KUM 100 CHHUNGA AWKIN THLA A LEM REI BER TUR HI KHAWVEL TAWP HUN TUR NIA HRILH LAWK AN AWM!

Ni 27 July, 2018 ( Zirtawp) zan, thla bial zana thla awk lem lo awm tur hi kum 100 chhung (2001-2100) a awkin thla a puma a lem rei hun ber tur nia sawi a ni a, minit 103 chhung a lem ang. 
 Awkin thla a lem hian Ni, lei leh thla te chu tlar khatah awmin ngil takin an intlar thin a, lei hlim khan thla eng a hliah avangin a sen rum thin a, hei vang hian 'blood moon' tia sawi te pawh a ni thin a, ni tla tur pawh a lang sen phut dawn a ni.

 

He thla awk lem tur hi Rorelna Ni lo thleng tur ngaihventute chuan khawvel tawp hun tur niin an sawi a, Kristian minister pahnih, John Hagee leh Mark Biltz te chuan Bible-a khawvel tawp tur hrilhlawkna, 'Ni thimah a chang ang a, Thla thisenah a chang ang a...' (Tirh.2:20) tih leh "....thla pawh chu a pumin thisen angin a lo awm ta a..." (Thup.6:12) tih te a lo thlen dikna tur niin an ngai a, khawvel tawp hun tur a ni tiin an lo sawi lawk ve bawk.

 

 Tuntum thla awk lem turah hian kum 15 chhunga Sikeisen en ber hun a ni ve dawn a, Ni, lei leh Sikeisen te chu tlar khatah an awm ang a, an intlar ve pat dawn a, Sikeisen hi lei hlimin a hliah phak ve loh avangin a eng hle dawn a, thla nen inhnaih tea awmin a hmuh theih ang. 

Hetianga hrilhlawktute hian an lo hrilh lawk dik ngai chuang lem lo rih lo va, tuntuma khawvel tawp hun tura lo sawi lawktu pakhat Irvin Baxter chuan kum 1980 atang tawh khan hrilhlawkna lam hi a lo buaipui tawh a, kum 2000 ral huna khawvel tawp tur thu lo sawi tawh kha a ni a, ani hian Joel 2:28 thu hmang hian a lo hrilh lawk ve bawk a ni.