(Based on a true story)
Ziaktu: Maria L Puii
Tunlai social media khawvelah hian ram dang chauh pawh nilovin Zoram khuavelah pawh rilru leh taksaa nupui pasal uire sanna hi a pung nasa hle, a pung satliah mai pawh nilovin chappui kang maiin khawvel hi a tuam hlup hlup mai a ni. He Setana hmanraw tha ber pawl – uirena hi hi khawi hnam mah hian a pawm zam lo. Pathian pawh hian sualah rau rau hian hmeichhiat mipat sualna hi a huat ber a ni hial mai awm e.
Chhiartute tana mahni invenna atan leh hriatna ti zau hrim hrim atan he short story hi ka hlan e. Hming leh a chhehvel hi chu a mihringate nihna thupna’n phuahchawp a ni a. A thu kaldan erawh hi chu thudik tak ani e.
Tawi kimchang taka post a that avangin a behbawm lamah kan kal tam lovang a, a point tak lamah hlir he story hi kan thlur bing dawn a nia.
Jenny chu inbual pahin a zai rat rat a, a pasal leh fate a ngaihtuah a, a pasal nena an chhungkaw din chu duhthusam ang chiaha tha chu nilo (duhthusam chu vanramah a kim chauh ang) mahse a lungawithlak thawkhat a ti hle a.
A pasal hi hna zahawm tak thawklai aniin khawtlangah leh kohhranah pawh mi naran aia challang, mizia hrim hrimah pawh mi nghet, mi rin zawng tak a ni a. A fel a, a fing bawk a. Nupui hmangaih thiam leh duat thiam tak mi a ni. A nupui chhungte pawh a ngaihtuahin a duat thiam a, amah Jenny ai mah mahin a pasal hian a pizawn leh puzawn te hi a ngaina thiam hialin a lang. An fate 2 lah nise an school kalnaah pawh vantlang chunglam, hmeltha leh duhawm, nu leh pa thuawih thei tak an lo ni nen. Jenny tan chuan khawvel hi a lungawithlak thawkhat khawp mai.
Jenny hi chhungkaw pangngai tak atang lo seilian, hmelthaa sawi tling, nu fel leh mi khawngaihna ngah tak a ni a. ngaihzawng kal thuk pui tak nei hran lo, virgin-a pasal nei a ni. A pasal nena an inneih hnu ah pawh hian harsatna lian tham an tawk ngai lova, an inneih hmaa a hna lo chelh ve chu a pasalin bansan mai tur leh In chhung khura an fate lo uap mai chu a tha ber tia a sawi thin erawh chu a zawm lem lova, a chhan pawh a nu in, ‘nupa chu hmalam hun hriat loh a ni a, zan khat thil thua mak chhiat tawh theih a ni a, hetia a hminga hna ilo neih ve hi a tha’ a tih deuh avangin he thu ah kher hi chuan a pasal thu hi a hnial ve ngar ngar thung a ni.
A inbual zova, thla hmasa lawka a pasal duhtakin a leisak android phone changkang chu a han online a, a awmna whatsapp group velah post thar a awm leh awm loh a han en thuak thuak a. Group 3 a neih hnuai chiah ah chuan number ringawt hian message alo thawn ve reng mai a. A thu chu a han chhiar a, ‘Pi Jenny, nang chuan min hre lovang a, in office bul lawkah khan kan office a awm ve a, nitin deuh thaw ka lo hmu thin che a, inthian mai mai ang aw....’ tiin alo inziak a.
Jenny chu a bing deuh chuk chuk a. Chutia a ni mi nupui, pasal fanau nei lai hmelhriat loh lehnghalina rawn biak teh ngawt chu thil pangngai tak a nilo tih a hria a. Thinrimna chang em em pawh hre chuang lovin a delete nghal hmak a. Tihtur dang tihsanin a theihnghilh chho ta mai a.
A pasal leh fate an lo haw a, nidang ang bawkin hlim takin an awm a. Zanah pawh a pasal nen khumah an inkawm a, hlim leh nuam ti takin nupa nihna pawh an hmang a.
