MUMMY (UNLUCKY MUMMY) RUANGTAWIH THEI LO

MUMMY (UNLUCKY MUMMY) RUANGTAWIH THEI LO

★Opeey-a khiangte
_______________________________________

                       

Tun tum chu Mitthi ruang, tawih thei lova an siam chungchang lam kha i hawi ve leh thung teh ang u hmiang..

Mummy tih chu Mitthi ruang emaw, rannung, ramsa ruang emaw, tawih thei lo tura Damdawi (chemical) emaw leh thil dang dang hmanga vawnthat a ni.

Mihring Mummies leh ran, ramsa mummy chu Khawmualpui hrang hrangah hmuhchhuah a ni a. chungahte chuan, natural preservation leh cultural artifacts a awm nual bawk.

Tin, Egypt-ah sawn, animal mummies maktaduai khat chuang hmuh a ni bawk a. chung zinga tam tak chu zawhte a ni. Ancient Egyptian mummy mai bakah, heng khawmual dang Mitthi ruang tawih thei lo va an siam (mummification) danhmangte hian, ancient American cultures leh Ancient Asian culture hmelhmang a tilang chiang hle a.

North America-a Nevada-a Spirit Cave mummies of Fallon an tih chu, kum 9400 aimaha rei tawh liam taa mi kha a ni a. chu Mummy cave an hmuhchhuah hma kha chuan, mummy an hmuhchhuah upa ber chu Naupang ruang a ni a. chu chu Chinchorro mummies-ho zinga mi niin, Camarones Valley, Chile-a awm a ni a, 5050 BCE vela mi kha a ni.

Natural mummified upa ber erawh chu, Lu (head) chauh a ni a. kum 6,000-a upa tawh niin, kum 1936 CE khan, Inca Cueva No. 4, South America-ah hmuhchhuah a ni. Ptolemaic Greece hun laia Mummy-ho kha 20th century khan scientifically-a chhui tan a ni a.

Mummy zirchianna atana modern scientific examinations an neih hmasak ber chu kum 1901 khan a ni a. Chu examination chu, Egypt khawpui Cairo-a English-language Government School of Medicine professor-in a kalpui a ni. 

mummy X-ray hmasa ber pawh kum 1903 khan a ni. British chemist Alfred Lucas chuan chemical analyses behchhanin, Egyptian mummies a lo zirchiang tawh a. a zirchianna atanga result-ah chuan, Ruang tawih thei lo va an siamna substance nihphung chungchang a awm a ni.

Ancient Egyptian mummies upa ber berte kha natural mummy an ni a. Mummy an nih theih chhan chu, ruang an phumna hmun ro that vang te leh vawh vang te an ni hlawm a ni.

3500 BCE khan, Egyptians-hovin Thlan khura inphum an ching tan a. 

Mahse chung Thlante chu pawn te te a ni hlawm thung. Ruang an phum duhna hmun pawh, ruang tawih har theih nan, Thlaler hmun ro, sa tha tak, ruang ro zung zungna tur hmun an thlang thin a.

chuvangin, an mitthi phumte chu, anmahniin tawih thei lo (Natural mummy) an lo ni ta thin a ni.

4th dynasty (about 2600 BCE) khan, Egyptian mithiam, ruang tawih thei lo va siamtu (embalmers)-te khan, Ruang tawih thei lo va siam dan dik tak "true mummification" hi an lo thiam tawh a. 

Ruang kawchhung lama ril, pumpui leh kawchhunga taksa peng dang dangte chu phawrhchhuakin, Mineral leh Oil hrang hrang hmangin ruang chu an vawngtha thei thin a ni.

Amaherawhchu, chutianga Egyptian-hovina ruang an sawngbawl vel dana thil tam tak chu, tun thlengin hriatchhuah theih a la ni ta chuang lo a ni.

Greco-Roman period laia Mummy an siam dan tlem erawh document a awm thung. Tomb of Tjay kha TT23 tih a ni a, Mummy tuam an hmuhna hmun pahniha a pakhat zawk a ni.

Thiamna a lo sang zel a, Mummy siam nana an technique thenkhat pawh hriatchhuah a lo ni ta zel a.

