ZU ZUAR FANU 30

CHAPTER--30

Ziaktu: R'z Thangluah

Columnist, www.tleirawl.in

Msi chuan Max-a awmdan chu mak a ti telh telh mai. A hma zawng khan a phone ah hian lock pattern a dah ngai lo;mahse,a zin haw aṭang khan a phone ah chuan lock pattern a dah daih nia. Chumai a nilo a Whatsapp Apps,Facebook App,Gallery,Messenger Apps zawng zawngah lock pattern a dah vek bawk. Msi chuan,"Tinge i phone hi engkimah lock pattern i dah a?,"a ti a. Max chuan,"Ka thiam thar a ka dah ve mai mai anihkha,"a lo ti ringawt a. Msi chuan,"Nihchuan i pattern tal chu min hrilh theilo mi?,"a ti leh ngat a. Max chuan,"Ngatannge i tih a?,"a lo ti thung a. Msi chuan,"I gallery ka en chak a,"a lo ti mai a. Max chuan,"Ehe kan pu biak ka ngai tak e,ka haw phawt ang aw. Muttui mai aw,"a ti a,a chhuak nghal daih a. Msi chu a thaw hak a,"Hetiang em em a i mizia thlaktu hi ka hre chak khawp mai,"a ti hul hak a.

Msi chuan Max chu zawi muanga thlah dan a ngaihtuah ta a,Maxa'n a rawn biak loh chuan a be ngai ta bik lova. Ni 1 ah hian vawi khat mah in biak loh te an nei ta,Msi chuan an inkar thu chu tumah a la hrilh lova. A nu erawh chuan a zawt leh zauh ṭhin a;mahse,Msi chuan engmah a sawi ngai lem lo.

Sunday a ni a Emily leh Sangtea chuan an ṭhiante 2 chu surprise an duh vangin engmah hrilh lovin,an leng tawp dawn a ni.

Sangtea leh Emily chu bike in an rawn in phur phei a,Msi te In kawtah chuan an rawn ding nghal chat a. Emily chuan,"Min lo beisei lo ngawt ang a,"tih pahin a chhuk nghal thak a. Sangtea chuan,"Nia min lo beisei lo viau ang....lut ila,"tiin Emily chu a kai a,an lut Msi te Inah chuan kawngkhar pawh kik lem lovin an lut ve mai a.

Sitting roomah chuan Msi chu a lo ṭhu a,a nu erawh hmuh tur a awm mai lo. Emily te rawn lut a hmuh chuan a lo nui var var a,"Awii Mate,ka ngai tawh lutuk che,"tih pahin a rawn kuah nghal vawng vawng a. Emily chuan,"Awii keipawn ka ngai lutuk che,i lo damṭha em? Khawnge Max?,"a ti nghal mawlh mawlh a. Msi chuan,"An hna chungchangah an pu hmuh a ngai a,a chhuak lawk a,"a lo ti mai a. Sangtea chuan,"Kan Engineer val chu a buai a ni maw? I ṭhiannu hian thil a rawn hawn sak ve a sin,"tiin a bag aṭang chuan Max-a thil tur chu a rawn phawrh a. Msi chuan,"Awwwi tinge tiang te i rawn hawn sak duh a? I ho e mai,i dawr bungraw leinaah i insen nasat dawn nen,"a lo ti nghal vat a. Emily chuan,"Nangma ta tur pawh ka rawn hawn tho a lawm,hei i duh zawng a nih ngei ka beisei,"tiin a bag aṭang chuan Sunday pheikhawk high heel sen chu a rawn phawrh a,Msi chuan,"Woww...,a nalh lutuk. Ka duh zawng hi chu i van hre tak;mahse,engzatmannge? A to awm si,"a ti leh a. Emily chuan,"Bun chhin phawt teh,"tiin a packna chu a hawng nghal sawk sawk a. Msi chuan a bun chhin a,a lo tawk chiah chiah leh nghal a,"Awii ka van lawm tak,ka hmangaih che ka ṭhian ṭha ber i ni,"tih pahin Emily chu a kuah leh a. Emily chuan,"Nangpawh ka ṭhian ṭha ber i ni lawm,i inhmeh lutuk,"tih pahin a nui sen sen a.

