MIZO ZIRLAI PAWL (MZP)

MZP Logo

[Mi tam tak chuan he pawl hming hi chu kan hre deuh fur maithei!! He pawlin enge a tum? Enge a tobul ? Tih te Chik zawk in ha'n sawi han tum ila..!!]

★Opeey-a Khiangte

__________________________________________

Mizo Zirlai Pawl (Mizo students' Association) hi October 27, 1935 khan din a ni a. Mizo multinational student organization a ni. MZP general headquarters chu Aizawla awm a ni a, Mizo awmna hmun hrang hrangah headquarters a bun zel a.  Mizoram chhung; Serchhip, Biate, Champhai, Ratu, Kolasib, Mamit, Zawlnuam, Saitual, Lunglei leh  Khawzawl bakah Churachandpur(manipur) leh , Behliangchhip (in Tripura) ahte Headquarters neiin, Sub-headquarters 50 chuang bakah Branch tam tak a nei bawk a ni.

__________________________________________

♣ Heng a hnuaia pawl hrang hrangte nen pawh hian an thawk dun tlat a ni:

Hmar Students' Association (HSA)

Lai Students' Association (LSA)

Mizoram Bawm Students' Association (MBSA)

Pang zirlai Pawl (PZP)

Mara Students' Organization (MSO)

Ranglong Students' Union (RSU)

Thado-Kuki Students' Union (TKSU)

Siamsin Pawlpi (SSPP)

It is itself a constituent unit of North-East Students' Organisation (NESO)

__________________________________________

♠ MZP Motto : Ṭanrual hi chakna (Union is strength).

__________________________________________

♥ Mizo Zirlai Pawl History:

Zirlai Pawl (MZP) hi kum 1935 October ni 27 ah din a ni a, he pawl hian khawvela Zo hnahthlakte chenna chin tawh phawt chu a huam a ni.

Zohnahthlak zawng zawngte ram leh hnam tana mi chenfakawm ni tura buatsaih leh, ram leh hnam hmasawnna kawnga theihtawpa sorkar tanpui hi a zepui a ni.

Party politics tel lova sorkar siamthat nana hnathawh chu a hnapui ber a ni bawk. “Tanrual hi chakna” tih thupuia hmangin Mizo zirlai zawng zawngte zingah inpumkhatna te, an chanvo leh dikna humhalhna te, Zoram leh hnam tana mi tangkai nihna te, kuthnathawh uara chawisan nan te, Mizo hnam nun leh zemawi leh tha apiang humhalh a nih nan te, Mizo hnam chimralna laka hum tur te, eiruk leh hlemhlet dona te, Mizoram leh hnam tluchhe tur venna te, Pi leh Pute atanga Zofate luah chin ram rorelna pakhat hnuaia awm lehna tura chawl lova thawh zel chu a thil tumte a ni.

__________________________________________

Pawl chhinchhiahna (emblem)-a nghawngkawlin a phurh hi pipute atanga Zofate luah thin Map niin, hemi chhunga mi hi tuna Mizoram State Map a ni.

Rawng sen hian MZP chu ram leh hnam chhan nan huaisen taka thawh a inhuam tih a entir a, nghawngkawl leh favah hian thawhrimna pawimawhzia entirin, lehkhabu hian zirlai pawl a nih a entir bawk..

Pawl puanzar chu rawng chi hnih niin, a chanve chunglam var (white) leh a hnuai lam hring (emerald green) a ni a, rawng varah hian a senin MZP emblem ziakin, rawng hringah Mizo Zirlai Pawl a vara ziah a ni. Rawng var hian pawl thianghlim entirin a hring hian pawl nung tih a entir bawk.

A din tirh atanga ram leh hnam tana theihtawp a chhuahnaten hnuhma ropui tak tak hnutchhiahin, Mizoram buai 1966 atang khan duhthusamin a kal chak thei ta lova, kum 1980 bawr chho atang khan Mizoram sorkar nen ngaihdan a inan loh avangin mumal takin a kal thei ta lova. Chuvang chuan zirlai pawl hran thahnem tak a lo piang chho ta a.

__________________________________________

Harsatna chi hrang hrang avanga a hnathawh ropui tak tak a chawlhsan mek chu din thar a nih leh nan zirlai pawl hrang hrang lo piang chhuak, heng —

United Mizo Tribal

Students Union (UMTSU)

All Mizo

Students Association (AMSA),

Mizo

National Students Joint Action Committee(MINSAC),

Students Union Joint Action Committee (SUJAC),

All

India Mizo Students Federation (AIMSF)

te chuan an nihna theuh dahthain Mizo zirlai, ram leh hnam hmasawnna duhtute chuan he pawl, MZP ah hian huang khatah lutin Dt. 14.8.1993 atang khan an awmho leh ta a ni.

Pawl hi Firm & Society Act hnuaiah No. 35 of 1969-70 a register a ni a. Mizorama pawl hlun ber pawl leh langsar tak, Mizo zirlai zawng zawngte lenna hmun leh Inpui ber a ni.

MZP General Headquarters-ah hian Elected Office Bearers 6 awmin

Appointed Secretary 10 leh Executive Member 50 an awm a. Adviser 8 leh

Legal Adviser 2 awmin Editor, MZP Chanchinbu leh NESO Represent te chu Ex-Officio Committee Member an ni.

Tunah hian MZP hmunpui ber General Headquarters chu Aizawl niin, Zohnahthlak luah chin ram chhung Churachanpur,Manipur leh Behliangchhip,Tripura-ah te Headquarters neiin Mizoram state chhung, heng Serchhip, Biate, Champhai, Ratu, Kolasib, Mamit, Zawlnuam, Saitual, Lunglei leh Khawzawlahte hian Headquarters a awm a, a vaiin 12 a ni.

General Headquarters leh Headquarters hrang hrang hnuaia khaw 41, heng — Hnahthial, Chawngte, Tlabung, Lungsen, Tawipui, Haulawng, Bunghmun, Bairabi, Vairengte, Bilkhawthlir, Thingdawl, Kawnpui, Thenzawl, Chhiahtlang,  Chhingchhip, Tlungvel, Khawlailung, N.Vanlaiphai, E.Lungdar, Bungtlang, Hnahlan, Khawbung, Sialhawk, Chawngtlai, Khawhai, Rawpuichhip,W. Phaileng, Seling, N.E.Khawdungsei, Kepran,Sawleng, Vaitin,Rabung, Kawlkulh, Ngopa, Kawrthah, Darlawn, Aibawk, Reilek, Thingsulthliah leh Kanhmun — ahte hian Sub-Headquarters a nei a, hengho hnuaiah hian Branch tam tak a awm bawk.

