@vtg Jul 29, 2018:
Vawisun zantieng dar 2:40pm khan Pastor (retd) HV SUNGA (kum 96 le thla 4) Diphu chu a rawng a i bawl hlak Lalpa kuomah chawlhadam dingin amilo maksan tah. Hnam le kohran in ei tuor takzet a, a tu le te hai le kohran, a i maksan hai eituorpui takzet a nih. Tuhin a ruong hi ama inlum ngei Diphu a in zal niin, vawizan Diphu HYA, YPA le MWA nunghak tlangval in khawvarpui anta, zingah a ruong hi Diphu Christian Burial Ground, Diphu a vuiliem a niding a nih.
A CHANCHIN TLAWMTE:
Kum 1922 March 30 in Senvawn khuo ah a pienga, Ringmu Lo-a bawkte a suok/pieng anih. Apa Hmunthangkhup Varte (Laia an ti bawk). A nu Thangpuitling Sungte. Unau pasal pasari le nuhmei pahni - an rengin pakuo an niha; Ama hi apasari na anih, A naupang laia hriselnaw tak nisien khawm a unauhai popo laia a dam sawt tak ani ve tlat. Kum 1934 March 17 in Pathien thu a awi tana 1939 in Pastor Taisen kutah Baptisma a changa 1945 January 17 chun Sam 33:12 hmangin Sandam inhrietchiengna feltak a hung neia, chutaka inthawk chun a nu le pa ringnawtu la ni zinghai chu nasataka invawina neiin kristiena lutve dingin athlem athlema, a thruoilut veve anih. Sandam inhrietchiengna a nei kum vek hin a pa le a unauhaiin Pathien rawngbawl dingin an pek suoka. A hriselnawna lei le nau dawn dinga a nun a dit leiin a sikul kai a phal nawa, ama hril danin nikhat char sikul a kai hman anih, Chuleiin mi’n a thiemna an indawn pha chun “BBF ka nih” ati hlak- chu chu “Bi a Ba Fail a tina anih. Pathien rawngbawl ding chun hrietna chite bek nei a trul si leiin In ah tiem le ziek anchuk fawma. Kum 1946 khan Aizawl ah Sunday School Training in a fe a. Aizawla lo um Sap Missionary hai kawlah Tonic Solfa anchuk sa nghala. Kum 1947 in All India Sunday School Teacher Training Diploma Certificate a dawnga. Chun, 1948 in Tonic Solfa Junior, Elementary le Intermediate Zosanglien kutah a pass vawnga. Khanglai huna Tonic Solfa Certificate hrim hrim kha sap rama inthawk vawnga pek suok ala ni leiin a Certificate dawnghai khawm London-a inthawk vawng ala nih.
A RAWNGBAWLNA TIENG:
A sung haiin rawngbawl dinga an peksuok ang takin NEIG Mission Presbytary hrietpuiin hlaw bo in rawngbawlna a tran phawta . February ni 3, 1946 in Hmar kohran lai Naupang Sunday School hmasatak chu tran ania, a trantuhai laia thrangve in Superintendent hmasatak ani nghe nghe. Chu kum vek chun Sunday School Training ding chun Aizawlah a fe anih. Training a hung zo chun Manipur Hmar lai hieng: Senvawn, Sartuinek, Saikawt, Parvachawm, Parbung, Phulpui khuo ahai Sunday School Training a peka. Chun, Cachar le N.C.Hills tieng : Tuisiet, Leiri, Tattephai le Hmarkhawmawi a hai khawm a lo pek anih. Hmar hnam ngainatu laia mi ani ve leiin 1950 khan Hmar Association Book Room Churachandpur ah a hawnga, 1952 in Hmar lekhabu a zawr tran. 1953 in Bible School ah a luta, hi kum hin tirko exam a pass bawk. June 14, 1954 in Nunghak Darsangkim leh an inneia; an innei zo hin Burma ramah rawngbawl dingin an fe nghala. Burma ram Kanaan khuo ah Independent Church a phuna, phairam leh an inzawm. Kum 1955 March 27 in nau pasal an neia . .Rawngbawlna hlawk lem ding ngaituona