KAN RO HLU BER - KAN HUN NEIHTE

By - Tluangpuii Hmar Zote

 www.tleirawl.in

Ka naupan lai khân ka pa khân thâwnthu awmze nei leh rilrua vâwn tur chi te hi min hrilh thin a, chung zinga tun thlenga ka la hriat reng leh ka rilrua awm ka vei êm êm chu; Lal ropui, Alexander the Great-a chanchin kha a ni.

A chanchinah khân tun thlenga ngaihtuahna tam tak min neihtirtu leh ka hriat reng pakhat chu:-

Thi mai thei dinhmuna a din lai khân a khawnbawl upate a ko khawm a, a duhthusam hnuhnung chu a hrilh a. Chungte chu :-

1. Doctor thiam ber ber ten a kuang chu an zawn tur a ni.

2. A rosum khawl khawm sa zawng zawng (pawisa, rangkachak, lunghlu.. adt.) chu amah vuina kawngah an theh darh darh tur a ni.

3. A kut pahnih chu a kuang chhûng ațanga dah chhuakin an uai chhuahtir tur a ni.

Chung thil a sawi zawh hnu chuan a khawnbawl upa pakhat chuan a duhthusam hnuhnung chu a hriatthiam loh thu sawiin, sawi fiah leh deuh turin a ngen zui a. Tichuan, a ni chuan hetiang hian a sawi fiah zui leh ta a:-

1. Ka ruang dahna kuang doctor thiam ber berte zawn tura ka duhna chhan chu; Siamtu hun ruat a lo thlen meuh hi chuan he khawvel doctor-te thiamna sâng tak hian awmzia a neih lohzia tihlan ka duh vang a ni.

2. Min vuina tur kawnga ka rosum khawl khawm sate theh darh ka duhna chhan chu; mi zawng zawng hian he khawvela kan khawl khawm rosumte hi chuan he khawvel bak hi an pel dawn lo a ni tih hria se ka duh vang a ni.

3. Ka kut pahnih kuang chhung ațanga dah chhuah ka duhna chhan chu; mite hian he khawvelah hian kut ruakin kan lo lut a, kut ruak bawkin kan chhuahsan leh dawn a ni tih hre reng se ka duh vang a ni, a ti.

He a duhthusam hnuhnung atanga keima ngaihtuah naa lo lang hmasa ber chu:-

 Khawvela kan ro hlu ber chu kan hun neihte hii kan hman zawh tawh chuan kut ruaka chhuahsan bak tih theih kan nei tawh lo. Tawp chin a neih tlat avangin hun hi kan thil neih hlu ber a ni a, rosum hausaknate hi chu kan peipung thei a; mahse, hun erawh kan tipungin, kan tisei thei si lo, tih hi a ni.

Han ngaihtuah ve mah teh u, a dik viau lo maw?

Date : 01:10:2017
Time : 08:15
.................@THZ@...................