Lawngtlai
District-a custom hiring centre (CHC) pathuma leilet neitute'n an inhawh chhawk
theih tur Sub Mission on Agricultural Mechanisation (SMAM) atanga pek tractor
leh hmanraw dang chu tukin zingkar khan Lawngtlai District Agriculture
office-ah AH & Vety Minister Pu C. Ngunlianchunga'n CHC kutah a hlan.
Pu
C. Ngunlianchunga chuan khawvel changkang zelah hna thawh nan khawl hman uar
deuh deuh a nih thu sawiin, khawl chuan hna a tiawlsamin a tichak a, thar
chhuah pawh a tipung, a ti a. Sawrkar chuan kut hna thawktute a ngaihsakin, hma
an sawn nan scheme hrang hrang hnuaiah tanpuina a pe chhuak reng a, kut hna
thawktute'n tanpuina dawn ringawt chu duh tawk mai lo va, sawrkar hma lakna
tihlawhtling tura theih tawp an chhuah thin a tul a ni, a ti a. Kut hna
thawktute chu NLUP sem chhunzawm theih loh tur anga thuthang awm mek chu chiai
phah nana hmang lo tura chahin, beneficiary thlan dan kalphung (guidelines) fel
tak a awm a, chu chu Court-ah theh luh a nih hnuah NLUP chu a pangngaiin a kal
leh mai dawn a ni, a ti.
Tractor
hlanna inkhawm hi Lawngtlai District Agriculture Officer (DAO) Pu J. Rokima'n a
kaihruai a. Diltlang Circle bialtu Agriculture Extension Officer (AEO) Pu J.
Sanghlira'n tractor sem a nih dan a sawi a. LADC-a Executive Member Pu C.
Lalneihkhuma leh Chamdur Leilet Society Vice Chairman Pu Krossmawia te pawhin
thu sawiin, AEO Pu Lalbiaknia'n lawm thu a sawi bawk.
SMAM
hnuaia tractor pek hi Bolisora, Chamdur 'P'-I leh Chamdur 'P'-II-a leilet neitu
mi 66 te'n man neia an inhawh chhawk (custom hiring) tur a ni a. Hemi dawng
thei turin hian he'ng khuaa leilet neitute hian farmer group dinin,
inkaihhruaina leh hruaitu fel tak nei thlapin an enkawl chho dawn a ni.
Tukina
hlan tak khawl hi - New Holland tractor 1, 3 ton capacity trailer 1, rotavator
1 leh self-propelled paddy reaper 1 a ni a. A vai hian Rs 11,13,000/- man niin,
sawrkarin Rs 9,50,000/- a tum a. A bak a dawngtute tum tur Rs 1,63,000/- leh a
phurhna senso te chu bialtu MLA Pu C. Ngunlianchunga'n a MLA Fund atangin a
tumsak a ni. Lawngtlai District-ah hian CHC hnuaiah tractor 3 a lo awm tawh sa
a, tuna mi nen hian tractor 4 a awm dawn a ni.
He
hunah hian Pu C. Ngunlianchunga chuan Thingkah veng tan table tennis board 1, a
bat 4 leh ball 6 a pek bakah, College Veng sporting club te chu football goal
net a pe nghal bawk.
- DIPR
No comments:
Thanks for your comment.