A tuk alo ni a, chawhma dar 11 AM ah Jenny chuan an office-a hna a thawh mawlh mawlh laiin a whatsapp alo ri a, a han hawng chu nimina thu rawn thawn tu bawk kha ani ngei ang, a number pawh alo chhinchhiah lova, ‘I tha em?’ tih te mai chauh hi a ni a. A bula a thawhpui a thian Nguri hnenah chuan, ‘U Ngur, he pa hian min rawn whatsapp fo mai. Fo tih lemah niminah a rawn ti tawh a, ka chhang lem lova hei a rawn ti leh tawh’ tiin a phone chu a entir a. Nguri chuan, ‘A nih hi, tunlai social media kan hman nasat chhoh ah hian hetia inbiak chawt chawt leh inngaihzawn chawt chawt hi an uar khawp asin. Hmanni lawk khan kan thianpa pawh a facebook thiannu nen an lo inbe nasa thin nge a nupui nen khan an inthen phah der asin! Hei pawh hi ngaizam mai mai suh....hau hrep la, a reh vang vang mai ang’ a ti a.
Jenny chuan han hauh ngawt chu amah a inthiam lova, ‘ti hian ngawi reng ila a rawn ti fo peih lo tawp ang’ tia ngaihtuah chungin a delete leh tawp a, reiloteah a theihnghilh chho leh ta mai a.
Hemi zan hian dar 10:00 PM velah Jenny inbual hlanin hepa vek hian ‘Mu tawh em?’ tih chauh te hi a rawn thawn leh a. Hemi tum phei hi chuan a pasal khuma lo muzal bulah a phone chu a kalsan avangin a inbual zo chu a pasal chuan, ‘Jenny, notification i nei ania’ tiin alo hrilh satliah a. A phone pawh chu a hawn sak lo hrim hrim.
Mut ve pahin a phone a han en chuan number ngai bawk kha alo ni a. Ngawi rengin a delete a, a pasal chu ava kuah a, reilote an ti ti a, an muhil chhunzawm ta mai a.
Hetiang hian kar 2 chhung zet he pa hian Jenny chu tawite te, pawisawi em em silovin a whatsapp thin a. Kar 2-na chhovah chuan Jenny ning leh mak ti tawh chuan, ‘Min rawn be tawh suh, i hmel hriat pawh ka ni lo. A hrim hrimin mi nupui ka ni a, hetiangin mipa dang ka be fal ngai lo!’ tiin thu a thawn ve a. Mahse, hepa hi a beidawng lo mai pawh nilovin a bei nasa sual sauh a. Hmeltha a tih thu te, inkawm a chak thin zia thu te pawh a rawn sawi chho ta zel a.
Jenny pawh a hmaa a rilru ang mai kha ni tawh lovin, he a mi hriat ngai pawh nilo, beidawng lova rawn be reng tu lakah hian mak tihna leh hriatchian a, kawm chian deuh zawk chak ruk riauna rilru amah pawh a inhriat chian hmain, alo intuh ta reng mai a.
A mipa zawk chuan a ngaihzawn thu leh a hmangaih thu te thlengin a rawn sawi chho ngam ta zel a. Jenny chuan inngaihzawn lam thu sawi chu rem a ti lova, a ngaihzawn ve loh thu leh mi nupui anih thu sawi reng chungin alo be laklawh chho ve reng tawh nen, politeness emaw felna lamah emaw ngaiin a rul tawk chuan a chhang chho ve ta fo mai a ni. Hming leh veng te inhrilh tawnin an hnathawh te thlengin an inhrilh chho ta zel a.
Reiloteah Jenny chuan a pasal hriatpui a hlauh tawh avangin chupa number chu a hming dik pawh ni hauh lovin a saved ta hial a. Mi nupui ni reng sia mipa dang biak fal leh kawm fo chu thildik a nilo tih chu a hre reng a. Mahse, a thinlung chhungrila nulat thar leh chakna ruk chhete lo inup ru leh, a pasal chauh hi amah pawl tu ani a, mipa dang mutpui hi engtin tak ni ang maw tia a rilru chhungril bera alo ngaihtuah zauh thin tawh na chuan he pa lakah hian hlet a hreuh ta a ni ber mai.
A pasal hriat a hlau a, a fate hriat phei chu a ngaih pawh a ngaihtuah chhin ngam lo hrim hrim. Thla 2 alo liam meuh hnu chuan chu pa chuan call hial te pawh a rawn call ta zauh zauh a. Ani Jenny pawh chuan ngaihzawn lam thu sawi lovin, (tin, a ngaih pawh a ngaizawngin a inhre lo hrim hrim a) a be ve chho ta reng a. A chang phei chuan Jenny zawk zawk chuan ava ‘good morning’ hmasain ava be hmasa tu zawk hial alo ni chho ta reng mai ani.
