- Hmaa Hauzel
Columnist, www.tleirawl.in
Group A-ah hian a thlengtu Russia, Saudi Arabia leh vawihnih champion tawh Uruguay te an awm ho a. Team lian fal an awm lova, second round lut turin an inbeih tawk hlawm viau a rinawm. Thlirlawk dan chuan vawihnih champion tawh Uruguay hi chak vekin group champion an ni tura ngaih a ni a. Vawihnih chakin Mohamed Salah te ram Egypt pahnihna niin second round an inhlangkai tura ngaih a ni a. A thlengtu Russia hian Saudi Arabia hneh tura ngaih ni mahse second round an inhlangkai zo lo tura ngaih a thung a. Saudi Arabia hi point box niin group A-ah chuan a mawng phah an nih a rinawm. Group A thlirlawk a, rin chhintu 101 Great Goals predicts chuan hetiang hian an inhneh kual a ring; Russia 2-0 Saudi Arabia, Egypt 1-2 Uruguay, Russia 1-3 Egypt, Uruguay 4-0 Saudi Arabia, Uruguay 2-1 Russia, Saudi Arabia 0-3 Egypt. Group A a awm ramte chanchin tlem lo tarlang leh ila.
Russia
Khawvela ram ropui ber pawl Russia hian World Cup an thlen vawi khatna tur a ni a. World Cup-ah hian vawi 11 an lo inlan tawh a. Vawi sarih chu Soviet Union an nih laiin a ni thung. Russia hi kum 2014 World Cup-ah khan Belgium, South Korea leh Algeria te nen awm hovin second round an inhlangkai zo lova. Euro 2016-ah England inhnehtawkpui thei mahse last 16 an inhlangkai zo leh chuang lo bawk. An ramah ngei khel in, mipui thlawpna hmu ţha viau mahse second round lut turin harsatna an tawh rin a ni. Alan Dzagoev (CSKA Moscow), Aleksandr Kokorin (Zenit St Petersburg) leh Yuri Zhirkov (Zenit St Petersburg) te hi Russia player pawimawh, an inngahna tura ngaih a ni a. Chelsea midfielder hlui Zhirkov hian World Cup zawh aţang chuan international football a chawlhsan tawh dawn a. World Cup-ah ţha taka inlan a, hnuhma ţha tak nen ram tan inkhelh chawlhsan a tum hle ngei ang.
Saudi Arabia
Saudi Arabia hi an Group-ah pahnihna ni chungin Russia World Cup khel phak turin an tling a, Japan dawttu an ni. World Cup khel tur zawnnaa an group-ah Australia nen an point hmuh a inzat a. Goal difference-ah +2-a an san zawk vangin direct in World Cup khel phak turin an tling. Anni hi kum 2014 kha World Cup-a an chet ţhat ber ţum a ni a. Brazil-ah khan Last 16 an inhlangkai a, last 16-ah Sweden in an hnawkchhuak thung. Tun ţuma Saudi Arabia player te hi an ram chhunga khelh deuh vek an ni a. Ram pawna khel pakhat chauh awm in, Levante player Fahad Al-Muwallad chiahin ram pawna football a khel a ni. Nawaf Al-Abed (Al-Hilal), Fahad Al-Muwall (Al-Ittihdad) & Yahya Al-Shehri (Al Nassr) te chu an player pawimawh, an inngahna an ni dawn a. Al-Abed hian World Cup qualifier-ah goal 5 thunin Russia an pan theihna kawnga thawhhlawk tak, an top scorer a ni a. An khelh hnuhnun ber ţuma Al-Muwall goal thun vangin World Cup khel phak turin an tling chiang thung.
Egypt
Premier League 2017-18 season-a player ţha ber Mohamed Salah kawltu Egypt hian kum 1990 hnu lamah a vawikhat nan World Cup an khel dawn a. Salah an neih miau vangin mite en chak an ni ngei dawn. Pharaoh-a rorelna ţhin ram ropui Egypt hian World Cup an vawithum khelhna tur a ni a. Africa rama team ţha ber pawl an ni reng a. African Cup of Nations-ah pawh vawi sarih ngawt an champion tawh nghe nghe. Russia World Cup khel tur zawnnah Uganda, Ghana leh Congo te nen awm hoin vawikhat chiah an tlawm a. Group champion niin World Cup khel turin an tling a. Russia an pan theih nana an player pawimawh ber chu Mohamed Salah a ni a, Salah hian goal 5 thunin an ram top scorer a ni nghe nghe a. Ani bakah hian Arsenal player Mohamed Elneny (Arsenal) leh Ramadan Sobhi (Stoke City) te chu an player pawimawh turte an ni ang. Egypt inngahna lian ber Mohamed Salah chu hliamin a tibuai mek a. World Cup 2018-a an khelh hmasak berah an inlan hman dawn em tih a la chiang lo zel a. Salah awm leh awm loh hian an hma lam hun thui takin a hril tura ngaih a ni.
Uruguay
World Cup-a champion hmasa ber leh vawihnih champion tawh ram Uruguay hi CONMEBOL-ah pahnihna niin Russia World Cup khel turin an tling a. Khawvela striker ţha ber pawl pahnih Luis Suarez leh Edinson Cavani te an neih miau vangin Russia World Cup-ah pawh hian ngaihthah theih an ni dawn hauh lo. Uruguay tlarhma player Cavani chu French Ligue-1 ţha taka inlanin top scorer a ni a. La Liga lamah pawh Luis Suarez chu goal thun tam lama pathumna, Messi leh Ronaldo te hnung chiaha awm a ni a. Atletico Madrid player pawimawh tak Diego Godin a awm tel bawk a, anni pathum hi Uruguay innghahna player pawimawh pathum an ni ang. Uruguay player pawimawh Suarez hian World Cup-ah titi a siam tam thei viau. Kum 2010-ah khan Ghana nen an inkhelh ţumin goal tur a ben chhuah vangin hnawhchhuah a ni a, Penalty hi an siban nghakin a dang zui leh nghal a, an chakpui ta nghe nghe a, hei hian titi a siam hat a nih kha. Hei mai hi a ni lo, kum 2014 World Cup-ah khan Italy defender Giorgio Chellini chu a seh leh bawk a, Hei hian titi a ti tamin Suarez hian sawisel a tawh nasat bakah hrem a tuar zui bawk. World Cup-ah titi siam thei tak Suarez hian Russia World Cup-ah hian sawi zui laih tur engtak hnutchhiah leh ang maw le??
No comments:
Thanks for your comment.