ZUN PHUR THLIFIM

Ziektu : Simeon K Zote

www.tleirawl.in

"Boruok thienghlim chu mihriemin ei mamaw seng annawm ie," tiin ka inkhel met a, tlang bawkah chun ka va thung thawveng a. Ama Pawlsiemlien in 'Di nunnem' ti hla a sak chu ngaithla in suilungruka mi dawn veng vengtu um naw sienkhawm,  'cho ruollo leng tam sienkhawm, suilungrukah mi dawn ve rawh aw' tiin, ka duaisam lanu chu ka ka ngaituonaah ka hei inchengtir veng veng a. Chuonga khawsawt nasan ding em em um lo chu, khuosawt ang deuin ka mitmeng ka hei sukdanglam vel a.

Ka hla ngaithlak chun thlifim a ko am ani ding, nunghak sam inhmi deuhai bawk sam inleng chiei chiei theina tawka na in zantieng thlifim chu a hung hrang hieu hieu a. Beisei lawk khawm ni der lovin, ka hun liem ta hnung thil tamtak laia thil pakhat chu, ka hmaa tar ang hlawlin chieng em emin a hung inlang a.A zawiin ka zawi ta rawng rawng el a ni chu tie.

A ni ngei, kha ni, ama leh hi tlang bawka hun kan hmang lai khan, tuta ang tho hin thlifim a hung hrang a, a bawk sam inleng hieu hieu kara a mitmeng sukmawi zuol tawk char dinga zantieng nisa tlak tawmin a hung sun de sar sar chu ka mitthlaah chieng em emin a hung inlang a. Ka thuok ka lak hawk a, ka hmui pet fan fanin ka mittui chu dang kir ka tum hle.

Chu thlifim chun hmangaina a hung fensa mani ding aw, tiin ka hawi vel ruoi a, a tak hmu ding um silo. Thilsiem thenkhathai hin mihriem lungril le ngaituonahai hi intawmpuiin, chu ngaituona le beiseina hai chu chawk tho dingin a hun taka hin sin an hung thaw hlak a ni hi tie, ka ti hiel el! Kha ni-a thlifim ang char kha vawisun hin iengleia hung hrang nawk amani ding aw,ka nunhluihai kha a mi lo la hrietpui zing a, chu tlangbawk, ka hmangai le kan hun hmangna hlaka ka khat cho a ka um chu ngaingam lovin, mi hnem dingin a hung hrang a ni hi, tiin ka ngaituo ta lem a.

Amiruokchu,mi hnem chu hrillo, ka khawsawtna hung sukzuolin, ka beisei lo mittuiin ka mitah ro a rel mek lem si. Mit inkhap lo leka kan inthlir vawng vawngna hmun le tlanga chun, nunhlui hmangaina a hung fen sa ti hre der lovin, chu thlifim chun ka kawl vela tlangsam hna haia chun ro a rel a.

Hmangaina tak tak leia ka fawp vawng vawng ni khan,hi thlifim hi a neka uorin a hung hrang a.Thatna po po neizotu suilung ka ruolpui ka lungdi le kan inkar mi hrietpui tum ni awm tak mi hung chenchiltu kha a ni la tlata hrietna ka nei a.Chul ta hnung hmangaina chu hung keitho nawk dinga hung tirtu hi an um amani aw,ka ti rum rum el.

Fam silova lunglai inthenna kha hi thlifim hin a lo hriet ve zing a,hmangaina tawp ngai silo,hmangaina kan inchawltir el ta hi pawi a mi lo tipui amani ding, am? Ka hmangai Parte khan, 'ka la hmangai zing che' tia biethu min hlan beiseiin, hi thlifim hi a hungtir amani ding aw. Ka suongtuona le duthusam hai chu ka beiseina lei cho a ni si. Kir thei chang ruol ta lo Parte hlak chu malsawm ri-la-ra chawiin, runpui a rem ta si. A lungdum val tawnah a parmawina inhlanin, ka thliek phal lo rose par chu thliekin a lo um tah a. Chuoilo par ka sawn kha kumtluong par a lo ni lem ie. A chuoi zo tah a, a la vul zing si. Ngai ding um ta lo hin chuoi law law lem sien chu maw, tia duhthu ka sam mel mel lai chun, chu zantieng thlifim zun hung phurtu chun tinzai a mi lo relsan ta zing a.

Tho nawk inpei zinga zal hadam tlawk tlawk tah, Parte Zun chu hung phurin, hmangaina tuipuiah a min chengtir a. Ka nuom ngai lo le ka beisei ngai lo hmangaina mittui chu ka bienga ngei a luong ve ta si. Aw hmangaina, khawlam i um a? In lo hmu am thilsiem tinreng hai, ka hmangai hmangaina kha? Kha hmangaina khan ka kuom a hung tlung ta ngai si nawh a, khawla'm a thamral zo an ta le maw?