A pasal hriat a hlau dep dep a, tisaa uire nilo mahse thildik leh thil pangngai anih lohna chuan a uai rit angreng hle a. A chang phei chuan a rilru chu a uire ta hial ni te pawhin a inhre titih fo mai. A lehlamah mi ngaihzawn nih leh mi biak chak ngawih ngawih nih chu nuam tihna riau leh chutianga pasalte hriat lohva midang han biak ruk vel chu phurawm ru riauvin a hria a.
Tihtawp vawi tam a duh a, a thianpa hnenah pawh chu inbe tawh lovang tiin vawi engemaw zat a rawt hial a, mahse hetia a tih lai pawh hian a ruk takin a hlimpui a, thil dik ni miah lo tih hre mahse han biak tawh loh vang vang chu a thei lo chho ta reng mai a ni.
A thla thumna turah chuan a mipa zawk chuan, ‘A takin hmel inhmu ve hrim hrim ang. Min duh ve lovin nang mi nupui leh kei tlangval senior hi inngaihzawn a rem lo ka hre vek. Mahse, vawi khat chauh tal aw....chumi khami restaurant-ah chuan vawiin chawhnu dar 1 ah ka lo awm ang, ka treat ang che’ a rawn ti a. Jenny chuan kal a hlau a, a zak bawk a, a chak tho bawk si a. A kal duh loh thu vawi 3 a sawi a, mahse a rawn nawr tut tut sia. Office atang chuan chhuanlam dang siamin a kal ta nge nge a.
Jenny rin aiin alo smart a, tin ‘pa’ a tihchi tak alo ni bawk a. Hlim angreng, ngaihngam chiah silovin darkar khat restaurant-ah chuan an chawl dun a. Inhmu tawh miah lo turin thu an thlung a, whatsapp leh facebook lamah erawh a pawilo chin sawia inbiak chhunzawm zel erawh a tha an ti a.
Amaherawhchu, a turtu a lehlam lehlamah a awm tawh avangin english thu thlum tak tak leh zai leh pangpar vel inchawih taka siam, romantic tak tak video te thlengin an inthawn chho ta a. Hemi thleng pawh hian Jenny chuan ngaihzawng tak takin enin a en lo va, a thu thawnah pawh ama inthiamlohna tur chiang tak engmah a tel ngai lo. Tin,
Jenny office-ah chuan kal thut a ching zauh zauh a, a chang phei chuan office dawr ve hrim hrim ang tein Jenny chu a rawn bia a. Jenny bula lo thu te tan pawh han ngaihthat lohna tur awm silovin lem a rawn chang thiam thin em em mai a. chutak te chu Jenny chuan a lawmin amah ngainatna leh thlakhlelh ruk riauna alo pung chho ta zel lo thei lo a ni.
He mi thla thum (3) chhung hian Jenny pasal chu a awm mai mai bik lo. Mi aa a nilova, zawi muangchanga a nupui khawsak dan leh ze danglam chho hret hret chu a hai lo. Jenny pasalin a nupuia thil danglam inthlakthleng a hmuh te chu heng te hi a ni:-
1. Tun hmaa a phone khawilaiah
pawh kalsan mai mai thin khan a phone chu a hum deuh chawt a. A online ngunin net pack pawh a heh zual a. Zanah an mut hlan pawha an khum hnai lutuk lova a pasala phone nena dah dun thin khan a lukham hnuaia dahin a muthilh pui ta ziah a. Bathroom-ah kenglut ngailo khan a keng lut ta fo a, rei tak tak a inthiar pui a, tum 2/1 a pasalin a bathroom luh reina chhan a zawh chuan game a khelh pah thu leh inthiar a rei duh thu te sawiin a ke pawh a mut vek thin thuin a chhang a. Inthiar paha phone khawih lo tura a pasalin a tih chuan, ‘a nuam ve a’ tiin a chhang mai. A sms, whatsapp conversation leh call log te a delete/clear zing ta em em a.
2. Tunhmaa thawmhnaw pawh inbel ve mai mai thin khan thawmhnaw a lei thar ta fo a. Tin, make up hmang nasa ngai lo thin si khan make-up kit lei tharin uluk takin make-up a inbel ta ziah bawk a. Scent thlengin hmang duh ngai lo khan scent te pawhin a inphuh rimtui ta fo mai!
