AIZAWL-AH I.L.P LEH N.R.C NEILO THAHNEM TAK MAN AN NI

Aizawl | August 17, 2018: Vawiin 17 August, 2018(Zirtawpni) khan MZP bultumin Aizawl khawpui  leh Mizoram chhung hmun hrang hrangah hnamdang dan lova khawsa Inner Line Permit neilo, Assam National Register of Citizens(NRC) a chuang lo leh permit nei lova sumdawngte dapchhuah hnatlang neih a ni a, ILP nei lo, Assam National Register of Citizens(NRC) a chuang lo, dan lova Mizo hming hawh a sumdawng thahnem tak hmuhchhuah niin thuneitute kutah hlan nghal an ni.

Sorkar leh thuneitute pawhin theih tawp chhuah a hma an lak mek lai a, Ni khat hnatlanna a hnamdang permit neilo a khawsa, Assam National Register of Citizens(NRC) a chuang lo leh dan lova sumdawng thahnem tak manchhuah tur an awm hi MZP chuan pawi a ti hle a, heng hnamdang dan lova khawsa te hi permit neilo bakah anmahni leh anmahni lo in sponsor te leh hnamdang vekin an lo sponsor te an ni hlawm a ni.

MZP chuan India danpuiin a bik taka min humhalhna dan Inner Line Permit(ILP) hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute a ngen nawn leh a ni. Kan thenawm state Assam sorkar chuan an state chhunga foreigner te thawnhaw an nih theih nan National Register of Citizens(NRC) an kalpui mek a, Assam sorkarin final draft list a tih chhuah a chuan NRC a chuang lo nuai 40 chuang an awm a, heng foreigner te hian Assam chhuahsan in an state thenawm ah an tlan chhe khawm mek a, Megalaya, Tripura, Arunachal Pradesh, Manipur leh Mizoram ah te an tlan chhe hlawm ni a hriat a ni a, Mizoram ah pawh thahnem tak an lo lut ve ngei ni a hriat a ni. MZP chuan kan sorkar thuneitute chu Inner Liner Permit(ILP) pawh NRC a chuang lo chu tun hnuah pe chhuak tawh lo turin a ngen nawn leh a.

Tin, Mizoram chhunga Veng/Khua Local Council/Villege Council thuneitu zawng zawng te hnamdang ILP issue chungchangah document felfai lo chu hriatpuina lehkha lo pechhuak lo turin kan ngen bawk a ni. Dan lova hnamdang khawsa te dapchhuah hnatlangah hian MZP hruaitute bakah College hrang hrang Students Union(SU) Leader te leh Hnampual Zirlai Pawl hrang hrang hruaitu mi thahnem tak an thawkchhuak a ni.

 Tin, MZP chuan hnamdang dan lova khawsa a hmuhchhuah te chinchang chu ngun takin a enzui dawn a, thawn kir (push back) an nih dan pawh MZP chuan Vairengte thleng a umzui dawn a ni. MZP chuan Mizoram chhung a dan lova hnamdang sumdawng te dapchhuakin a tul angin hma a la zel dawn a, hnamdang dan lo a Sumdawng te dapchhuah kawngah hian MZP chuan Mizo mipuite thlawpna a ngen a ni.