leiin 1956 in Sielmat tieng hung kir nawkin 1957 January ni 2 chun N.C. Hills ram tienga rawngbawl dan ding enthla dingin a fea, chu trum chun Haflong , (Muolhoi) Mahur le Hmartlangmawi khuo hai chu a sira. Survey a zu thaw zo chu Sielmat tieng kir nawkin March 15 chun a nuhmei, a nau le a ruolhai Tawna, Aia, Ruota le Lalte hai chu thruoisa in N.C.Hills-a rawngbawl ding chun an lut ta anih. Kum 1957 November thla in ICI indin a nia. Presbytery hmasatak chu 1958 January 10 in Retzawl khuo ah nei a nih. Kum 1958 April 1 chun tirko sin a thaw trana. Kum 1959 February 22 in Hmartlangmawi a inthawk Saron ah ansawna, thlakhat le ti met chau an um hnung April 13 chun a nuhmei in chatuon ram a lo pan san tah a. 1960 February 26 in Pastor Ordination a changa. 1962 January ni 8 in Nunghak Lalsiemkim leh an innei nawka. 1963 in Hmartlangmawi, N.C.Hills a bawk rawngbawlna sunzawm nawk dingin a kir nawka. 1964 in Bhutan ah a fe a, mi pahni baptisma anchangtir. 1969 February 1 in Phaiphak ah anpema, 1975 January 24 in Khatdum, Meghalaya ah , 1977 February 13 in Mualsei ah. Chun,1982 March 10 in Khawmawi, Manipur ah an insawn nawka. Chu kum April 15 chun Naupang Sunday School biel pumpui hotu , Child Co-Ordinator hmasatak sin thaw dingin appointment pek anih. Child Co Ordinator sin kum 4 a thaw hnungin Mission Field tieng bawk a lung an len nawk leiin 1986 March 1 in Karbi Anglong ah a lut nawka, Muoldam khuo ah a um phawta, 1987 April 1 in Diphu ah an sawn nawk a. Pathien remruot pek anga ngaiin 1988 January thla-a inthawkin RPC ah rawng a bawl a tran nawka, 1993 January in RPC- in an pension tira. Muoldam a bawk a um nawka. Kohran mamawna leiin 1998 March 1-a inthawkin a service sukhring nawk ana, lawmman in thla tin cheng 600 pek a nih. Chu kum chun N.C.Hills ah khuo 5 ah RPC kohran andina.
Rawngbawlna la thaw thei peia hriet ani lei le kohranhai ditsakna leiin 1999 March 1 a inthawk 2000 March chen kha a service sukhring nawk a niha.1999 May 22 chun Diphua an umlai a nau nuhmeihai laia naupang tak Ramsiempui chun a nunghak thratlai takin chatuon ram a lo inlawi sana, ama hi a nauhai laia thi hmastak anih. Adang po chu nuhmei pasal neiin hi thu ziek chen ahin chu an la dam seng.
Kum 2008 May 6 chun a nuhmei pahnina khawm chun Diphu-a an umlai bawk chun chung tieng a lo inlawi san nawk tah a. Nuhmei pahni lu le nau pakhat lu a sun tah anih. Kum 2008 July thla a inthawk 2016 January chen khan a naupa Lalrosem kawl ah Hmarkhawlien ah a zu uma, Kum 2014 July thla khan a naupa Rev. V.Ramchuoilo in an rawngbawlna le Delhi khawpui inhmutir dingin a hang thruoia. Rajdhani Trainah an chuonga, fak ding an hung pek deu zing chu inhawi a ti khawp ela “Mi hausa kaisana inthawk ang el ei niha” a ti’n Rajdhani-a chuong inhawi a ti zie chu a comment. Delhi a chun December thlabul chen a uma, hi sung hin a lekha zieksa MANMASI – HMAR TOBUL THUSIM chu an sut (published) pek hmana, A lekha bu ziek pakhat Delhi- a sut (published) a hang um ve chu a lawm hle. Kum 2016 a inthawk khan Diphu abawk hung nawkin vawisun ni chen hin Diphu-a a nauhai: Zarzolien le Immanuel hai kawlah a um sawng tah anih.
