Medical College hmasa ber MIMER hawn a ni ta

Aizawl | August 7, 2018:  Vawiin August 7 khan Chief minister Lal Thanhawla chuan Mizoram-a Medical College hmasa ber Mizoram Institute of Medical Education & Research (MIMER), Falkawn chu a hawng.

 Chief Minister chuan, Mizorama Medical College hmasa ber a ding ta chu mi hrang hrang thawhhona leh tanrualna rah a nih thu sawiin, MIMER hi roreltu sawrkar ta bik a nilo a, Mizo mipui zawng zawng ta a ni, a ti. Hmabak la tam viauin, tunah hian medical college dinhmun chu duh angin la changtlung tawk rihlo mahse India ram a college tha ber siam tura bultanna a ni a ti a; 'Bul tan that hi a chanve zo ang a ni' an tih angin, chumi atan chuan  faculty member-te leh zirlaite an pawimawh tih a sawi a, thahnemngaia theihtawp chhuah zel turin a chah a ni.

Health Minister Pu Lal Thanzara chuan harsatna hrang hrang karah bul tan ni mahse, thawhhona tha tak nena chawl lo a kal zel avangin vawiinah hlawhtlinna  lawm a ni thei ta a ni, a ti.

Finance Minister Pu Lalsawta pawhin thusawiin vawiina thil thleng chu Mizoram hmasawnna mellung theihnghilh ngai tawh loh tur phunna a ni, a ti a. Mizoram tan hlawhtlinna ropui tak a nih thu leh, hriselna kawnga hmasawnna nasa tak a nih thu a sawi a. Hmabak tam tak a la awm tih hriain, chumi atan chuan thawktu leh zirlai bakah mawhphurtu dang zawng zawngte thahnemngai leh tangrual taka thawk zel turin a duhsakna a hlan bawk a ni.

Bialtu MLA Agriculture Minister Pu K.S Thanga, pawhin thusawiin, mahni ramah ngei medical college hawn a ni chu Mizo Chanchina lang reng tawh tur a ni" a ti a. MIMER chhehvela chengte pawimawh thu sawi bawkin, state pawn leh ram pawn amite thiamna zir tura lo kalkhawmna hmun a nih dawn avangin zonun zemawi lo lantir thin turin a chah bawk a ni.

 MIMER hawnna inkhawm hi Chief Secretary Pu Arvind Ray chuan kaihruaiin, state a nih tirhin hriselna lamah inenkawlna nei tha lo hle mahse Mizoram chuan tunah hriselna lamah nasa taka hmasawnin Medical College a din thei ta hial chu hlawhtlinna ropui tak a ni a ti a, Mizo thalai doctor leh medical thiamna zirchhuak ten an thiamna chu Mizoram tan hmangtangkai zui zel se a duh thu a sawi a ni.

Mizoram sawrkar chuan state chhunga Medical College a neih ve theih nan August ni 29, 2014 khan Ministry of Health & Family Welfare-ah dilna a thehlut a. MCI chuan 2017 January ni 5 leh ni 6 khan inspection hmasa ber rawn neiin, objection engemawzah an nei a. Dilna hi thehluh nawn leh thin niin, MIMER hi phalna pek a nih hma in Medical Council of India (MCI) chuan enfiahna, Inspection Visit neiin an lo kal thin a. MCI in enfiahna an neih hnuhnun ber chu kumin April ni 4 kha niin, Ministry of Health and Family Welfare hnenah MIMER tan Letter of Permission pe turin May ni 15 khan rawtna an thlen a. MoHFW chuan MIMER-a MBBS zirlai 100 tan phalna, Letter of Permission (LoP) chu academic session 2018-19 atan May ni 25 khan a pe ta a ni. July thla atang khan NEET UG Exams 2018 kaltlangin admission tih tan a ni a; Seat allotment hi Mizoram sawrkar hnuaia H&TE Department in kalpuiin, zaa 15 chu NRI tana dah in, zaa 15 dang leh chu Central Pool atan dah a ni a, a bak zawng zaa 70 chu state quota a ni. Tunah hian zirlai in admit mi 62 state quota hnuaiah an awm tawh a, NRI quota ah mi 11 in admit tawh bawkin, Central Quota atangin mi 6 an in admit tawh bawk a ni. MiMER a zir tur in admit theih hun hnuhnung ber chu tun thla ni 30 a ni.

- with inputs from DIPR