Chapter - 1
Ziektu: Fred Hmarramthar Sanate
www.tleirawl.in
Kum 1999 khan kanu chun amilo hringa,ka pa hi sipai ani leiin kanu le cho kan um hlak.Kapa hi Kapu le kapi hai nau neisun ana,siekhawm kapi le ka nu hi anin remnaw leiin indang a kanu le kan cheng a,Ka pa hi inpui hluotu ding ani si a ienglei a a hluo naw am ana? ti hi ei hrietnuom seng ring a um.
Kum 2003 khan kum li kalo tling ve der tah a,naupang fel tak lawmman kan sunday school a hai ka dawng hlak,ka hmel hi a țha beknaw a chu kanchawm lal a,mi lawm ka hlaw zek hlak.Ka bieng inbawr hlap hi ami hmetpeknaw mangsam an um in ka ringnaw a chang lem chu ka țap pha hlak.Kum 2004 khan inchukna Rûn ka bel ve țan a,ka hmel le in awmlo in lekha kathiem thei fuot a,hotu hai ditsak khawm ka hlaw hlak.Ka țapder lei hin kan hotu hai chun anmi lawma nitin vawikhat bek anmi suk țap hlak.Nancy hi chu aw awh,kalunginsiet ani a Pa hlakin dit talo hung khawm a hung suok nuom ngai nawh,a Pa hin chu a ngaisaknaw si anti ringawt khawm ka țap pui el hlak.Kum 2005 khan kum 6 lai kalo tling ve ta a,mi mi hmusitna hai khawm ka hriet ve țan tah,ka nu le indanga um ni inlang khawm kapu hai bula hin ka um tam lem a,tar bula um nana na chu țawng upa eilo hriet rawn deu a nih danga rawh,ka zuk ben kei che,bawngnenetui kha chawm rawh ti vel hi kapu hai mi biekna hai ana,ka hming khawmin anmi ko phal nawh, ‘Mêng’ tiin anmi ko hlak.
Ka hung upa ve deu deu a thil chinchang ka hung hriethiem ve deu deu a,2006 khan kum 7 ka hung tling ve tah.Ka ruol hai țawngbau mawilo tak tak kahung hriet țan ta a,kalungril ana thei khawpel,ka pa hlak kumkhat a vawikhat dam a hung thei țawk hlaka,thlahni dam a uma chuongchun ami maksan nawk el hlak.Kum 10 ka hung tlinga kalungril khawm a hung puitling ve țan tah,nitin kanu hin inleng anei hlaka,a inleng pa hlak chu la thleirawl deu kum 18 vel hi ana,zu rim alan nam ham hlak,ka hmupeinaw thei khawpel a sienkhawm naupang kala ni leiin ieng thawthei kala ni nawh.Zan sawt deu deu a hung leng hlak a,kei chu kanu hin bawi zal taraw ami ti a puon am pha bek dap a,chuongchun amin zal tir hlak,amiruok chu kanu hung zal hmakhat chu kalo in ngai biek nawh.Kum 5-6 kani la khan chu thil iengkhawm kalo hriettiem ngai nawh a,tu ruok hin chu kum sawm lai kalo ni ve ta leiin thil hrietthei tawk ka ni ve tah,Kan school a ka ruol hai țawngbau chun kalungril a sukna thei khawpel a,hmun fal deu a ka țap kieng kieng hlak.Chuonga zantin kanu’n inleng anei hlak chu ana katih.
Zan tin hin inhma deu deu in amin zal tir hlaka,kei hlak chu ka nu ka thlakhla leiin in vat harsa kati hlaka,in tehlem kan sier el hlak,zantin a anthaw dan pangai ang chun ka in le in naw anmi hung enthla hlaka,Moia chun a in tam? tiin kanu chu rawl damzai in andawn hlak,chuongchun kanu le Moia chu ka in hnungin nupa nun chu an hmang hlaka,zankhat chu ru a suor hmar hmar leiin kalo in nghala,dar 11:45 vel an ta ka țhanghar phat a ka zun suok taluo chu ka tho phat a,tuola inzun hlak kani leiin ka zalna pindan a inthawkin inhmaw takin ka tlandawk a,kan common rooma khuma chun ka nu le Moia chu anlo inbaw châwt châwt a,ka tlan lai chu ka ngirtluon zat a ka nu hai thil thaw chu ka en kar a,anmi zuk hmu chu puon anin lukhup vat a,kei chun mak kati taluo hran chuong nawh,an ni in anmi hriet ngainaw a chu keiin zantin a ka hriet hlak ani leiin inzun ding chun tuola ka suok a,in ka zuk luot nawk chun anlo in hak hman vawnga,an hmel ruok chu a danglam khawpel.
