MZP BILKHAWTHLIR IN ZIRLAI TIṬHA CHAWIMAWI

tleirawl.in | 15 June 2018:  Nimin Ni 14 June 2018 (ningani) chawhma dar 11 khan Mizo Zirlai Pawl, Sub-Headquarters, Bilkhawthlir chuan Bilkhawthlir Community Hall-ah Bilkhawthlir khua aṭanga HSLC leh HSSLC 2nd Division chin chunglama pass te lawmpuina leh  chawimawina hun an hmang.

He hun hi Pu Lalnunpuia Pachuau, Vice President, MZP Sub-Headquarters, Bilkhawthlir chuan kaihruaiin, Pu Robert Romawia Royte, Chief Managing Director,  NECS chu khuallian niin, Dr. C Lalmuankima, Principal, Government Kolasib College chu khualzahawm niin hun an hmanpui.

Pu Israel Lallawmawma

Pu Israel Lallawmawma, President, MZP Sub-Headquarters, Bilkhawthlir chuan thusawiin, "Zirlai chuan ṭha taka lehkha zirin, ram leh hnam tana innghahna tlak ni turin kan zir a ngai a. Nu leh Pa ten kan zirna atan harsa takin min enkawl a, an duhthusam tihlawtling ngei turin theihtawp kan chhuah tur a ni." tiin zirlai kalkhawmte a chah a. "Kan ram hmangaih tur leh kaihruai tur hian mi thiam ngei kan nih theih nan hma i la thar deuh deuh ang u" tiin zirlai kalkhawm te chu a fuih a ni.

Pu Michael Lalramdanga,

MZP General Headquarters, Treasurer, Pu Michael Lalramsanga chuan, "Zirlaite chu tum nei a, mahni tuma chiang turin a chah a, chumi tihlawhtling ngei tura chhel taka bei turin a chah a. Mizorama Secretary leh Officer lian kan neihte hnamdang an ni vek tawh mai chu manganthlak a tih thu leh zirlaite chu tum nei chunga zir a ṭan la turin a fuih a ni.

Pu Robert Romawia Royte

Khuallian Pu Robert Romawia Royte, Chief Managing Director, NECS chuan zirlaite chu zu leh ruihhlo laka inthiar fihlim tur leh kuhva leh sahdah pawh hnualsuat turin a ngen a, taima leh tumruh tak, remhre tak siin lehkha zir a pawimawh thu sawiin harsatna tawh chang pawhin chona ah ngai a, huaisen taka hmachhawn turin a fuih a ni. Khuallian chuan retheihna hi hmasawna leh hlawhtlinna daltu a ni lo a, harsatna leh manganna huai taka hmachhawn thinte chuan hlawhtlinna an chan thin thu sawiin, zirlaite chu social media buaipui lutuk lo tur leh hman dan tawk hre turin a fuih a ni.

Pu Dr. C. Lalmuankima

Khualzahawm Dr. C.Lalmuankima Principal Government Kolasib College pawhin thu sawiin zirnaah Kolasib District tan lak a ngaihzia leh Kolasib District puma Commerce zirna awmlo leh Science zirna sikul pakhat chauh a awm chu a vei thu a sawi a, MZP leh khawtlang hruaitute hemi kawngah hian ṭan lak a ngaih thu a sawi.

Pu Zosangliana Rokhum

He hunah hian MZP Headquarters, Kolasib, President Pu Zosangliana Rokhum leh Pu RK. Ramdinthara, President Joint Village Council, Bilkhawthlir te pawhin thu an sawi a, Pu Lalawmpuia, Secretary, MZP Sub - Headquarters, Bilkhawthlir chuan report a pe bawk.

MZP Sub - Headquarters, Bilkhawthlir ten kumina zirlaite tithate chawimawina an pek  HSLC 2nd division chin chunglam mi 52, HSSLC 2nd division chin chunglam mi 19 te hnenah hian citation an hlan theuh a ni.
________