★Opeey-a khiangte
Tin khawrpum in a khawsa ve naw naw , a pa loneimi zu ngawlvei ni bawk, a nu mi ina tirhkah anga inhlawh ve lawp lawp thin, a chawrchhuahna tlawm hle mahse khawvel infiammi zinga hlawhtling, hausa leh lar ber te zinga rawn inhlangkai thei, mi tam takin kan chenna planet chhunga football chhuih thiam bera an ngaih hial, mibik leh miropui Cristiano Ronaldo "CR7" chanchin a ngaihnawm zual thenkhatte i lo tarlang mai mai dawn teh ang.
1. Ronaldo hi pa in vawng tak mai a ni a, meizial a zu lova, zu pawh a in lo. A zu in loh chhan hi zu vanga boral a pa a hriatchhuah tir thin vang a ni. Tin, meizial leh zu hi khawvela footballer tha ber a nih tumna kawnga dodaltu lian takah a ngai nghet tlat.
2. Infiammi te zingah, a bik takin footballer zingah ngat phei chuan an taksaa tatoo chhu kai miah lo chu an tam hauh lovang.
Mahse, Ronaldo hian a taksa khawi lai hmunah mah tatoo zu chhu kai hauh lo a! A tatoo duh lohna chhan hi a chhuanawm riau lehnghal- kum tinin thisen tum hnih a pe ziah thin a, tatoo a neih chuan a pe thei dawn tawh lo a ni.
3. Sporting Lisbon a a coach hrawn hmasak ber, Paulo Cardoso chuan," A inkhel lai ka hmuh hmasak ber kha ka theihnghilh thei ngai tawh lovang. Ka assistant hnenah a ball thiamzia hahipin ka hrilh a, football khawvelah hian a cham rei tur zinga mi a nih thu leh a la dinchhuah tur thu te pawh ka hrilh tel nghe nghe" tiin Ronaldo chungchang a lo sawi tawh a ni.
4. A tleirawl lai a a football practice dan hi a hautak tiah tiah kher mai.. a ke tawn tawnah thil rit tawn bet chungin ball chawh a zir thin a, rit nena duh tawka ball a chawh kual theih phawt chuan, rit tellova a ball chawh a rang lehzual thei dawna a hriat vang a ni. A thlawn lo chu a nih hi maw..!
5. Manchester United in 2003 kuma £12.2m a an lei hma lawk khan Liverpool pawhin an lo enthla ru ve reng a, mahse an club a khel atan la tha tawk lovah an ngai a, lakluh an tum ta lo a ni.
6. Manchester United in an lakluh hma lawk khan, khatih hunlaia Ronaldo club Sporting Lisbon leh United ten exhibition match an nei a, he match ah hian Ferguson an John O'shea chu Ronaldo chang turin a ti a, Ronaldo hian a lo chhaih hah ngang a ni ang, half time ah John O'shea a chu mask a oxygen hip tir a ngai hial.
7. Manchester United hian an jersey no 7 hi an mibik player te an hak tir thin. United miropui Bryan Robson, Eric Cantona, David Beckham etc te lo hak tawh thin a ni. Mahse Ferguson-an kum 18 mi Ronaldo hnena jersey no 7 a rochun tir dawn khan a inngaihtuah nawn loh thu a sawi a ni.
8. Chawhruala NBA player te ho zuan san zawng lakin, anni aiin Ronaldo 7cm in a zuang sang thei zawk. Awmhmun atanga a zuan hian 44cm a sangin a zuang thei a, run-up a lak phei chuan 78cm laia sangin boruakah a per kang chho thei. A ball pet pawh a na ngang mai, free kick hi 130 kmph a chakin in a pet kawh thei.
9. Sum ah pawh a buai lo fu.. US President Donald Trump's in kum khat a a hlawh zat hi, Ni 6, darkar 9, minute 17 leh second 5 chhung lekin a lalut daih. Club atang ringawta a sum lakluh chu £274,000 a ni a, khawvela footballer hlawh tam ber pawl a ni nghe nghe.
10. A hausa a, a lar a, a hmeltha a, a pian lah nise a nalh em em a, khawvel hmeichhe lar leh hmeltha tak tak te ngaihzawn rawn a ni pawh hi a mak love.
A duh duh thing thei dinhmunah a awm a, a hmeichhe kawp tawh zingah hian Bollywood actress Bipasha Basu pawh a bang bik lo.
11. A thui ta viau mai a, he a chanchin pakhat ngaihnawm tak mai hian kan tlip tawh mai ang e..
Cristiano Ronaldo: " Ka hlawhtlinnaah hian ka thianpa Albert Fantrau-a hnenah lawmthu ka sawi lo thei lo.
Youth club pakhata ka khelhpui thin a ni a, player zawng tura Sporting Lisbon mi leh sa ho an lo kal khan, min inkhelhtir chhin anga chuta goal thun tam ber chu an Academy a zir tura an lakluh tur thu min hrilh a.
Kha match ah khan 3-0 in kan chak a ni. Hmahruaina goal ka thun a, Albert an a hnu lawkah a tauh goal veleh a, 2-0 in hma kan hruai a.
Tichuan hun tawp dawnah Albert ah chu ball tha zet mai a hmu a, amah lo thlawp turin a bulah chuan ka tlan a, keeper a bum a a tlanpel a, a tih tur awmchhun chu goal ruaka thun chauh a ni tawh.
Mahse, thun talo chuan ball chu min lo pass ta daih mai, a mak ka ti lutuk. Harsa lo takin goal ruakah chuan ka thun ta a, Academy a lut tur chuan thlan ka ni ta a ni.
Inkhel ban veleh engvanga khatia ti nge ani tih ka zawt nghal a, tawitein tihian min chhang 'kei aiin i thiam zawk a i phu zawk e' tiin"..
Kum engemawzah hnuah nikhat chu chanchinbumi hovin Ronaldo thusawi hi a dik leh dik loh finfiah turin Albert Fantrau-a chenna in chu panin an va zawt a.
Thutak a nih thu leh a football career pawh khata tanga a tawp tak hlauh thu te leh hnathawh nei lova a awm zui tak thuin a lo chhang a.
Chanchinbumi te chuan " Chutiang anih chuan in ropui tak i nei a, lirthei manto tak tak i nei bawk a, i hausa em em bawk sia, engtinnge heng zozai te hi i neih theih si?" tiin mak tih hmel takin an zawt leh a.
Alberta chuan a thianpa chu chhuang tih hriat takin tihian a lo chhang a, "Cristiano min pek vek a ni e" tiin..(Opeey-a khiangte)
★★★
No comments:
Thanks for your comment.