tleirawl.in | 14 July 2018: June 14, 2018 a tan tak, Khawvel show ropui ber tia chhal ngam, FIFA World Cup 2018, Russia in an thlen mek chu nakzan khian a hmawr bawk a ni dawn ta.
Nakzan dar 8:30 ahFrance leh Croatia an intum ang a, Khawvel Football in lal thar a nei dawn nge dawn lo a chiang ang.
France hian 1998 khan World Cup No mawi an lo chawi tawh a. An chawi leh chuan an tan hlu tho mahse, thil thar a ni hran lo. Mahse, Croatia erawh hi chuan kan rama TV Channel ten a lem an lo chawi anga an lo chawi ve a nih ngawt loh chuan an vawi khat chawina tur a ni.
Croatia President Pi Kolinda Grabar-Kitarovic chuan France nena an intum tur hi a nghak thiam lova, a helhhawlh ni berin a sawi a. Pi Kolinda Grabar-Kitarovic chuan a phur lutuk chu a helhhawlh ni berin a sawi bawk.
Pi President hi Mizo tleirawl chu nise, “awi, ka phur lutuk hi a hrehawm zawk,” a ti hial ta ve ang.
A sawi zelnaah chuan, “ Pathianni tlai result chu eng pawh ni rawh se ka pawisa lo, kan chakah ka ngai a, hnehna chang tlukah ka inngai tawh” a ti a. 1998 World Cup France –a Pathumna an nih kha an khum tawh hrim hrim niin a sawi a.
Result predict chungchangah erawh a ring lawk duh lova, ""I'm not good at that. The result is not important, only that it is a victory."tiin a chhang.
Pi Grabar-Kitarovic chuan French PM, Emmanuel Macron , Russian President Vladimir Putin leh British Prime Minister Theresa May te hnenah Croatia Jersey pek a tum nia sawi a ni.
Croatia ram khawpui Zagreb lamah pawh Police lam Passport pek chungthuah fans Russia lama zin belh tum an tam vangin an duty ngawrh hle a. Croatia Football thuneitu lam pawhin an ram fans te tan FIFA hnenah ticket an dil belh a, Mahse, vanduai thlak takin black market ah bak a awm tawh lo a ni.
Result chu eng pawh lo nise, Croatia team hi Monday tlai 2:30 pm (1230 GMT) khian Jelacic Square, Zagreb, Croatia ah ropui taka hmuah an ni ang a. An ram teamte hmuak tur hian Mi sing tel an punkhawm beisei a ni.
No comments:
Thanks for your comment.