MSU IN GRADUATE TOPPER TE LAWMPUINA HMANG

Pic @ DIPR

tleirawl.in | 10 July 2018 : VAwiin (10 July 2018) Mizo Students Union (MSU) General Headquarters, Aizawl chuan  Vanapa Hall ah Graduate Topper 2018 te lawmpuina hun a hmang a. Hemi rual hian zirna in hrang hrang a (SU Leader) Zirlai hruaitu pass chhuakte lawmpuina  a hlan nghal bawk. 

He hunah hian Pu R. Lalzirliana, Home Minister chu Khuallian niin, Pi Vanlalawmpuii Chawngthu Minister of State chu Khualzahawm a ni.

MSU President RB Lalmalsawma chuan MPSC hnuaia Combine Exam buatsaih thin hi kum tina buatsaih lovin kum nga emaw dan velah buatsaih thin nise Mizo thalaite state pawn a hnathawka kan chhuah  tam zawk theih nan leh Central Service leh All India Service a kan luh tam zawk theih nan  a fuh ber a rinawm thu a sawi a. Sawrkar hnathawk pension rawih nawn thu ah MSU chuan dinna nghet tak a nei a, chuvangin mithiam bik pawh ni si lo rawih nawn mekte hian MSU in a ngenna hun tiam chhunga bang ngei turin kan phut nawn leh a. Mizo Hnam dam nan Mizo ngei nupui pasala innei turin zirlai kalkhawmte a chah nawn leh a, kan Ram dinchhuah nan zirna kawngah tun aia nasa zawka tan la zel turin a fuih bawk.

Khuallian Pu R. Lalzirliana chuan Graduate Topper te lawmpuina MSU-in a buatsaih thei chu lawmawm a ti a. Ram leh Pathian tana thawkzel turin leh a neitu tak tak ni tura thiamna sang tak nei chho zel turin leh Central Service hrang hrang exam te pawh pe chho zel turin a fuih a. Minister chuan thawmhnaw fai piah lamah, thiamna hi incheina diktak chu a ni, a ti a. Ram zahawmna leh ropuina hi thiamna-ah a innghat zawk a ni, tiin a sawi a. Zirna piah lamah eizawnna a awm a, lehkhabu piahlamah eizawnna pawh a awm tih hriat tel a tha a ni, a ti bawk a ni. Lehkha thiamna in a ken tel chu Mizo kan nihna kan hlut leh zual hi a ni, a ti a. Ze mawi nei, lehkhathiam ni zel turin leh nu leh pate chhawmdawl kawngah pawh theihtawp chhuah turin duhsakna a hlan a ni.

Joan Laldinpuii, Lunglei College Khuallianin chawimawina a hlan lai

Khualzahawm Pi Vanlalawmpuii Chawngthu pawhin thusawiin harsatna tam tak hlawhtlinnan kaltlang a ngai a ni, a ti a. Tum sang turin leh mahni sehna mual mualah tan la zel turin a ngen bawk a ni. Zoram dinhmun ngaihtuaha zirmi te’n thahnemngai zir zel turin a fuih a ni. Tun hlawhtlinna hi a bul tanna chauh a ni, tiin a sawi a. hnam him nan Mizo leh Mizo ngei inneih a pawimawh thu sawiin kan Ram kal zelna kawngah Nu leh Pa thuawih a pawimawh zia uar takin a sawi bawk.

Graduate Toppers 24 zingah hian Hrangbana College atangin zirlai 4, Pachhunga University College atangin zirlai 14, Govt. Zirtiri Residential Science College atangin zirlai 2, Govt. Aizawl College atangin zirlai 1 leh Govt. Mamit College atangin zirlai 1 leh Lunglei Govt. College atangin zirlai 1 an tel a ni.

Hemi hun hi College hrang hranga zirlai thahnem tak leh zirlai nu leh pa tellin, Mizoram Upa Pawl te pawhin an tel pui a ni.

- Joan Laldinpuii chanchin i chhiar duh chuan hetah hian hmet rawh
- Mamit atanga Topper R Lalruatfeli chanchin hetah
- Gold Medalsit lalbiakenga , PUC a ami kawmna hetah