Sangtea chuan,"Ka ril a ṭam tawh e,engnge kan ei ang?,"a lo ti sup a,a bula hmeichhe 2 ti ti mawlh mawlh chu a rawn melh rulh rulh bawk a. Emily chuan,"Awii kan lo theihnghilh daih che a,"tih pahin a nui har har a. Sangtea chuan,"A âwm a lawm,"a lo ti hmuk a. Msi chuan,"Hmmp a mipa ber i tihtauh hmuk ten,tikhan lo ṭhu ru thingpui ka va lum a nge,"tih pahin choka lamah chuan a phei nghal a.

"Nangni chu in hlim a ni tiraw? Mahse,kei ve hi huiham....in hlimna hi tihchhiat sak che u ka duh lo. Chuvang chuan engpawh thleng se,keimahin ka tuar mai ang,"tiin amah leh amah chu a inbe mawlh mawlh a.

Sangtea chuan,"Max chu be ve ṭhin hrim hrim ila,"a lo ti a. Msi chuan,"Aih an la buai ang be duh lo mai rawh,"a lo ti vat a. Sangtea chuan,"A hrim hrimin vawiinte chu a inkhawm ve ka ring a,"a ti leh a. Msi chuan,"Chawhma chu a inkhawm a lawm. Chawhnu pawh inkhawm a tum a;mahse,an pu khan a rawn ko leh thut sia a kal ta nihkha,"a lo ti leh a. Emily chuan,"Khawnge Nu Ruati hi,a kawr tur ka lo hawnsak ve a sin,"a lo ti leh a. Msi chuan,"A ṭhiannu damlo a kan a,a lo haw ṭep ang,"a lo ti vat a. Sangtea chuan,"Max chu a zin chhuak leh dawn em?,"a lo ti thung a. Msi chuan,"Imm naktukah hian a kal leh ang,"a lo ti vat a. Sangtea chuan,"A cham rei dawn em?,"a lo ti leh a. Msi chuanṭ,"Umm tun ṭum chu thla 1 vel ka cham ang a tia,"a lo ti leh mai a. Sangtea chuan,"I lung a leng leh hle dawn a ni maw?,"tih pahin a nui hak hak a.

Tlai lam dar 3 velah chuan Emily te pawh haw turin an in tintuah ve ta a. Emily chuan,"I nu chu kan nghak lo law law mai ang aw,a kawr tur kha lo pek theihnghilh lo la aw,"tiin a chah zui mawlh mawlh bawk a. Sangtea chuan,"Max-a thil tur pawh kha aw,"tih pahin a lo nui suk a,Msi chuan,"Awle theihnghilh lovang,"a lo ti nghal mawlh mawlh a.

Msi chuan Max chu a biak loh chuan a rawn kal a ring silo. Biak ngawt chu a hreh be bawk sia,amah be lovin Notei a be ta ringawt a;

"Aw U Ms?,"

"Ee i u mama kha ka be tlang thei lova,a hman hunah lo kal se ka ṭhiannu in China ṭangin a thil tur a lo hawn sak a,rawn la mai se aw,"

"Awle hei a chhuak kha a lo la haw lova,"

"Imm an la buai a niang,lo hrilh ngei ngei ang che aw,"

"Awle tehreng mai,"

"Nih ka dah phawt aw,eirawng bawl a  ngai a,"

"Awle,"


Msi chuan,"Engpawh nise hetiang rilru mumal lo deuh a awm reng ai chuan,a rawn len hunah engkim ka sawipui mai ang. Duh dang a lo nei a nihpawn ka inthiarfihlim mai ang,"tiin thutlukna siam harsa tak chu a siam ta a.