3. Music ngaina lutuk lo nupa an ni a. Amaherawhchu, hetia Jenny nun inthlak chhovah hian music a ngaithla ta fo va, gospel lam nilovin love song lam, english love song a ngaithla nasa hle a. Zana a mut hmunah pawh earphone vuahin a ngaithla thin ta a. A changin a muthilhsan a, a pasal chuan amah tihharh hlau takin dimtein a dahthat sak ta fo mai.
4. A pasal a be bawrh bawrh ngai ta lova. Zana mut hmunah an titi ngai tawh hek lo. Sex hman dun a pasalin a beisei pawhin chhuanlam ‘ka lu a na, vawiin ka chau, ka pum lam a nuam lo, kan ti zing, ka muhil vat vat duh....’tia chhuanlam siamin a pasal chu a hnar chho ta deuh fo a. Chau, hah, mutchhuak, na nei inti si chuan zanlai pelh thleng thlengin phone a khawih a, a online peih reng si!
5. A fate a duat thin a, tawngkam nem tak hlirin a bia a, a chulin a pawm hliau hliau thin kha a ni a. Tunhnaiah erawh chuan a fate chu hnawk ti ta riau ang maiin nungchang a nei chho a. Tul lo tak takah a vin tuarh tuarh ta fo mai!
6. A haihawt ta riau a, a pasalin a biak mawlh mawlh lai te hian thildang ngaihtuah a nei tih hriat tak hian biak pawh a hrelo fo mai!
7. Inkhawm a thatchhe thar a, chhung inkhawmnaa hun hmang zing ber thin khan a fate leh a pasalte a hnawn ta deuh zel a.
Heng nupui/pasal rinawmlo signs-te hi a lian zual leh langsar zual chauh tarlan a ni a. Hetiang zia a neih chhoh hi a pasal, lehkhathiam, mi inchhiar zau hian a hai hauh lova.
A nupui a hmangaihna a thuk em avangin leh nupui then hrim hrim a duh loh em avangin a hrelo der chho zel a. Tin, chutih bakah engtia tihtur nge tiin a ngaihtuahna a seng nasa a. A tha ber tur erawh hriatthiam har a ti. Tul lova a nupui rilru tihnat a duh hek lo. Uluk theih tawpin a nupui chezia chu thlithlaiin a enthla reng thung a. Engmah han malmal tur em awm silova rinhleh thua han inchapchar ngawt chu a ni theiin a hre bawk silo nen. Private Detective Agency, Aizawla awm ve tawh nia mi sawi a hriat chu zawn chhuah a, rawih ve mai a tum ta hial a ni.
Heti taka a nupui avanga a ngaihtuahna a hman nasat avang hian zan a mu tlem chho ta em em a, a chang chuan a tlaivar hial a. Office lamah te dawhkan bawha mutthluk te hial a ngah chhova, a staff-te’n an kaitho fo ta mai a ni. Chawei tuina a nei tawh lova, engmah a ei thei lo ani ber mai.
A social media ngaihzawng (ngaizawng inti lo mahse a ngaizawng ani ber a) neih atanga thla 6 hial alo vei hnu chuan Jenny-te chhungkua chuan an zia an paih nasa hle tawh a. Tunhmaa chhungkaw hlim tak kha rauhsan In ang maiin alo reh ta thip thiap a. chawei lai tak ngial pawhin an inbe ta mang lo. An fa kum 12 leh kum 8 mi te pawh chuan thil awmzia hre lo mahse engemaw tak an nu leh pa te boruakah chuan diklo a awm tih an hai bik lo.
A pasal ni se, mahni hnaa rinawmna tuipui em em kha a hna ah a kal regular vak lo chho ta a. A kal pawhin hma tak takah te a haw thin a. A cher chho ta viau a. Inkhawm a thatchhe chho a, a mawhphurna chanvo te thlengin ti tha thei lova inngaiin phatna thu ziaha YMA lama a nihna thlenga bansan a tum chho ta zel a ni.