Mizoram College hrang hrang 31 leh Women Polytechnic, Aizawl leh Lunglei Polytechnic-a Students’ Union theuhte nen inthlunzawmin, henga Vice President leh General Secretary theuhte chu an awmna hmun Hqrs/Sub-Hqrs. ahte Ex-Officio Committee Member an ni a, Mizoram University hnuaia Students Union President leh General Secretary te chu Ex-Officio Committee Member an ni bawk.

__________________________________________

Zohnahthlak hnam hrang hrangte inpumkhat leh, hnam khat, chhul khat chhuak kan nihnate a taka hmanga unau kan nihna vawng nung tlat turin theihtawpin hma a la thin.

Chi peng nghenchhan zirlai pawl (Tribe based Students’ Organisation) chi hrang hrang pariat (8) heng —

Hmar Students Association(HSA),

Lai Students Association (LSA),

Mizoram Bawm Students Association(MBSA),

Ralte Students League (RSL),

Mara Students Organisation (MSO),

Ranglong Students Union (RSU),

Thado Kuki Students Union (TKSU),

Siamsin Pawlpi (SSPP) — te nen inzawmin, MZP ah an in-affiliate vek a, lungrual tlang taka thawkin mawhphurhna inhlan tawn thin a niin, harsatna tawhte insutkiansak tawn thin a ni bawk.

__________________________________________

Tin, India hmarchhaka state hrang hrang zirlai pawlte inhlawmkhawmna North East Students’ Organisation (NESO) ah hian Constituent Unit niin, tunah hian he pawla Vice Chairman nihna a luah mek a ni.

Zirlai pawl a nih angin zirlaite hamthatna turin MZP hian theihtawpin hma a la thin a, a din champha 27th October chu Mizoram sorkar chuan MZP ngenna angin ‘Zirlaite Ni’ ah a puang a, he ni hi Mizoram pumah zirlaite tana tangkai thei ang ber leh chhinchhiahtlak taka hman thin a ni.

Chimralna laka Zofate himna tura a hmalakna kawng hrang hrangah thil dik lo titute huaisen taka doin, thil tha titute erawh a chawimawi thin a.

Zofate dinchhuahna turah Mizoram mai ni lovin, Central sorkar thlengin a tul dan ang zelin hma a la thin a, enhran leh thlauhthlak bik nihna ata dinchhuahna tur leh, Mizote vohbik kan nihna leh hungbik kan nihnate chu a nghin lohna turin theihtawp a chhuah thin a ni.

__________________________________________

Contact :

MZP Pisapui

Treasury Square, Aizawl - 796 001

P.O. Box - #91

Ph : 2328660 / 2316853 / 2301708

Visit Website : http.www.mzpmizoram.org

e-mail : mzpghq@yahoo.co.in

__________________________________________

Mizo Zirlai Pawl TobuL:

Mizo Zirlai Pawl hi kum 1935 October ni 27 ah din tan ni a pawm a ni a. Amaherawhchu, kum 1924 October thla khan Lushai Students` Association(Mizo Zirlai Pawl) din a ni tih Mizo leh Vai Chachinbu (Mizo Zirlai Pawl) chhuakah kan hmu a, hetiang hian ziak a ni. “... Tichuan engpawh lo nise, i han bei phawt mai teh ang tiin Lushai Students` Association (Mizo Zirlai Pawl) hi tan kan lo tum ta a ni.

2016 October thla khan Culcutta, Guwahati, Shillong-ah rorel inkhawm kan nei a, tah chuan Buchhawna hi General Secretary leh Treasurer (Temporary ) ah ni rih sela kan ti tlang ta” tiin.

Record dangah erawh chuan, MZP general election hmasa ber ni 24 October 1939 khan Buchhawn chu President-ah thlan niin, Lalhmuaka chu General Secretary a ni a, Hrawva chu Treasurer ni lehin, Saptea chu Student Secretary a ni tiin a inziak thung.

Chu pawl chu chhunzawm zel lovin a tawp ta niin a lang. Tichuan kum 1935 October thlaah Shillong-ah a tharin din a lo ni leh ta a. Headquarters ah Aizawl an hmang niin a lang. General Secretary chu Pu.Sangliana a ni. Record pawimawh tihbo anih avangin a din ni tak hriat a ni lo. Ni 27 October 1935 hi din tan ni a pawm a lo ni ta a ni.

Dan (Constitution) pawh hi engtik lai atanga neih nge hriat a harsa ta a. Indopui II-na avangin kum 5 lai chu MZP a chawl a, kum 1947 khan chhunzawm thar leh a ni.

Tichuan kum 1959 ah siamthat leh a ni tih kan hre thei. Tluang takin a kal chho zel a; amaherawhchu, rambuai vang nge, namen lovin headquarters a lo chak ta lo va, kum 1968 ah MZP Headquarters hi a awm ta lo tiin Shillong chu MZP Joint Headquarters-a siamin hotute an inthlang a: dan pawh an siamtha vek a, chu dan siamthat chuan Shillong chu MZP Headquarters-ah a siam ta a ni.

Hei hian hruaitute muthlu a bengharh a, ngaihtuah fel turin tan an la vat a. Shillong unaute thil lo tih chu engtia tih tur nge tih an thlir vat a ni.

Headquarters chuan pawi a ti em em a, siam that leh chu a hna a ni tih hriain kum 1970 khan Dan pumpui ennawnna a nei leh ta a ni.

Chu dan siam danglamah chuan Joint Headquarters Mizoram pawnah leh Sub- Headquarters Mizoram chhungah siamthat theihna dan a siam ta a.

Tichuan, Joint Headquarters :

i) Shillong (Meghalaya)

ii) Churachandpur (Manipur) ah din a ni a. Sub- Headquarters Biate (Aizawl District) leh Kawnpui (Aizawl District)-ah te hawn a ni. Hun inher zelin ram dinhmunte a lo

Hunte a her danglam zel a, kum 1972 khan Mizoram pawh Union Territory a ni ta a, kan dan pawh siam danglam a ni a. Kum 1953, 1969, 1971-ah te hian Dan siamthat (Amendment) a ni a. Mahse, Record hluite a bo hlawm avangin a bulthut atangin kan chhui chhuak thei ta lo a ni.

Tichuan, kum 1980 bawr chho a sawrkar leh MZP te an ngaihdan a inan tak loh avang khan, mumal takin hna a thawk hlei thei ta lo va. 

