Hnahthial | July 28, 2018: July 27 khan Government Hnahthial College chuan an College Auditorium-ah Graduation Day and Freshers' Social hun an hmang a, bialtu MLA Pu John Siamkunga, Chairman Mizoram State Law Commission chuan khuallian niin a hmanpui a, India International Footballer Hnahthial tlangval Jeje Lalpekhlua pawhin khualzahawm niin a hmanpui. He hunah hian Graduate thar 12 te hnenah lawmpuina hlan an ni.
Pu John Siamkunga chuan Government Hnahthial College-in kum reilote chhungin nasa takin hma a sawn a ni tiin theihtawp chhuaha thawktute college staff leh khawtlang hruaitute chungah lawmthu a sawi a. Hmasawn zel tur chuan khawpui liana college-te tlawh a tul thu sawiin, kum thar lamah zirlai naupangten exposure/excursion an neih theihna tur ngaihtuahpui a tum thu a sawi a. Zirlai naupangte chu theihtawp chhuaha zir tura chahin hnamdang te nen kan inbeihna hi thluak a ni tawh tiin central service hrang hrang a inziak tling thei tura tan la turin a chah.
khualzahawm Jeje Lalpekhlua pawhin fuihna thu sawiin theih tawp chhuah hi hlawhtlinna bul a ni a, harsatna thlen chang a awm thei mahse chu hunah pawh chuan beidawng mai lova, theih tawp chhuah thar thin tur leh Ruihtheih thil chi hrang hrang laka fihlim turin zirlaite a chah.
No comments:
Thanks for your comment.