CT scans hmangin, kum 2,400-a mummy upa tawh chu kum 2008 khan endik a ni a. chu mummy endiknaah chuan, Mummy luruha cranial cavity-ah an hmanrua (tool) a lo tang a.

Chuta an tool hman chu rannung ruh ilo vel atanga rod ang deuh siam a ni. chu tool hmang chuan Thluak an zai thin a ni. Kum 10-tel tih dan hrang hranga an zirchian hnuin, modern Egyptologist-te'n,
Ancient Egypt hun laia mummy an siam dan dik tak an hrechhuak thei ta a.

Ruang Kawchhung an haichhuak vek a, rimtui leh Palm wine hmangin kawchhung chu an silfai leh vek a. Kawchhung haichhuak vak mah se, Lung (heart) erawh an zuah zel thung.

An tradition-ah Lung hi ngaihtuahna hnar ber a ni a. chuvangin, thih hnu piah lama Thlarau thawhlehnaah a la pawimawh hle dawna an hriat vangin, Lung chu phawrhchhuah a ni ve ngai lo a ni. 

Tichuan, ruang an silfai zawhah, ruang kawchhung leh pawn lamah natron chulhin ruang chu an tiro ta hulh a.

Jar-ah an dah emaw, puan nemin an tuam emaw ta thin a. chutia an sawngbawl vel chhung chuan ni 40 chhung a awh a ni. Tuam chiho chu, khatia ruang an tihro dehydrate hnu khan, linen cloth hmangin an tuam thuah vak a.

Egyptian priest-te'n, ruang chu thlarau sual laka a him theih nan Amulet te tak te an dahtel thin a ni. Tin, boruak hnawng a luh theih loh nan, an tuamna pawh chu thinghnai (resin) an hnawih chhuak leh vek thin a. ruang dahna Mitthi Kuang pawh Thinghnai an hnawih leh vek bawk.

Tichuan, Mummy chu Thlan (Tomb)-ah an zalh a, Thihhnu piah lama an rochun turah Rohlu an dahtel zel thin a ni. Ancient Egyptian tomb tam taka Mummy-ah phei chuan, Aspergillus niger an dahtel thin a. Thlan hawn chiah khan, hipluh theih a ni a. chu chuan thihna hial a thlen thei thin a ni.

Ruang Tawih thei lo va siam (Mummification) hi Ancient Egyptian society-ah chuan an custom zinga pakhat a ni a. Egyptian-ho nunphung pholanna pakhat a ni bawk.
                     

THE CURSE OF THE UNLUCKY MUMMY

Unlucky Mummy chu Ancient Egyptian-ho bungrua (artifact), London-a British Museum-a dah saw an ni a.

Chung bungraw neitu dik tak chu hriat a ni tawh lo. A nihna takah chuan, 'Unlucky Mummy' chu mummy a ni lo va, 'mummy-board'  (inner coffin lid) cheimawi zawk a ni.

Thebes-ah hmuhchhuah a ni a, a pianzia leh cheimawi dan style atangtea chhutin, 21st emaw, early 22nd Dynasty (c 950–900 BC) hun laia mi niin a lang.

Thebes chu Ancient Egyptians chuan Waset an ti a, ancient Egyptian khawpui niin, Nile Lui atanga chhak lama awm a ni a. chu chu Mediterranean atanga chhim lam 800 kilometers (500 mi) vela hlaa awm a ni.

Tunah erawh khawpui hlui ram (ruin) a ni tawh a, modern Egyptian khawpui Luxor huam chhunga awm a ni. Unlucky Mummy hi British Museum-ah chuan, a serial number EA 22542 tiin an sawi mai thin a ni.

Unlucky Mummy-a mymmy an lo dah thin chu hmeichhia niin an ngai a. Unlucky Mummy chhinna a changkan danah pawh hian, a neitu chu a hun laia awmthei ve tak niin a lang.

mummy-board (Unlucky Mummy) chu 162 centimetres (64 in)-a sei a ni a, Thing leh plaster hmanga siam a ni. Unlucky Mummy chanchin chu plaster-ah kimchang takin a inziak bawk.