Chutah zirlai Pawl hrang hrang -

1) Mizo Zirlai Pawl (MZP)

2) United Mizo Tribal Students Union (UMSTU)

3) All Mizo Students Association (AMSA)

4) Mizo students Joint Action Committee (MSJAC)

5) Student Union Joint Action Committee (SUJAC)

6) Mizo National Students Action Committee ( MINSAC )

7) All India Mizo students Fedaration (AIMSF)

te a lo piang nual a, chung zirlai pawl hrang hrangte chuan an pawl theuh thiatin leh hnam bil zirlai pawl MZP a rawn inziak lutte'n Dt 14.8.1993 atangin Mizo Zirlai Pawl din an relthlu thei ta a.

Mizo Zirlai, Mizoram leh hnam hmasawnna duhtute an lawm hle mai. Tichuan, Constitution thar siamin hruaitu thar thlang thei turin India ram hmun hrang hranga Mizo zirlai nen Dt. 29-30 September 1993 khan Vanapa Hall-ah General Assembly an nei ve nghal a.

He dan hian Mizo hnahthlak zawng zawngte ram leh hnam tana mi chenfakawm ni tura buatsaih, leh ram leh hnam hmasawnna kawnga theihtawpa sorkar tanpui hi a tum a ni.

Chu chu MZP zepui a ni. Politics-a inhnamhnawih a sorkar do lampang hi MZP nihphung a ni lo va, MZP in he zia hi a thlak duh loh avanga, thenkhatin sawichhiat nan taka an hmang a nih pawhin MZP chuan a nihphung hi vawn tlat zel a tum a ni.

Heng a hnuaia mite hi MZP zawm (affiliated ) pawlte chu an ni :

1) Hmar Students` Association (HSA)

2) Lai Students `Association (LSA)

3) Mara Students` Organisation (MSO)

4) Mizoram Bawm Students1 Association

5) Pang Zirlai Pawl

6) Ralte Students Leaque (RSL)

7) Ranglong Students` Union (RSU)

8) Siamsin Pawlpi (SSPP)

9) Thadou Kuki Students` Association (TKSU).

[Note:Ziah kim loh leh hmaih palh dik lo lai deuh a awm mai thei a min lo ngaidam ula..!! Opeey-a Khiangte]

★★★★

(Website a Fakna awm i lo click zauh khan website man tal a lo tum ve mai thei a sin.)

MZP Hqrs Kolasib ten zirlaite tana inelna hrang hrang an buatsaih chu zawh fel a ni ta

MZP Hqrs Kolasib Executive Committee vawi 3-na tahrik ni 2 July 2018 a neih in a lo rel tawh angin Primary School Drawing Competition 2018, Middle School Quiz Competition 2018, High School Quiz Competition 2018 leh Higher Secondary School Article Writing Competition 2018 buatsaih nise tha a tih chu Pathian kaihhruaina duhawm taka zarah zawh fel a ni a.

Primary School Drawing Competition 2018 hi tahrikni 14 August 2018 khan St.Maria Gorretti's School a neih a ni a. Zirlai sawmnga (50) chuang he lem inziah siakna ah hian an tel a, a hnuai ami ang hi result te chu a ni.

1st Prize
Melody Lalsiamthari d/o Samuel Lalremruata
Home Mission School Class - IV
( Trophy + Ciatation + Prize Money )

2nd Prize
Lalramdinthari d/o Lalramchullova
St.Maria Gorretti's School Class - III
( Trophy + Ciatation + Prize Money )

3rd Prize
Lincoln Lallawmkima s/o V.L Siamthara
Home Mission School IV
( Trophy + Ciatation + Prize Money )

Zirlai pathum hnenah Consolation Prize present tha tak hlan an ni. Zirlai lem ziak a tel zawng zawng te hi pencil, eraiser, sharpner leh colour hlan vek an ni.

1. Jonathan Lalchanhima s/o Hmingthantluanga St. Aloysuis School.

2. Stephen Lalnundika s/o David MS Dawngliana
Brighter Faith Academy 

3. K.Lalmuansangi d/o K.Lalrosanga
Brighter Faith Academy


Middle School Quiz Competition 2018 ah hian Competition neih hma tahrikni 23 August 2018 khan writen in  Preliminary Govt. Middle School ah neih hmasak a ni a. School tha zual paruk (6) thlan chhuah ni in, heng school paruk (6) te hian tahrikni 4-5 September 2018 khan CZS Studio Diakkawn ah zan dar 7:00 pm khan inelna an nei a. A hnuai ami ang te hi result chu a ni.

Winner
Brighter Faith Academy
( Trophy + Ciatation + Prize Money )

1st Runner Up
Govt. Chawngfianga Middle School
( Trophy + Ciatation + Prize Money )

2nd Runner Up
St. Aloysuis School
( Trophy + Ciatation + Prize Money )

Integrated School hnenah Consolation Prize hlan a ni. Primary leh Middle School lawmman te hi tahrikni 5 August 2018 Middle Quiz Competition Final zan hian hlan nghal an ni.

High School Quiz Competition 2018 neih turah hian tahrikni 24 August a 2018 khan Hmarveng High School ah Preliminary neih hmasak a ni a. School tha zual paruk (6) thlan chhuah ni in an ni hian tahrik ni 6-7 August 2018 zan dar 7:00 pm khan CZD Studio Diakkawn ah inelna hi an nei, a hnuai ami hi result te chu a ni : - 

Winner
St. John's Higher Secondary School
( Trophy + Ciatation + Prize Money )

1st Runner Up
H.T High School
( Trophy + Ciatation + Prize Money )

2nd Runner Up
Govt. Kolasib High School.
( Trophy + Ciatation + Prize Money )

Competition a tel zawng zawng te hnehah hian lawmpuina Ciatation hlan vek an ni bawk.

Higher Secondary School Writing Comoetition 2018 chu tahrik ni 24 August 2018 han Govt.  C.Zakhuma Higher Secondary School ah neih a ni a. Zirlai mi 60 vel in topic thlan bik pathum hmang in inelna hi an nei a ni. A hnuai ami te hian lawmman  dawng te an ni.

1st Prize
Vanlalruata s/o Lalbiaksanga
St. John's Higher Secondary School
( Trophy + Ciatation + Prize Money )

2nd Prize
Lalthantluangi d/o Lalpianmawia
Govt. C.Zakhuma Higher Secondary School.
( Trophy + Ciatation + Prize Money)

3rd Prize
Ramnghakmawii
Kawnpui Higher Secondary School
( Trophy + Ciatation + Prize Money )




            Sd/- 
( C.LALRUATDIKA )
       Secretary
MZP Hqrs Kolasib

HNAM ROHLU ZIRTIRTUTE

      September Ni 5, 2018 Teachers Day vawi 57- na kan lo thleng leh ta hi MZP chuan lawmawm a ti hle a. He ni (Teachers Day) lo thleng hian Zirtirtute hlutna leh pawimawhna min hriat thar tir leh sela, tun aia nasa leh zuala Zirlaiten, Zirtirtute kan zahna kan lantir a pawimawh tak zet a ni.


