ASSAMIN NRC TICHHUAK, INDIAN KHUA LE TUI NI LO NUAI 40 ASSAM-AH AWM

July 30, 2018: Vawiina Assam sawrkarin an state chhung National Register of Citizens (NRC) draft list a tihchhuahah mi nuai 40 zet chu India khua leh tui ni lo an awm tih tar lan a ni a. Khua leh tui an nihna finfiahna tur an neih loh chuan hnawhchhuah tur an la ni ang.

NRC hi kum 1951 atang khan vawikhat tihchhuahna a ni a, hei hi phalna tel lova ram thenawm Bangladesh atanga pemlut te chhut chhuah theihna tura ruahman a ni.

Thuneitute an fimkhur hle a, hetia tuna list an tihchhuaha tel lo te chu tumah hnawhchhuah emaw man emaw an ni dawn lo tih an sawi a, a chhan chu hei hi draft chauh a ni a, Bangladesh atanga Assama Muslim tam tak lo lut te thenfaina tur a ni an ti. Home Minister Rajnath Singh chuan mi tam takin an hriatchian loh vangin an lo tawngpawng hlauh va, hei hi final list a la ni lo va, draft chauh a la ni a ti a, northeast-a home ministry officer incharge Satyendra Garg pawhin he draft an tihchhuah vanga ram dang mi te thiam loh chantir emaw hrenbeh emaw an ni lo ang a ti bawk. Assam Chief Minister Sarbananda Sonowal chuan mipui te chu a punlun zawnga thu kalpui lakah inthiarfihlim turin a chah bawk, niin thu kan dawng.

Hemi chungchangah  hian Hmar Students Association Asssam Hills Joint Headquarters pawhin nimin lam khan thu a lo chhuah tawh bawk a ni.

HSA Thuchhuah

NRC a inziahluh dilna hi March 2015 atanga kalpui tan niin Assam state chhunga chhungkaw nuai 68 te hnen atangin dilna thehluh a ni. Mi vaibelchhe 3.29 ten NRC a inziahluh dilna an thehlut a, mi vaibelchhe 2.89 te chu ennawn leh tura dah an ni. Heng zinga tel lo te thuneitu ten an pawm theih loh chuan phalna tel lova luta ngaih an ni ang.

 Tuna mi nuai 40 tel ve lote hian kum thara inthlanah vote an thlak thei dawn em tih chu Election Commission thutlukna tur a ni anga.  List a tel lo te tan August 30 - September 28 thleng hun hawn a ni a, India khua leh tui dik tak tan engmah hlauhthawn tur a awm lo.


  He list ah hian Assam citizen, March 21, 1971 hmaa lo khawsa tawh te chauh ziahluh an ni a.  Kum 1951 a census an neih hmasak ber zulzuia kalpui a ni a, March 24, 1971 a Assam electoral roll a hming chuang te tar lanna a ni.

 Mi tupawh March 24, 1971 a Assam khua leh tui lo ni tawh nia finfiah theih te chu India khua leh tuia chhiar an ni dawn a, chu chuan January 1, 1966 leh March 25, 1971 inkara Assama lut, Foreoigners Registration Regional Officer a inziaklut te a huam dawn a ni.

first draft chu January 1 khan tihchhuah a ni a, chutah chuan mi vaibelchhe 1.9 hming tar lan a ni a, chung zinga mi nuai 1.5 te document chu rinhlehawm a ni a, rinhlelhawm zingah hian hmun thuma thena hmun khat chu hmeichhia an ni.
 
    Vawiina NRC list tihchhuah vang hian sawrkar laipui chuan buaina thleng thei venthawn thilah sipai 23,000 zet Assam bakah thenawm state, Meghalaya, Nagaland, Arunachal Pradesh-ah te a tir chhuak a ni.