DGP Balaji Srivastava chuan, Mizoram chhungah dan loa hnam dang an luh Mizoram Police-te'n an phal dawn loh thu a sawi a, "Dan loa lo luh tumte dang turin theihtawp kan chhuah zel ang," a ti.
Vanglaini palai zawhna chhangin DGP chuan, Assam sorkarin National Register of Citizens (NRC) draft list a tihchhuah hnuah ramrî-ah khauh zawka venhimna kalpui a nih thu a sawi a, "Ramri hrûla police duty-te leh CID-te chu dan loa hnam dang an lo luh lohna atan ngawrh lehzuala duty tura hriattir nghal an ni," a ti a; NRC draft bill tihchhuah hnuah Assam aṭanga dan loa Mizorama lut an awm lohna atan hma an lak nghal thu a sawi.
Balaji Srivastava chuan, Mizoramah hnam dangte chu inner line permit (ILP) tel loa an rawn luh phal a nih loh thu sawiin, "Check gate-te pawh thuam ṭhat a ni dawn. August 6-7 hian district tina SP-te meeting ka neihpui dawn a, dan loa hnam dang Mizorama an lo luh loh chungchang hi kan thu ngaihtuah tur pawimawh berte zinga mi a ni. Dan loin Mizoramah tumah an lo luh kan phal lo a, kan phal tur a ni lo," a ti.
Assam sorkarin NRC draft list a tihchhuahah Assam state chhunga chêng mek mi nuai 40 chuang chu an hming telh a ni lo a, hei vang hian Assam nena inri state-te chuan Assam aṭanga dan loa an state chhunga lut an awm lohna atan ramri venhim hna ngawrh lehzualin an kalpui mek a ni.
- Vanglaini
No comments:
Thanks for your comment.