SHC SAWRKAR LAILAWK LAKLUH A NI

tleirawl.in | 13 July 2018 : Sinlung Hills Council sawrkar lailawk (interim) chu thla 6 chhung atan vawiin chhun dar 10 khan Aizawl bawrhsap, Dr. A. Muthamma chuan a office chamber ah a rinawmna tiam tirin Sawrkarin a ruat member 2 te nen 14 a la lut.

Lakluh inkhawm hi Pi A. Muthamma chuan kaihruaiin, SHC CEM, EM leh member ten thutiam  an la.


Mizoram Sawrkar leh HPC(D) inbiak laia spokeperson Pu Lalṭhalien chu CEM atan lakluh niin, Pu LT Hmar, Inbiak laia HPC(D) working Chairman chu Chairman atan lakluh a ni a. Pu Lalbiengnung, inbiak laia HPC(D) Army Chief chu Deputy Chairman a tan lakluh a ni.
(CEM hi State Sawrkar angah chuan CM ang an nina, Chairman hi Speaker ang a ni)

EM atan mi pali, Pu Darliensang Ralsun, Pu JC Zairemkunga, Pu Lalthlamuana Hmar leh Nl. Melody Lalchhuangzeli te lakluh an ni a.


Council member atan Pu Rohringa Hmar, Py Lalrinsanga Ralte, Pu Benjamin, Pu B. Lalṭhachhunga, Pu Lalremruata te bakah sawrkar ruat pu Lalmalsawma Darngawn leh Pu Lalrammuanpuia te lakluh an ni bawk.

Lakluh zawha thu sawitu, Pu Lalṭhalien, CEM Sinlung Hills Council chuan council memberte leh duhsaktute chibai bukin, ram leh hnam hmasawnna atana remna a awm thei chu lawmawm a tih thu a sawi. SHC mipuite tana hmasawnna leh ṭhatna thlentu a nih ngei theihna tura thawhpuiah mipui a sawm nghal a ni.

Pi A. Muthamma pawhin thu sawiin, remna atana HPC(D) te an inphahnuai thei chu lawmawm a tih thu a sawi bawk.