The Frontier Despatch:
All-party leh all-NGOs te nena Mizoram ngaihdan kalh ECI thupek sawiho a nih hmain Election Department-in e-roll a telh thar dilna lehkha Form 6 Bru relief camp-ah sem tawh
Election Commission of India thupek zawmin tunkar khan Mamit, Kolasib leh Lunglei-a Election department hotute'n Tripura hmarlama Bru Relief Camp-ah Electoral Roll ennawnna tur Form 6 an sem niin The Frontier Despatch (TFD) chuan thu a dawng.
Form 6 hi first-time voter leh constituency danga pem te tana dilna form siam bik a ni a, Bru relief camp-ah hi chuan a tam zawk chu vote thlak rual ni tawhte'n e-roll-a an hming ziahluh dil nan a nih ber a rinawm.
State sorkar chuan July 12 khan relief camp-a Bru chengte hi repatriation kaltlanga Mizorama an kir hnuah chauh electoral roll-a telh tur an ni tiin thutlukna a lo siam tawh na in, August 1 khan Election Commission of India chuan Home Ministry, Mizoram leh Tripura sorkar aiawhte meeting a neih puinaah ngaihdan dang a nei a.
ECI chuan repatriation process hian tihtur dang leh buaina hrang hrang a thlen ziah avangin e-roll revision chu relief camp-ah kalpui ni se, ERO-te pawhin hun bituk lawk angin endik zo sela, Mizoram final e-roll chu September 27-ah tih chhuah hman ni se tiin thutlukna a siam a, chu chu Mizoram Chief Secretary pawh a hriattir tawh niin TFD chuan thu a dawng bawk.
ECI thupek hi Mizoram sorkar chuan a pawm lo niin a sawi a, vawiina Home Minister R Lalzirliana hova political party leh NGO zawng zawng te hemi chungchang a sawiho puinaah pawh state sorkar dinna chu a la ngai reng tih sorkar hotute'n an sawi a. Political Party leh NGO te pawhin an dinna a ngai reng thu an sawi ve bawk a ni. Meeting-ah hian Election dept lam erawh an tel lo a, form 6 chungchang hi sawichhuah a ni lo bawk.
Hemi chungchanga sorkar thu chhuah chuan, "Mizoram chhungah ngei Bru rawn kir leh duh te tan Summary Electoral Roll Revision leh Vote thlak chu sawrkar dinna leh duhdan a ni [Home Minister-in] ti a. Hemi chungchangah hian Chief Minister Pu Lal Thanhawla pawhin Ministry of Home Affairs(MHA) leh Election Commission of India(ECI) hnenah lehkha thawn tawhin Mizoram mipui leh sawrkar duhdan a thuhmun tih chiang taka ziakin Mizoram chhungah ngei E/Roll Revision leh Vote thlak chu Mizoram sawrkar duhdan a ni tih a thlen tawh tih a sawi a. Chief Secretary leh Principal Secretary, Home te pawn Mizoram tanchhan te theihtawp chhuahin ECI chu vawi 3 lai an sawipui tawh a ti a.
"ECI thutlukna hnuhnungberah chuan Bru pem te tan, Summary E/Roll Revision chu Tripura Relief Camp-ah neih tur tih leh Vote thlak chu Mizoramah tih a ni a. Mizoram sawrkar duhdan ni lo mahse, inthlang ram kan nih angin inthlanna kaihhnawih a thuneitu sang ber ECI thupek anga Mizoram sawrkar chuan hma a lak tak mai a ngai a ni a ti," a ti.
ECI thupek ang hian Form 6 chu tunkar tir lam khan Election dept hnuaia thawk te'n relief camp-ah te an sem tawh a, a dawngtute'n an thehluh leh hun tur leh ERO te'n an endik hun tur erawh tihchian a la ni lo niin TFD chuan thu a dawng tel bawk a.
Repatriation hi August 14 leh September 10 inkara zawhfel tur a nih laiin final e-roll chu September 27-ah tih chhuah tur a ni a. Heng ni bituk sa te inkarah hian chawlhkar hnih chuang hret a awm avangin repatriation zawh hnuah ERO te'n Form 6 lo lut apiangte chu Mizoram chhungah an endik hman thei maithei niin TFD chuan thu a dawng a, hemi chungchangah erawh chuan thutawp a la awm lo thung a ni awm e.
Bru relief camp-a chengte chungchangah hian electoral roll leh vote thlak thu-ah Mizoram sorkar duhdan ni-a lang chu hetiang hi a ni: tarlan tawh angin, e-roll revision hi Mizoram chhungah kalpui ni se tih a ni a. Tin, vote thlak hunah camp-ah kalchilha vote thlak tir ni lo sela, Mizoram chhungah ngei vote thlak se tih a ni bawk.
____
frontierdespatch.in
[ Chibai! I hriat angin The Frontier Despatch (TFD) thuziak tam tak hi ram hnuk khawih leh mipui ngaihven zawng tak tak a ni hlawm a, chuvang chuan tupawhin smartphone-ah emaw, computer-ah emaw awlsam taka an chhiar theihnan online-in kan chhawp chhuak ve a ni. Ama'rawhchu, heng thu te hi hailan a mipui hriata phochhuah nan sum leh tha tam tak kan seng thin a, keini magazine naupang te leh kar khata vawi khat chhuak tan chuan chanchinbute in chawmna ber advertisement hmuh tam a harsa a, kan magazine la tu te hnen atanga subscription fee kan dawn ve te hi kan hna kan kalpui theih chhan a ni. Public-interest, investigative journalism min chawi nun pui turin kan ngen duh che a, I remchan chuan kan magazine, Thawhtanni tin a chhuak hi min subscribe sak ve turin kan ngen a che. Phone-in emaw, WhatsApp-in emaw 9436140055 / 9862573033 ah biak theih reng kan ni a, email-in despatch.weekly@gmail.com ah zawhfiah theih reng a ni bawk e. ]
No comments:
Thanks for your comment.