RAWLLAI KA DI

Ziaktu: Tluangpuia Hilthang,

www.tleirawl.in

Ka subject har tih ber Hindi ah chuan passed mak chiah chiah hmu in, Middle Sikul chu kan chhuah san ve ta a. Kan veng atang a High Sikul hnai ber, Pu Sena Sikul kan tih ah chuan ka lut ve ta a. Middle Sikul kal lai ang ngawt kha a ni tawh lo a, Necktie nen kan in suih ve thlap tawh a. Nau zawk Middle Sikul kal te nen kan han kal rual a, ka necktie chu a tawi lutuk a nih hi kan han ti a. Mahni tawk ah nuam kha kan ti ve hle thin.

Hreawm ti lutuk lo in pawl riat chu kan han zo ve mai a. Pawl kua kan han zir chho chu kan in ti senior ve ta hret a. Pawl riat nih lai ang em em chuan kan zakzum tawh lo a. Class hmeichhia keu deuh te bul ah erawh, ka la lai chhe thei viau tho a. Kawngka bul hnaih a an lo thut chang kha chuan zung tur a, han chhuah te kha ka huphurh hle thin. Kan class hmeichhia lam melh tha ngam lo viau mah ila,  pawl riat room ah erawh ka lut phei ve fo a. Kan veng mi pakhat hi a awm ve a, Break lai leh hun awl ah chuan ka leng lut ve fo thin.


Tumkhat chawhnu tan hma deuh hian, pawl riat room ah chuan ka va tlan lut a. Ka thianpa bul ah thu a kan hawi chhuak chu, hmeichhe thutna tlar hmasa ber kan va en phei a. Ka thil hmuh chuan min barakhaih nge ni, chulam hawi chuan ka mit chu a bet nghal thlawp mai a. Ni dang a ka la hmuh ngai reng reng loh, hmeichhe pakhat hi ka va hmu ta thut mai a. Nu lian lo tak ni in a ngo ver mai thung a. A mit meng erawh chu a zim deuh san thung a. Min hmu chiang chuang lo ang tih vang a, han melh vung vung erawh ka ngam der lo. Chu chu Jenny ka hmuh hmasak na ber, ka thinlung ah a lo luh tan na a ni.

Jenny i hi a pa hnathawh avang in Kolasib ah an lo awm thar ve chauh a. He mi ni hi kan Sikul ah, a luh tan ni a lo ni awm a. Veng tawp atang a kan veng ah daih, sikul a rawn kal chu a peih ka ti hle mai a. Rawn kal lo se chuan ka in hre dawn lo kha a ni tho si. Kan class a mi pakhat an veng lam mi nen hian an rawn kal rual thin a. A rawn kalpui thin ber chu ka hmeichhe thian ve deuh ber a la ni zui a. Chu vang erawh chuan ka hnaih tam phah ngam chuang lo a. Thiannu ve te kawm ber chu break lai te pawn kan thu ho ta fo a. Kan pahnih tak phei chu kan in be ngai miah lo. Kan thu tlang ve hrim hrim kha a ni mai a.

Chutia lo thu tlang ta ziah chu, in dem hun lai kha a la ni a. Ka thian thenkhat te chuan hmeichhe bul a ka laih nasat theih zia hria khan, min dem dun ta vak vak mai a. A ruk a lo star teh reng nen, ka hnaih ngam ta mang lo a. Tlai Sikul ban a a thiannu nen,  kan Sikul step a an chhuk tur hi, a ruk in ka thlir liam ngam ta tawk mai a. Lungleng em em mai khan, ka haw hnak hnak mai thin. A tuk sikul kal leh vat vat hi ka enghelh ber a ni thin a. Sikul kan han thleng a ka hnaih ngam leh ta chuang lo a. Chutiang hlir chuan kar chu ka tum tla ve thak thin. Zirtawpni tlai te hi lehkha zir nuam ka tih vang ni miah lo in, ka huphurh thei em em a. Zan thum vel chu nun khawhar em em mai khan kan awm ta thin a. Thawhtanni zing ka Sikul kal tur ka hlim thin zia te kha !

Hmel lam chhe vak ta lo chu, Mipa ho chuan break lai te hian an thutpui fo a. Ka va hnaih ngam mang ve tawh si lo a. Ral atang khan rilru na ngawih ngawih leh thik ru teuh khan ka thlir ru fo thin. Saw pa nen sawn an in hnim hnaih deuh nge, saw pa tan sawn an tih pui zawk tihte chu ka ngaihtuah nasa hle thin a. A chang leh in ngaizawng chu an ni lo ang. An inkawm ve satliah a nih dawn saw ti in ka in hnem thul. Amah avang a ka rilru in sual nasat zia te kha a hre ve der awm si lo a. Devotion tur kan han in tlar a, pawlriat hmeichhia kha kan bul chiah ah an han ding a. A zawn a din te kha ka ngam der lo a, ka zawn tak a an rawn din chang te khan, ka chhungril hi a lo hlim ve em em mai thin.

