WORLD CUP THLIRLAWKNA - GROUP B

          - Hmaa Hauzel

Columnist, www.tleirawl.in

Group B-ah hian team hmuhnawm tura ngaih Spain leh Portugal te bakah Iran leh Morocco te an awm tlang a. Spain leh Portugal tan second round luh theihna hun ţha tak a awm tura ngaih a ni a. 101 Great Goals predicts chuan Group B a mite an inhnehkual dan tura an rin tiang hian an tarlang; Morocco 1-0 Iran, Spain 2-2 Portugal, Portugal 2-0 Morocco, Iran 0-2 Spain, Spain 3-0 Morocco. Spain hi point sarih hmua group leader ni tura ngaih an ni a, Portugal in dawtin, Morocco leh Iran ten an dawt ve leh tura ngaih a ni. Ram mal thlirna lo tarlang ila:

Spain
Football thiam ram, World Cup leh Euro ah pawh lo champion tawh, player nei ţha rual em em Spain hi kum 2010 World Cup-ah khan ropui takin an champion a. 2014 World Cup-ah erawh champion tura rinkai ber pawl ni chungin first round paltlang zo lovin an tla ri ngawt thung a. Russia-ah hian ţha taka inlan a, an mualphona thup mawi ngei tumin an inlan ngei ang.

Spain hian Russia zin thei tur zawnna inkhel an hmachhawn vawi 10-ah vawikua hnehna changin goal 36 ngawt an thun a. Isco leh David Silva te chuan goal nga ve ve thunin top scorer an ni dun a. Anni pahnih hi Russia World Cup-ah pawh hian an inngahna player pawimawh tak an ni leh ngei dawn a. Manchester United siban nghak Ddavid de Gea pawh an inngahna lian tak a tling ngei ang.

World Cup-ah vawi 13 lo inlan tawh Spain squad-ah hian 2010 a champion team player pali chauh an tel tawh a, chungte chu Andres Iniesta, Gerard Pique, Sergio Ramos and leh David Silva te an ni a. Anni kaihhruaina hnuaiah hian ţha taka an inlan theih a beiseiawm. Champions League final-ah Liverpool player pawimawh pahnih Mohamed Salah leh Karius a hliam vangin Ramos hian hawtu a ngah vanglai tak a ni a. Russia World Cup-ah pawh hian ngaihven hlawh ber pawl a ni dawn a. |an ngawih ngawihtu leh haw ngawih ngawihtu an inpawlh chuat dawn a ni.

Portugal
European champion Portugal hi World Cup-ah an thlang sang hleithei meuh lova, an thlen san ber ţum chu kum 1966, Mizoram buai kumah khan a ni a. Hemi ţum hian semi final an thleng a, final lut zo lo mahse pathumna erawh an ni zui tho thung. World Cup hnuhnung berah khan Spain ang bawkin first round an platlang zo lo va. Germany leh USA te tluk zo lovin pathumnaah an awm.

Russia World Cup khel phak tur zawnnah Portugal hian a tir lamah harsatna tawk mahse an khelh hnuhnung berah hnehna an chan hlauh vangin direct in an tling tho thung a. An player chhuanvawr Cristiano Ronaldo chuan goal 15 ngawt a thun.

Cristiano Ronaldo (Real Madrid), Andre Silva (AC Milan) leh William Carvalho (Sporting Lisbon) te chu an player langsar zual tura ngaih an ni a. Ronaldo hi tlarhma player ngaihven hlawh ber pawl a ni ngei dawn a. William Carvalho hian central midfield ah ţha taka khel in, Ronaldo tan ball ţha tak takin a chhawpsak leh tura ngaih a ni.

Portugal hi player nei ţha rual tak an nei a. Khawvela player ţha bera mi tamtakin an ngaih C. Ronaldo an neih miau vangin tu team tan mah zuam chi an ni dawn lova. C. Ronaldo tel lo pawha France hneh thei team an nih miau vangin Ronaldo-ah chauh innghat ngawr ngawr an ni lo tih a chiang bawk a. Team hmuhnawm tak an ni ngei ang.

 Morocco
Kum 1976-a AFCONS champion Morocco hi World Cup-ah vawinga an inlanna tur a ni a. 1998 hnu lama an inlan lehna hmasa ber tur a ni thung. Juventus defender ţha tak Medhi Benatia hoin an inlan dawn a. Team vangtlang tak ni tura ngaih an ni a. Spain leh Portugal nen an awm tlan miau vangin second round lut turin hna hautak tak an thawh a ngai dawn a. Second round lut turin thilmak an tih a, inlehthalna lian an thlentir ngei a ţul ang.
Khalid Boutaïb (Yeni Malatyaspor), Hakim Ziyech (Ajax), Medhi Benatia (Juventus) te chuan player pawimawh zual pathum ni tura ngaih a ni a. Boutaïb hian Russia pan tur zawnna inkhelah goal li thunin an topscorer a ni a. Hakim Ziyech hian Ajax tan season ţha tak a hmang a, Dutch club lian-ah an key player a ni. Juventus defender Medhi Benatia pawhin season ţha tak hmang bawkin goal hnih a thun.

 Iran
Iran pawh hi Morocco ang thoin World Cup-ah an vawinga inlanna tur a ni a. Russia World Cup khel tur zawnnaah ţha taka inlanin khelh 10 aţangin point 22 an hlawhchhuak a, Russia zin thei turin ticket an book fel.

Ex-Real Madrid manager Carlos Quieroz is the man in charge of the Iran football team but it is extremely unlikely that Iran will make it out of the group stage.

Iran tan hian Sardar Azmoun (Rubin Kazan), Mehdi Taremi (Al-Gharafa) leh Ehsan Hajsafi (Olympiacos) te chu an inngahna player pawimawh turte an ni a. Kum 23 mi lek Azmoun hian Russia an pan theih nan qualifier-ah goal 7 zet a thun a. Iran tan a kum zat aia pakhata tlem hret goal 22 a thun tawh nghe nghe a. He kum 23 mi lek hi Russia-ah a cheţha zui leh a nih ngat chuan club lian hrang hrangte ngaihven a hlawh zui ngei ang.