         Ram leh Hnam rohlu chu Zirtirtute hi an ni a. Vawiin-a kan hmasawnna hrang hrangte hi kan zirtirtute vanga kan neih a ni a. He ni pual hian Zirtirtute zawng zawng MZP chuan duhsakna kan hlan che u in, zahna chibai kan buk a che u.


      Tuna zirlai zawng zawngte hi nakina ram hruaitu tur leh kohhran, khawtlang leh ram tana mi tangkai tak tak la ni tur te kan ni a, chumi atana min siam puitlingtute chu kan zirtirtute hi an ni tih hre reng tur leh Zirlaiten, kan zirtirtirtute kan ngaihhluta kan zah deuh deuh hi MZP chuan a duhin, a beisei tlat a ni. 


        Teachers Day pual hian Ni 31st August,2018(zirtawpni) khan MZP buatsaihin Aizawl Vanapa Hall-ah hnamdang nupui/pasal neilo tura inzirtirna neih rualin, Kum 2016-2017 National Awardee leh State Awardee dawng zirtirtu sawm(10) te hnenah lawmpuina leh chawimawina thuziak hlan an ni. 
National Awardee leh State Awardee te chu:-


NATIONAL AWARDEE :
1. Pu C. Remsanga, Headmaster, Govt. Bungtlang, H/s.

2. Pu H. Ngurthansanga, Lecture. Govt.Mamawii, Hss.

3. Pi J. Lalrinmawii, Sakawrtuichhun P/s.

4. Pu V. Lalrinmawia, Headmaster, Govt. Pukpui, M/s, Lunglei


  STATE AWARDEE :

5. Pi K. Zoramchhani, Headmistress, Govt. Chhiahtlang, Hss,

6. Pu Lalchhanhima Chhangte, Headmaster, Govt. M/s Seling,

7. Pi Lalmuankimi Khiangte, Headmistress, Govt. Pukpui, M/s, Lunglei

8. Pu Lalthantluanga Tochhawng, Govt. GM. HSS, Champhai.

9. Pu R. Lalzokima, Headmaster, Govt. PS Luaia, M/s, Rengtekawn, Kolasib,

10. Pi Ramngaihsangi, Govt. Electric Veng, P/s.  Te an ni.


Sd/-
(LALNUNMAWIA PAUTU)
    General Secretary

MZP KANGHMUN IN EDUCATION AWARENESS BUATSAIH

Aizawl | August 25, 2018: Mizo Zirlai Pawl Sub-Headquarters Kanghmun chuan vawiin August 25, 2018 khan Hotel Floria, Aizawl-ah 'Education Awareness' an buatsaih.

Secretary Joseph VL Hmangaiha chuan kaihruaiin, Pu Lalnghinglova Hmar chu resource person a ni.

He hun hi MZP Gen.Hqrs aṭangin general secretary Pu Lalnunmawia Pautu leh hruaitu dang ten an uap bawk.

Resource person, Pu Lalnghinglova Hmar chuan, Zirna pawimawh zia  a sawiin, Ruihhlo dona atana ṭha ber chu zirna a ṭan kan lak hi a ni a ti a.
"Kan thlen chin aṭang hian hma kan sawn zel a pawimawh a. Zirna-ah mi an harh thar a, Kanghmun zirlaite pawh Aizawl in awm chhan hi Ziirna vang a ni a. Hemi atan hian in theihtawp in chhuah a ngai a ni" a ti bawk a.

(Website hi tluang taka a kal zel theih nan ads awmte hi min lo click sak ve dawn nia.)

"Kawng hrang hrangah hma sawnin, hna hrang hrangah hma sawn mahila, India huapa Administration line ah ṭan kan lak a pawimawh a. India rama mi thiamte el turin Mizote thluak hi a ṭha tawk a, theihtawp chhuah a lehkha zir a pawimawh".

Kanghmun nula tlangval zirlaite chuan in nihna ang angin awm ula, Aizawl nula tlangvalte an tum suh u. In awm chhanah chiang ula, in khua leh in inchhung hre reng ula, Aizawl a in awm chhanah chiang rawh u" tiin a chah bawk.

He huna thusawitu, Pu Lalnunmawia Pautu chuan, "Zofate inpumkhatna atan MZP hi theihtawp a chhuah a, a chhuah zel dawn bawk a ni." a ti a. Ngaihsan leh ngaihhlut tur dik kan hriat a, Zirna avanga hlawhtling, UPSC leh MPSC a inziak tlingte kan ngaihsana kan chawimawi a hun tawh thu a sawi bawk.

Adviser Pu P Laltlanmawia pawhin thu sawiin, 'hman tlak, chhawr tlak leh mi dang tana ṭangkai tura lehkha  zir a pawimawh thu sawiin, Zirlaite chu mahni chawrchhuahna hre renga hmangaih let ṭheuh turin a chah bawk a ni.

Zaithiam Ruth CVL Muanpuii'n kalkhawmte zaiin a awi a. He hunah hian Kanghmun khaw mi, Aizawla zirlai awm za chuang an kalkhawm a ni.


--------

KAWNPUI-AH BIKE LEH SCOOTY INSU; PAKHAT NA HLE

Kawnpui | August 25, 2018: Vawiin August 25, 2018 tlai lam dar 4 -  5 vel khan Zophei (Kawnpui leh Bualpui inkar) -ah Bike leh Scooty (Aprilia) an insu a.

Bike a chuang, Jeremy Lalhriatkima, Pi Lalngaihzuali fapa, Kawnpui venglaia cheng, kum 25 chu a na hle a. Kawnpui PHC panpui a nih hnuin Presbyterian Hospital, durtlangah refer a ni a. Durtlangah hian admit a ni.

Kan thu dawnna in a sawi danin, a hnar leh bengah thi a chhuak nasa hle a, thisen a hloh hnem hle a. Presbyterian Hospital CT Scan a chian loh vangin Civil Hospital, Aizawl ah CT scan tih a nih hnuin Presbyterian Hospital, Durtlangah phurhlet a ni a, admit a ni.

Jeremy hi a ṭhiante nen Bualpui lam aṭanga Kawnpui lam pan niin, Scooty khalhtu hian Kawnpui lam aṭangin Bualpui/Kolasib lam a pan thung. Scooty a chuang pawh hi a ngaihtuahawm hle a,  Kolasib atangin Ambulance ken chhoh a ni a. Zanin 8:30pm vel khan kawnpui atangin Aizawl panpui a ni a. Lalropuia hi a harh chhuak lova, Scooty a chuang ve Athlangi erawh hliam liantham a nei lova Kolasib lam panpui ania hriat a ni.
Jeremy Lalhriatkima hi MZP Sub-Headquarters, Kawnpui Secretary dinhmun chelh lai a ni.