"Max,thil sawi lawk ang aw,"tiin Msi chuan bul a ṭan nghal a. Max chuan,"Aw eng thil nge a?,"a lo ti vat a. Msi chuan,"I awmdan hi ka hrethiam hlawl lo che,thudik min hrilh rawh midang duh i nei em?,"a ti tawl mai a. Max chuan,"Duh dang nei ni ila,ka kalsan tawh ngei ang che,"a lo ti thung a. Msi chuan,"Mahse,i mizia hian a ti lang leh ṭhin a nih hi,"Max chu a melh kar mai a. Max chuan,"I ngaihbel mai mai anihchu,"a lo ti leh mai a. Msi chuan,"Duh dang i nei a nihchuan tlang deuhin min hrilh la,ka lo inthiarfihlim mai ang,"a ti ta nge nge a. Max chu a nui hak a,"I ngaihdan hi i kalthui pui thei lutuk a,duh dang nei ila mipa takin ka hrilh che a nga ka kalsan ngei ang che. Mahse,duh dang ka nei tlat lo,"a lo ti ve tlat thung si. Msi pawh chuan tih ngaihan vak a hre bik tawh lo,"Umm nihchuan ka tihpalh lutuk aw,naktukah engtikah nge i chhuah ang?,"a ti a. Max chuan,"Chaw eikhamah nih ka ring,"a lo ti vat a. Msi chuan,"I thlen veleh min lo hrilh la aw,"a ti a. Max chuan,"Awle,"a ti ringawt a,a ngaihtuahnaah erawh Kimkimi chiah a awm leh tawh a. Kimkimi leh Msi chu a khaikhin leh ṭhin a,Msi chu mipa tupawn hmu se hmelṭha an ti ṭhin. Kimkimi pawh chutiang tho chu a ni;mahse,Msi chu Kimkimi angin a zei ve vak lo tih chu Max aia hrechiang tu an awm lovang.
Max chu a in pack leh malh malh tawh a,a in pack pah chuan Kimkimi chu a call nghal bawk a;

"Aww duat,"

"Hei ka rawn chhuak dawn chiah a,ka in pack mek aw,"

"Imm ka ngai tawh lutuk che nia,lo thleng vat vat rawh,"

"Umm lo thleng vat vat ang,kan dah rih phawt aw nakinah ka lo be leh ang che,"

"Awle mmuuaah,"


Max chuan phone chu a off nghal a,a thuamhnaw package chu a khai a,room aṭang chuan a chhuak nghal a. Sitting roomah chuan Notei chu a lo ṭhu vang bawk a,"I chhuak tawh dawn mi?,"a lo ti vat a. Max chuan,"Aww thim hmaa thleng thlak ka duh sia,ka kal a nge. E chuan maw,Msi kha ka biak loh chuan min lo be rih suh seh aw. A chhanchu,naktuk ṭangin kan buai nghal char char dawn a,"a ti a. Notei chuan,"Engnge in tih dawn em em a?,"a lo ti nghal vat a. Max chuan,"Aww hna kan thawk dawn lawm,ka sawi vek tawh kha. Ka kal dawn nia bye aw,"tiin a chhuak nghal nul nul a. Notei chuan a um zui nghal vat a,"Heyy Misualpa,i thlen veleh min lo bia ang che aw,"tiin Max-a samah chuan a tuai sak a. Max chuan,"Ka sam kha tuai ve ziah suh,ummm ka thlen veleh ka lo bia ang che,"a ti a,carah chuan a lut nghal a. Notei chuan,"Nih tluang deuhin i kal dawn nia aw,"tiin a thlah liam ta a.

Sangtea chuan Sunday tlaia Msi te Ina an len a Msi mize danglam lutuk chu a ngaihtuah let leh a,"Msi hian kan lakah hian thil zep ruk a nei chiang mai. Nimina a awmdan kha a dik miah lo,Max lah chu hmuh tur awm reng reng bawk si lo. An inkar thu a buai mawn le?,"ama hriat tawk lek chuan a phun sup sup a. A tho lawk a,a insiam sawk sawk a Msi te Ina leng turin a tlanchhuak nghal a.

"Ms,thil thleng a awm mi?,"a ti nghal tawl mai a. Msi chuan,"Eng thil maw?,"a lo ti hã mai a. Sangtea chuan,"Max nen in inkarah engnge thleng a?,"a ti leh a. Msi chuan,"Engmah awm lo,tinge min zawh a?,"a lo ti leh a. Sangtea chuan,"Tunlai i mizia hi a mak lutuk lawm,"a ti leh a. Msi chuan nui chungin,"Tunlai chu ka hah deuh a,chuvang pawh chu a niang. Max nen kan inkar chu a ṭha lutuk a nia aw,"tih pahin a nui sen sen a. Sangtea chuan,"Tak tak maw? Khapa khan a tihnnat che hi ka phallo a nia aw,"a ti khar khar a. Msi chuan,"Umm kan ṭha lutuk a lawm,thingpui in la kan lum nge aw,"a ti a,a tho a choka lamah a phei nghal daih a.