Zan khat chu, zinglam dar 3 PM velah Jenny mutui lai chu chiang tak hian a harh hlawl mai a. A pasal muhil lai chu uluk takin a hmelah a en a, a fate an adjoining room-an mu chu ava en leh a. A inngaihtuah harh ta deuh thut a. A nundan diklo leh rinawm lo avanga a pasal leh a fate nun thlenga a tihchhiat mek dan leh amah ngei pawh inveng seng lo titih leh tisa pawha uire lo chauh ani tawh dan leh tenawm mai anih dan chu mak taka inhrechhuakin a harh deuh huaiin a inhria a.
A nundan pawlawh tak leh rinawmlo tak chu hemi hun thleng hian mahni inthiam chawp chhovin amah mimal chakna leh lerh rukna avangin pasalte pawh zah zo lovin alo a nung chho a. Tisaa uire la ni lo mahse a thinlung erawh chu a uire chiang ani tih a inhria a. Pathian lam lo thlir reng dan tur a ngaihtuah tel bawk a. inthiamlohna leh hrehawm tihnain a zel chuai chuai mai a. Bathroom-ah thawm dimtein ava tawngtai a, Pathian hnenah ngaihdam dilin alo dik tawh lohna siamtha leh turin tih tak zetin a intiam a, a tap hial a ni.
Rilrua tum nei chiang sain phur takin office turin a insiam a, tuk danga a thlah dan mumallo rei tawh tak chu bansanin a pasal chhuak tur pawh (an pa hi an office a hlat avangin a chhuak hmasa ziah thin) thlum taka bye bye-in a biangah a fawh sak zeuh a.
Office a thlen veleh a thianpa chu a call a, ‘I thianpa inluaha kalpui min tum tawhna ah khan vawiin chu i kal ang. Thu pawimawh tak sawidun tur ka nei e’ tiin. A tum dan chuan an va inhmu fal ang a, an nundan chu thildik leh tha nih loh zia sawiin vawi khat mah inbe tawh lo tur leh inhmu tawh lo turin thu a ti tawp ang a. A tul phei chuan Pathian hnenah tawngtainain a thlah hial ang tiin a inngaihtuah a.
Chhun dar 12:30 ah chiah chiah an intiamna hmunah an inhmu a, a thianpa In luahah chuan chahbi alo laksak tawh hmangin an lut a. Thla ruk chhung a mipain alo nghahfak chu a hlawhtling ta nge nge a.
Tumah hmuh leh thawm hriat phak lohnaah an inhmu fal ta ani. Jenny chuan thil awmdan leh a rilru put dan a sawi nghal char char a. A mipa chuan ngawi rengin alo ngaithla a. A tawpah chuan, ‘A tha e. mahse hei leh chen nangmah avangin ka rilru ka sengin ka neih pawh ka ui lova. A tawpna’n kan mudun tur a ni’ a ti ta tlat mai a.
Jenny chu a theih ang tawkin alo inveng vein a chum a, a tlawh chawrh chawrh a, mahse hmeichhe thain hneh ngang hek lo. A thianpa chuan a kuahin a hrawm bawrh bawrh a. A fawp lui a, a awmah a zen lut a.
Jenny chu atir lamah zawng theihtawpin a tang a, mahse amaha ngainatna leh ngaihzawn vena lo intuh ru reng tawh nen, tisa lumin a han nekin a han kuah vela, a hnute leh taksa rem dangah chulin a khawih vel ruai ruai nen, a tisa chakna chu a rin loh tak leh a duhloh ang dan berin alo chhuak ve tlat mai si. A tang na lo tial tial a, a tawpah phei chuan a tihdan leh khawihdan ang anga awm turin a mu zangthal a, a kutin a hmai a hup ta ringawt mai ani.
A thawmhnaw a phelh bawrh bawrh a, tlangval tih lemah pathlawi zei leh thil hre tawh chin alo ni nen, zei tak leh hmanhmawh hauh lovin a khalin a play kual a. an han tih tak tak takah phei chuan Jenny chuan nuam a ti em em mai.
Office-ah pawh let tawh lovin tlai dar 5 thleng an awm dun a, vawi-3 zet an mudun hman. Traffic alo jam nen, in a va thlen meuh chuan dar 6 a pel hial tawh.
Jenny-in in ava thlen chuan a pasal te, ama nu leh pa leh a pasala pa te chu sitting room-ah an lo thu ngawi thap mai a. Jenny chuan boruak pangngai taka han biak a han tum hmasa na a, engkim a danglam vek ani tih an hmelhmaiah chuan a hmuthiam nghal a. Thlak pawh inthlak lovin thutna awlah chuan ngawi rengin ava thu a.
