KOHRAN LE ȚHALAI

Ziektu: Buonneitling Inbuon

Columnist, www.tleirawl.in

Tulai a țhalaiin hun ei hmang dân hi suongtuona tam tak ka lo nei hlak chu, tlâwmin hung tarlang ei tih aw..

Kohran rama hin țhalai hi ei hlu em em a, Kohran țhuoitu hai khawm țhalai bo chun, inhawi an ti tak tak thei ngai naw a, a chîn taka inthawka a lien tak khawm nisien, țhalai huna hin ei hlu hle a nih.

Kohran hnatlâng haia khawm nisien, Kohran hlimni a khawm nisienla, țhalai bo hin chu, iengkhawm thaw inhawi tak tak na a um thei ngai nawh, Kohran țhuoitu hai khawma an en tak le an suong tak chu țhalai hai ei nih, ieng kawnga khawm nisienla nu le pa, sungkuo laina hai khawma an suong hun lai tak chu, țhalai hun le vanglai hun hi alo nih.


Sienkhawm,Mani hlutna hre lova, ani naw tieng panga hmang thâmral mei mei chu hril ruol lovin, ei tam ta hle, Pathien ram hmangaina châng khawm hre ta lovin, ei țhatlai hun ei hmang zo pei ta el hi chu a pawi hle, mi siemtu lungril chu ava na âwm ngei de aw, mihriem hi ei hlu em em a, Pathien ang puia siem ei na, ngaituona țha tak tak nei thei dingin, Lalpan mal a misawma, sienkhawm, hmang naw nadinga hmang le, ei hlut naw na dinga hmangtu tamtak ei um hlak leiin ei hlut ding ang khawmin ei hlut zo ngai naw a nih.

Țhalai hun hi ei hlu em em laizingin, mani hlutna hmang thiemlo,le um dân hmang țha nuom lo ei tam hle el ta hi chuh, a va pawi de ngei de aw, Pathien lung chu ei va sukna awm char char ngei de aw..ti dâm ngaituona tamtak ka nei hlak.

Mani hlutna hi ei hrietchieng naw lei am ani ding aw, ti dâm ngaituona a suk sei hle, mani hlutna hi chieng inla chu Kohran ram, pathien ram hi ei ngaisak in ei invawi ring a um, "Aw nang țhalai i hlutna hrechieng tumin, țhangla la, chutaka inthawk i chieng zet pha chun, i țhalai hun hmang dân ding hung thiem lem tâng i tih".

Ieng kawnga khawm nisienla, mani hlutna hi hrietchieng a țul em em a nih, tuelkhawm hi A Aw B inchûk ang vawnga lan chûk vawng ei nih, inchûk zo tah, ti a um thei nawh, kei ngei khawm kawng tamtaka bâksamna ka nei ho em em a nih, iengkim hi eiin chûk pei ani leiin hnung tieng pan lovin, hmatieng pan țal țal ei tieu aw..

Țhalai hlutna ka hriet zuol bêk bêk na chu, tlâwmin zuk tarlang ei tih, inkhawmpui ka fena khuo 1 ah chun, Tar deu 1 hi a uma, bu khawm fa dudak thei ta lo, ama khatin iengkhawm fâk zawng thei ta lovin, inhnawm inzun khawm fe thei ta lo, a um hmuna iengkim bawisâwm ngai ta chuh,alo um a, ka hang en chun ka lunginsiet hle khawpel.

A țhatlai hun a ngaidân ding ka hang ngaituo chun, hril thei ruol lovin, ka lunginsiet hle khawpel a, a naupa chu alo uma, hieng hin um hmuna iengkim bawisâwm a ngai el an ta maw? Tia ka hang indawn chun, aw ani ngei hi tie,tiin ami dawnna, kei chun a mak ngei ie maw, "Damlaini khawm hlobet par ang chau a nih, damsawtna khawm lungngaina chau, ropuina khawm sûm hlim ang chau a nih, hla thu in anlo hril hi chu alo van dik em em ngei de aw, ka ti tah a.

A naupa chun ani taluo ie..khawvêla hin tlâkhla ding hrim alo um naw a nih, atia, chuonga kan hohlim peina a chun, a naupa chun kan jection le hlak ka damna dingin, mi jection ta naw ro, ka thi nadingin mi jection lem ta ro tiin ami dawna, a hang ti chun ka lainat hle a, Ama tading chun dam man a um ta naw ti an hrieta, a rinum pêk em leiin thi kar nghakhla in a um lem ta a nih.

Hi pitarnu chan hi ka hang ngaituoa, a țhatlai hun hmang dân popo ngaituona in hun hmang a ti ring a um, Lalpa !tadingin iengtinam hringnun kalo hmang ve aw, annawleh, dam lang ka țhatlai hun la nisien, Lalpa tadingin ka țhatlai hun popo la hang hmang țha lang, ti dâm suongtuona tamtak a nei ka ring, sienkhawm a thei chuong ta si naw a, a hun a tâwp tah leiin.

Ka unau dittak le ka țhalai chanpui hai, nakie hin ei vanglai hun insir rawi ei tih, hun țha ei nei sûng le ei țhatlai huna hin ,Lalram tadingin thei tâwpa țhang la a, ei țhatlai hun hlutna hi hrein, ei vanglaini hmang thiem thei ding le, Kohran ram, Pathien rama ei theina senga țhang la thar thei dingin, Lalpan ei lungrila thu hung hril thar mawl raw seh. Amen!