1999 KUM CHENA A RAWNGBAWLNA BELKHAWM:
1. Ringthar lak zat 325
2. Biekin hawng zat 17
3. Bapstisma inchangtir zat 657
4. Upa Ordained zat 25
5. Inneitir zat 254
A NAU HAI HMING AN PIENGNA HMUN PIENG NI:
1. Upa B.B.Trainingthang, Kanaan, Burma - 27th Mar.1955
2. Rev. V Ramchuoilo, Hmartlangmawi, N.C.Hills - 13th Jan. 1958
3. S.Zairemkung Saron, N.C.Hills - 1st Nov.1962
4. (late) L Zarzolien, Hmartlangmawi, N.C.Hills - 9th Sep.1965
5. Vanramropui, Hmartlangmawi, N.C.Hills--- 10th May.1968
6. T Gospelthang, Phaiphak, N.C.Hills - 7th Jul. 1970
7. Rebek Pawlremkim, Phaiphak, N.C.Hills - 24th Aug.1972
8. Ramsiempui, Phaiphak, N.C.Hills - 6th Jun. 1974
9. Lalrosem Khatdum, Meghalaya - 5th Mar. 1977
10. Immanuel, Muolsei, Meghalaya - 26th Apr.1979
A DAMSUNGA A PAWIMAW NA/THRANG VE NA HAI:
1. HSA intranna, 1939 ah Debate Leader
2. Hmar Literature Society intranna 1943-a Committee Member
3. Japan ral meeting Muolvum ah 1945
4. Mizo Union Area Commander, 1946
5. Manipur Hmar laia Naupang Sunday School bul trantu 1946
6. Hmar Bible Translation Committee hmasatak 1948
7. Burma a ICI indintu 1955
8. N.C.Hills a ICI indintu lai thrang 1958
9. Tonic Solfa Examination Board indintu laia a thrang 1958
10. Meghalaya ICI indinna 1976
11. Karbi-Anglong ICI indinna 1977 (Klemenlong, Sakechep lai)
A LEKHABU ZIEK HAI SUT KUM A LEKHABU ZIEKHAI SUT KUM:
1. Naupang Sunday School enkawl dan 1947
2. Hmar Hla phuoktuhai 1989
3. Hmar Hla Solfa-a siem 1948
4. Bible Ram Chanchin 1990
5. Hmar Arasi Block 1952
6. Hmar Pholeng 1993
7. NPSS Junior Bu I na 1962
8. Zawlneihai Chanchin 1994
9. NPSS Primary Bu I na 1963
10. Hmar |obul Zuonginzirna 1995
11. NPSS Intermediate Bu I na 1963
12. Bible Perzep 2007
13. PSS Nursery Bu I na 1964
14. Thuhrilna Ki 2008
15. NPSS Beginner Bu IIna 1964
16. Thlarau Indona 2011
17. Tonic Solfa Inchukna 1965
18. Bible Sierkawp 2012
19. Thruoitu nina 1985
20. Manmasi Hmar|obul Thusim 2014
(A lekha zieksa la publish lo Thudik le Thutak ti ala um)
A HLA PHUOK HAI:
1. Zion ngaina Ind. 321
2. Ka kuomah hung rawh Ind. 322
3. Trawngtaina Ind 327
4. Van mi han an hung thre - Thalai hlabu.
Hmar hnam rohlu le Kohran ban lientak pakhatin muol amilo liemsanta hi eiin pam takzet a nih. Pathienin a i maksan a sunglekuo, tu le te a nauhai thlamuongin umpui zing sien ti hi, ei tawngtaina a nih.
- Robert Pearson Varte
No comments:
Thanks for your comment.