July thla chhung sorkar nghâk dawn

Mizoram Government Aided School Association (MIGASA) hruaitute chuan, Mizoram sorkarin ṭanpuina a pek sikul, lumpsum grant-in-aid school-te chu dinhmun ṭha zawk, adhoc grant-in-aid dinhmuna hlankai turin Mizoram sorkar an phût a; July 2018 chhunga thu lawmawm an dawn loh chuan sikul khar thlenga hmalak an tum thu an puang.

MIGASA hruaitute hian nimin khan Aizawl Press Club-ah thuthar thehdarh­tute an kâwm a; an president C Lalngaihzuala chuan, Mizoram union territory a nih lai aṭangin sorkarin sikulte chu dinhmun 

ṭha zawkah a hlangkai ṭhin tih sawiin, "Tuna kan hrawn mek sorkar hian kum 10 chhungin sikul dinhmun a khawih che miah lo a, khawih chet a hun tawh kan ti a, kan ngenna hi min tihhlawhtlinsak ngei kan beisei tak zet a ni," a ti.

MIGASA President sawi danin, Mizoram sorkarin kum 2001 aṭangin lumpsum grant-in-aid a kalpui ṭan a, chutih hun laia lumpsum school-te chu kum 2008-ah adhoc grant-in-aid-ah a hlangkai an ni a, adhoc grant-in-aid school/deficit school engemaw zatte pawh regularise a ni.

Mizoram sorkarin kum 2008-a sikul hrang hrang dinhmun a khawih chet ṭumin khawtlang enkawl private school 82 chu lupmsum grant-in-aid dihmunah dah an ni a; chu'ngte chu higher secondary school 12, high school 34 leh middle school 36 niin, a vaiin sikul 82 a ni. Lumpsum aided school ṭhenkhat erawh chu harsatna avangin tihtawp a ni tawh a, tunah hian M/S leh H/S bikah lumpsum aided school 61 a awm mek.

Lumpsum aided school-te'n kum khata lumpsum grant an dawn dan chu - HSS-in Rs. 1,50,000 leh H/S leh M/S-te'n Rs.1,20,000 a ni a; hei hi lumpsum status-a dah an nih aṭangin tihpun a la ni lo.

Lumpsum aided school-te chuan adhoc aided-a hlangkai turin ṭum eng emaw zat sorkar hotute an ngen tawh nia sawiin, C Lalngaihzuala chuan, "Vawiin thlengin thu lawmawm kan la dawng lo hi hriatthiam harsa kan ti hle," a ti a; an dinhmun leh an harsatnate chu mipuiin pawhin an hriatthiampui an beisei thu a sawi.

C Lalngaihzuala chuan, MIGASA-in June 28, 2018-a General Assembly an neih ṭumin July 2018 chhung ngeia lumpsum aided high school leh middle school 61-te chu adhoc grant-in-aid din­hmuna hlangkai turin sorkar an phût tih a sawi a, "July 2018 chhunga sorkar aṭanga thu lawmawm kan dawng lo a nih chuan 'No Teaching Day' leh tiamchin awm loa sikul khat mai ni se, kan ti. He­tianga kar kher ngai lo a, a rang thei ang bera kan ngenna min tihhlawhtlinsak turin sorkarin kan ngen tak meuh a ni," a ti.

MIGASA hruaitute chuan, adhoc aided din­hmuna dah phûta sikul khâr mek lumpsum aided HSS pakuaa zirtir­tute, Mizoram Govt. Lumpsum Grant-in-Aid HSS Association-te hmalakna chu an thlâwp thu an sawi a; anni nen pawh an inbepawp reng tih an sawi.

C Lalngaihzuala chuan, lumpsum aided school-a zirtirtute chu an awmna khuaah sorkar sikula zirtirtute thawh ang an thawh ṭhin thu sawiin, "Inthlanah retur­ning officer, pol­ling officer, booth level officer, Births & Deaths registrar, census renumerator-ahte min hmang ṭhin a, sorkar tan ṭangkai takin kan thawk ṭhin," a ti.

Zawhna chhanga MIGASA hruaitute sawi danin, lumpsum aided H/S leh M/S 61-ah zirlai 3,000 chuang an awm a; School Education department-in an chhût danin, adhoc aided-ah hlangkai ta se, kum khatah cheng vbc. 30 vel sen belh a ngai dawn a ni.

- Vanglaini.org