Ama pa (kohhran upa ani nghe nghe) chu a rawn tho chhuak a, Jenny hmaiah chuan na takin a rawn beng thuai mai a. Jenny chu chhutah a tlu tla tawp a, a pasala pa chuan a khawih leh zel tur lo dangin a thutnaah chuan a thut that tir a.
A pasal chuan,
‘Khawinge ding meuhin thu ka han sawi ang e. I nundan leh awmdan ah hian kan ngaih a that lohna a rei tawh a. He chhungkua ngei pawh hian kan tuar hle ani tih nang pawhin i hai der na a i hrethiam reng mai. Ngaihzawng min neih san tih hi ka hriat rukna a rei tawh a, mahse a hring ahrana inmanna a awm loh avangin ka ngawi a.
Thla 6 chhung vel hian uluk theihtawpa ka chhui hnu chein internet lamah leh phone call-in mipa biak ruk thin i nei ani tih hi chu ka hre chiang khawp a. Tum 2/1 phei chu sms leh whatsapp-a in inbiakna i delete nghal theihnghilh ka chhiar a, ka screenshot nghe nghe a. I bialpa chuan a ngam bawrh bawrh hle che ani tih a hriat reng mai a, nangmah lamah erawh chuan chiang taka i ngaihzawn leh duhthu sawina ka hmu lo. Mahse i rilruah a riak tlat a, be lovin i awm theilo ani tih erawh kan chiang em em ani.
Ka dawhtheihna tawpin ka dawh che a. A reh veleh mai beiseina leh nangmah ngei pawhin thildik anih loh zia i hriat reng dawn avangin thil thuk zawk zel thleng lova i tihtawp ka rin em avangin normal thei ang berin ka ngawi chho zel a ni. Mahse, a rei tual tual a, nangmah pawh i boruakah hian a lut thuk tial tial zawk ani tih ka chian takah chuan Detective ka ruai a, thla khata 1,00.000/- zet an inchhiar nghe nghe a.
Anni chuan tunthla tir atang khan he ina i awm loh chhung zawng zawng hi an enthla che a, nakina thubuai a awm palh a evidence neih kim zawkna atan i sim card i hminga in register lo thlengin keima bul tumin an register thlap a, i hriat miah lovin.
Tunah hian i sms thawn te, midang i whatsapp-na zawng zawng leh i phone call voice zawng zawng hi Additional Session Judge phalnain haichhuah theih vek a ni.
Vawiin khan in kal dunnah zui ruk zel in ni a. Pindanah pawh nilo sitting room-a in khawsa lai zawng zawng kha bang awng chhete awm atangin video leh audio-in record vek a ni a. I lo thlen hma lawk khan hei an kutah hian a rawn thleng hman vek tawh.
Keima thiam loh ani ang. I tisa chakna mamawh phuhru chea ka lo inngaih lai hian min lo duh khawp lo em em ani tih i awmdanah a chiang a. Chuvangin kei zawk hi min ngaidam ang che. Nupa erawh kan nih zui a rem tawh lovang. Uire ngaidam chu an nun a tawi pipute’n an lo ti a, tunah pawh hian ka thi thut mai dawn te hian ka inhre hial a ni.
I duh duh hi la la, insiam la, min chhuahsan ang che. Kan fate chu kan inpuiah kan chhoh tir rih a, an lo puitlin hnuah uirenu fa nih an duh dawn loh avangin i kawl chu sawi loh an hmel pawh vawi-1 mah i hmuh leh ka phal dawn lo bawk a.
Hei ka nu leh pa (Jenny nu leh pa) te hian an fa na na chu tuallaia i vahvaih an phal lovang, an haw pui mai ang che. Anni nen hian engkim kan lo sawiin in video te pawh kan lo en thuak thuak vek tawh ani’ a han ti mai chu....
Jenny chu chhuatah a let thla tawp a, thei leh theilovin, ‘Ka nu ka pa, ka pasal duhtak, ka thiam lohna hi a tam lo asin! Rema hian min tibuai tlat a ka duhlo chung, ka theihtawpin ka inveng ve asin! Vawiin chiah kha ka uire asin...chu pawh min pawngsual a....’ a tap hlawp hlawp a, a nu chuan pawnah a pawtchhuak hlawk hlawk a.
- WhatsApp
No comments:
Thanks for your comment.