Kum 1889 khan, mummy-board chu British Museum-ah in Mrs Warwick Hunt of Holland Park, London chuan, Mr Arthur F Wheeler hmingin a pe a. Kum 1890 khan, Museum-a 'First Egyptian Room'-ah phochhuah a ni a, chuta chin chu mipui hmuh theihin dahchhuah a ni ta a ni.

Tin, kan sawi hmaih hauh loh tur chu, Unlucky Mummy chhungah khan mitthi ruang a awm a.
First and Second World Wars hun lai khan, a chhiat palh an hlauh avangin, Unlucky Mummy atang chuan ruang chu an lachhuak a, hmun him zawkah dahthat a ni. hmun hrang hrangah sawn kual a ni a, khatia British Museum a chhuahsan hnu khan, a hmun dik tak Egypt-ah tho dahkir a ni leh ta a ni. 

mummy board erawh kha chu Museum Room 62-ah dah a ni.

Mummy-board hian, a thlen chin apiangah vanduaina a kengtel zel niin an sawi a. vanduaina a thlen zingah chuan, hliampui, chhiatna leh thihna te a tel a ni. Kum 1912-a RMS Titanic chetsualna pawh kha Unlucky Mummy-a anchhia awm vang niin mi tam tak chuan an ngai a ni. chuvang tak chuan Unlucky Mummy tih a ni ta reng a ni.

'Unlucky Mummy' leh British writer leh journalist ni kawp Bertram Fletcher Robinson thihna pawh khan inzawmna engemaw neiin an ngai a. Robinson chuan kum 1904-a Daily Express newspaper-a journalist hna a thawh laiin, Egyptian artefact chanchin a zirchiang a.

chumi atanga kum 3 hnuah, mak takin a boral ta ringawt mai a ni. kum 1860 chho khan, Oxford graduates mi 5-te'n Egypt an tlawh a. Nile lui lawnga zawhin, tourist attraction hrang hrang an tlawh a. Tichuan, Deir el-Bahri mummy khura thil awm chu an zin hriatrengna souvenir atan an la a.

chu chu egyptian priestess Amen-Ra kuang khuhna chhin a ni. high priests, Amen-Ra tih chu Egyptian pathian hming atanga phuahchhuah a ni. Egypt atanga an kir lamah chuan, graduate 2 chu an thi nghal a. pakhat erawh Egypt khawpui Cairo lamah a kal a, Vahmim a va pel laiin ama banah a inkap palh a. tanbun a ngaih phah ta a ni. an zinga Arthur Wheeler erawh chuan England a thleng thei hlauh thung a.

Mahse, U.S.-ah a pem a, tuilian leh kangmei vangin a va thi ve leh ta tho a ni. Kuangchhin (coffin lid) chu Wheeler-a unaunuin a kawltha a. 

kum 1887 khan Thlalatu kohva kuangchhin chu thlalak a tum a.

Mahse, Thlalatu pawh chu a boral ve leh ta zel a. A hnuah, 5-foot-a sang “mummy board” chu British Museum-ah dahthat niin, a hmingah pawh official takin “artifact 22542” tih a ni ta a ni.

Unlucky Mummy anchhia vanga nghawng tha lo tak mai chuan thil mak tak tak a thlen a. accidents te, kailawna lum palh te, eizawnna kawnga tluan lohna te a ni. Rilru buai pakhat phei chuan, mummy hrangin kar tam tak chhung min zarbuai tih a lo sawi ve nawlh bawk.

Tin, Titanic Lawngah khan Mummy an phur a, Titani lawng pawh chuan chetsualna a tawk a, mi thahnem tak an thih phah ta niin an ngai bawk a ni.

Thil tak tak a ni emaw, ni lo emaw, Mummy a nih hrim hrim chuan a nelawm tawh lo phawt mai! chubakah, mitthi hi chu tuma'n kan ngaina ngai lo. chuvangin, saw'ng mummy an hmuhchhuahho sawn mi tam tak rilruah rapna a tuh a.

Chuta tang chuan, Vanduaina leh Anchhia an kengtela ngaih tlatna a awm ta mai zawk pawh a ni thei..
                         

Source:WAGK & https://www.thevintagenews.com/2017/12/16/the-unlucky-mummy/ via @UA-45128648-9

★★★