Ka nu chun ami hmu ngam ta nawh,Moia khawm chu in ka zuk luot phing leh a suok dei a,kanu chu anthin in anthin ta ela,ka hmel hmu ngamlo chun tukver tieng a dâka,Nu….. tiin țap pum le rawl inlap dar chun ka hang ko a chu zet chun ka nu chu a țap zawi zawi a,bawi inu hi mi suol tak ka nih,inu ni tlak khawm kani ta nawh zinga inthawk chu i pu hai bula um ta raw aw bawi,keikhawm ka in tieng kier nawk el tang ka tih,bawi lunginsiet takin tu bula khawm hril naw raw aw tiin kanu chun bawkkhupin chibai ami buok a,ka nu hnunga inthawk chun vantirko ngier hi ka hmu a,ama chun “sim rawh sim mawl rawh,ita dingin kawt lientak alan hawng tukhawm mani suolna hrie a ka kuomtieng hung pan tu ta phawt chu ka hnar ngai nawh ka ngaidam hlak,Nancy inu hin ka dan ala bawsiet rawp a ni chun a hnuoi taksa hi pila kier nawk dingin phuomhmangin um a tih,a thlarau in chatuon hrem hmun tieng pan bawk a tih” tiin a rawlri chu ahung insuo a meikhuo angin van tieng a bo nawk riei riei a,
A rawlri chu kana ah a cham zinga ka zalna khuma inthawkin ka țhanghar phat a,ka mang mak tak el chun amisuk thlaphang ngei el,kalung chu inphu dawp dawp in kanthuok hlawp hlawp a ka thlantui in ami buok vel ela,ka room chu meivar a umnaw leiin kanu chu ka zuk dap a,a umnaw phing chun ka pindana inthawk chun inhmaw takin ka suok vat a,kazuk hmu hmasa tak chun kalung a khei zawk a,ka manga am ala ni ding kan hai map a kamit dam kala nuoi vela,anni hlak chun anmilo hmu vat sinaw,Moia chun amihung hmu a,thuom inbel reng reng an nei nawh.Nancy ti le inruolin puon an lukhup vat a amak kati khawpel ka manga ka hmudan char ani leiin ka mang am ala ni ding tiin kava them ngei a nih.
In lukhup pum chun an thuom hai chu anin bel sawk sawk a,Moia chu a suok ta dei a kanu chu inthin pum le ka hmel hmu ngamlo chun tukver tieng a ngha tlat a,kei ruok chu kalungril na ngawi ngawi in ka țap a,rawl inlap dar pum chun Nu Pathienin a ngaidam ta che i suolzie in hriet a ama i tlan hmang san rawp a ni chun i hringna alak ding a nih,i thlarau chun chatuon hremhmun tieng pan atih.Ka ti zo chun kanu chun amihung kuo chawt a,bawi mi ngaidam mawl rawh,tia țap dur dur pum chun ami kuo a,kanu chun bawi tuta i thil hril kha iengtinam i hriet a,tunam hril dingin a ti che tiin amindawn a,kei chun Nu ienglei a i țap am ieng am hril kanei le? kati a,chuonga ka ti phing chun ka nu chun bawkkhup in chibai ami buk a, tuhin chu ka suolzie kan hriet ta ie,ngaidamtlalo ngaidam kalo ni tah tiin a țap tlawk tlawk a,ka manga ka thil hmu chu a tak ngeiin a tlunga ami ruok chu kanu bula thil iengkhawm ka hril awm ka hriet si nawh,kanu chun ka thil hril hai chu ami hrila,nu kha chu ka manga ka thil hmu annawm i bula iengkhawm hril kanei nawh kati a
Kanu chun a hrietthiem ngei nienga tih Lalpa rawl ngei a ni chu tiin suol simin maicham a buotsai a,an sil fai dawk a puon var suot a inbel in a țawngțai a,a țawngțai zo chun ka mit ka zuk menga a bula var em em hi ka hmu a,ka ți khawpel a kanu chu ka zuk khiekhmu a kanu ruok chun a hmu ve si nawh,Chu var em em chun a kut chu ka nu lu chunga an nghat a “i suol na hai ngaidam a ni tah” ti char hi a hrila suom angel hin a bo nawk el ta a,ka zuk țhang har chun zing dar 8 lai alo inri tah,ka manga ka thil hmu chu amak kati khawpel a,ka manga mang sawng kanei tak kha amak kati zuol a nih,kanu chu ka zuk kokhek a choka le vel hai ka zawnga ka hmu zo nawh tuol ka suok a kan huon mawnga chun hlo a lo thlo rat rat a.
sunzawm ding >>>
No comments:
Thanks for your comment.