SP Hovin 'Half Yearly Crime Review Meeting' neih a ni

Kolasib: 17 July 2018:  Superintendent of Police, Kolasib district hnuaia police station hrang hrangte chuan nimin khan SP Office Chamber-ah 'Half Yearly Crime Review Meeting' an nei a, hemia tarlan a nih danin Kolasib district chhunga PS hrang hrangin nikum aiin kuminah thubuai ziahluh an nei tlem zawk. 'Half Yearly Crime Review Meeting,' Abhishek Dhania, IPS kaihhruaiah hian kumin January a\anga June thlenga police-ten case an ziahluh zat chu 174 a tling tawh niin tarlan a ni a, heng atang hian case 132 chu chargesheet siam tawh niin mi 73 convict an ni tawh a, case la chhuilai mek 42 an nei bawk. Thubuai ziahluh hi nikum 2017 Half Yearly Crime Review nena khaikhin chuan case 7 in a tlem a,

chargesheet pawh 8 a tlemin convict rate pawh 5 in a tlem zawk bawk. Hetih lai hian Final Report (case chhuizui tur awm lova tihtawp) erawh 4 in a sang a ni. Report-ah tarlan a nih danin Kolasib district chhunga PS hrang hrang zingah case ziaklut tam ber Kolasib PS chuan case 99 an register a, an hnuaiah hian Kawnpui PS (case 41) awmin Vairengte (case 26) leh Bairabi (case 8) te an awm bawk. Tun June thla liamta bikah chuan Kolasib PS in IPC hnuaiah case 10 an ziaklut leh tawh a, Kawnpuiin case 9, Vairengte in case 3 leh Bairabi PS in case 2 an ziak lut leh tawh bawk.

Thubuai lian tham zingah tualthah case chu nikum kum chanve chhung khan ziahluh a awm loh laiin kuminah pakhat ziahluh a ni tawh a, pawngsual erawh nikumah 2 ziahluh ni mahse kuminah a awm hrih lo thung. Naupang khuaikhem chungchangah nikum kum chanve chhungin thubuai 14 ziahluh a ni a, kumah chuan 12 ziahluh a ni tawh bawk. Half Yearly Crime Review Meeting-ah hian Kolasib SDPO C Lalmalsawma leh Vairengte SDPO Ramtharnghaka hovin PS hrang hranga OC te leh Traffic OC te pawh an tel a, case pending awm mekte um zui dan tur bakah Tripura atanga Tuikuk raltlan laklet tur chungchang pawh sawi ho a ni.

- Kolasib Aw