SIPAI NUHMEI 3

Chapter - 3

MANGA HMULAWKNA A TAKA TLUNG

Ziektu: Fred Hmarramthar Sanate

Ka pi chun ka pa chu a zuk telephone a,chanchin vel chu uor tawk tak in a zuk hril a ka pa khawm chun kan hotu hai zuk hril kata an remti chun hung ka ti ata,sawt raklo hnunga chun telephone chu a hung inri rang ranga ka pa chun a hung theinaw ding thu ka pi bula chun a zuk hril ni awm ani,ka pi chun


aw….ka nuhmei a thi zuk ti tawp la ninawniem a hang ti a,ka pi hi a lung a sen ngang a nih,ka pienga inthawk ka pi lungsen ka vawikhat hmuna a ni bawk ți a um thâr thâr khawpel sakeite angel a nih.Ka pu hlak chu to ruou el hi ana min thil an hril chu ni e ti thei vawng hlak i ana,ka pi lungsen chun nang hlak hi thil hang hrilpui thei khawm nilo che iengkim hi aw ni e i ti liem vawnga .in innu hi țhe rawh ti hai sienla che khawm aw ni e ti tho i tih chulai tak chun ka pu chun țhe love ah a lo ti duot a,ka pi khawm chu an nui tawp a,ka pu chun kum hi zat hi eilo innei ta a hieng lawm lawma i lungsen hi kala hmu ngai nawh,inkeidei hram hram rawh iengkim chunga thuneitu chun a hun taka Ro a hung rel ding annawm ata.
Ka pu le ka pi hai insel chu kana kham ema,ka lu na in sukzuol,to ta ro ka lu na ni kati a an to țâwt a,damdawi anmi pek a chuongchun ka damdawi a thawk chun ka imu suok a ka in dier dier a,in tak tak silo hin ka uma,ka bula ka pi hai in vak vel chu ka hmu zinga,Nuhmei pakhat beidawng hmel tak el hi ka hmu a,ama nu chu kalo biek a ami dawn chuong si nawh,ka hmuna in chu mipui tam deu umkhawmna in hi ana,a ung suokdawkna pindan a chun nuhmei zakifuol a var hak hi a hung suok ve a,ienglei a khanga lungngai hmel taka hung suok am ani ding aw tiin a hung suokna pindan chu ka pan a,Pasal pakhat Zakufuol vâr em em hatu hi alo uma,ama bula chun Pu kha nu kha iengtileia lungngai hmel deu a hung suok am ana? kalo ti a,ama pa chun e bawi iengdinga hilai hmuna hung am ina,Damdawiin ani hi,suok vat raw damnaw anhung nawk ding anta alo ti a,Pu ka thil indawn che kha i hriet annaw? ka hang ti nawka,ama pa chun mak ti hmel deu hin ami ena amihung pan hnai a,bawi nang i hriet chi ani naw ati a,ana chu ami hril ta tho a,nau a pai a,a lungngai ani kha,mi chun nau an pai le an hlim a anlawm hlaka,ama ruok kha chu lungngai in anlawi ani kha,a nau pai lai kha sukthlak a nuomthu khawm ami hrila amoruok chu thla thum a lo tling vang ta leiin an thei tanaw thu ka hril phing le lungngai hmel takin ami suoksan anta kha alo ti a
Ka pi chun amihung nawthar a,Mêng iem i chang iva țawng nasa lawm lawm de nau pai dam iti a,i mang a si ni maw? ata, iengthil am i mangin i hmu le ati a mindawn a,kei chun ka thil hmu chu kimchang deu in ka hril vawnga,ka pi chun mak a ti khawpel a,i thilhmu hin umzie inthuok tak anei ngei anih,ata.Ka nu chu a thi ta mani ti thei khawpin a hmel hmu ding a vang em em a,Thla tel a hung invawi meu chun thup ruol lovin ka nu chu a phieng a hung inbêl ta ela,Laibung in ko khawm in ka nu chungthu chu anrel tah a,chuongchun ka nu chu thiemnaw inchangtir in dan anga ro rel ani tak leiin mi dukdaklo nawchizawr ang alo ni ta a,ka pu chun laibung hai chunga za ngai in a sakhming chu muolpho taka siemlo hram tum sienkhawm laibung khel tiengah mipui anlo hung inrawl ta leiin,Moia le ka nu chu innei lui tir in khawsuonga inthawk an hnawtdawk ta a.
Ka pa bula chanchin chu ka pi le ka pun an hril ngam naw a,sienkhawm ka pu chun hril lo a umsawng tawpel chu thil țha ni a a hrietnaw leiin ka pa chu an zuk hril ta ngei a,ka pa chun ka mangin Nancy khan amilo hril vawng ta annawm alo ti a,thil mak chu anih.Thlakhat khawm a liemțha hma’n kan pansak hai arpui chu a khuong vet a,ka pi hai in anlo ti hlaka,arpui a khuongchun uire an um hlak.Vawikhat cho khawm nilo kan pansak hai arpui chu a khuong vet a,kan Vawkpuinu chu anțhung kuok hlaka,kan vawkpuinu chu kan chawr tieng a ngha tlat hlak.Ka pi chun tutak am aw ani ding? a hang ti hlaka,ka pi’n tutak aw ani ding ati vet hlak chu mak ka ti hlak.Ka nu muolpho hma hin kan Ar chal antui a,a tui khawm chu lien bek lo ar la tui neka chienlem met hi ana,kan ar antui zat hin a tui hi ka hang en vet hlaka tuok khat chu kan archal hi kan arpuinu tui bawma alo bawk kuok a,a țum hnung chun ka hang en nghala a tui chu a chien biek leiin amak ka ti ema ka lak a kanu bula khawm kan entir nghe nghe,ka nu chun Moia bula en rawh archal tui ani hi ata a pek a,Moia chun a dawn dei a.
