics ah Full Stop a awm lo” tih changchawiin Politician tam ber-te leh an that hun lai zawng zawng kalpel a, an mahni ruaituten, i chhawrtlak tawh lo ti-a, an chawlhhahdam tir tawhten, kan biak Pathian Nung zahna nei map lovin Zofate min hmangaih leh tan mek lai hian, Thalaiten a kam atangin kan thlir reng dawn em ni? Inthlan a awmin Kohhran hrang hrangten inthlan thuchah a chhuah fo va, MPF-in thuchhuahan siam fo bawk. Mahse, zawm erawh a hlawh ngai lem lo. Politics-a mahni hamthatna tur a nih dawn phawt chuan Pathian leh Kohhran, Zoram mipuite zah miah lovin, dawt pawh sawi mai duh nivekin kan lang!
Corruption punlun chhan hi : Politics hi Party-a in hmang, pu chuam neiten an hlawkpui tur a, an khelh turah chauh kan ngaih a. Corruption tipunluntu a ngai a, Thalaiten kan telve na tlak ah kan ngaih loh vang leh Ram politics veina chang kan hriat loh avangin, Kan nu leh pa, Pi leh Puten, kan future ngaihtuah ve ranin, kan tan, Pathian Nung dah tha in, Politics Field ah an zuanglut ni berin a lang. Chuchuan, eiru thei chinten zak miah lovin nuam a tawltir a, In leh lo tha pui pui an din a, lirthei an hung del dul a, chung mite chu zaka siam tak a ruangin, kan tlawn angaih phah a, thianah kan siam a, an neih ei kan tum a, kan phesek thin ni berin a lang. Sum ngah na na na chu an lo pawk deuh nge nge a, pawl intodelh lo te te, a hminga thiltum eng eng emaw nei ve fir fer kan din a, sum kan mamawh a, sum tuak a harsa a, eiru te bawk kan belbul leh thin.
Hei hian kan khawltlang ah eiru te a ti ngampa a, a ti huangtau a, an thaw lian em em a, Saipui kal in an kal nguk nguk tawh mai thin a nih hi. Chumi dangchat tur chuan heng kan thil tih zawng zawng hi bansan a ngai a, eiru te sum awh loh ngam a ngai. An lirthei hmansak zung zung te, chawei siam tir te, sum thawh tir fo te hi ching lo ngam ila kan thatpui ang. A letling zawngin kan kal a, kan nuihzat tur ten min nuihzat let a, kohhran leh khawtlang ah nihna tha pui pui kan vawn tir a, in thlahrunna chhete mah an nei lo. Hei hian Hnamdang lakah Kan Society hmel a ti bal a. Kan Biak Pathian Nung hmel an hmuh theih loh phah a. Kan ramin hma a sawn loh phah mai nilovin, a hnungtawlh phah a. Thalai Vision nei lo, mi beidawng, Depression nei tam tak a siam phah mek a nih hi.
Atawp berah chuan : Thalaiten, Kan Ram Politics virvel belchiang ila, Hnam dingchhuak, ram hmasawn, mahni Intodelh kan nih theih nan Kum 2018 ah hian, Ram hmasawnna duh, mizo mipuite hmangaihtu, Pathian leh Kan ram tan ti tak taktu an lo chhuah theih nan tun atangin kan ngaihtuah hmang ila. Zoram Nuam siam turin nang leh Kei bak hi an awm chuang lo tih rilru pu chungin ngaihtuah i seng teh ang u.
NB: ka buaizia hre chung a, ka thil vei min hriatpui hi ka lawm.min phut angin kan ziak ve rawi a,ka ennawn hman lo, siam that ngai lai chu in mawhphurhna a ni.
Ziaktu : Lalbiaklawma (Tebiaka)
No comments:
Thanks for your comment.