MZP-IN ZIRTIRTU SEMRUAL PHUT

Vawiin 20th July 2018( Ningani) chhun dar 12:00 khan MZP General Headquarters Executive Meeting neih a ni a. Meeting hi Tv. L. Ramdinliana Renthlei, President-in a kaihruai a, Zirtirtu sem rual chungchang, Part Time Asst. Professor lak chungchang, Lumpsum Grant-In-Aid chungchang, MZP buatsaih a ‘Thu leh Hla kutpui’ hman chungchang leh Social Media a ṭha zawnga hman dan inzirtirna neih dan turte rel a ni.


Zirtirtu sem rual chungchangah hian Press Conference te pawh nei tawh a niin,  Chief Minister leh Education Minister te pawh sawipui alo ni tawh a, hemi chungchangah hian Sorkar atang a hmalakna vawiin thleng a engmah hriat tur a awm lo hi MZP chuan hriatthiam har a ti hle a. MZP Executive meeting chuan 15th August, 2018 ral hma ngeiin Sorkarin Zirtirtu indaihlohna School-ah zirtirtu dah belh turin a ngen nawn leh a, MZP ngenna ang a Sorkar-in hma a la lo anih chuan zirtirtu semrual an nih theih nan MZP chuan a tawp thlengin hma a la zel dawn a ni.


Meeting chuan, College hrang hrang a thawk tur Part Time Asst. Professor lak chungchang a ngaihtuah a, tun dinhmunah Mizoram Sorkar enkawl College-ah Part Time Asst. Professor NET nei lo 54 thawk an awm mek thu te sawi lan niin,  UGC Norms chuan College Asst. Professor tur chuan NET neih ngei a phut avangin Part Time Asst. Professor hna lak reng rengah NET nei ngei lak ni tawh se, Tin, Part Time Asst. Proffessor lak an nih reng rengin Advertisment mumal taka chhuah zel tawh turin Meeting chuan thu neitute a ngen nghal a ni.

 Meeting-ah hian Lumpsum Grand-In-Aid harsatna chungchang ngaihtuah a ni a,  Higher Secondary School 9-ten zirna in an khar hi MZP chuan pawi a ti hle a, hemi avang hian zirlai mi 850 dawnin an zirlai hun eng emaw chen an chhunzawm thei tawh lova, hei hi MZP chuan pawi a ti takzet a, zirlai ten zirna an chhunzawm leh thuai theih nan thuneituten hma la thuai se MZP chuan a duh hle a ni.


Vawiin MZP Executive meeting chuan MZP buatsaihin Ni 13-14 September, 2018 hian Thu leh Hla Kutpui neih nise tiin an rel a. Tin Social Media tangkai zawk a hman dan tur inzirtirna hun neih nise tiin a rel bawk a ni.

          Sd/-
(H.LALTHIANGHLIAMA)
Asst.General Secretary