SAIPHAI-AH NRC NEI LO 71 HMUCHHUAK TAWH

Saiphai | August 22, 2018: MZP General Headquarters bul tumin Ni 20th August, 2018(Nilaini) atang khan Saiphai Police check post-a duty te chuan chhumlo chatloin NRC list-a chuang lo endik hna an thawk mek a.

 MZP General Secretary Lalnunmawia Pautu hnen aṭanga thu kan dawn danin, "Nimin thleng khan NRC neilo mi 71 lai man chhuah tawh a ni!" a ti a.
Mizoram Home Addl. Secretary Lalbiak Zama'n "NRC vang hian Mizoram tan a hlauhawm lo" a tih chu "a hriatchian tawk loh vang a ni." a ti a.
- www.tleirawl.in -

      Pu Mawitea chuan,   "Saiphai lam duty te chuan tukin zing atangin ram leh hnam tan duty chhunzawm leh nghal a ni. Khuate a lum em em a. Duty te'n hriselna tha kan neih theih nan min lo tawngtaipui dawn ni a." tiin mipui a ngen bawk a ni.

Tukin High Field a Muslim Id hmangte

NI HNIH CHHUNGIN MZP IN NRC NEI LO 200 CHUANG THAWNHAW TAWH

August 21, 2018: Mizo Zirlai Pawl General Headquarters bultumin Bairabi leh Vairengte-ah te MZP Sub-Headquarters te nen National Registers of Citizen Assam in July 20, 2018 a darft a chhuah a chuang lote checkna neia duty a ni a, Saiphai-ah pawh MZP General Headquarters leh Hmar Students Association tangkawpin endik leh ven hna  thawh mek a ni.

Nimin , August 20 atang khan hma lak tan niin, Tunlaiin Assam ah NRC a chuanglo te chu Assam a awm a remloh avangin an kal darh chum chum a. Mizoram sorkar chuan NRC neilo Mizorama an luh loh thu a chhuah laiin. MZP General bultumin NRC neilo Mizoram a luhtum enfiah a ni a, heng zat hi tun ni hnih kal mek ah hian NRC nei lo mi 200 chuang man leh thawnkir an ni tawh a ni.

A hnuaia mi ang hi vawiin, August 21, 2018 dar 4 vela report kan dawn a ni a, danglam leh thei reng a ni.

Bairabi            :     25

Saiphai           :     64

Vairengte       :   127

An vaiin          :   216

Vairengte a duty te atanga thu kan dawn danin Sawrkar thuneitu atangin duty tawh lo tura nawrna a awm a, mahse, an nawrna zahawm viau mahse, ram leh hnam tan, mahni hna tul kalsanin an duty zel tur thu kan dawng.

Heihi Mizoram ani, sawrkar hian hma a la lo nge MZP thiltih hrim hrim hi a dodal zawk?

Kan ṭhenawm state-te chuan venhimna uluk takin an kalpui nghal a. 
Hetih lai hian Mizoram sawkar pawhin a sipai a tirh belh mek a. NRC nei lote luh phal lova Mizoram veng turin  nge, NRC neilo te veng turin tih chu zawhna a la ni rih.

Hriat theih chinahSawrkarin  Saiphai ah IR 10 dah belh an ni a. Vairengte leh Bairabi lamah pawh dahbelh a ni bawk niin thu dawn a ni.

MZP in Vehbur khawn

  
Aizawl | July 25, 2018: Vawiin ni 25 July, 2018 chhun dar 12:00 khan MZP Conference hall-ah MZP-ten Zofate Chawlhbuk sak an tumna a, thilbo leh chhia rulh letna tur Vehbur khawn khuhhawnna neih a ni a. He hun hi Pu B.Vanlaltana, Vice President chuan kaihruaiin, Tv. L.Ramdinliana Renthlei, President MZP, Tv. Lalthanzuala, General Secretary, MSU leh Pu Ngurbiakvela, Joint Action Committee(JAC) te’n thu sawina hun an nei a ni. Khuhhawnna neih zawh hian Khatla,Sikulpuikawn, Kulikawn leh Ngaizel lamah te Venbur khawnin, MZP hruaitute leh zirlai engemaw zat an thawk chhuak nghal a ni.

    He huna thu sawitu, L. Ramdinliana Renthlei, MZP President chuan "Kan bungraw chhia, thil bo, senso leh Damlo enkawlna Compensation hi Central Sorkar leh Assam Sorkar-ah dil a ni a, Mahse vawiin thleng hian chhanna kan la hmu lova, min pek pawh an tum lo niin kan hria a ni. Kan Sorkar hotute thurawn angin Mizoram Sorkar-ah Home Department-ah thehluh a ni a, beiseina sang taka kan awmlaiin ni 19th July 2018 khan Homes Department a tangin lehkha kan dawng ta a, Lehkha-ah chuan ti hian a inziak a ni. ' Bairabi, Zophai buaina a MZP Bungraw chhia leh bo senso chungchang chu Mizoram sorkar-in ngun takin a ngaihtuah a, tun dinhmunah chuan Bungraw chhia leh bo senso Compensation chu Mizoram sorkarin a pe thei lo tih kan inhriattir e.' tih a ni. Compensation denchhen hian Damlo enkawlna leh Bungraw chhia senso hi MZP chuan ba thahnem tak kan nei a, hetia kan beisei loh ang lehkha kan hmuh hian kan thinlung a tina hle a ni." A ti.

L. Ramdinliana Renthlei chuan, “Zofate Chawlhbuk sakna bungrua kha MZP bungrua chauh a ni lova, Zofate Chawlhbuk sak a mi tlawmngai hnatlang bungraw thahnem tak a tel a ni. Bairabi YMA bungrua te, Bairabi MHIP bungrua te kha a kangral vek a, MZP chuan a rulhna tur kan nei si lova, Kan compensation chhut danah sawisel neuh neuh a awm tih kan hria a, kha compensation kha draft a ni a, Sorkar lamin a hunlai khan hmanhmawh taka thehlut tura min tih angin thehluh a ni a, tih dik tawk loh leh felfai lo deuh a lo awm pawh a ni mai thei e. Kan chhut ai hian a tam zawk a ni. MZP chu a dinna ngaihah a la ding reng a, kan ram humhalh nan a Zofate Chawlhbuk sak hi kan la tum reng a, ramri chungchangah hian nasa lehzualin hma kan la chhunzawm zel dawn a ni." A ti bawk.

