MASTER DEGREE PHENAH KA NU, KA CHHUNGTE

B.A ka pass tirh khan engvang nge ka hre lo, M.A ka luh lehna tur ka scho ațangin pawisa tlem kha ka khawl țang țang a, ka thiam vang ni lovin ka pawisa kawl khan tlin beiseina min siamsak tlat mai. Pathian zarah M.A zir ve thei turin ka tling ve hlauh a.

1st August 2016 M.A class țan ni khan ka nunah hian theihnghilh theih tawh loh tur thil min hnutchhiah a ni. Țap chungin ka kal a, a chhan pawh true story based fiction vang khan a ni awm e.  Kha thil kha ka ziah a ni lova, ziak turin ka ti lova, interview hranpa ka nei hek lo, an ziah tawh hnua hre ve chauh ka ni a, Tin ka chanchin hmanga fiction phuah mai a ni. Mahse, tuna mi hi chu keima ziah ngei a ni ta.

B.A ka kal chhung khan ka phak ang tawkin chhungte tihautak lo zawnga khawsak ve ka tum hram hram a, ka hun awl neih ang angah ka pocket money tur tuakin eng eng emaw zuarin ka inhlawh ve hram hram țhin. Țah chang ka nei a, inthlahrunna leh zah chang pawh ka ngah ve țhin khawp mai. Ka chhungten an theih ang tawk leh an phak ang angin a rem remah inhlawh chawp chungin min chawm bawk a. An ei ai kan fee manah an hmang a, an silh leh fen ngaihtuah aiin ka lehkha zir nan tiin an hmang zel a, an thawhrimna leh min hahpuizia zawng zawng kha haider theih a ni ngai lo. Ka sawi tum ber erawh chu kha thil avang khan tumruhna ka ngah phah hlein ka inhria.

Malsawm tlak loh pawh mal sawm țhintu leh rethei leh pachhiate pawh hawisan ngailotu chuan M.A 1st class-ah, 6th Position dinhmun thleng thei turin min hruai a, heng zawng zawng phena awm chu ka chhungte an ni. Ka zirna kawng bikah chuan ka thlen theih chin a tawp min hruai a, hlawhtling chu ka la inti chiah lo, ka zir hah man leh ka chhungte min enkawlna zawng zawng ka rulh let ve theih hunah chuan ka la hlawhtling ve ang. Ka nu leh Pa leh Ka U hi awm lo se ka tun dinhmun hi ka luah thei lovang a, anni beih hram hramna azara mawi ve mai chauh ka ni. Pathian zarah Țahna mittui hi hlimna mittui a la chan chhoh ve theih zel ka beisei. Mite chuan eng ang pawhin min hliamin, min tina mah se, ngawih theihna hian beiseina leh chakna thar min pe a, tumruhna min siamsak zawk țhin a lo ni. Khang thilte avang khan zak tur ka ni lova, Ka phak tawk chinah chuan chhungte tihautak lo zawnga nun hram hram hi ka la tum tlat a ni. 

Tin, ka lehkha zirna kawngah hian keimahin engmah ka tithei lova, ka chhungte thawhrim rah ka tel mai zawk a ni. Ka tih ve erawh thuawihna nena lehkha zir hi a ni mai a, Pathian tel lo chuan engmah ka ni lo bawk a ni, Pathian hian min ensan ngai si lova.

A tawp berah chuan, tun dinhmun mite pawhin an lo tawn fe tawh hnu thleng thei a min hruaitu Pathian chu fakin awm se la, Zangkhua hian bungbut hun a nei țhin tih hi ka chunga a thlen ve hun a la awm ka ring tlat bawk e. Engkim hi Pathian leh ka chhungte min enkawlna vang liau liau a ni a, an chungah pawh tih tak zetin ka lawm a ni.

-          AowpeeHmar Hrangchal