ZU ZAWRH ZIRCHIANGTUTE REPORT SAWIHO A NI : Hlawkna leh Tawrhna 1:2.85

Aizawl | July 30, 2018: Vawiin khan  MLPC zirchiangtu pawl report atanga workshop chu Conference Hall, Assembly Annexe ah  neih a ni a. Study group Convener Pu Dominic Lalhmangaiha'n keynote address a sawi a, Principal Investigator Dr Laldinliana Varte in MLPC study group report a pe a, sawihona neih a ni.

Study group report ah hian zu zawrh vanga hlawkna hi cheng 1 ni ta se, zu zawrh vanga pawisa sen hi cheng 2.85 ang a chhut a ni. Social cost hi India ram state dang leh ram dangah pawh a sang viau mai a. MLTP hmanga zu khap hunlai pawh khan zu a awm reng tho avang leh, zu in an awm reng tho avangin social cost hi a awm reng a, benefit erawh a beitham hle ang.

 Study Group leh Prof. Vivek Benegal, Centre for De-Addiction Medicine, Dept. of Psychiatry, NIMHANS leh Prof Jyoti Kumar, Dean of SEMIS, MZU te inrawnkhawma chuan a hnuaia thurawn leh rawtnate hi an chhawp chhuak a:

MLPC Study Group hian MLPC Act 2014-in socio-economic lama kan ram a nghawng dan a zirbing a. He Act hman a nih hma lamah zu-in kan nun, a bik takin health lam, a nghawng dan zirchianna fumfe engmah a awm loh avangin he report-a lang zawng zawng hi MLPC nghawng chhuah a tih ngawt theih loh ang. Chu a chhapah, MLPC Act hman a nih atangin kum 2 a liam awrh a ni a, zu tan leh tan lo zawnga thu han keuh tlukna atan he bu chhunga thu awmte hi hman diak diak theih pawh a ni kher lo ang.

Rawtnate chu –

1. Total Prohibition : Zirchianna atangin zu avanga kan hlawkna leh tawrhna hi 1 : 2.85 a nih miau avangin kan tawrhna titlem tura zu khap bur rawt hi thil awm lo tak niin a lang lo. Total Prohibition kalpui a nih dawn erawh chuan sorkar a in commit hle a ngai ang a, kohhran leh NGO te pawhin nasa zawka beihpui an thlak a tul hle bawk ang. Total Prohibition hian rah tha a chhuah rualin dan lova thiltih duhna tam tak a pai tel nasa dawn. Tin, Dan hnuaia zu hralh chhuah a awm dawn loh avangin sorkar-in tax atanga revenue hmuh tur a nei dawn lo a, chung chu ui loh ngam pawh a tul ang.

2. Partial/Controlled Prohibition : A hnuaia thilte hi ngaih pawimawh tel ni se -

a. Health kaihhnawih hi zu that leh that lohna lanna langsar ber a nih avangin helama inzirtirna leh inenkawlna, a ngawl vei mai turte tanpuina leh tal chhuah dan tur inhrilhna lam uar deuh deuh ila. Kum 21 tlin hmaa zu in lote zingah harsatna a tlem bik nia ngaih a nih vangin in thei chin bithliah hi khauh zawka kalpui dan zawn ni se. Rilru lama harsatna awm thei leh chumi nghawng chhuah harsatna sutkian dante pawh vei tel a ngai ang.

b. Rui chunga motor khalh te, khawlaia rui te, hnathawhnaa ruih chingte hi khauh zawka vil ni se, sorkar hnathawk performance appraisal-ah zu avanga harsatna tawkte chanchin ziahna tur thlengin duan ni ta se.

c. Media kaltlanga nasa zawka zu that lohna leh nghawng a neih theihte inzirtirna tih chhuah tam.

d. Supply reduction : Tuna kalpui ang deuh hian sorkar-in Zu zuar thei bik siam zel se. Excise Dept thuam chak deuh deuh a tul ang a, Zu card hi Smart Card-a siam ni thei se. Alcohol content mil zela zu tax tihsan deuh deuh ni se, zu man hi sang deuh far se. Zu leh a kaihhnawih fakna lam reng reng tihchhuah khap bur ni se. Alcohol content tam lo, ‘mizo zu’ chawilar law law te pawh a tha mai thei.

e. NDPS Act hnuaia Drug De-addiction programme kalpui nana sum an dah ang deuh hian Zu atanga chhiah hmuhte hi zu avanga harsatna tawkte tanpuina atana hman theih tura ruahman ni ta se.

f. Zu chungchang zir reng thei tur Study Group din ni se, member-ah pawh zirna leh hnathawhna peng hrang hranga mi thiam bikte ruat thin ni ta se.

3. Free sale : Zu khap bur leh khuahkhirhna hnuaiah eng ruai kan an loh avangin free sale zawnga kalpui te pawh ngaihtuah tel theih tho chu a ni ang.

- MSR