Aizawl |August 16, 2018: Mizoram School of Photography chuan vawiin khan Vanapa Hall Upper Lobby, Aizawl-ah ni thum chhung awh tur World Photography Day pual Photo Exhibition, Sales & Contest vawi 2-na an buatsaih.
He hun hi Mizoram Journalists' Association President Pu Zonunsanga Khiangte chuan khuallian niin a hmanpui a, a hawng.
Khuallian Pu Zonunsanga Khiangte chuan, "Photography leh Journalism hi a inzawm tlat a. Thlalak pakhatin hian news tam tak hrilin thu tam tak a sawi a, Document a tlingin history dahṭhatna ṭha tak niin, thu leh hla tam a kengin a sawi a ni," a ti a.
Mizo ṭhalaite thlalak lama hma an sawn theihna tura hma latu Pu Malsawmtluanga Vangchhia a fak thu a sawi bawk.
Pu Malsawmtluanga Vangchhia chuan, "Mizoram School of Photography hi Photography hlutna leh thlalak lama tui ṭhalaiten eizawnna tlaka an hman theihna beiseia din a ni," a ti.
Inrinni hian a kharna hun an hmang dawn a. He hunah hian thlalak phochhuah te aṭangin lawmmna sem a ni ang.
Judge atan Pi Lalhmingmawii, leh Pu H Lalchhanhima te an sawm a ni.
Tin, MSP hian December 5 -8, 2018 hian Open Photo Exhibition an buatsaih dawn a ni.
________
No comments:
Thanks for your comment.