SIALINUCHHU THAWNTHU

-  C-a Chhakchhuak

       Kum 300 vel liamtaah khan Mizo khaw pakhatah hian naupang danglam tak mai hi a awm a. Hmeichhia a ni a, sam sei sain a piang a ni. Mizo nu fahrin a ni lo anga tih khawpa nalhin a vun a nung a, a sen no châk a ni ber mai. Chu'ng zawng zawng aia sawi hlawh leh en hlawh chu a Serh a ni! Pathian nu 'Thil' a ni anga tih hiala mawi leh nalh a ni a, a sen rah țhiah hi a ni ber e. Naupiang entute zawng zawng pawh chuan a bianga piai ta lo chuan a serh chu han piai sak vek mai an tum zawk hial a. A hmingah Senhlari an sa ta a ni.
                 Ni leh thla, kum thlengin a liam a, chu nausen duhawm tak chu a lo nula ve ta reng mai. Nula fel leh taima tak mai a ni a, an khaw tlangval zawng zawngin láwm atan an duh a, chuh pawh an inchuh nasa narawh e. Nula tuaitirté a ni a, an khaw tlangval a ni aia kum 7/8 vela upaho chu a pianhlima a serh mawizia hmutute deuh vek an la ni a; a nulat hnuah a thil chu a danglam em tih mawlh mai chu an hriat chak leh an hmuh chak, an khaw Zawlbuk titipui ber a ni zan tin mai a ni.
                Nula ta nafam chuan tlangval hmel duh zawng te a lo nei ve a; an khaw tlangval, neihnun lama mi naran mai huaisen leh tlawmngaih lamah erawh a khawpum chhuan leh hmatheh tling phak nen chuan an indi ve ta a.

                   Rei pawh indi hman loin an innei mai a. Nu leh pa țha ta na chuan fanu duhawm zet mai an hring a; a hmingah Siali an sa nghe nghe a ni. Siali pawh chu a nu nulat lai ang maia nula fel leh taima a ni reuh a.

               

   Țum khat chu an hunawlah Senhlari leh a fanu Siali chuan khua ațanga hla takah thing phurin an chhuak a. Ral leh sa hlauhawm reh vang lai a nih vang chauha kal hla ngam leh mipa hruai lo an ni. Mahse an rin ang lo deuhin thil a thleng ta tlat mai le; duh aiin an lo tla hla hret a ni. Pawih pasalțha ram kal pakhat an tawk ta hlauh mai le, chu pawih pasalțha mit lah chu an la nufa nasa si a. An han inbei ta a, hmeichhe tha leh mipa tha chu inthlau tak a ni. Senhlari chu rei pawh țang thei loin a tlawm titih ta mai reng a, a fanu Siali hnenah chuan "Siali, va tlan la i pa va kau rawh" a ti ta vak vak a.
         
   Chu pawihpa chuan Senhlari serh a han hmu chu a phu zawk mai a, a mawi tilutuk chuan a khawihchhiatsak a hlau a, engmah tita lo chuan an khaw lamah a hawsan ta ringawt a. Pawihpa chuan Senhlari chu a hming han zawh nachang kha a lo hre miah lo a, a sual laia a fanu a kohna Siali tih chauh chu a hria a ni.
                An khuaah chuan Senhlari serh mawizia chu hahipin a han sawi a; an khua vela theirah an neih mawi ber mai, tun hnua Sialinuchhu kan tih tak hi a hriat chhun Siali hming hawhin Sialinuchhu tiin a han phuah ta a ni. He lama serh kan tih hi khi lamah chuan Chhu an lo tingei niin a lang.
             Hun a kal zel a, pawihho an lo thlangtla zel a, chu hming pawh chu an pu thla ta zel a, a Mizoram púm huapin kan ti Sialinuchhu ta sup sup mai a nih hi..


     Zahmawh ah la lovin mizo thil hming a nih miau avangin alo chhuah dan te hi hre lo kan lo awm takin!