Thu sawitu dang, Lalthanzuala, MSU G.S chuan, “Zirlai pawl ten hetianga hun kan hman ngai ta mai hi lungchhiatthlak kan ti a.  ramri chungchanga MZP hmalakna chu a tha kan tiin kan thlawp tlat a, Zirlai pawlte hian ram leh hnam tan hma kan lakna kawngah hian beisei neiin hma kan la ngai lova, MZP te’n Zofate Chawlhbuk sak an tum naa hliam leh thilbo leh chhia tam tak hi hmuh let beisei vanga hma la an ni lova, Mizoram Sorkarin pek let a tum vang zawka senso zawng zawng list thehlut tur a tih avanga thehlut mai an ni a, damdawiin bill te leh an motor chhia avangin MZP in ba tam tak a nei phah tih MSU chuan kan hriatpui a, MZP ten vehbur an khawn hi a tawp thlegin MSU chuan kan support tlat dawn a ni." A ti bawk.

Pu Ngurbiakvela JAC Chairman pawhin thu sawiin “Vawiin hian hun hmang satliah kan ni lova, dan bawchhe zawk Assam Police te vangin zirlai pawisawi lo leh tlawmngai a thawk chhuak Mizo Thalai tam takin hliam nasa tak an tuar hi JAC chuan a dem nawn leh a. Thalaite tawrhna leh thisen kha sum a rulh let theih a ni lova, MZP te hmalak na a Assam mi leh sa leh company hnena Vehbur a khawn hi JAC chuan a tawp thlengin thlawp tlat dawn a ni.” A ti

MZP  chuan Vehbur khawn chu a chhunzawm zel dawn a. Ni 26(ningani)hian Treasury,Tennis court, Temple. Ni 27(zirtawpni) hian Chanmari, Zarkawt, Dawrpui leh Millennium Centre-ah te khawn leh ani anga, Ni 30(thawhtanni)hian Chaltlang, Ramhlun, Zemabawk,Vaivakawn, Bawngkawn leh Thuampuiah te khawn leh a ni anga, Ni25(inrinni) chhun dar 12 hian MZP Conference hall-ah Aizawl khawpui chhunga hnamdang sumdawng zawng zawng te a ko khawm dawn bawk a ni.

MZP meeting in a lo rel tawh angin Vehbur hi Mizo mipuite bakah Mizoram chhunga Private Bank,Supply Company, Kawngsiam Company, Cement Company leh Tele-Communication Network Company zawng zawng te hnenah khawn nise tha a ti bawk a, Aizawl khawpui chhunga vehbur khawna nih rual hian Mizoram hmun hrang hrangah MZP Headquarters,Sub-headquarters leh branch-ah te pawh khawn vek a ni.

W. PHAILENG HSS CHUNGCHANGA W. PHAILENG MZP SUB-HEADQUARTERS PRESS RELEASE

Vawiin thawhlehni (24th July 2018) chawhnu dar 1:30 khan all VCs leh all NGOs chuan W. Phaileng Higher Secondary School, Adhoc Grant-in-Aid-a hlan kai a nih theih nana hmalakna kal meka ni 19 July 2018-a Joint Student's Union te, Managing Board leh MIGLASSHA te committee-in resolution a lo siam _'"July ni 5 2018 (wednesday) thleng sawrkar hma lakna nghah nise, chuta thu lawmawm kan dawng lo a nih chuan July 26 2018 ațangin heng khua- Zawlnuam, Sakawrdai, W. Phaileng, Phullen, Farkawn, Thingsulthliah, E. Lungdar, Zobawk leh NE Khawdungsei-ah tehian tiam chin awm lova Sawrkar School leh Zirna in awm zawng zawng hi khar leh Road Block a ni ang"_ 
tih chu zawm ve ni rawh se tiin a rel.


He hunah hian W. Phaileng khaw chhunga Office zawng zawng khar leh Lirthei chhuak leh lut awm lo tura Road Block a ni ang.

MZP-IN VEHBUR KHAWN DAWN

July 21, 2018: MZP chuan vawiin khan MJA memberte an Pisa-ah lengah sawmin, Zophai buainaa kut tuarte leh bungraw chan tak te h;lutna hmuh et tura an hmalak tumdan an sawipui a. Sawrkar lam atanga dilna thehlut tura sawi hmuh an nih hnuah, ni 19 July 2018 khan Home department atangin zangnadawmna pek theih an nih loh tur thu an dawn takah chuan vehbur khawn an tum a ni.

Bairabi Zophaia Assam Police ten zirlaite bungrua an tihchhiatsak rul tura Mizoram sawrkar intiamna a hlawhtlin loh avangin Mizo Zirlai Pawl MZP chuan Mizoram chhunga company lian leh Assam mi leh sa, Mizoram a awmte hnenah an thiam dan ang anga vehbur khawn an tum tih an sawi.

MZP President L.Ramdinliana Renthlei chuan vawiin khan MZP Pisapui ah press mite kawmin March ni 10 a Zophai hmuna Assam Police ten zirlai tlan chhiate umzui a an riahna hmun Buk a Mutbu, Pawisa, Thawmhnaw, Bungbel, Cell Phone leh Document pawimawh tak tak awmnate, Zofate Chawlhbuk sa tura mi tlawmngai thawk chhuakte Motor tih chhiat leh Bungraw thenkhat halral a nih thu a sawi a.  Heng an halral leh tih chhiat zawng zawngte hlut zawng hi MZP te chhut theih chinah cheng nuai 21 sing 7 & 300/- a nih thu a sawi a ni.

MZP President chuan Mizoram sawrkar hotuten thilbo leh chhia zawng zawngte hlutna chhutchhuak a, pek a harsat loh tur thu an sawi avangin damlo te awmna bill leh motor chhiate chu a ba thlau a siam tir leh in khulh chhuah a ni a, ti a. Thlamuang taka an awm laiin tun thla ni 19 khan sawrkar hnen atangin lehkha an dawn-ah Zophai buaina chungchanga thilbo, chhia leh damlote senso zawng zawng tum sak tura an intiamna chu hlen lovin pawisa a neih loh thu-a an chhang ta mai chu zirlaite hmuhsitna-na nia an ngaih thu a sawi a ni.

Mizoram sorkarin tun dinhmuna pawisa an neihloh thu tawngka pawh nilo, thu dengkhawng tak hmanga lehkhaa MZP hruaitute a chhang chu Zirlaite hmuhsitna leh ram leh hnam tana thisen lo chhuah tawhnate chu engahmah a ngailo tihnaah MZP chuan a ngaih avangin, MZP Executive Meeting chuan vehbur khawn mai ni se an ti ta tih a sawi a. A tul angin Mizo mipuite hnenah Vehbur khawn bawk nise tiin a rel a, Mizo mipuiten ram tana fehchhuak thil bo, tih chhiat leh hliam tuarte enkawlna senso rulhna tur thawh ve turin an ngen tih a sawi bawk.

