WORLD CUP THLIRLAWKNA GROUP E

- Hmaa Hauzel,
Columnist, www.tleirawl.in

Group E’ ah hian football thiam ram, World Cup-a champion ngun ber Brazil an awm vangin group ngaihven hlawh a ni lo thei lova.  Switzerland, Costa Rica leh Serbia te nen an awm tlan vangin Brazil tan hian awlsam tein Group champion a nih theih a rinawm.

Group 'E' thlirlawktu 101 Great Goals predicts chuan Brazil hian point kua an hmuh a ring a. An inhnehkual dan tura a rin tiang hian a tarlang; Costa Rica 1-1 Serbia, Brazil 3-0 Switzerland, Brazil 3-0 Costa Rica, Serbia 0-1 Switzerland, Serbia 1-2 Brazil. Ram mal angin lo thlir leh thuak thuak ila.

*Brazil*
Tarlan tawh angin Brazil hi World Cup-a champion ngun ber an ni a. Khawvela player ţha tak tak kawl khawmtu an nih miau vangin champion tura rinkai ber pawl an ni a. Neymar, Coutinho, Gabriel Jesus leh Firmino te inkawp tur ringawt pawh hi en chakawm tham a ni.

Brazil hi World Cup thlengtu Russia tih loh ah chuan World Cup khel tura tling hmasa ber an ni a. South American khawmual (CONMEBOL) ah pakhatna niin awlsam takin an tling chho a ni.

World Cup champion ngun ber ni mahse kum 2014 semi final-ah an tualzawl ngeiah 1-7 ngawta Germany an hneh lo chuan nghawng lian tak a la nei reng a. Mangchhiain a la umzui zel a ni ber mai. Russia World Cup-ah hian an champion thei a nih chuan Germany lakan a mualphona kha an theihnghilh mial mahse le!

Brazil-ah hian Mizote pawhin player kan hmelhriat tak tak an awm fur hlawm a. Tun hma aţanga Mizo ţan hlawh an ni țhin bawk nen tun ţumah pawh hian Mizoram aţanga țantu nei tam ber pawl an nih leh ngei a rinawm.

*Switzerland*
Switzerland hi direct-a inpet tling zo lo, playoff hmanga World Cup khel phak ta hram a ni a. Playoff a an khingpui  Northern Ireland  chu penalty sawisel hlawh tak hmangin an hneh ţawk nghe nghe.

Hetihlai hian chhia tia zuam tur chi chu an ni hauh lo thung a. Euro 2016-ah khan last 16 lutin penalty-ah Poland an hneh ta lo hlauh thung.  Xherdan Shaqiri (Stoke City), Granit Xhaka (Arsenal) leh Haris Seferovic (Benfica) te hi an player pawimawh zual tura ngaih an ni a. Arsenal defender thar Stephan Lichtsteiner pawhin ngaihven a hlawh ngei bawk ang.

*Costa Rica*
Costa Rica hi kum 2014 World Cup-a rin phak baka rawn che thate kha an ni a. Group match-ah Uruguay leh Italy an hneh bakah England nen 0-0 in an inhnehtawk bawk a. Second round-ah Greece  chu penalty hmangin an hneh leh bawk a, pathumna ni ta Netherland erawh an paltlang zo ta lo thung.

Russia World Cup khel turin an rawn tling leh nawlh a, World Cup khel tur zawnnaah Mexico dawttu niin pahnihna an ni a. Tun hi vawinga ngawt World Cup an khelhna tur a ni nghe nghe.

Keylor Navas (Real Madrid), Joel Campbell (Real Betis) leh Marco Ureña (LAFC) te hi an player pawimawh zual tura ngaih an ni a. Real Madrid siban nghak ţha tak Navas hi chhandamtu pawimawh tak a  tlin leh ngei a rinawm.

*Serbia*
Serbia hi vawi 12 World Cup an khelhna tur a ni a. Kum 1930 leh 1962 ah khan palina an lo ni tawh a. Kum 1998 hnu lamah erawh second round an la thleng leh ngai lo thung. Aleksandar Kolarov (AS Roma), Branislav Ivanovic (Zenit St Petersburg) leh Nemanja Matic (Manchester United) te hi an player pawimawh zual pathum ni tura ngaih an ni a. 1998 hnu lamah a vawikhat nan second round inhlankai ngei an tumruh hle ang.

Group E-ah hian Brazil tih loh chu an intiattawk hlawm țhe ţhaw viau a, group hmuhnawm pawl tak an ni ang.