WORLD CUP THLIRLAWKNA GROUP D

- Hmaa Hauzel
Columnist, www.tleirawl.in

Group D hi football chikmi ţhenkhatte chuan 'group of death' tiin an sawi țhin a. Hei hian group awlai a ni dawn lo tih a tichiang nghal awm e! Football ngainatute hmuhchak leh ngaihven hlawh Messi te
ram Argentina an awm miau vangin Group D hian ngaihven a hlawh dawn a. 2014 finalist Argentina hian ngaihven an hlawh leh zual ang.

Group 'D'-ah hian Argentina, Croatia, Nigeria leh Iceland te an awm a. Argentina tan group champion nih theihna kawng zau tak a inhawng tura ngaih a ni a. Croatia pahnihna an nih theih a
rinawm a. Nigeria leh Iceland te pawh hi inhnehtawk viau tura ngaih a ni a. He group-a awmte hi an inhnehtawk tlang viauin a rinawm a. 101 Great Goals predicts chuan tiang hian an inhneh kual a ring; Argentina 2-0 Iceland, Croatia 1-0 Nigeria, Argentina 2-1 Croatia, Nigeria 1-2 Iceland, Nigeria 0-2 Argentina.

Argentina
World Cup-a vawihnih champion tawh leh kum 2014-a final hial thleng thei Argentina hi
Russia World Cup-ah pawh hian champion tura rinkai ber pawl an ni a. Khawvela footballer țha bera ngaih Lionel Messi an neih miau vangin tu tan pawh ngaihthah thiang lo, huphurh en en a en nghal tur chi an ni a. Tlar hmaa Messi, Aguero, Higuain, Angel Di Maria te bakah Paulo Dybala an la neih cheu vangin tlarhma nei ţha ber ang hiala ngaih an ni.

Sampaoli-a enkawl mek Argentina hian tlarhma player nei țha viau mahse tlarhnung player leh muallai player an nei ţha tawk lova tlarhma player leh tlarhnung player te an inbuk tawk lo ţhin hi an khel a ngheh tawk theih loh nachhan pawh a ni a. An inkhairual tawk loh vang hian champion tur
meuha rin an harsat phah ve bawk ţhin.

Messi, Aguero leh Di Maria te hi Argentina player pawimawh zual tura ngaih an ni a. Messi
khelh ţhat loh nia tlahniam lutuk lova midang an par vul thei a nih chuan anni tlukna champion tura
rinkai an awm bik dawn lova. Argentina hi an champion hlauh a nih chuan Messi chu hnial rual lohin football khel mekte zinga footballer ţha ber a ni chiang bal tawh bawk ang.

 Iceland
Aizawl District aia mipui tlem zawk, mipui nuai thum vel lek awmna Iceland in World Cup
an khel phak hi thil mak tawp a tling a. World Cup an vawikhat khelhna tur a nih vangin mi ngaihven an hlawh leh zual dawn a. Euro 2016 ang deuha rin aia an khel ţha leh a nih phei chuan ţan an hlawh nek dawn.

Tualchhung league mumal pawh la nei hleithei lo Icelandic tan hian Gylfi Sigurdsson
(Everton), Alfred Finnbogason (FC Augsburg) leh Kolbeinn Sigborsson (Nantes) te chu an player pawimawh zual turte an ni a. Gylfi Sigurdsson hian kum 2012 aţang khan EPL-ah inlan ţanin Swansea, Tottenham leh Everton tan a lo khel tawh a, season liam ta khan Everton chuan an club chanchina an
player manto ber ni turin an la lut hial a. A tawnhriat neih ţhat hi Iceland in chhawr ţangkai an tum ngei
ang.

Sigborsson hi Euro 2016-ah England an hnawhchhuahna goal thuntu kha a ni a. Iceland tan hian vawi 44 chiah la khel mahse an topscorer a ni mek thung.

Iceland hian inkhelh zawhah an fan te nen kut an beng rual leh ţhup ţhup dawn a. Chu chu I
League leh MPL velah pawh kan lo la chhawng ve leh tura ngaih a ni.

Croatia
Anni hi khawvelah pawh midfielder nei ţha ber pawl an ni a. Muallaiah Real Madrid mifielder Luka Modric leh Mateo Kovacic bakah Barcelona player pawimawh Ivan Rakitic te, Inter Milan player pawimawh Ivan Perisic leh Marcelo Brozovic te an neih miau vangin tutan mah zuam chi an ni dawn lo.

Anni ho bakah hian tlarhmaah Juventus Striker Mario Mandzukic an nei bawk. Manzukic
hian ram tan goal 30 a thun tawh a. Croatia tana goal thun hnem ber Davor Suker-a goal thun zat chu chu 15 in a la tluk lo thung. Tlarhmaah Manzukic hi aninnghahna a ni ngei dawn a. Tlarhnungah Liverpool defender Dejan Lovren leh Atletico Madrid defender Sime Vrsalijko te chu an inngahna an ni bawk ang.

Croatia hi kum 1998 khan pathumna niin hei hi World Cup-a an thlen san ber ţum a ni a.
Euro-ah vawihnih quarter final an thleng tawh bawk a, khawvel huapin championna erawh an la nei lem lo thung. Euro 2016-ah pawh khan champion ta Portugal kha kawng tin rengah hneh chungin goal-ah an vanduai a, vanneihthlak taka Portugal in an tih goal mial bawk si vangin uiawm takin an tla nghe
nghe a nih kha.

Nigeria
Nigeria hi World Cup an vawiruk khelhna tur a ni a. Kum 2014 khan last 16 an inhlangkai a. France hneh lovin an tla zui thung. Mak ve deuh chu Nigeria te hi group khatah an awm tlang thei em em mai a ni.

Nigeria hian hmanni lawk khan Argentina inkhelhfiam puiin 4-2 ngawtin an chak a.
Argentina an hneh țum hian Arsenal forward Alex Iwobi chuan goal hnih a thun nghe nghe a. Alex
Iwobi hi Nigeria inngahna a ni ang. Ani bakah hian Kelechi Iheanacho (Leicester City) leh Ahmed Musa (CSKA Moscow) te hi an player langsar zual tur an ni bawk ang.

Group 'D' ah hian Argentia leh Croatia te inkhel chu inkhel hmuhnawm ber tura ngaih a ni a. Football ngainatute tan chuan anni inkhel hi en hmaih phal chi a ni lo ang.