MZP President chuan Bairabi Zophai hmuna Zofate Chawlhbuk sak tumna chu an la thulh lo tih sawiin ramri chungchanga Chief Minister kaihhruaina hnuaia Committee sang Core Committee thu leh hla an la ngaichang nia sawiin, Core committee te hmalakna leh an thu in awmzia a nei lo a nih chuan MZP chuan nasa leh zualin ramri chungchangah hma a la chhunzawm leh nghal dawn tih a sawi bawk a ni.

______________________________________________________________


A hnuaiah hian MZP thuchhuah kan dah e.

Mizo Zirlai Pawl (MZP) hmalakna a Ni 10th March, 2018(Inrinni) a Bairabi Zophai a Pu Ch. Chhunga(L) Ex-Chief Minister-in MZP te ram a pekna hmuna Zofate Chawlhbuk sak a tum laiin, Assam Police ten MZP chhungkua leh hnatlang tura thawk chhuakte tharum hmanga nasa tak a vuak mai duh tawk lo a, Silai hial an hmeh puah hnuin zirlai leh hnatlang tura thawk chhuak engemaw zat thisen chhuakin hliam tuar tam tak an awm a ni, kan Chanchinbu mite pawh an press card pawh zah lovin vuak tel an ni. Silai mu a kahhliam Damdawi ina admit ngai leh zai ngai khawpin an awm bawk a ni. Assam Police ten zirlai tlan chhiate umzuiin an riahna hmun Buk a Mutbu, Pawisa, Thawmhnaw, Bungbel, Cell Phone leh Document pawimawh tak tak awmnate, Zofate Chawlhbuk sa tura mi tlawmngai thawk chhuakte Motor tih chhiat leh Bungraw thenkhat halral a ni a. Heng an halral leh tih chhiat zawng zawngte hlut zawng hi MZP te chhut theih chinah Rs.21,70,300/- a ni. MZP chuan hliamtuarte enkawlna tur leh zangna dawmna pe turin leh thil bo leh tih chhiatte hmuh let a nih theih nan Central Sorkar leh Assam Sorkar hnenah Document felfai tak theh lutin hma a la a, MZP chuan zirlai hliam tuarte enkawlna tur leh zangnadawmna pe tura kan ngenna tun thlenga Central Sorkar leh Assam Sorkar atangin chhanna kan la hmulo hi Mizo hnam min hmuhsitnaah kan ngai a ni.

Bairabi Zophai buaina leh Zirlai ten vuak leh Silai kah hial kan tawrhna a, Bungrua, Thawmhnaw, Zirlaite Pawisa leh Document pawimawh tak tak te a bo leh chhiat vek hnuah Zirlai hruaitute mangang taka kan awmlaiin, Mizoram Sorkar hotuten thilbo leh chhia zawng zawngte hlutna chhutchhuaka Mizoram Sorkar hnenah thehlut tura min thurawn angin leh pek ngei min tiam hnuin rang takin Asssam Police ten zirlaite kut an thlak dan Doctor lehkha leh thilbo hlutnate, lirthei an tih chhiat dan zawng zawng MVI report nen lam thehluh nghal a ni a. Chief Minister leh Home Minister pawh sawipui nghal niin, MZP chuan Sorkar intiam ang a min pek mai rinna avangin a theih ang angin damlo te awmna bill leh motor chhiate chu ba thlau a siam tir leh inkhulh chhuah te a ni. Hengte avang hian MZP chuan midangte hnenah pawisa thahnem tak ba a neih phah nghe nghe a ni. Hruaitute thlamuang taka kan awm laiin Ni 19th July, 2018(Ningani) khan Mizoram Sorkar hnen atangin lehkha kan dawng a Zophai buaina chungchanga thilbo, chhia leh damlote senso zawng zawng min tum sak tura an intiamna chu hlen lovin Sorkarin tun dinhmunah pawisa a neih loh thuin min lo chhang ta a ni.

Ni 20th July, 2018(Zirtawpni) MZP executive meeting chuan Mizoram sorkar hnen atanga kan lehkha hmuh chu ngun taka ngaihtuah nghalin, an intiamna an bawhchhia leh Mizoram sorkarin tun dinhmuna pawisa an neihloh thu tawngka pawh nilo, thu dengkhawng tak hmanga lehkhaa MZP hruaitute min chhang hi Zirlaite hmuhsitna leh ram leh hnam tana thisen lo chhuah tawhnate chu engahmah a ngailo tihnaah MZP chuan a ngaih avangin, MZP Executive Meeting chuan, Mizoram chhunga company lian tak tak leh Assam mi leh sa Mizoram chhunga awm te hnenah a rampum angin MZP ten kan thiam danin sum leh pai khawn mai nise a ti ta a ni. A tul angin Mizo mipuite hnenah Vehbur khawn bawk nise tiin a rel a, Mizo mipuiten ram tana fehchhuakte thil bo chhia leh hliam tuarte enkawlna senso rulhna tur MZP in Vehbur a khawn turah hian ram leh hnam thinlung pu a mahni remchan ang tawk leh phal ang tawk sum leh pai lo thawh ve turin Mizo mipuite leh pawl hrang hrangte thinlung takin MZP chuan a ngen a ni.

Bairabi Zophai a Zofate Chawlhbuk sak tumna hi thulh a la ni lo a, MZP chuan Zofate Chawlhbuk sak hi a la tum reng a ni. Tunah hian ramri chungchangah Chief Minister kaihhruaina hnuaiah Committee sang Core Committee din a ni a, Committee-ah hian MZP pawh a tel nghe nghe a ni. Core Committee hian hma la ve bek bek in, Mizoram leh Assam inrina te pawh 1933 Survey of India Toposheet MAP rin chhanin fan chhuah tawh a ni, Assam leh Mizoram ramri document kimchang zawng chhuak tura National Archives, Bengal Archives leh Assam Archives te kal hma bak a la ni bawk. Core committee-te endikna report kimchang leh document an hmuh chhuah ang te July, 2018 ralhma a Chief Minister hnena thehlut tura tih a ni a, thehlut hman tura hmalakna kal mek chu MZP chuan a hlawhtlin ngei a ring a, a beisei bawk a ni. Core committee te hmalakna leh an thu in awmzia a nei lo a nih chuan MZP chuan nasa leh zualin ramri chungchangah hma a la chhunzawm leh nghal dawn a ni.