Tumkhat kan room zawn Verandah ah an tui in tur an lokal phei a. Kawngka bul ah hian ka lo din lai tak hi a ni a. Ka zawn an pel fel chiah tih hian, kan thianpa pakhat hian ka hnung ah a rawn nem thut mai a. Ka va bawh phei thlawp mai a, a leng dawr mai leh nghal a. Ka zak lutuk chu ka sen nghal tawn tawn mai a. Khur hlawk hlawk chuan tih palh lutuk kan ti a. Rawn nuih sei pah hian a ho lutuk engmah a nih loh kha an rawn ti a. Kha ta a nui hmel kha tun thleng hian ka mitthla ah a la cham fo thin.

 Hnaih ngam si lo hlat ngam bawk si lo hian ka hun ka hmang hi a ni ber a. A mah avang in Sikul kal a nuam ka tih phah a. Amah avang vek in ka Sikul kal ka na haw fo thin. A hmel ka hmuh in hlimna in ka khat a, a hmel vek ka hmuh avang in a chang chuan thikna in ka khat si. Chu chu Jenny ka hmelhriat dan ber chu a ni a. Chutiang nimahse amah ka lo tawng kha ka in chhir ngai lo. Ka high Sikul run belh ti nuam tu a ni a. Hmangaihna kawng min tem tir in, hmangaihna pe chhuak tur a huaisen har zia ka hriat phah a. A pe ngam ten a par zu tlan tur a an hlawh chhuah hi, a hlu ka tih zual phah thin.

Chutiang ang chuan ka high sikul nun chu ka hmang chho ve a. Jenny-i nen kan in kar chu a hnaih phah chuang lo a, a hlat phah chuang hek lo. Ka thinlung ah erawh Jenny-i chu Jenny-i a ni reng a. Midang Jenny-i an awm thei chuang lo. Nikhat chu Sikul a lokal ta lo tawp mai a, Mi han zawh lah chu ka ngam lo nasa mai a. Nitin mai hian an room lam kawngkhar leh a thutna thin chu a ruk hian ka thli thlai ziah a. Kar khat hnu ah pawh Jenny chuan rawn lan tih ni reng a nei ta lo. Ka tha hi a zawi zo a, a hriat loh in ka lungleng a, ka engtih tha mah hi a tho thlawt si lo. Hmu tawh lo tur a ka khum lai zawl a ka ngaihtuah phei chuan ka mittui te chu a hnam ta hial a.


A tawp a tawp ah chuan kan thianpa, an class a mi chu peh hel ti tih hian ka zawt ta nge nge a. Ka star a ni tih a hriat hlau tak si, a mah ngei pawn ka zawh dan in a zir loh chuan min chhaih palh ang tih ka hlau em em a. Vawin hi Jenny-i ka va han hmu lo ve, a thiannu kha a mah chauh khan a haw sia kan ti a. Kar khat chuang a lokal tawh hlei nem, a pa Aizawl ah an transfer leh thut a. An pem chho ta daih an ti a ni awm e an ti a. Chu thu ka hre zet chu ka nghilh chhup nghal hian ka hria a. Ka in thup thei lo ang tih hlau chuan Home work ka tih loh ka va ti teh ang ka ti thut a. Kan Class chu pawn lam a hmel danglam si lo, chhungril erawh na tak in ka pan ta a.


Ka tlai Sikul bang chu zawi em em mai hian ka haw a. In kan han thleng chu tui kan lo la nei lo zui a. Tuizem a mi khai tum chuan ka chhuak ta nghal a. Tin a dawh in kan nghak ta a. Ka tuidawh chhung pawh chuan Jenny-i hlir ka ngaihtuah a. Kan harh chhuah meuh chuan ka tui dawh chu a lo liam pur pur a. Tui chu off in tuizem bul ah chuan kan thu leh phawt a. Aizawl lam ni a ka rin chhim lam chu kan hawi a. Thing lo lang paw chuk mai chu ka thlir ta a. Ka naupan deuh lai a ka u te hla sak thin. A awm zia pawh ngaihtuah mang lo a kan lo sak liam thin chu kan ngaihtuah chhuak a. A vawikhat nan tih tak zet in Jenny-i ngaihtuah chung chuan love song an tih thin chu kan sa ta vang vang a.

Khawi an tuan maw tiin, zirpui lenrual hlui te
Zah pawh dawn zo lo in, zawt in ka zawng che a.
Saw raltiang vang khua ah, tuan in a leng an ti.
Ka hmangaih enchim loh ka tan vul zel che maw

Tawn leh ka nuam ngei e, rawllai ka D te kha
A cham reng thin thinlai an, thiamna run khat bel a
Dar ang kan lenlaini te kohkir leh theih ni si lo
Hlimte a kan lenlai hun, a va han rei lo tak em
Chhem dam thlifim damten, nemten va leng zel la
Ka di thlan dartui luang nemten lo chhem dam la
Hliah tu van rang chhum aw, muang ten zing cham rih la
Turni sensa hnuai a tuan rel ka D hliah in

Aw thian koh thiam huiva, thlawk in va leng ta la
Ka di run sang bel in ti hian min va hlan la
Nang ngai suihlung lengin, chhin zai a rel thei lo
Hram thiam rimawi tin pawn, an hnem zo lo tiin.