"Nang hi chuan min hrechiang a ni tiraw? Mahse,ka inthup hram hram a ngai a ni,"Msi chuan thingpui chu a chawk ri rawk rawk a.

"Chini in va ngah awm ve a?,"Sangtea chu a nui hak hak a. Msi chuan,"Maw?,"a lo ti hâ mai a. Sangtea chuan,"Chini in va ngah awm ve?,"a ti leh a nui sun sun a. Msi chuan,"Awiii lubuk,a thlum lutuk ti ve mai la. I van sual tak,khawi ka lo siamṭha leh ang,"a ti a,a nui kar kar a. Sangtea chuan,"Tak takin ka ti mai mai a nihkha,a tui lutuk a lawm,"tih pahin a nui leh hak hak a. Msi chuan,"A hrim hrimin nang hi Emily te Inah i leng dawnlo mi?,"a ti leh a. Sangtea chuan,"Zanin chu a sumdawnpuite ho inleng a nei dawn a,"a lo ti mai a. Msi chuan,"Nihchuan,nang hi tinge hnathawk lovin i la awm?,"a ti leh mauh mai. Sangtea chuan,"Ka chhungte hian hnathawk turin min ring ngamlo a nih hi,ka nu sumdawnna pawh ti lian turin ka ti a. Ka thusawi an zawm duhlo a lawm,atawpah an thinrim hunah thawhchhuah neilo tiin min ânkhum leh a ka ning a nia. Thla thar aṭang chuan hna pangngai deuh zawn ve tawh a ngai a ni,"a ti nang nang a. Msi chuan,"Ni e mipa ve si hnathawh neih loh chu tuman makpa atan pawh an duhlo ang che,"tih pahin a nui zui har har a. Sangtea chuan,"I nu chuan min duh chiang sa,"a rawn ti zauh a. Msi lah lo duai bik lo,"I hre ngawt ngawt lo aw,"tih pahin a lo nui var var a. Sangtea chuan,"Min duh bawk e aw,"tih pahin Msi hnarah a pawh sak a,Msi lah tlawm a tum bik silo,"A duh pit lo che aw,"tiin Sangtea hnarah chuan pawh tumin a va ban a;mahse,Sangtea chu a lo in dang hman a. Msi lah chuan Sangtea hnara pawh ngei tumin ṭan hmun a siam rem thung a,chutih chhung chuan Sangtea chuan Msi kut 2 chu a lo man bet hman a,"I che thei tawh lo e aw,"tih pahin Msi chu a chhiatkhum zui a. Msi chuan,"Awii lubuk,i chaklo ang chu aww,"tih pahin tal chhuah tum a bei ve ngial a. Mahse,awmzia awm lo. Sangtea chuan,"I tlawm em?,"tih pahin a nui vur vur a. Msi chuan,"Aih tlawm ve ngailo Zo lanu ka nih hi aw,"a ti a,a tal leh bat bat ṭhin a. Sangtea chuan,"I tlawm nge tlawm lo?,"a ti leh a. Msi chuan,"Ka tlawm pit lo aw lubuk,"a lo ti leh nghal vat a. Sangtea chuan,"Imm i tlawm loh aiah,"tih pahin Msi hmui senno chekah chuan a fawp nghal tawn a. Msi chuan,"Ummmmhh...duhtawk teh,"tih pahin Sangtea chu a nam kiang dawr a,"Tiang hi ti tawh suh,"a ti leh a. Sangtea chuan,"Ms,ka hmangaihna che hi tinge i hriatthiam duh miah lohva?,"a ti leh a. Msi chuan,"Chutiang sawi a hun lo,i thutiam kha hre reng ang che. Ka ṭhiannu saw i tina tur a ni lo,"a ti leh a. Sangtea chuan,"Awle ka hria e;mahse,engtikniah emaw ka thinlunga ka hmangaihna che hi irh chhuah hun a la awm ang. Chutih hunah chuan min hnial reng thei tawh bik lovang,ka haw dawn muttui,"a ti a,a helmet a la a,a chhuak nghal nul nul a. Msi chuan Sangtea chhuak chu ngawi rengin a en zui vawng vawng ringawt a.