Hun engemaw chen an inngaihzàwn tawh hnuah ni khat chu...
`
Caroline-i, nula hlimthei tak; a hmêla hlim hmel pu reng mi leh nuimawi em em, nu lian ni silo pianthiam zet, a thawmhnaw inbel apiang mawipui ber zel țhin, mi pawi sawi ngai lo leh midangte hreawm hlau zawk țhin mi chuan a bialpa, a pasal ni ngei tura a ruat ni bawk chu surprise tumin a call a; thil hlimawm tak hrilh a duh a, inhmuh puiah a sâwm a ni.
`
Inhmuh an tumna, vawi tamtak an lo inhmuh fo tawhna hmun, an restaurant duhber hmunah chuan- tlai fo țhin a bialpa, a hmangaih ber ni bawk chu darkâr chanve dâwn alo nghâk reng tawh a. Tuisik no engemaw zah a in hman hial! A thil hrilh turin ati zàm tih a hmêl ațang hai rual a ni lo. A kutțang a hmer a, a mi nghah lokal leh kal loh thlirin a hawi kual sek bawk.
`
Nakinah chuan hmanhmawh tih hriat tak mai hian a bialpa chu kawngkhar ațang a rawn pên lut tih ava hmu ta! A mitah chauh lo pawh Fabian-a hi chu mipa hmelțha nih ava tling chiang tak. Midang lo awm ve te rêng paw'n a kawngkal an en duhdan ațang a hriat vek. A sam tihdan leh a incheina a inhmeh thei hle a, a hawiher leh a cheziaah sawiselna lai tur zawng ta ila theihai kûnga apple rah lawh tum ang vel kan ni ang. Mifel famkim a ni lo; mahse, famkim taka thil ngaihtuah țhin leh felfai taka thil ti țhin mi a ni thung (a tlai fo tih loh chu)
`
Tichuan, dawhkan khawhar, beidawng lova amah lo nghâk reng tawh tu lam chu panin ava thleng a. An inkuah a, a tlai avanga thupha chawi mawlh mawlh chungin tui a in a. Phone-a sawi mai lova engvanga hmaichhan khera thil hrilh duh nge a nih a zawt zawm nghal bawrh bawrh a.
`
Muangchangin a bag chhûnga bâwm te tak tê, uluk leh mawi taka tuam hi Caroline-i chuan arawn phawrhchhuak a...
`
"Hei hi e'nge ni a?
"My dear, i hawn hunah i hre mai dawn alawm" (a nuih ver ver a)
"En teh! Thil manto tak tak inpêk leh hetianga in surprise hi ka duh lo tih i hre vek a ni lo'm ni, mahse hei hi e'nge ni leh ta?"
"Chutiang a ni lo, i hawng anga i hre mai ang ka tih chu"
"Darling, nakin lawkah kan la innei anga, chhungkaw nuber ila ni dawn, chutih hunah chuan sum hman dan leh inchhung enkawl dan i thiam angai dawn tih i hre tawh lo em ni? Tun ațanga kan inzir hi angai asin, ka sawi chu i hrethiam tiraw..."
"He thil pawh hi chhungkua kan nih theih nana min puitu tur a ni maithei asin, e'nge a chhungah awm ila hre lova, engkim hi a pâwnlam landan ringawt ațanga teh loh tur asin"
"Ka la lovang, mi hausa fanu nena inzawmna neih reng pawh hi hmasawnna aiin retheihna kawng kan sial zawk niin ka hria, ka tihpalh" tih leh chhuah a rual a.
`
Caroline-i chuan a mittui chu adang zo lo; ațap a, ko ko mahse a kokir zo tawh lo, aliam tur chu a thlir ringawt a.
`
A bâwm chu a hawng a, pregnancy test result- nau a pai tih hriatna lang chiang em em chu amahin a en a, a rin loh tak maia Fabiana'n a kalsan chu a tuar thei lova, zah pawh dawn zo lovi'n a țap hawm hawm a...
No comments:
Thanks for your comment.