November thla tawp a hung invawi meu chun khuo a hung inthieng țana boruok khawm thlasik rim an nam vat vat tah.Kan chawr tieng hin sipai nuhmei pakhat a umve a,a hmelțha deu el ana,a pasal chu hmelsie deu el a nih.Ama hi kan venga chu a hmelțha pawla an hril lar a nih,a pasal nei hma hin ka pute Thanga le anin ngaizawng hlaka,ka hriet china kum 6 lai anin ngaizawnga,ka pute Thanga chu mifel tak el a nih,a pieng a țha a,a hmel khawm alo in ang vuok leiin nunghak hai in an dit thei ta luo.Ka hang hril nuom tak chu kan chawrnu changchin tlawmte,ama hi mifel mi nguoi le nunghak fel a khawthlangin an thlangdawk ngat hlak a nih.Thanga le kum 6 lai anin zui hnung hin sipai țhangthar pakhat in a dit a,a lengchil ta ngat ngat ela,a nu le pa hai chun sipai pa chu anlo ditpui khawpel a,anin nei hma reng reng khawm anu hai chu motorte dam anchawkpek a,chuongchun sipai pa chun anu le pa chu pawisa sumin anhmin der ta a,nunghak hmelțha piengnal le zaidam chu sorkar uichal Kima chun nuhmei in alo nei ta a,Ruoti hin ditnaw hle sienkhawm a nu le pan Kima bula tangka sumin anlo zawr ta a nih.
Ka pa hin sipai alo ni kher kher hi an sier ngawi ngawi a,ka pu hai bula hin Sorkarpa uichal kani ringawt a ti hlak.Mi chun minhnar hlak an tih,sienkhawm sipai hi inhawk chi a ni nawh,sipai ni nuom ro ro chun aithiengbil mâwn sang chuong khawm siem lem inla inhawi lem a tih,a ti hlaka,chu chu ka hriet kar a ka pa hi ka lunginsiet thei khawpel a nih,tu lek lem hin chu ka nu a la hang chan sa nawk ta nghal,tu hin chu ka pa le hlim takin kan umthei ta ding ana ka hlim a nih.Ka pa pension ta ding ani leiin ka pu hai khawma an thlakhla a,ka pa hin arasi pathum lai a bel an tah.Chuonga ka pa chanchin ngawt kan ngaituo lai chun zan mang mak tak el kanei nawk ta a,a mak dangdai khawpel,tuta țum hin chu ka mangin kan vawkpui ințhung pumin alo khuong a,kan chawrtieng a ngha tlat a,ka pi chun imi sukzak taluo khuong tanaw rawh alo ti a,kapu hnâng metna a dil chun a lo hlap a,ka pi bula chun pi hlap ta naw rawh lunginsiet a um taluo kalo ti a,zing dar4:28 vel ani tah,ka pi bawk chun amihung nawthar rek a,Mêng tumi i kunginsiet chu? ami ti a,ei vawkpui kati pek a,mang inei rek ani maw ati a,ka mang hai chu ka hrila,ka pi chun a hun a tlung ding anta chu ati ringawt a,
A ti zo sawt raklo hnunga chun kan chawr tieng mi anin ri nawk nawk nghala,ka pi chun iengthil am anta le maw? tiin a zuk suok tuma,ka pu chun Thiengi keiin ka en thliethlai lem kati ie alan hma si a khan Mêngnu le lo zal ro a ti a,a suok nghala a hung kir vat ta naw lei chun ka pi khawm chu a suok ve nghala,ka pu le chun a ruolin anhung inlawi a,ka pu chun ava mak thei de aw Thanga hi chu,min nuhmeia an nei ta chun a tawk a thieng ta naw ansawnnawm ie,a ti riei a,ka pi chun kum 6 meu anin zui a,zuk theinghil bur khawm chu thil awlai nienga tiem,a pakhatnu khawmin a hmangai ema,an pahni hin kanthiemnaw chuong hran naw ve ve,Ruoti nu nih thiemnaw kan changtir ati a,ka pu chun a khei a naunu ana ama thu thu annawm a pasal dinga a ditpui chu anuom tak innei tir el nawni,a ta,ka pi chun chuonga i ngai lei a i naupan a nuhmei a chan pha anta hi ati anin sel ta rek a,chuonga ka pu hai inselna țawngkama inthawk chun ka pute Thanga le Ruoti chu an uire ani ti ka zuk hrietthei,kan vawk anțhung hlaka kan chawrtieng a ngha phat le,kan pansak hai arpui a khuong phata ka pi’n tuom aw ani ding? a ti vet hlak kha nakawr cho nilovin a tak ngei in ka hung hriet thei tah.