ZU ZUAR NU

Ziaktu: Hc Lalrinzuali
(Jampui hill, Vawksa Street)
.

“Hmeichhia te te si,” ti a hmeichhiate harsatna hrethiam lek lo a an diriamna tawngkam tinrengte chu chhan a sawt lo tih hria ni awm takin ngawi rengin a ngaithla a, mit khap lek loa hmalam ena a nunhlui lungchhiatthlak tak ngaihtuaha a rilru a sawrbing mek lai chuan a beng dar kiu vawng vawng khawpa an rawn benna avang chuan a harh chhuak chiang khawp mai.

A hmeichhe nihna tizahawmtu pakhat, a sam sei hnap chu uluk hauh lo chuan an hlep hmawk hmawk a, hnuailam bihin a mittui a dir zung zung a. Khawtlang phal loh zu a zawrh avanga lu meh kawlhsak tawk mek leh zahthlak thei ang bera khua fanpui tur a ni.

Amah chu Lalhmangaihi, kum28 bawr vel, a fapa kum 3 mi leh a nu pitar kum 58 vel mit lehlam del nena khawsa an ni. Pasal chu a nei ve a, mite ang bawkin hmangaihna avanga hlimna pawh alo tem ve tawh asin; mahse, a tan chuan chu hlimna chu a tawi lulai deuh a ni. A pasal, a innghahna leh a thlamuanna awm chhun chuan an fapa kum 1 mi lek a nih laiin accident avangin mual a liamsan ta si!  A pasal hi Myanmar lam mi a nih avangin a chhungte nen pawh an inpawh lem lo.

Lalhmangaihi hian unau pianpui a nei lo a, a pa chanchin pawh sawi tur a hretam lo. A nu mit khing del leh a fapa chu a kuta awm an ni a, a enkawl a ngaih si avangin a phak tawk tawkah a inhlawh ve tang tang a; mahse, a beitham deuh a ni.

Beiseina chhawm nun tlak neih chu a tan thil harsa a ni ta. Mi hausa fa, nun beidawng te’n thil pawi nasa tak an khawih thin ang bawk hian, retheihna fanu beidawng Lalhmangaihi chuan kawng awm chhun nia a hriat, zu zawrh hna thawkin tun hi a thleng ta a ni.

A thil tih sual chu a pawm a, thiam thu sawi a tum hek lo. Hmeichhe hmeltha pangngai ve tak kha alu a kawlh vek tawh a, a silhfen tawmkai lo takte chu pawtthlerin a banah chuan ran ang maia hlingin khawlai fanpui a ni ta.

An en luih luih a , an nuihsawh bawk a, a hmalam en tura a hawi chhuah ngam loh avang chuan a pai leh khat khat thin a; chutih lai chuan an in zawn an hnaih tawh tih erawh chu a hrechiang khawp mai! A thin a phu zawih zawih a; a nu rilru tur a hria a, a fapa erawh chu a ngaihtuah ngam lo.

An in zawnah chuan muangchangin a han hawichhuak a, a sa zual thenkhat chuan, “I fanu hi rawn en the,” tiin a nu chu an lo au el bawk a; chu’ng thawm bengchheng avang chuan a fapa, a hmangaih ngawih ngawih chu an tukverhah chuan a rawn dak ta!  A hmai chu a bal nian a, tap zo hlim tih hriat takin a meng tui par bawk a, Lalhmangaihi chuan amah a ngen vanga tap a ni tih a hai lo.

Chu naupang kutah chuan a piin a thlemna, chawthing fang vel chu a berh liai bawk a. A ngaih em em, a nu ava hmuh chuan hrilhhai hmel takin a en ve vawng vawng a. A nu erawh chuan a en let ngam lo.

A tha a khur a, a ding a, a mittui chu lei charah chuan a far thla zung zung a. Chutia a din reng lai chuan a hnunga ding, an khawtlang hruaitu rawva zet chuan, “Kal ta che,” tih pahin a tiang ken chuan a hlap ta zawt mai a, chu veleh lo en rengtu a fapa chu a tap ta tuarh tuarh a; mahse, a kalsan a ngai si. “Anu... Anu…,” tih ri chu a bengah a cham kumkhua tawh dawn a ni.

A phu tawk hremna nia an hriat an pek chikim hnu chuan, Police kutah hlanin jail tang tur chuan an phur ta vawn vawn a.

Mi chi hrang hrang, sualna hrang hrang vanga lungin tangte chu an kat nuk a, a then phei chu an thawveng em em mai lehnghal. Hringnun hi amah maia hmachhawn chu nise, khawvel eng ai chuan chu jail run thim chu a tan a nuam zawk ta ve ang. Mahse, a nu mit tha lo, che hleithei lo leh a fapa, a nu mamawh ngawih ngawihtu chu a khawvel an ni miau si a.

