Ziaktu : Albert Lal Buatsaiha
www.tleirawl.in
He Russian tleirawl chhelo zet mai chanchin hi in hre nual tawh ngei ang a. Ka'n sawi ve mai mai ang e...
20th October, 2017 khan China rama Hospital pakhat ah a thi a, a thih lai hian kum 14 chauh ani lehnghal!
Khawvel sumdawnna kawnga ṭhang chak tak China rama Fashion Model Scout pakhat in European tleirawl hmelṭha ho, Fashion Model ni tura a sawm luh ani a, thla thum chhung Contract an sign pui a, Sanghai Fashion Show ah pawh a inlan ve hman a ni.
Thla thum chhung chauh contract an neih avang hian, a chhawrtu Agency lamte chuan khawl ang maia nasain an chhawr ta char char mai a, ni 2 chhunga coma-a aawm hnuah he khawvel a khualzin kawng a zawh zo ta a ni.
He tleirawl modeling khawvela parchhuah tuma hmala mek hian a contract a hmang zo hman ta lo a, nitin darkar 18 deuh thaw hna an thawk a, assignment an la nei zui bawk, rilru leh taksa la puitling bawk silo chuan a nun a ning ta nge, thildang ṭha lo a chungah a thleng zawk, pâr chhuah tuma a kuhmum a in sangmar ṭan mek laiin ram hran daihah, chhungte dawm hlum phak loh in a thliak ta si. A taksa chu an han postmortem/autopsy chuan a thisenah tûr an hmu tlat mai bawk! Tun thlengin he thil hi an la chhui mek anih hmel.
Kum tlinglo, ram danga hna thawk tura chhungte telloa han tirh mai chu anu leh pa te pawh an demawm khawp mai.
Hethil thleng hi ka ngaihtuah zui ta a, kan ramah pawh hna avang a, mipa aiin kan nula ten sum thawhchhuah lam an vei a, India ram rilah mai nilo, Foreign thlengin kan nula tamtak an fehchhuak mêk a. Kum tlinglo pawh mi documents hawh in an feh chhuak a, nghawng a nei chho zel chu anih hi, a pawi khawp mai.
Hmanni ah kan mizo nula ngei pawh in phaiah a khawvel zinkawng a zawh tawp phah tawh a, naupang deuh deuh phaia hna thawh tumin tunah hian phai lamah an liam thla mek zel chu ania... An chungah eng tak thleng ang maw?!
Kan hna nen a inmil avang hian chik deuhin an thawhna tur hming ka han zawt deuh zel a, chiang faka han sawi thei nghal chu 40% pawh an tling lo ang! Kan retheihna hian sum it huam huamna ah min hruai lut a, kan fanu te dinhmun tur, an khawsak dan tur lam pawh ngaihtuah thei lovin retheihna bawiah kan tang a, sum in kan fanu nula te kan hralh mêk chu anih hi!
Phaia hnathawh hi a ṭha lo e, ka tihna lam ani hran lo a, engatinge kan mizo nula kher hi an duh bik chhan tih hi ka rilrua zawhna awm a ni. Khawvela mihring tam ber dawttuna ram India ramah kan cheng a, mizo nuai 12 bawr vel lek te hi engnge min duh bikna chhan tur? A state ang zawng pawha mihring tlem ber pawl kan ni lehnghal si... Ngaihtuahna kan sen deuh chu angai ka ti.
21 July 2018 |Thingdawl
No comments:
Thanks for your comment.