Issue by:
Mizo Zirlai Pawl(MZP)
General Headquarters,Aizawl:Mizoram

MZP IN ZIRTIRTU SEMRUAL TURIN SORKAR AN NGEN

tleirawl.in | 8 July, 2018  : MZP chuan Mizoram school ah te zirtirtu indaih loh chhan hi zirtirtu inkhairual loh vang nia ngaiin zirtirtu semrual chungchangah thuneitute leh sokara thiltitheite inrawlh lo tur leh harsatna siam lo turin an ngenin an hriattir.

Nimin chhun khan MZP chuan Aizawl Press Club-ah Press mite kawmin Mizorama sorkar enkawl zirna In hrang hrang, Primary-ah zirtirtu 8510, Middle-ah 10206, High School-ah 4513, Higher SS-ah 1661 an awm a. Heti zozai zirtirtu awm chung si hian zirtirtu indaihlohna a awm reng tho chu zirtirtu tlem vang ni lovin, inkhairual loh vang a ni an ti.
Zirtirtu awmsa semrual chungchang hi Education Minister leh Chief Minister te pawh an lo sawipui tawhin ziakin ngenna an thehlut tawh tih MZP te hian an sawi a. Chak leh zuala zirtirtu sem rual hi kalpui turin thuneitute an ngen nawn leh a, Zirtirtu awm sa sem rual chungchangah hian thuneitute leh sokara thiltitheite inrawlh lo tur leh harsatna siam lo turin an ngenin an hriattir a ni.

MZP ten an zir chiannaah Aizawla sorkar enkawl primary school thenkhatah zirlai 55 awmnaah zirtirtu 8 awmna te, zirlai 63 awmnaah zirtirtu 10 awmna te, zirlai 15 awmnaah zirtirtu 5 awmna te a awm a, Chutiangin Middle School ah pawh zirlai 39 awmnaah zirtirtu 10 awmna, zirlai 96 awmnaah zirrtirtu 9 awmna te, zirlai 15 awmnaah zirtirtu 8 awmna te a awm a, High School-ah zirlai 35 awmnaah zirtirtu 9 awmna, zirlai 47 awmnaah zirtirtu 10 awmna, zirlai 63 awmnaah zirtirtu 11 awmna te, zirlai 44 awmnaah zirtirtu 8 awmna te a awm a,. Hetianga Aizawla an indaih viau lai hian MZP-a in report thingtlang Primary School 11 te chuan zirtirtu 1 chiah an nei thung a, heng schoolah te hian zirlai 42 te, 45 te an awm a, Thingtlang Primary School 45 te chuan zirtirtu 2 chiah an nei a, Thingtlang Primary School 30 te chuan zirtirtu 3 chiah an nei bawk niin an sawi.

Middle School-ah Hindi Teacher neilo 237 an awm a, an hriat theih chinah headmaster neilo school 105 an awm a. Zirtirtu ni si SSA emaw RMSA emaw zirtirtu pangai Education Deptt. office hrang hranga attach an tam hle a, zirtirtu lak thar thingtlang lama post ten an thiltihtheihna hmanga transfer an dil thin chu MZP chuan thalo an ti a. Zirtirtu tura lak office lama attach a awmte pawh hi an awmna hmun tura kal turin MZP chuan a ngen a, Zitirtu awmsa sem rual chungchangah chuan MZP chuan na takin hma a la dawn tih an sawi.

Zirtirtu awmsa rualkhai taka thingtklang leh khawpui school-ah te semrual a nih theih nan; thingtlang lam zirlaiten zirna tha an dawn ve theih nan MZP chuan hma a la zel dawn tih an tarlang a ni.

- MZP

MZP IN ZIRLAI HRUAITU DEGREE HMU THARTE LEH NDA A TLING THARTE CHAWIMAWINA BUATSAIH

tleirawl.in | 05 July 2018 : Vawiin 5th July, 2018 chhun dar 12:00 khan MZP General Headquarters chuan MZP Conference hall-ah kum 2018 chhunga MZP chhungkua, College Students’ Union Leader leh Hnampual hruaitu degree neithar leh National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te hnenah lawmpuina leh chawimawina thuziak hlan a ni. He hun hi Pu Joseph Lalhimpuia, Mizoram Youth Commission Chairman chuan khuallian niin a hmanpui a ni. Tv. L.Ramdinliana Renthlei, President MZP leh Pu Joseph Lalhimpuia te’n thu an sawi a. Pu B Vanlaltana, Vice President MZP chuan inkhawm hi a kaihruai. 
He huna khuallian Pu Joseph Lalhimpuia chuan, " kumin chhunga sipai lak runpui neih tum anih thu sawilangin, MYC chuan thalaite tan eizawnna nghet an neih theihna turin a tul apiang a dap zel dawn a ni a ti a. Kan ram leh sakhua humhim turin thiamna kan mamawh tih hriain thalai zirlaite chu tan la sauh sauh tura fuihin, mihlawhtlingte chawimawna lamah MYC chuan hma a la zel dawn a ni." a ti.

MZP President chuan, “MZP ten Zophai-a kan buainaah khan College leh Hnampual hruaitute thawmhnaw, Bungrua leh pawisa tam tak Assam police ten an halchhia a, Assam Sorkar hnenah rul leh vek tura ngenna kan thehluh tawh chu tun thlengin chhanna leh hlawhtlinna kan la hmulo a ni. Mizoram Sorkar hotute hnenah pawh ziaka thlen a lo ni tawh bawk a ni. MZP chhungkua, College zirlaite leh hnampual hruaitute thil bo hlutna chu hmuhlet leh a nih theih nan Mizoram chhunga Assamese awmte hnenah emaw Mizo mipuite hnenah Vehbur khawn mai MZP chuan a duh tawh a, Committee ah ngun takin kan rel anga Assam police in zirlaite bungrua leh pawisa an hal ral tak te hmuhlet a nih theih nan hma kan la dawn a ni. Assam leh Mizoram ramri buaiah pawh Sorkar kaihhruaina in hma lakna a kal ve bek bek a, hemi chungchangah hian MZP pawhin hma a la chhunzawm zel dawn a ni." a ti bawk.

MZP chuan National Defence Academy(NDA) tling thar mi pahnih Joel Thangeo S/o Kaizamang Thangeo leh VL. Malsawmzuala S/o VL. Zaikima te leh MZP chhungkua, College Students' Union Leader leh Hnampual hruaitute te hnenah hian  chawimawina thuziak a hlan a. MZP in a chawimawi MZP chhungkua, College Students' Union Leader leh Hnampual hruaitute mi 59 an ni.