An vuakna vanga a taksa na thum leh a mittui tlak nasat avanga a lu na bur te avang chuan mut hahchawlh hlek chu thain a hria a; mahse, ava hlawhchham chiang em! A pangtilum ngheng lova muhil thei lo a fapa, naupang te chu a ngai a, a lainat a, a tap ri bawk chu a bengah a rawn ri nawn leh thin. Tunah te hian a pi chak lo tak nen khan engtin tak he zan hrehawm hi hmang ve ang maw!

(In lamah ve thung chuan) Naupang khawngaihthlak chu a tap bang tawh dawn lo emaw tih turin a tap tuarh tuarh a. A pi chuan theihtawpin a thlem a. Naktukah a nu chu a rawn haw dawn thu leh thil tha deuh a hawnsak dawn thute chu beisei miah lo leh mittui hru zauh zauh chung chuan a hrilh a.

Aw…zan hrehawm chu ava ni chiang em! Engtin tin emaw naupang pawh chu a intap muhil ve ta mai a.

Lalhmangaihi erawh a dawldangin a cher hle a; ei tur a hun takah dawng thin mah se, in lama a fapa leh a nu chuan eng nge an lo ei ve ang ? A hrawkah hnawhtu a awm tlat a, a mittui bawk chu a chaw a ni leh thin.

Hun te chu an kal duak duak a, sum hmachhuan tur nei tha leh mite anga kawng han sialsaktu chu nei sela a chhuak ve tawh mahna. Mahse, chu zawng a tan thil theih a ni lo; a chhan chu a rethei em a ni.

A fapa ngai chuan nitin a tap awl lo a, chhungte kan niah ngaihsaktu a nei ve ngai hek lo.

Thla tam a liam leh hnu chuan kantu a nei ve ta tlat mai! Vengtu police pakhat chuan a rawn hruaichhuak a, chuta a thil va hmuh zet chuan ava thawng tak em!

A nu chuan a fapa chu alo pawm a, an cher dun hle. A fapa chu a chau a ni tih hriat ngawih ngawih hian a pi awmah chuan a bei hle hle a. A nu a hmu thut chu a hre lo emaw tih mai turin a en vang vang a.

Lalhmangaihi chuan tawng zai reng a rel lo. A fapa chu a pawm a, a kuah vawng vawng a, naupang khawngaihthlaka chuan, “Anu... min kalbosan tawh suh, ka ngai tawh lutuk che. Inah haw ang,” a ti a, a tap ta a.

A nu chuan, “Bawihte, ka lo haw tep tawh a lawm, zanin chu api bulah lo mu leh phawt rawh aw…” tih bak a sawi thei lo.

A pi chuan a dam loh vanga harsa tak chunga rawn kalpui a nih thu te a sawi a, a rilru hah zualna tur chi erawh a sawi duh bik lo. Lalhmangaihi chuan a chhuah tep a rin thuin a nu chu a hnem ve bawk a. A fapa erawh chu a pang asa hle a, a nu tangah chuan na pawh nei lo ang maia thlamuangin a bei hle hle a; mahse, an inhmuh hun chu a tawp ta si!

A fapa chuan a pawm bet tlat a, a tap vawn vawn a. Mahse, a pi chuan pawm luiin a kalpui ta a, chu tap thawm, “Anu...,” tia chiau vawn vawn ri chu ngaithla ngam loin a beng a hup tlat a.

A fapa damlo a ngaihtuah em avang chuan a tlaivar thak a, tlanchhuah mai te a duh rum rum a; mahse, kawng a awm si lo.

Zing nichhuak chu a dul ruih a, ni dang ang bawkin beiseina chhuahpui tur a nei lo. Chu mi ni chuan eng mah reng a ei lo a, tlailam alo nih chuan kantu a nei leh ta nawlh mai! Mak ti tak chuan a chhuak a, an khawtlang hruaitu pakhat lo thu reng ava hmuh chuan mak a ti telh telh a, ngawi reng chuan ava thu ve tawp a. Chuta a rawn kantu thusawi chu a ni thu ngaihthlak hrehawm ber mai chu. A FAPA KHA A THI!

Lalhmangaihi chuan a melh ngai a melh tlawk tlawk a, a mittui erawh a sur zung zung a, a hmangaih a fapa neih chhun, a mah ngaia tap vawn vawn kha a dawm miah lohin mual a liam a maw? Nu tan chuan a aia na a awm thei kher lo ang.

A thinlung chu chemtea vih ang maiin a na a, a thutna atang chuan a tla zawi hnawk a, “Bawihte…,”tiin a phun sep sep a. An bial laih a, an sawi nawk nawk bawk a; mahse, a phun chu a zawi tial tial a, Lalhmangaihi chu harhchhuak tur a awm ta lo a ni.

THUBELH: Miin thilsual a tih tamtak hi chu retheihna leh harsatna vang ani, i hekna aiin atuarna hre hmasa rawh.. in diriam ai chuan hmangaihna nena in chhawmdawl hi misualte damdawi tha ber ani.